1 ಅನಿ ತೆನಿ "ಮಿಯಾ ತುಮ್ಕಾ ಸಾಂಗ್ತಾ ತುಮ್ಚ್ಯಾ ಮದ್ಲೆ ಉಲ್ಲೆ ಜಾನಾ ದೆವಾಚೆ ರಾಜ್ ಅಪ್ನಾಚ್ಯಾ ಅದಿಕಾರಾ ಸಮೆತ್ ಯೆತಲೆ ಬಗ್ಲ್ಯಾ ಸಿವಾಯ್ ಮರಿನ್ಯಾತ್" ಮಟ್ಲ್ಯಾನ್.

2 ಸಾ ದಿಸ್ ಹೊಲ್ಲ್ಯಾ ಮಾನಾ, ಜೆಜು ಪೆದ್ರುಕ್, ಜಾಕೊಬಾಕ್ ಅನಿ ಜುವಾಂವಾಕ್ ಬಲ್ವುನ್ ಘೆವ್ನ್, ಎಕ್ ಮಡ್ಡಿ ವರ್‍ತಿ ಗೆಲೊ. ಥೈ ತೆನಿ ಎವ್ಡೆಚ್ ಹೊತ್ತೆ. ತೆನಿ ಜೆಜು ವರ್‍ತಿ ನದರ್ ಮಾರುನ್ ಬಗಟಲ್ಲ್ಯಾನಿ ತನ್ನಾ ತೆಚೆ ವರ್‍ತಿ ಹೊಲ್ಲಿ ಬದ್ಲಾವನ್ ತೆಂಕಾ ದಿಸ್ಲಿ. 3 ಜೆಜುಚ್ಯಾ ಅಂಗಾ ವೈಲ್ಯಾ ಫಾಳಿಯಾ ಎವ್ಡ್ಯಾ ಫ್ಹಾಂಡ್ರೆ ಖಡ್ ಹೊಲ್ಲ್ಯಾಕಿ, ಹ್ಯಾ ದುನಿಯಾತ್ ಕೊನ್ಬಿ ಧುವ್ನ್ ತವ್ಡೆ ಫ್ಹಾಂಡ್ರೆ ಕರುಕ್ ಸಾದ್ಯ್ ನಾ. 4 ತನ್ನಾ ಎಲಿಯಾ ಅನಿ ಮೊಯ್ಜೆ ಜೆಜುಕ್ಡೆ ಬೊಲ್ತಲೆ ತಿನಿಬಿ ಶಿಸಾನಿ ಬಗಟ್ಲ್ಯಾನಿ.

5 ತನ್ನಾ ಪೆದ್ರುನ್ ಜೆಜುಕ್ "ಗುರುಜಿ! ಅಮಿ ಹಿತ್ತೆ ರ್‍ಹಲ್ಲೆ ಕವ್ಡೆ ಬರೆ ಹಾಯ್ ನ್ಹಯ್! ಹಿತ್ತೆ ಅಮಿ ತಿನ್ ಝೊಪ್ಡಿ ಘಾಲುವಾ, ಎಕ್ ತುಕಾ, ಎಕ್ ಮೊಯ್ಜೆಕ್, ಅನಿ ಎಕ್ ಎಲಿಯಾಕ್" ಮಟ್ಲ್ಯಾನ್. 6 ಪೆದ್ರು ಅನಿ ಹುರಲ್ಲಿ ಶಿಸಾ ಎವ್ಡೆ ಭಿಂಯಾವಲ್ಲಿ ಕಿ ಕಾಯ್ ಬೊಲುಚೆ ಮನುನ್ ತೆಕಾಚ್ ಕಳಿನಸಿ.

7 ತನ್ನಾ ಎಕ್ ಮೊಡ್ ಯೆಲೆ ಅನಿ ತೆಚ್ಯಾ ಸಾವ್ಳಿನ್ ತೆಂಕಾ ಧಾಪ್ಲಿನ್, ಅನಿ ಮೊಡಾತ್ನಾ "ಹ್ಯೊ, ಮಾಜೊ ಲೈ ಅಪುರ್‍ಬಾಯೆಚೊ ಲೆಕ್, ತೆನಿ ಸಾಂಗಟಲ್ಲೆ ಆಯ್ಕಾ!" ಮನುನ್ ಧನ್ ಅಯ್ಕೊ ಯೆಲೊ. 8 ತನ್ನಾ ಎಗ್ದಮ್ ತೆನಿ ಫಿರುನ್ ಬಗ್ಲ್ಯಾರ್, ಜೆಜು ಎಕ್ಲೊಚ್ ತೆಂಕಾ ದಿಸ್ಲೊ.

