1 Coríntios 14

ಆತ್ಮ್ಯಾಚ್ಯಾ ಅನಿ ಜಾಸ್ತಿಚ್ಯಾ ವರಾಂಚ್ಯಾ ವಿಶಯಾತ್

1 ಪ್ರೆಮಾಚ್ಯಾ ಸಾರ್ಕೆ ಚಲಾ , ಆತ್ಮಿಕ್ ವರು, ಲೈ ಕರುನ್ ಪ್ರವಾದ್ ಕರ್ತಲೆ ವರು ಜೊಡುನ್ ಘೆವ್ಕ್ ತುಮಿ ಆಶಾ ಕರಾ. 2 ಕಶ್ಯಾಕ್ ಮಟ್ಲ್ಯಾರ್ ದುಸ್ರ್ಯಾ, ದುಸ್ರ್ಯಾ ಬಾಶಾನಿ ಬೊಲ್ತಾ ತೊ ದೆವಾಕ್ಡೆ ಬೊಲ್ತಾ ಸಿವಾಯ್ ಮಾನ್ಸಾಕ್ಡೆ ಬೊಲಿನಾ; ಆತ್ಮ್ಯಾಚ್ಯಾ ವೈನಾ ಪ್ರೆರಿತ್ ಹೊವ್ನ್ ಘುಟಾನ್ ಹೊತ್ತಿ ಸಂಗ್ತಿಯಾ ತೊ ಬೊಲ್ತಾ, ಜಾಲ್ಯಾರ್ಬಿ ತೊ ಬೊಲ್ತಾ ತೆ ಕೊನಾಕ್ಬಿ ಕಳಿನಾ. 3 ಖರೆ ಪ್ರವಾದ್ ಕರುನ್ ಬೊಲ್ತಾ ತೊ ಮಾನ್ಸಾಂಚ್ಯಾ ಕಡೆ ಬೊಲ್ತಾ; ತೊ ತೆಂಕಾ ಧನಿಯಾತ್ ವಾಡುಸಾಟ್ನಿ ಪ್ರವಾದ್, ಉಮ್ಮೆದ್ ಅನಿ ಸಮಾಧಾನ್ ಸಾಂಗ್ತಾ. 4 ದುಸ್ರ್ಯಾ, ದುಸ್ರ್ಯಾ ಬಾಶಾನ್ ಬೊಲ್ತಾ ತೊ ಅಪ್ನಾಕುಚ್ ಪ್ರಚಾರ್ ಕರ್‍ತಾ; ಖರೆ ಪ್ರವಾದ್ ಕರುನ್ ಬೊಲ್ತಾ ತೊ ಸಗ್ಳ್ಯಾ ದೆವಾಚ್ಯಾ ಲೊಕಾಂಚ್ಯಾ ತಾಂಡ್ಯಾಕ್ ವಾಡ್ವುಕ್ ಮಜತ್ ಕರ್‍ತಾ.

