1 ಎಕ್ ದಿಸ್ ಜೆಜು ಸಿನಾಗೊಗಾತ್ ಗೆಲೊ, ಥೈ ಅಕಡಲ್ಲ್ಯಾ ಹಾತಾಚೊ ಎಕ್ ಮಾನುಸ್ ಹೊತ್ತೊ. 2 ಥೈ ಹೊತ್ತಿ ಜುದೆವಾಂಚಿ ಉಲ್ಲಿ ಮಾನ್ಸಾ, ಜೆಜು ತ್ಯಾ ಅಕಡಲ್ಲ್ಯಾ ಹಾತಾಚ್ಯಾ ಮಾನ್ಸಾಕ್ ಸಬ್ಬತಾಚ್ಯಾ ದಿಸಿ, ಗುನ್ ಕರ್‍ತಾ ಕಾಯ್ ಬಗುವಾ? ಅನಿ ಗುನ್ ಕರ್‍ಲ್ಯಾನ್ ತರ್, ತೆಚೆ ವರ್‍ತಿ ಎಕ್ ಝುಟೆ ಅಪ್ವಾದ್ ಘಾಲುವಾ, ಮನುನ್ ರಾಕುನ್ಗೆತ್ ಹೊತ್ತಿ. 3 ಜೆಜುನ್ ತ್ಯಾ ಅಕಡಲ್ಲ್ಯಾ ಹಾತಾಚ್ಯಾಕ್ "ಉಟುನ್ ಫಿಡೆ ಯೆ" ಮಟ್ಲ್ಯಾನ್. 4 ಅನಿ ಥೈ ಹೊತ್ತ್ಯಾ ಲೊಕಾಕ್ನಿ "ಸಬ್ಬತಾಚ್ಯಾ ದಿಸಿ ಪಾಳ್ತಲೊ ಖಾಯ್ದೊ, ಬರೆ ಕರುಚೆ ಮನ್ತಾ, ಕಾಯ್ ವಾಯ್ಟ್ ಕರುಚೆ ಮನ್ತಾ? ಎಕ್ ಮಾನ್ಸಾಚೊ ಜಿಂವ್ ಹುರ್‍ವುಚೆ, ಮನ್ತಾ? ಕಾಯ್ ಜಿವ್ ಕಾಡುಚೆ ಮನ್ತಾ?" ಮನುನ್ ಇಚಾರ್‍ಲ್ಯಾನ್.

ಹ್ಯಾ ಪ್ರಸ್ನ್ಯಾಕ್ ಕೊನ್ಬಿ ಕಾಯ್‍ ಜಬಾಬ್ ದಿವ್ಕನ್ಯಾತ್. 5 ತನ್ನಾ ರಾಗಾನ್, ಜೆಜುನ್ ಸಗ್ಳ್ಯಾ ಲೊಕಾಕ್ನಿ ಎಗ್ದಾ ಅಪ್ನಾಚೆ ಡೊಳೆ ಫಿರ್ವುನ್ ಬಗಟ್ಲ್ಯಾನ್. ತೆಂಚೆ ಮಂಡ್‍ಪಾನ್ ಬಗುನ್ ತೆಕಾ ಬೆಜಾರ್ ಹೊಲೊ. ತನ್ನಾ ಜೆಜುನ್ ತ್ಯಾ "ಮಾನ್ಸಾಕ್ ತುಜೊ ಹಾತ್ ಲಾಂಬ್ ಸೊಡ್" ಮಟ್ಲ್ಯಾನ್. ತೆನಿ ಹಾತ್ ಲಾಂಬ್ ಸೊಡ್ಲ್ಯಾನ್, ತನ್ನಾಚ್ ತೆಚೊ ಹಾತ್ ಬರೊ ಹೊಲೊ. 6 ತನ್ನಾ ಫಾರಿಜೆವಾ ಭಾಯ್ರ್ ಗೆಲಿ, ಅನಿ ಹೆರೊದಾಚ್ಯಾ ಪಕ್ಷಾಚ್ಯಾ*3:6 ಹೆರೊದಾಚ್ಯಾ ಪಕ್ಷಾಚಿ ಲೊಕಾ ಮಟ್ಲ್ಯಾರ್,ಹೆರೊದ್ ಅನಿ ತೆಚ್ಯಾ ಘರಾನ್ಯಾಚ್ಯಾ ಲೊಕಾಂಚ್ಯಾ ಫಾಟ್ನಾ ರ್‍ಹಾತಲಿ ರಾಜಕಿ ಪಕ್ಷಾಚಿ ಲೊಕಾ. ಲೊಕಾಂಚ್ಯಾ ವಾಂಗ್ಡಾ ಮಿಳುನ್, ಜೆಜುಕ್ ಕಶೆ ಕರುನ್ ಜಿವಾನಿ ಮಾರ್‍ತಲೆ ಮನುನ್ ಯವ್ಜನ್ ಘಾಟ್ಲ್ಯಾನಿ.