9 ತೆನಿ ಮಡ್ಡಿ ವೈಯ್ನಾ ಉತ್ರುನ್ ಯೆತಾನಾ "ಮಾನ್ಸಾಚೊ ಲೆಕ್ ಮರುನ್, ಅನಿ ಪರ್ತುನ್ ಝಿತ್ತೊ ಹೊವ್ನ್ ಉಟುನ್ ಯೆಯ್ ಪತರ್ ತುಮಿ ಮಡ್ಡಿ ವರ್‍ತಿ ಬಗಟಲ್ಲೆ ಕೊನಾಕ್ಬಿ ಸಾಂಗುನಕಾಸಿ" ಮನುನ್ ತಾಕಿತ್ ದಿಲ್ಯಾನ್.

10 ತೆನಿ ಜೆಜುಚ್ಯಾ ಹ್ಯಾ ಗೊಸ್ಟಿಕ್ ಖಾಲ್ತಿ ಹೊಲ್ಯಾನಿ, "ಖರೆ ಮರುನ್ ಅನಿ ಝಿತ್ತೆ ಹೊತಲೆ, ಮಟ್ಲ್ಯಾರ್ ಕಾಯ್?" ಮನುನ್ ಅಪ್ನಾಚ್ಯಾ ಮದ್ದಿಚ್ ಬೊಲುನ್ ಘೆವ್ಕ್‌ಲಾಗ್ಲ್ಯಾನಿ. 11 ಅನಿ ತೆನಿ ಜೆಜುಕ್ "ಅದ್ದಿ ಎಲಿಯಾ ಯೆವ್ಕ್ ಪಾಜೆ ಮನುನ್ ಖಾಯ್ದೆ ಶಿಕ್ವುತಲೆ, ಕಶ್ಯಾಕ್ ಸಾಂಗ್ತ್ಯಾತ್?" ಮನುನ್ ಇಚಾರ್‍ಲ್ಯಾನಿ.

12 ತನ್ನಾ ಜೆಜುನ್ "ಸಗ್ಳೆ ತಯಾರ್ ಕರುಕ್ ಮನುನ್ ಅದ್ದಿ ಎಲಿಯಾ ಯೆವ್ಕ್ ಪಾಜೆ, ಜಾಲ್ಯಾರ್‍ಬಿ, ಮಾನ್ಸಾಚ್ಯಾ ಲೆಕಾನ್ ಲೈ ಕಸ್ಟ್ ಸೊಸುಕ್ ಪಾಜೆ, ಅನಿ ತಿರಸ್ಕರಿತ್ ಹೊವ್ಕ್ ಪಾಜೆ, ಮನುನ್ ಪವಿತ್ರ್ ಪುಸ್ತಕ್ ಕಶ್ಯಾಕ್ ಮನ್ತಾ?" ಮಟ್ಲ್ಯಾನ್. 13 ಮಿಯಾ ತುಮ್ಕಾ ಸಾಂಗ್ತಾ, "ಎಲಿಯಾ ಅದ್ದಿಚ್ ಯೆವ್ನ್ ಹೊಲೊ, ಖರೆ ಲೊಕಾನಿ ಪವಿತ್ರ್ ಪುಸ್ತಕಾತ್ ಸಾಂಗಲ್ಲ್ಯಾ ಸರ್ಕೆ ಅಪ್ನಾಚ್ಯಾ ಮನಾಕ್ ಯೆತಾ ತವ್ಡ್ಯಾ ಬುರ್ಶ್ಯಾ ರಿತಿನ್ ತೆಕಾ ಚಾಲ್ವುಲ್ಯಾನಿ." ಮನುನ್ ಸಾಂಗ್ಲ್ಯಾನ್.

14 ತೆನಿ ಹುರಲ್ಲ್ಯಾ ಶಿಸಾತ್ನಿ ಯೆವ್ನ್ ಮಿಳ್ತಾನಾ ತ್ಯಾ ಶಿಸಾಂಚ್ಯಾ ಭೊತ್ಯಾನಿ ಲೈ ಲೊಕಾಂಚೊ ತಾಂಡೊ ಜಮಲ್ಲೊ ಅನಿ ಖಾಯ್ದೆ ಶಿಕ್ವುತಲೆ ತೆಂಚ್ಯಾಕ್ಡೆ ವಾದ್ ಕರುನ್ಗೆತ್ ಹೊತ್ತೆ. 15 ಲೊಕಾ ಜೆಜುಕ್ ಬಗುನ್ ಅಜಾಪ್ ಹೊಲಿ ಅನಿ ತೆಚ್ಯಾಕ್ಡೆ ಪಳುನ್ ಜಾವ್ನ್ ತೆಕಾ ಸ್ವಾಗತ್ ಕರ್‍ಲ್ಯಾನಿ.