5 ತುಮಿ ಸಗ್ಳ್ಯಾನಿಬಿ ವಿಚಿತ್ರ್ ಬಾಶಾನಿ ಬೊಲ್ಲ್ಯಾರ್‌ಬಿ ಮಾಕಾ ಲೈ ಖುಶಿ; ಜಾಲ್ಯಾರ್ಬಿ ತ್ಯಾ ಲೊಕಾಕ್ನಿ ಜಾಸ್ತಿ ತುಮಿ ಪ್ರವಾದ್ ಕರುನ್ ಬೊಲುಚೆ ಮನ್ತಲಿ ಮಾಜಿ ಆಶಾ. ಕಶ್ಯಾಕ್ ಮಟ್ಲ್ಯಾರ್ ಪ್ರವಾದ್ ಕರುನ್ ಬೊಲ್ತಾ ತೊ ವಿಚಿತ್ರ್ ಬಾಶಾತ್ನಿ ಬೊಲ್ತಲ್ಯಾಚ್ಯಾನ್ಕಿ ಕವ್ಡೆಕಿ ಬರೊ, ಖರೆ ವಿಚಿತ್ರ್ ಬಾಶಾನ್ ಬೊಲ್ತಾ ತೊ ಅಪ್ನಿ ಬೊಲಲ್ಯಾಚೊ ಅರ್ಥ್ ಸಾಂಗುನ್ ಸಗ್ಳ್ಯಾ ದೆವಾಚ್ಯಾ ಲೊಕಾಂಚ್ಯಾ ತಾಂಡ್ಯಾಕ್ ಪ್ರಚಾರ್ ಕರ್‍ತಾ ಹೊಲ್ಯಾರ್, ತೊ ಬಿ ಉತ್ತಮ್ ಬರೊ ಮನುನ್ ಹೊತಾ. 6 ಅಶೆ ರ್‍ಹಾತಾನಾ ಭಾವಾನು ಅನಿ ಭೆನಿಯಾನು, ಮಿಯಾ ದೆವಾಕ್ನಾ ಯೆಲ್ಲಿ ದಾಕ್ವನ್ ನಾಹೊಲ್ಯಾರ್ ಉಲ್ಲೆ ಶಾನೆಪಾನ್ ನಾಹೊಲ್ಯಾರ್ ಪ್ರೆರನಾನ್ ಭರಲ್ಲಿ ಬಾತ್ಮಿ, ನಾಹೊಲ್ಯಾರ್ ಉಲ್ಲಿ ಶಿಕಾಪಾ ಹಾನ್ತಲೆ ಸೊಡುನ್, ವಿಚಿತ್ರ್ ಬಾಶಾತ್ನಿ ಬೊಲುನ್ಗೆತ್ ತುಮ್ಚೆ ಮದ್ದಿ ಯೆಲ್ಯಾರ್, ಮಾಜ್ಯಾನ್ ತುಮ್ಕಾ ಕಾಯ್ ಫಾಯ್ದೊ ಹೊಯ್ ಹೊತ್ತೊ?

7 ಪೊಂವೊ ನಾ ಹೊಲ್ಯಾರ್ ತಂತಿಚೆ ಎಕ್ ವಾಜಾಪ್ ಅಸ್ಲ್ಯಾ ಜಿವ್ ನಸಲ್ಲ್ಯಾ ವಾಜ್ಪಾನಿ ನಾದ್ ದಿ ನಸ್ಲ್ಯಾರ್, ವಾಜ್ತಲೆ ಕಾಯ್ ಮನುನ್ ಕೊನಾಕ್ಬಿ ಕಶೆ ಕಳ್ತಾ? 8 ತಸೆಚ್ ಎಕ್ ಮೊಟೊ ಪೊಂವೊ ಆಯ್ಕುಕ್ ನಸ್ಲ್ಯಾರ್, ಕೊನ್ ಮಾರಾಮಾರಿಕ್ ತಯಾರ್ ಹೊವ್ಕ್ ಹೊತಾ? 9 ತುಮ್ಚ್ಯಾಬಿ ವಿಶಯಾತ್ ಅಸೆಚ್, ತುಮಿ ವಿಚಿತ್ರ್ ಬಾಶಾನಿ ಬೊಲ್ತಲೆ, ಬರೆ ಅರ್ಥ್ ಹೊತಾ ತಸೆ ತುಮಿ ಉಚ್ಚಾರ್ ಕರಿನಸ್ಲ್ಯಾರ್, ತುಮಿ ಸಾಂಗಲ್ಲೆ ಕೊನಾಕ್ ಅರ್ಥ್ ಹೊತಾ? ತುಮ್ಚ್ಯಾ ಗೊಸ್ಟಿಯಾ ವಾರ್‍ಯಾರ್ ಹುಡುನ್ ಜಾತಾತ್! 10 ಜಗಾತ್ ಕವ್ಡ್ಯಾಕಿ ಥರಾಚಿ ಬಾಶಾ ಹಾತ್, ತ್ಯಾತುರ್ಲ್ಯಾ ಎಕ್ ಬಾಶೆಕ್‌ಬಿ ಅರ್ಥ್ ನಾ ಮನುನ್ ಕಾಯ್ ನಾ. 11 ಖರೆ ಬಾಶೆಚೊ ಅರ್ತ್ ಮಾಕಾ ಗೊತ್ತ್ ನಸ್ಲ್ಯಾರ್, ಮಾಜೆಕ್ಡೆ ಬೊಲ್ತಲ್ಯಾಕ್ ಮಿಯಾ ಎಕ್ ವಳಕ್ ನಸಲ್ಲೊ ಸಾರ್ಕೆ ಹೊತಾ, ಅನಿ ತೊ ಬಿ ಮಾಕಾ ವಳಕ್ ನಸಲ್ಲೊ ಹೊತಾ. 12 ತಸೆಚ್ ತುಮಿಬಿ ಆತ್ಮಿಕ್ ವರಾ ಕಮ್ವುನ್ ಘೆವ್ಚೆ ಮನುನ್ ಹಾಸಿ. ತಸೆ ಮನುನ್ ದೆವಾಚ್ಯಾ ಲೊಕಾಂಚ್ಯಾ ವಾಡಾವಳಿಕ್ ಗರಜ್ ಪಡ್ತಲಿ ವರಾ ಜಾಸ್ತಿಚ್ಯಾ ಮಾಪಾನ್ ಜೊಡುನ್ ಘೆವ್ಕ್ ಕಸ್ರತ್ ಕರಾ.