7 ತೆಚ್ಯಾ ಮಾನಾ, ಜೆಜು ಅಪ್ನಾಚ್ಯಾ ಶಿಸಾಂಚ್ಯಾ ವಾಂಗ್ಡಾ ಗಾಲಿಲಿಯಾ ಸಮುಂದರಾಚ್ಯಾ ದಂಡೆಕ್ ಗೆಲೊ. ಥೈ ಲೊಕಾಂಚೊ ಎಕ್ ಮೊಟೊ ತಾಂಡೊ ಜೆಜುಚ್ಯಾ ಭೊತ್ಯಾನಿ ಗೊಳಾಹೊಲೊ. 8 ಗಾಲಿಲಿಯಾ, ಜುದೆಯಾ, ಅನಿ ಇದುಮೆಯಾ, ಮನ್ತಲ್ಯಾ ಪ್ರಾಂತ್ಯಾನಿತ್ನಾ, ಜೆರುಜಲೆಮ್, ಮನ್ತಲ್ಯಾ ಶಾರಾತ್ನಾ, ಅನಿ ಜೊರ್ದಾನ್ ನ್ಹಯ್ಚ್ಯಾ ತಿಕುಲ್ಲ್ಯಾ ಬಾಜುಕ್ನಾ, ತಿರ್ ಅನಿ ಸಿದೊನ್ ಮನ್ತಲ್ಯಾ ಶಾರಾಂಚ್ಯಾ ಅಜು-ಬಾಜುಚ್ಯಾ ಗಾವಾನಿತ್ನಾ, ಜೆಜುನ್ ಕರಲ್ಲ್ಯಾ ಬರ್‍ಯಾ ಕಾಮಾಂಚಿ ಖಬರ್ ಆಯ್ಕುನ್, ಹಿ ಲೊಕಾ ಥೈ ಯೆವ್ನ್ ಗೊಳಾ ಹೊಲ್ಲಿ. 9 ಸಮುಂದರಾಚ್ಯಾ ದಂಡೆಕ್ ಜೆಜು ಲೊಕಾಕ್ನಿ ಸಿಕ್ವುತಲೆ ಜೆಜು ಹಿ ಲೊಕಾ ಅಪ್ನಾಚ್ಯಾ ಆಂಗಾರ್ ಪಡುನ್ ಮಾಕಾ ಹಿಚಕ್ತಿಲ್, ಮನುನ್ ಅಪ್ನಾಚ್ಯಾ ಶಿಸಾಕ್ನಿ, ಅಪ್ನಾಕ್ ಬಸುಕ್ ಎಕ್ ಢೊನ್ ಹಾನುನ್, ತಯಾರ್ ಕರುನ್ ಥವ್ಕ್ ಲಾವ್ಲ್ಯಾನ್. 10 ಜೆಜುನ್, ಸುಮಾರ್ ಅರಾಮ್ ನತ್ತ್ಯಾ ಲೊಕಾಕ್ನಿ ಗುನ್ ಕರಲ್ಲ್ಯಾನ್. ತಸೆ ಮನುನ್, ಹರ್‍ಎಕ್ ಅರಾಮ್ ನತ್ತೊ ಮಾನುಸ್, ಲೊಕಾಕ್ನಿ ಢಕ್ಲುನ್ಗೆತ್, ಜೆಜುಕ್ ಅಪಡ್ತಲೊ ಅವ್ಕಾಸ್ ಹುಡ್ಕುಕ್ ಲಾಗಲ್ಲೊ. 11 ಗಿರೊಲಾಗಲ್ಲಿ ಲೊಕಾಬಿ ಥೈ ಹೊತ್ತಿ. ತೆನಿ ಜೆಜುಕ್ ಬಗುನ್, ತೆಚ್ಯಾ ಇದ್ರಾಕ್ ಪಡುನ್ "ತಿಯಾ ದೆವಾಚೊ ಲೆಕ್" ಮನುನ್ ಬೊಬ್ ಮಾರಿತ್.

