Lujia Chonjisan Gouxioxi 2

Ersani Mechide Uzheghazho

22 Musani shu jiere kieliesan waghaku udu kurudene Mereiyen Yusufughala Yelusalen chenshide kewonne Hudade khughozhi echighawo. 23 Ezhanni guijinshu jiere huaizho, "Laoda kewonlani man zhiguishighazhi Hudade ogi." 24 Pse Ezhanni guijinshu jiere huaizhi ghua yegu onu, ghua ga ghoghochen ogi giezho. Hhela ingiezhi giewo.

Ximien Kieliesan

25 Yelusalende nie kunni niereini Ximien giene. Hheshi nie gou kun wo, jiomun jiereye chighara wo, chanqi Isilie kunni jiuise giezhi panjizho. Hhende Shenlin duruzho. 26 Duya ijieku melieshida kenjin Ezhan kieliesan Mexihani uzhene giezhi Shenlin mejieghawo. 27 Shenlin hhei uduruzhi mechide ireghawo. Ersai ana adani zhao guijinni yoqiu mutun shiqin banjile irekude 28 Ximien kewonni qiorudene Hudai nierei fugiedaghazhi doulawo,

29 "Ezhan, chi yenjisan kielien mutun

ede hojii duyase pinnan andaghazho.

30 Chi jiuikuni bi qinsi uzhewo.

31 Eneshi chi olon minzulade zhunbei giesan wo.

32 Niman kunlade Hudai mejieghaku gon wo.

Goya bexin Isilie kunni minshen wo."

33 Ada anani hhe kewonde kieliesei chenliedene ghanirawo. 34 Ximien hhelade oluzhi onxian giedene kewonni ana Mereiyende kieliewo, "Isilie kunlai dunda ezighan kunla ene kewonni bayasuzhi jienliene, ezighan kunla fandui giene. Kunla hhei sugienduzhi duitou gholune. 35 Kunla zhughedene yan sumulakuni hhe man mejieghane. Chii zhugheye khudoghoghala chujiku mutun gholune."

Yana Kieliesan

36 Pse hhende nie bierei xienzhi wine. Niereini Yana giene, Yasheni jiawuni Faneilini oqin wo, hende oqioluwo. Dafalasenu 7 nien soudene 37 guafu feiliezhi 84 nien niezheghan souzho*2:37 Hhe ijin 84 oluwo. . Hhe mechise likai ulie giedene xieni udu orozo bareizhi onxian giedene Hudai shunjizho. 38 Hhela jian kielien kielieku shihoude Yana hhelani yo penjidene Hudade mafan giezhi Yelusalenyi jiuise giezhi sagheichen kunlade Ersani shiqinyi kieliewo.