13 ತಸೆ ಮನುನ್, ವಿಚಿತ್ರ್ ಬಾಶಾನಿ ಬೊಲ್ತಲೊ, ತ್ಯಾ ಬಾಶಾಂಚೊ ಅರ್ಥ್ ಸಾಂಗ್ತಲೊ ವರುಬಿ ಅಪ್ನಾಕ್ ಗಾವುಂದಿತ್ ಮನುನ್ ಮಾಗ್ನೆ ಕರುಂದಿತ್. 14 ಕಶ್ಯಾಕ್ ಮಟ್ಲ್ಯಾರ್ ವಿಚಿತ್ರ್ ಬಾಶಾನಿ ಮಿಯಾ ಮಾಗ್ನೆ ಕರ್‍ತಾನಾ, ಮಾಜೊ ಆತ್ಮೊ ಎವ್ಡೊಚ್ ಮಾಗ್ನೆ ಕರ್‍ತಾ ಶಿವಾಯ್ ಮಾಜ್ಯಾ ಮನಾಕ್ ತ್ಯಾತುರ್ ಭಾಗ್ ರ್‍ಹಾಯ್ನಾ. 15 ತಸೆ ಹೊಲ್ಯಾರ್ ಮಿಯಾ ಕಾಯ್ ಕರು? ಮಿಯಾ ಮಾಜ್ಯಾ ಆತ್ಮ್ಯಾನ್ ಮಾಗ್ನೆ ಕರ್‍ತಾ ಅನಿ ಮಾಜ್ಯಾ ಸಮ್ಜನಿನ್‍ಬಿ ಮಾಗ್ನೆ ಕರ್‍ತಾ, ಮಾಜ್ಯಾ ಆತ್ಮ್ಯಾನ್ ಮಿಯಾ ಗಿತ್ ಗಾವ್ತಾ, ಮನಾನ್‍ಬಿ ಗಿತ್ ಗಾವ್ತಾ. 16 ದೆವಾಚಿ ಧನ್ಯವಾದ್ ಸುತ್ತಿ ಆತ್ಮ್ಯಾನ್ ಎವ್ಡೆಚ್ ಕರ್ತೆಯ್ ಹೊಲ್ಯಾರ್ ದೆವಾಚ್ಯಾ ಲೊಕಾಂಚ್ಯಾ ತಾಂಡ್ಯಾತ್ ಹೊತ್ತ್ಯಾ ವರು ನಸ್ತಾನಾ ಹೊತ್ತ್ಯಾ ಮಾನ್ಸಾನ್ ತುಜ್ಯಾ ಧನ್ಯವಾದ್ ಸುತ್ತಿಕ್ ಆಮೆನ್ ಮನುನ್ ಕಶೆ ಮನ್ತಲೆ? ಕಶ್ಯಾಕ್ ಮಟ್ಲ್ಯಾರ್ ತಿಯಾ ಬೊಲ್ತಲೆ ತೆಕಾ ಕಾಯ್ಬಿ ಕಳಿನಾ, 17 ತಿಯಾ ಕರ್‍ತಲೆ ಧನ್ಯವಾದ್ ಸ್ತುತಿಚಿ ಮಾಗ್ನೆ ಥೈ ಬರಿ ಹೊಲೆ ಖರೆ ತಿ ಅನಿ ಎಕಾಮೆಕಾಚ್ಯಾ ಫಾಯ್ದ್ಯಾಕ್ ಪಡಿನಾ.