12 ಖರೆ ತೊ ಕೊನ್ ಮನುನ್ ಕೊನಾಕ್ಬಿ ಸಾಂಗ್ತಲೆ ನಕ್ಕೊ ಮನುನ್, ಜೆಜುನ್ ಗಿರ್‍ಯಾಕ್ನಿ ಖಡಕ್ ತಾಕಿತ್ ದಿಲ್ಯಾನ್.

13 ತನ್ನಾ ಜೆಜುನ್, ಎಕ್ ಮಡ್ಡಿ ವರ್‍ತಿ ಚಡುನ್, ಅಪ್ನಾಕ್ ಕೊನ್-ಕೊನ್ ಪಾಜೆ ತೆಂಕಾ ಬಲ್ವುಲ್ಯಾನ್. ತನ್ನಾ ತೆನಿ ತೆಚೆಕ್ಡೆ ಯೆಲ್ಯಾನಿ 14 ಜೆಜುನ್ ಬಾರಾ ಜಾನಾಕ್ನಿ ಎಚುನ್ ಕಾಡ್ಲ್ಯಾನ್, ತೆಂಕಾ "ಅಪೊಸ್ತಲಾ"*3:14 ಅಪೊಸ್ತಲ್ ಮಟ್ಲ್ಯಾರ್ ಅದಿಕಾರ್‍ಯಾನ್ ಧಾಡಲ್ಲೊ ಖಾಸ್ ಮಾನುಸ್ ಮನುನ್ ನಾವ್ ದಿಲ್ಯಾನ್. ಅನಿ "ಮಾಜ್ಯಾ ವಾಂಗ್ಡಾ ರ್‍ಹಾವ್ಕ್, ಮನುನ್ ಮಿಯಾ ತುಮ್ಕಾ ಎಚುನ್ ಕಾಡ್ಲಾ, ಸಗ್ಳ್ಯಾಕ್ಡೆ ದೆವಾಚಿ ಬರಿ ಖಬರ್ ಸಾಂಗುಕ್ ಮಿಯಾ ತುಮ್ಕಾ ಧಾಡ್ತಾ. 15 ಅನಿ ಗಿರೆ ಸೊಡ್ವುತಲೊ ಅದಿಕಾರ್ ತುಮ್ಕಾ ದಿತಾ" ಮಟ್ಲ್ಯಾನ್.

16 ಜೆಜುನ್ ಎಚುನ್ ಕಾಡಲ್ಲ್ಯಾ ಬಾರಾ ಜಾನಾಂಚಿ ನಾವಾ ಹಿ - ಸಿಮಾವ್ ಹೆಕಾ ಜೆಜುನ್, ಪೆದ್ರು ಮನುನ್ ನಾವ್ ದಿಲ್ಯಾನ್ 17 ಜೆಬೆದೆವಾಚಿ ಪೊರಾ, ಜಾಕೊಬ್ ಅನಿ ತೆಚೊ ಭಾವ್ ಜುವಾಂವ್ ಹೆಂಕಾ ಜೆಜುನ್ "ಬೊವನೆರ್ಗೆಸ್" ತಸೆ ಮಟ್ಲ್ಯಾರ್, ಗುಡ್ಗುಡ್ಯಾಚಿ ಮಾನ್ಸಾ, ಮನುನ್ ನಾವ್ ಥವ್ಲ್ಯಾನ್. 18 ಅಂದ್ರು, ಫಿಲಿಪ್, ಬಾರ್‍ತೊಲೊಮೆವ್, ಮಾತೆವ್, ಥೊಮಸ್, ಅಲ್ಫೆವಾಚೊ ಲೆಕ್ ಜಾಕೊಬ್ , ತಾದ್ದೆವ್,ದೆಶ್‍ಭಕ್ತ್ ಸಿಮಾವ್, 19 ಅನಿ ಜೆಜುಕ್ ಘಾತ್‍ಕರುನ್ ಧರುನ್ ದಿಲ್ಲೊ, ಜುದಾಸ್ ಇಸ್ಕರಿಯೊತ್.

20 ತನ್ನಾ ಜೆಜು ಘರಾಕ್ಡೆ ಗೆಲೊ, ಥೈ ಲೈ ಲೊಕಾ ಗೂಳಾ ಹೊಲ್ಲಿ, ತಸೆ ಮನುನ್ ಜೆಜುಕ್ ಅನಿ ತೆಚ್ಯಾ‍ ಶಿಸಾಕ್ನಿ ಜೆವಾನ್‍ ಕರುಕ್ ಸೈತ್ ಎಳ್ ಗಾವುಕ್ನಾ.