16 ತನ್ನಾ ಜೆಜುನ್ "ಕಾಚ್ಯಾ ವಿಶಯಾತ್ ತುಮಿ ತೆಂಚಾಕ್ನಾ ವಾದಿಕ್-ವಾದ್ ಕರುನ್ ಖೆಳುಕ್ ಲಾಗಲ್ಲ್ಯಾಸಿ?" ಮನುನ್ ಶಿಸಾಕ್ನಿ ಇಚಾರ್‍ಲ್ಯಾನ್.

17 ತನ್ನಾ ತ್ಯಾ ಲೊಕಾನಿತ್ಲ್ಯಾ ಎಕ್ ಮಾನ್ಸಾನ್ "ಗುರುಜಿ,ಮಾಜ್ಯಾ ಲೆಕಾಕ್ ಮಿಯಾ ತುಜೆಕ್ಡೆ ಘೆವ್ನ್ ಯೆಲಾ, ತೆಕಾ ಗಿರೊಲಾಗ್ಲಾ ತೆಕಾ ಬೊಲುಕ್ ಹೊಯ್ನಾ." ಮನುನ್ ಜೆಜುಕ್ ಸಾಂಗ್ಲ್ಯಾನ್. 18 ತೊ ಗಿರೊ ತೆಕಾ ಅಂಗಾತ್ ಚಡಲ್ಲ್ಯಾ ತನ್ನಾ ತೆಕಾ ಜಿಮ್ನಿಕ್ ಪಾಡ್ವುತಾ, ತೊ ತೊಂಡಾತ್ನಾ ಫೆನ್ ಕಾಡ್ತಾ ಅನಿ ಕಟ್ಕಟ್ ದಾತಾ ಚಾವ್ತಾ, ತೆಚೆ ಆಂಗ್ ಶೆಡ್ದುನ್ ಘಟ್ ಹೊತಾ. ತ್ಯಾ ಗಿರ್‍ಯಾಕ್ ಕಾಡಾ ಮನುನ್ ತುಜ್ಯಾ ಶಿಸಾಕ್ನಿ ಮಿಯಾ ಸಾಂಗ್ಲೊ, ಖರೆ ತೆ ತೆಂಚೆನ್ ಹೊವ್ಕ್ ನಾ ಮನುನ್ ಸಾಂಗ್ಲ್ಯಾನ್.

19 ತನ್ನಾ ಜೆಜುನ್ ಶಿಸಾಕ್ನಿ"ತುಮ್ಕಾ ವಿಶ್ವಾಸುಚ್ ನಾ! ಅಜುನ್‍ಬಿ ಕವ್ಡೊ ಎಳ್ ಮಿಯಾ ತುಮ್ಚ್ಯಾ ವಾಂಗ್ಡಾ ರ್‍ಹವ್ಚೆ? ಮಿಯಾ ಕವ್ಡೊ ಎಳ್ ತುಮ್ಕಾ ಸೊಸುನ್ ಘೆವ್ನ್ ಜವ್ಚೆ? ತ್ಯಾ ಪೊರಾಕ್ ಮಾಜೆಕ್ಡೆ ಘೆವ್ನ್ ಯೆವಾ!" ಮಟ್ಲ್ಯಾನ್. 20 ತನ್ನಾ ತೆನಿ ತ್ಯಾ ಪೊರಾಕ್ ತೆಚೆಕ್ಡೆ ಘೆವ್ನ್ ಯೆಲ್ಯಾನಿ. ಜೆಜುಕ್ ಬಗಟಲ್ಲೆಚ್ ತ್ಯಾ ಗಿರ್‍ಯಾನ್ ತೆಕಾ ಕಡ್ಕಡಿ ಸರ್ಕೆ ಕರ್‍ಲ್ಯಾನ್ ,

ತ್ಯಾ ಪೊರಾಕ್ ಜಿಮ್ನಿಕ್ ಪಾಡ್ವುಲ್ಯಾನ್ ತನ್ನಾ ತೊ ಪೊರ್ ಖಾಲ್ತಿ ಪಡುನ್ ತೊಂಡಾತ್ನಾ ಫೆನ್ ಕಾಡುನ್ಗೆತ್ ತಳ್ಮಳುಕ್ಲಾಗ್ಲೊ.