18 ತುಮಿ ಬೊಲ್ತಾಶಿ ತೆಜ್ಯಾನ್ಕಿ ಜಾಸ್ತಿಚ್ಯಾ ಬಾಶಾ ಮಾಕಾ ಯೆತ್ಯಾತ್ ತೆಚೆಸಾಟ್ನಿ ದೆವಾಕ್ ಮಿಯಾ ಧನ್ಯವಾದ್ ದಿತಾ. 19 ಜಾಲ್ಯಾರ್ಬಿ ದೆವಾಚ್ಯಾ ಲೊಕಾಂಚ್ಯಾ ತಾಂಡ್ಯಾಕ್ ವಿಚಿತ್ರ್ ಭಾಶಾಚಿ ಧಾ ಹಜಾರ್ ಶಬ್ದಾ ಉಪಯೊಗ್ ಕರ್‍ತಲ್ಯಾಚ್ಯಾನ್ಕಿ, ದುಶ್ರ್ಯಾಕ್ನಿ ಶಿಕ್ವುಕ್ ಪಾಯ್ದ್ಯಾಕ್ ಪಡ್ತಾ ತಿ ಪಾಚ್ ಶಬ್ದಾ ಬೊಲುಕ್ ಮಾಕಾ ಲೈ ಖುಶಿ.

20 ಭಾವಾನು ಅನಿ ಭೆನಿಯಾನು, ಪೊರಾಂಚ್ಯಾ ಬುದ್ದಿಚೆ ಹೊವ್ನಕಾಸಿ,ಬುರ್ಶಾಪಾನಾಚ್ಯಾ ವಿಶಯಾತ್ ವಾಡಲ್ಲ್ಯಾ ಪೊರಾಂಚ್ಯಾ ಸಾರ್ಕೆ ಚಿಂತ್ತಲೆ ಹೊವಾ. 21 ಪವಿತ್ರ್ ಖಾಯ್ದ್ಯಾಚ್ಯಾ ಪುಸ್ತಕಾತ್ ಲಿವಲ್ಲೆ ಹಾಯ್,

"ದುಸ್ರ್ಯಾ ಬಾಶಾತ್ನಿ ಬೊಲ್ತಲ್ಯಾ ಲೊಕಾಂಚ್ಯಾ

ಹೊಟ್ಟಾನಿ ಮಿಯಾ ಹ್ಯಾ ಲೊಕಾಂಚ್ಯಾಕ್ಡೆ ಬೊಲ್ತಾ;

ಜಾಲ್ಯಾರ್ಬಿ ತೆನಿ ಮಾಕಾ ಆಯ್ಕಿನಾತ್." ಮನ್ತಾ ಧನಿ.

22 ತಸೆ ಮನುನ್ ವಿಚಿತ್ರ್ ಭಾಶಾ ಬೊಲ್ತಲೆ ವಿಶ್ವಾಸಾತ್‍ ನಸಲ್ಯಾಕ್ನಿ ಎಕ್ ಸಾಕ್ಷಿ ಸಿವಾಯ್, ವಿಶ್ವಾಸಾತ್ ಹೊತ್ತ್ಯಾಕ್ನಿ ನ್ಹಯ್, ತಸೆಚ್, ದೆವಾಚಿ ಬಾತ್ಮಿ ಸಾಂಗ್ತಲೆ ವಿಶ್ವಾಸಾತ್ ಹೊತ್ತ್ಯಾಕ್ನಿ ಎಕ್ ಸಾಕ್ಷಿ, ವಿಶ್ವಾಸಾತ್ ನತ್ತ್ಯಾಕ್ನಿ ನ್ಹಯ್.