21 ಜೆಜುಚ್ಯಾ ಘರಾತ್ಲ್ಯಾ ಲೊಕಾನಿ "ತೆಕಾ ಪಿಶೆ ಲಾಗ್ಲಾ" ಮನುನ್, ಲೊಕಾ ಮನ್ತಲೆ ಆಯಿಕ್ಲ್ಯಾನಿ ಅನಿ ಜೆಜುಕ್, ಘರಾಕ್ ಬಲ್ವುನ್ ಘೆವ್ನ್ ಜಾವ್ಕ್ ಮನುನ್ ಗೆಲ್ಲ್ಯಾನಿ.

22 ಜೆರುಜಲೆಮಾತ್ನಾ ಯೆಲ್ಲೆ, ಖಾಯ್ದೆ ಸಿಕ್ವುತಲೆ, "ತೆಚ್ಯಾ ಆಂಗಾತ್ ಗಿರ್‍ಯಾಂಚೊ ವಡಿಲ್ ಬೆಎಲ್ಜೆಬುಲ್ ಹಾಯ್. ತ್ಯಾ ಗಿರ್‍ಯಾಚ್ಯಾ ಬಳಾನ್ ತೊ ಲೊಕಾಕ್ನಿಲಾಗಲ್ಲಿ ಗಿರೆ ಸೊಡ್ಸುತಾ," ಮನುಲಾಗಲ್ಲೆ.

23 ತನ್ನಾ ಜೆಜುನ್ ತೆಂಕಾ, ಜಗ್ಗೊಳ್ ಬಲ್ವುಲ್ಯಾನ್, ಅನಿ ಕಾನಿಯಾಂಚ್ಯಾ ವೈನಾ ಸಾಂಗುನ್ಗೆತ್: ಸೈತಾನಾನ್,*3:23 ಸೈತಾನ್ ಮಟ್ಲ್ಯಾರ್ ಅದ್ದಿ ತೊ ಸರ್‍ಗಾತ್ ಎಕ್ ದೆವಾಚೊದುತ್ ಹೊವ್ನ್ ಹೊತ್ತೊ.ತೆನಿ ದೆವಾಚ್ಯಾ ವಿರೊದ್ ಕಾಮ್ ಕರಲ್ಲ್ಯಾಸಾಟಿ ದೆವಾನ್ ತೆಕಾ ಸರ್‍ಗಾತ್ನಾ ಭಾಯ್ರ್ ಘಾಟ್ಲ್ಯಾನ್. ಅತ್ತಾ ತೊ ಸಗ್ಳ್ಯಾ ಗಿರ್‍ಯಾಂಚೊ ವಡಿಲ್. ಗಿರ್‍ಯಾಕ್ ಭಾಯ್ರ್ ಘಾಲುಕ್ ಹೊತಾ ಕಾಯ್? 24 ಎಕ್ ರಾಜ್ ದೊನ್ ತಾಂಡೆ ಹೊವ್ನ್ ಎಕಾಮೆಕಾಚ್ಯಾ ವಿರೊದ್ ಝಗ್ಡುನ್ಗೆತ್ ರ್‍ಹಾಲ್ಯಾರ್, ತೊ ರಾಜ್ ನಾಸ್ ಹೊವ್ನ್ ಜಾತಾ. 25 ಎಕ್ ಘರಾತ್ಲಿ ಲೊಕಾ ದೊನ್ ತಾಂಡೆ ಹೊವ್ನ್ ಝಗ್ಡುನ್ಗೆತ್ ರ್‍ಹಾಲ್ಯಾರ್, ತೆ ಘರಾನೆಚ್ ನಾಸ್ ಹೊವ್ನ್ ಜಾತಾ. 26 ತಸೆಚ್ ಸೈತಾನಾಬಿ ದೊನ್ ತಾಂಡೆ ಕರುನ್ ಘೆವ್ನ್, ಝಗ್ಡುನ್ಗೆತ್ ರ್‍ಹಾಲ್ಯಾರ್, ಸೈತಾನಾಚೊ ರಾಜ್ ಸರುನುಚ್ ಜಾತಾ.

27 ಎಕ್ ಘಟ್ಮುಟ್ ಮಾನ್ಸಾಚ್ಯಾ ಘರಾತ್ಲಿ ಸಾಮಾನಾ, ಚೊರುಚೆ ಮಟ್ಲ್ಯಾರ್, ಅದ್ದಿ ತ್ಯಾ ಮಾನ್ಸಾಕ್, ಘಟ್ ಭಾಂದುಕ್ ಪಾಜೆ, ತನ್ನಾ ತ್ಯಾ ಮಾನ್ಸಾಚ್ಯಾ ಘರಾತ್ಲೆ ಚೊರುನ್ ಘೆವ್ನ್ ಜಾವ್ಕ್ ಹೊತಾ.