21 "ಹೆಕಾ ಕನ್ನಾಚ್ಯಾನ್ ಅಶೆ ಹೊವ್ಲಾ?" ಮನುನ್ ಜೆಜುನ್ ತ್ಯಾ ಪೊರಾಂಚ್ಯಾ ಬಾಬಾಕ್ ಇಚಾರ್‍ಲ್ಯಾನ್. ತೆನಿ "ತೊ ಬಾರಿಕ್ ಹೊತ್ತೊ ತನ್ನಾಚ್ಯಾನುಚ್ ತೆಕಾ ಅಶೆ ಹೊವ್ಲಾ," ಮನುನ್ ಸಾಂಗುನ್ 22 "ಲೈಂದಾ ತ್ಯಾ ಗಿರ್‍ಯಾನ್ ತೆಚೊ ಜಿವ್ ಕಾಡುಸಾಟಿ ಮನುನ್ ಆಗಿತ್, ಪಾನಿಯಾತ್ ನ್ಹೆವ್ನ್ ಪಾಡ್ವುಕ್ ಕಸ್‍ರತ್ ಕರಲ್ಲೆ ಹಾಯ್, ದಯಾ ಕರುನ್ ತುಕಾ ಸಾದ್ಯ್ ಹೊಲ್ಯಾರ್ ಅಮ್ಕಾ ಮಜತ್ ಕರ್!" ಮಟ್ಲ್ಯಾನ್.

23 ತನ್ನಾ ಜೆಜುನ್ "ತುಕಾ ಸಾದ್ಯ್ ಹೊಲ್ಯಾರ್! ವಿಶ್ವಾಸ್ ಹೊತ್ತ್ಯಾ ಮಾನ್ಸಾಕ್ ಸಗ್ಳೆ ಸಾದ್ಯ್." ಮಟ್ಲ್ಯಾನ್.

24 ತನ್ನಾ ತ್ಯಾ ಪೊರಾಂಚ್ಯಾ ಬಾಬಾನ್ "ಮಾಕಾ ವಿಶ್ವಾಸ್ ಹಾಯ್, ಖರೆ ತೊ ಫಿರೆ ಹೊಯ್ನಾ, ವಿಶ್ವಾಸ್ ಕರುಕ್ ತಿಯಾಚ್ ಮಾಕಾ ಅದಾರ್ ದಿ!" ಮನುನ್ ಬೊಬ್ ಮಾರ್‍ಲ್ಯಾನ್.

25 ಲೊಕಾಂಚೊ ತಾಂಡೊ ಅಪ್ನಾಕ್ಡೆ ಯೆವ್ನ್ ಜಮ್ತಲೆ ಜೆಜುನ್ ಬಗಟ್ಲ್ಯಾನ್. ತಸೆ ಮನುನ್ ತೆನಿ ತ್ಯಾ ಗಿರ್‍ಯಾಕ್ "ಯೆ, ಬೊಲಿನಸಿ ಸರ್ಕೆ ಅನಿ ಆಯ್ಕಿನಸಿ ಸರ್ಕೆ ಕರ್‍ತಲ್ಯಾ ಗಿರ್‍ಯಾ, ಹ್ಯಾ ಪೊರಾತ್ನಾ ಭಾಯ್ರ್ ಪಡ್ ಅನಿ ಕನ್ನಾಬಿ ತೆಚ್ಯಾ ಭುತ್ತುರ್ ಜವ್ನಕೊ!" ಮನುನ್ ತಾಕಿತ್ ದಿಲ್ಯಾನ್.