23 ಅಶೆ ರ್‍ಹಾತಾನಾ ಸಗ್ಳೊ ದೆವಾಚ್ಯಾ ಲೊಕಾಂಚೊ ತಾಂಡೊ ಗೊಳಾ ಹೊಲ್ಲ್ಯಾಕ್ಡೆ ಸಗ್ಳೆಬಿ ವಿಚಿತ್ರ್ ಬಾಶಾನಿ ಬೊಲುನ್ ಹಾತ್ ಮನುನ್ ಚಿಂತುವಾ, ಹ್ಯಾ ಎಳಾರ್ ಕೊನ್‍ಬಿ ಎಕ್ಲೊ ಸಾದೊ ಮಾನುಸ್ ನಾ ಹೊಲ್ಯಾರ್ ವಿಶ್ವಾಸಾತ್ ನಸಲ್ಲೊ ಮಾನುಸ್ ಥೈ ಯೆಲ್ಯಾರ್ ತೊ ತುಮ್ಕಾ ಪಿಶೆ ಲಾಗ್ಲಾ ಮನಿನಸ್ತಾನಾ ರ್‍ಹಾಯ್ಲ್ ಕಾಯ್? 24 ಖರೆ ಸಗ್ಳೆ ಜಾನಾಬಿ ಪ್ರವಾದ್ ಕರುನ್ ಬೊಲುನ್ಗೆತ್ ರ್‍ಹಾತಾನಾ, ಕೊನ್‍ಬಿ ಎಕ್ಲೊ ವಿಶ್ವಾಸಾತ್ ನತ್ತೊ ನಾ ಹೊಲ್ಯಾರ್ ಸಾದೊ ಮಾನುಸ್ ಭುತ್ತುರ್ ಯೆಲ್ಯಾರ್ ತೊ ತೆಂಚ್ಯಾ ಬೊಲ್ನ್ಯಾ ವೈನಾ ಅಪ್ನಿ ಪಾಪಿ ಮನುನ್ ವಳ್ಕುನ್ ಘೆವ್ನ್ ಅಪ್ನಾಚಿಚ್ ಇಚಾರ್ನಿ ಕರುಕ್ ಪಾವ್ತಾ. 25 ತೆಚ್ಯಾ ಭುತ್ತುರ್‍ಲ್ಯಾ ಮನಾತ್ಲೆ ಘುಟ್ ದಿಸುನ್ ಯೆತಾ ತನ್ನಾ ತೊ ಡಬ್ಬ್ ಪಡುನ್ ದೆವಾಕ್ ಆರಾದನ್ ಕರ್‍ತಾ "ದೆವ್ ಖರೆಚ್ ತುಮ್ಚ್ಯಾ ಮದ್ದಿ ಹಾಯ್!" ಮನುನ್ ಪ್ರಚಾರ್ ಕರ್‍ತಾ.

