Jianlaiku Fama
18 Bi uzhese edeku shouku gieku jianlai matande ireku famaghala bilazhi ulie olune. 19 Zhayaghasanla jirezhi Hudai kesila xienjizhi khizhekuni panjizho. 20 Zhayaghasanla yama oronde widawo. Hhela imutui gholukushi goya duranghalane pusho, Huda ingiezhi gieghawo. 21 Hhela qida olusande hoji danlakuse andadene Hudai kesilani famatu ziyuni jienliekui panjizho. 22 Zhayaghasanla man hhantu shonholozhi tendun shouizhi eli kusanyi matan mejiene. 23 Zinie zhayaghasanla pusho, Shenlinshi toushu alima wo giezhi jienliesan matanye zhughedene shonholozhi Hudai kewosi danlaku, pse mai beyei jiuizhi shuikui panjizho. 24 Onxianghala matanyi jiuiwo. Chujieghekui onxian giese onxian pusho. Chujieghekui kien onxian giene? 25 Matan chujieghe dakune onxian giese rennai giezhi panjikuni wo.
26 Niekielien wo, Shenlinye matan zholierekude banman giene. Matan indan matugie onxian giekui ulie mejienema, Shenlin hende nango giezhi qinsi matande xiahua giene. 27 Kunni zhughei uzhechen Huda Shenlinyi sumulakui mejiene. Shenlin zhao Hudai isighala shentulade oluzhi xiahua giezho.