28 "ಖರೆಚ್ ಮಿಯಾ ತುಮ್ಕಾ ಸಾಂಗ್ತಾ, ಮಾನ್ಸಾನಿ ಕರಲ್ಲ್ಯಾ ಸಗ್ಳ್ಯಾ ಪಾಪಾಂಚಿ, ಅನಿ ದೆವಾಚ್ಯಾ ವರ್‍ತಿ ಬೊಲಲ್ಲ್ಯಾ ನಿಂದ್ಯಾಂಚಿ, ಮಾಪಿ ಗಾವ್ತಾ. 29 ಖರೆ ದೆವಾಚ್ಯಾ ಆತ್ಮ್ಯಾಚ್ಯಾ ವಿರೊದ್ ನಿಂದ್ಯಾ ಬೊಲಲ್ಲ್ಯಾಕ್, ಕನ್ನಾಚ್ ಮಾಪಿ ಗಾವಿನಾ. ಕಶ್ಯಾಕ್ ಮಟ್ಲ್ಯಾರ್, ತೊ ಕನ್ನಾಬಿ ಮಾಪ್ ಕರಿನಸಲ್ಲ್ಯಾ ಪಾಪಾತ್ ಪಡ್ತಾ." 30 "ಹೆಕಾ ಗಿರೊಲಾಗ್ಲಾ" ಮನುನ್ ಉಲ್ಲ್ಯಾ ಲೊಕಾನಿ ಮಟ್ಲ್ಯಾನಿ, ತಸೆ ಮನುನ್ ಜೆಜುನ್ ಅಶೆ ಸಾಂಗಟ್ಲ್ಯಾನ್.

31 ತವ್ಡ್ಯಾಕ್ ಮಟ್ಲ್ಯಾರ್, ಜೆಜುಚಿ ಬಾಯ್, ಅನಿ ಭಾವಾ, ಥೈ ಯೆವ್ನ್ ಪಾವ್ಲ್ಯಾನಿ. ತೆನಿ ಘರಾಚ್ಯಾ ಭಾಯ್ರ್ ಇಬೆ ರ್‍ಹಾವ್ನ್, ಜೆಜುಚ್ಯಾ ವಿಶಯಾತ್ ಖಬರ್ ಘೆವ್ನ್ ಯೆವ್ಕ್ ಸಾಂಗುನ್ ಧಾಡ್ಲ್ಯಾನಿ. 32 ಜೆಜುಚ್ಯಾ ಭೊತ್ಯಾನಿ ಲೈ ಲೊಕಾ ಬಸಲ್ಲಿ ಹೊತ್ತಿ. ತೆನಿ ಜೆಜುಕ್ "ತುಜಿ ಬಾಯ್, ಅನಿ ತುಜಿ ಭಾವಾ, ಅನಿ ಭೆನಿಯಾ, ತುಕಾ ಭಾಯ್ರ್ ಹುಡ್ಕುಕ್ ಲಾಗ್ಲ್ಯಾತ್" ಮಟ್ಲ್ಯಾನಿ.

33 ತನ್ನಾ ಜೆಜುನ್, "ಮಾಜಿ ಬಾಯ್, ಅನಿ ಭಾವಾ, ಅನಿ ಭೆನಿಯಾ ಕೊನ್ ಗೊತ್ತ್ ಹಾಯ್?" 34 ಅಪ್ನಾಚ್ಯಾ ಭೊತ್ಯಾನಿ ಹೊತ್ತ್ಯಾ ಲೊಕಾಕ್ನಿ ಬಗುನ್ಗೆತ್ "ಹಿ ಲೊಕಾಚ್, ಮಾಜಿ ಬಾಯ್, ಅನಿ ಮಾಜೆ ಭಾವ್‍ ಭೆನಿಯಾ! 35 ದೆವಾಚ್ಯಾ ಯವ್ಜನಿ ಸರ್ಕೆ ಕರ್‍ತಲಿ ಲೊಕಾಚ್, ಮಾಜಿ ಬಾಯ್ ಅನಿ ಮಾಜೆ ಭಾವ್‍ ಭೆನಿಯಾ" ಮಟ್ಲ್ಯಾನ್.