ದೆವಾಚ್ಯಾ ಲೊಕಾಂಚ್ಯಾ ತಾಂಡ್ಯಾಕ್ ಹುಕುಮ್

26 ತಸೆ ಹೊಲ್ಯಾರ್ ಭಾವಾನು ಅನಿ ಭೆನಿಯಾನು, ಅತ್ತಾ ಕಾಯ್ ಸಾಂಗು? ತುಮಿ ಎಕಾಕ್ಡೆ ಗೊಳಾ ಹೊಲ್ಲ್ಯಾ ತನ್ನಾ, ಎಕ್ಲ್ಯಾನ್ ಎಕ್ ಗಿತ್ ಗಾವುಕ್‍ ಹೊತಾ ನಾ ಹೊಲ್ಯಾರ್ ಶಿಕಾಪ್ ದಿವ್ಕ್ ಹೊತಾ, ಎಕ್ ಕಾಯ್‍ತರ್ ಸೊಡ್ಸುನ್ ಸಾಂಗುಕ್ ಹೊತಾ, ನಾ ಹೊಲ್ಯಾರ್ ವಿಚಿತ್ರ್ ಬಾಶೆತ್ ಬೊಲುಕ್ ಹೊತಾ, ನಾ ಹೊಲ್ಯಾರ್ ವಿಚಿತ್ರ್ ಬಾಶೆಚೊ ಅರ್ಥ್ ಸಾಂಗುಕ್ ಹೊತಾ, ಖರೆ ಹೆ ಸಗ್ಳೆ ದೆವಾಚ್ಯಾ ಲೊಕಾಂಚ್ಯಾ ತಾಂಡ್ಯಾಚ್ಯಾ ವಾಡಾವಳಿಸಾಟ್ನಿ ಕರುಕ್ ಬಗಾ. 27 ಕೊನ್‍ಬಿ ವಿಚಿತ್ರ್ ಬಾಶಾನಿ ಬೊಲುಕ್ ಬಗ್ತಾ ಜಾಲ್ಯಾರ್ ದೊಗಾ ನಾ ಹೊಲ್ಯಾರ್ ಲೈ ಲೈ ಮಟ್ಲ್ಯಾರ್ ತಿಗ್ ಜಾನಾ ಬೊಲುಂದಿತ್; ತೆಬಿ ಪಾಳಿ ಲಾವ್ನ್ ಅನಿ ದುಸ್ರೊ ಎಕ್ಲೊ ತೆಚೊ ಅರ್ಥ್ ಸಾಂಗುಂದಿತ್. 28 ಖರೆ ಅರ್ಥ್ ಸಾಂಗ್ತಲೊ ನಸ್ಲ್ಯಾರ್ ವಿಚಿತ್ರ್ ಬಾಶಾಂಚೆ ವರು ಹೊತ್ತೊ ದೆವಾಚ್ಯಾ ಲೊಕಾಂಚ್ಯಾ ತಾಂಡ್ಯಾತ್ ಗಪ್ಪ್ ರ್‍ಹಾವ್ಚೊ. ಅಪ್ನಾಚ್ಯಾ ಎವ್ಡ್ಯಾಕ್ ನಾ ಹೊಲ್ಯಾರ್ ದೆವಾಕ್ಡೆ ಜಾಲ್ಯಾರ್ ತೆನಿ ಬೊಲುಕ್ ಹೊತಾ. 29 ಪ್ರವಾದ್ ಕರುನ್ ಬೊಲ್ತಲೆ ರ್‍ಹಾಲ್ಯಾರ್, ದೊಗಾ ನಾ ಹೊಲ್ಯಾರ್ ತಿಗಾ ರ್‍ಹಾಂವ್ದಿತ್ ಅನಿ ಹುರಲ್ಲೆ ತೆನಿ ಸಾಂಗಲ್ಲೆ ತಪಾಸುನ್ ಬಗುಂದಿತ್. 30 ಖರೆ ಬಸುನ್ ಹೊತ್ತ್ಯಾಂಚ್ಯಾ ಭುತ್ತುರ್‍ಲ್ಯಾ ಎಕ್ಲ್ಯಾಕ್ ಕಾಯ್ಬಿ ದಿಸುನ್ ಯೆಲ್ಯಾರ್, ಬೊಲುನ್ಗೆತ್ ಹೊತ್ತೊ ಗಪ್ ರಾಂವ್ದಿತ್. 31 ತುಮಿ ಸಗ್ಳೆ ಜಾನಾಬಿ ಪ್ರವಾದ್ ಕರುನ್ ಬೊಲುಕ್ ಹೊತಾ, ಖರೆ ಪಾಳಿ ಲಾವ್ನ್ ಎಕ್ ಎಕ್ಲ್ಯಾನಿಚ್ ಬೊಲುಚೆ ಹೆಚ್ಯಾ ವೈನಾ ಸಗ್ಳ್ಯಾಕ್ನಿ ಶಿಕಾಪ್ ಅನಿ ಉಮ್ಮೆದ್ ಜೊಡುನ್ ಘೆವ್ಕ್ ಅವಕಾಸ್ ಗಾವ್ತಾ. 32 ಪ್ರವಾದ್ ಕರುನ್ ಬೊಲ್ತಲ್ಯಾಂಚೆ ಪ್ರೆರನ್ ತೆಂಚ್ಯಾ ಹತೊಟಿತ್ ರ್‍ಹಾವ್ಕ್ ಪಾಜೆ.

33 ಕಶ್ಯಾಕ್ ಮಟ್ಲ್ಯಾರ್ ದೆವ್ ಗೊಂದಳಾಚೊ ದೆವ್ ನ್ಹಯ್, ಸಮಾಧಾನಾಚೊ ದೆವ್.

ದೆವಾಚ್ಯಾ ಲೊಕಾಂಚ್ಯಾ ಸಗ್ಳ್ಯಾ ತಾಂಡ್ಯಾತ್ನಿ ಅಸಲ್ಲ್ಯಾ ಸಾರ್ಕೆ, 34 ಬಾಯ್ಕೊಮನ್ಸಾನಿ ದೆವಾಚ್ಯಾ ಲೊಕಾಂಚ್ಯಾ ತಾಂಡ್ಯಾತ್ ಗಪ್ ರ್‍ಹಾವ್ಚೆ. ತೆಂಕಾ ಬೊಲುಕ್ ಅವಕಾಸ್ ನಾ. ಶಾಸ್ತರಾತ್ ಸಾಂಗಲ್ಲ್ಯಾ ಸಾರ್ಕೆ ಖಾಯ್ಲ್ ಹೊವ್ನ್ ರ್‍ಹಾತಲೆ ತೆಂಕಾ ಬರೆ. 35 ಖರೆ ಜಾಸ್ತಿಚೆ ಕಾಯ್ಬಿ ಕಳ್ವುನ್ ಘೆವ್ಕ್ ತೆಂಕಾ ಮನ್‍ ರ್‍ಹಾಲ್ಯಾರ್, ಘರಾತ್ ಅಪ್ನಾಚ್ಯಾ ಘೊವಾಕ್ಡೆ ತೆನಿ ಇಚಾರುಂದಿತ್; ಕಶ್ಯಾಕ್ ಮಟ್ಲ್ಯಾರ್, ಎಕ್ ಬಾಯ್ಕೊಮನ್ಸಿನ್ ಲೊಕಾ ಗೊಳಾ ಹೊತಲ್ಯಾ ಜಾಗ್ಯಾರ್ ಬೊಲ್ತಲೆ ಮರ್ಯಾದಿಚೆ ನ್ಹಯ್.

36 ಸಾಂಗಾ ಮಾಕಾ ದೆವಾಚಿ ಗೊಸ್ಟ್ ತುಮ್ಚ್ಯಾಕ್ನಾ, ನಾಹೊಲ್ಯಾರ್ ತುಮ್ಕಾ ಯೆವ್ಡೆಚ್ ತಿ ಯೆವ್ನ್ ಪಾವ್ಲಾ ಕಾಯ್? 37 ಕೊನ್‍ಬಿ ಎಕ್ಲೊ ಆತ್ಮಿಕ್ ಪ್ರವಾದಿ ನಾಹೊಲ್ಯಾರ್ ಪವಿತ್ರ್ ಆತ್ಮ್ಯಾಚೆ ಪ್ರೆರನ್ ಹೊತ್ತೊ ಮನುನ್ ಚಿಂತ್ತಾ ಜಾಲ್ಯಾರ್, ತೊ ಮಿಯಾ ತುಮ್ಕಾ ಲಿವಲ್ಲೆ ತೆ, ಧನಿಯಾಚೊಚ್ ಖಾಯ್ದೊ ಮನುನ್ ವಳ್ಕುನ್ ಘೆಂವ್ದಿತ್. 38 ತಸೆ ವಳ್ಕುನ್ ಘೆವ್ಕ್ ತೊ ತಯಾರ್ ನಾ ಹೊಲ್ಯಾರ್ ದೆವ್ ಬಿ ತೆಕಾ ವಳ್ಕಿನಾ.

39 ತಸೆ ಮನುನ್ ಭಾವಾನು ಅನಿ ಭೆನಿಯಾನು, ಪ್ರವಾದ್ ಕರುನ್ ಬೊಲ್ತಲ್ಯಾ ವರುಚಿ ಆಶಾ ಕರಾ ಅನಿ ವಿಚಿತ್ರ್ ಬಾಶಾನಿ ಬೊಲ್ತಲ್ಯಾಕ್ನಿ ಅಡ್ವುನಕಾಶಿ. 40 ಖರೆ ಹೆ ಸಗ್ಳೆ ಮರ್ಯಾದಿನ್ ಅನಿ ಸಮಾ ರಿತಿನ್ ಹೊಂವ್ದಿತ್.