26 ತ್ಯಾ ಗಿರ್‍ಯಾನ್ ಜೊರಾನಿ ಬೊಬ್ ಮಾರ್‍ಲ್ಯಾನ್ ಅನಿ ತ್ಯಾ ಝಿಲ್ಗ್ಯಾಕ್ ಜಿಮ್ನಿಕ್ ಪಾಡ್ವುನ್, ತಳ್ಮಳಿಸರ್ಕೆ ಕರ್‍ಲ್ಯಾನ್ ಅನಿ ತೆಚಾತ್ನಾ ಭಾಯ್ರ್ ಗೆಲೊ, ತೊ ಝಿಲ್ಗೊ ಹಾಲಿನಸ್ತಾನಾ ಪಡ್ಲೊ. ತನ್ನಾ ಸಗ್ಳ್ಯಾನಿ ತೊ ಮರ್‍ಲೊಚ್ ಮಟ್ಲ್ಯಾನಿ. 27 ಖರೆ ಜೆಜುನ್ ತ್ಯಾ ಝಿಲ್ಗ್ಯಾಕ್ ಹಾತ್ ಧರುನ್ ಉಟ್ವುಲ್ಯಾನ್, ತನ್ನಾ ತೊ ಝಿಲ್ಗೊ ಉಟುನ್ ಇಬೆ ರ್‍ಹಾಲೊ.

28 ಮಾನಾ ಜೆಜು ಘರಾತ್ ಭುತ್ತುರ್ ಗೆಲೊ, ಶಿಸಾನಿ ತೊ ಎಕ್ಲೊ ಹೊತ್ತ್ಯಾ ತನ್ನಾ "ತ್ಯಾ ಗಿರ್‍ಯಾಕ್ ಭಾಯ್ರ್ ಕಾಡುಕ್ ಅಮ್ಕಾ ಕಶ್ಯಾಕ್ ಹೊವ್ಕ್ ನಾ?" ಮನುನ್ ಇಚಾರ್‍ಲ್ಯಾನಿ.

29 ತನ್ನಾ ಜೆಜುನ್ "ತಸ್ಲ್ಯಾಕ್ನಿ ಖಾಲಿ ಮಾಗ್ನಿ ಸೊಡುನ್ ಅನಿ ಕಾಚೆನ್ಬಿ ಭಾಯ್ರ್ ಕಾಡುಕ್ ಹೊಯ್ನಾ" ಮನುನ್ ಸಾಂಗ್ಲ್ಯಾನ್.

30 ಜೆಜು ಅನಿ ತೆಚಿ ಶಿಸಾ ತೊ ಜಾಗೊ ಸೊಡುನ್ ಗಾಲಿಲಿಯಾತ್ನಾ ಪಾರ್ ಹೊವ್ನ್ ಜಾವ್‍ಲಾಗಲ್ಲ್ಯಾನಿ, ಅಪ್ನಿ ಖೈ ಹಾವ್ ಮನುನ್ ಲೊಕಾಕ್ನಿ ಕಳ್ತಲೆ ಜೆಜುಕ್ ನಕ್ಕೊ ಹೊತ್ತೆ, 31 ಕಶ್ಯಾಕ್ ಮಟ್ಲ್ಯಾರ್ ತೊ ಶಿಸಾಕ್ನಿ ಶಿಕ್ವುಲಾಗಲ್ಲೊ. ತನ್ನಾ ಜೆಜುನ್ "ಮಾನ್ಸಾಚ್ಯಾ ಲೆಕಾಕ್ ಧರುನ್ ಲೊಕಾಂಚ್ಯಾ ಹಾತಾತ್ ದಿತ್ಯಾತ್, ಅನಿ ತಿ ಲೊಕಾ ತೆಕಾ ಜಿವಾನಿ ಮಾರ್‍ತ್ಯಾತ್, ಜಾಲ್ಯಾರ್‍ಬಿ ತಿನ್ವ್ಯಾ ದಿಸಿ ತೊ ಅನಿ ಪರ್ತುನ್ ಝಿತ್ತೊ ಹೊವ್ನ್ ಉಟುನ್ ಯೆತಾ" ಮನುನ್ ಸಾಂಗ್ಲ್ಯಾನ್.

32 ಖರೆ ಶಿಸಾಕ್ನಿ ತೆಚ್ಯಾ ಗೊಸ್ಟಿಯಾ ಅರ್‍ತುಚ್ ಹೊವ್ಕ್‌ನ್ಯಾತ್, ಜಾಲ್ಯಾರ್‍ಬಿ ಜೆಜುಕ್ ಹ್ಯಾ ಗೊಸ್ಟಿಯಾಂಚೊ ಅರ್ತ್‍ ಕಾಯ್ ಮನುನ್ ಇಚಾರುಕ್ ತೆಂಕಾ ಧೈರೊ ಹೊವ್ಕ್‌ನಾ.

33 ಜೆಜು ಅನಿ ಶಿಸಾ ಕಫರ್‍ನವ್ ಮನ್ತಲ್ಯಾ ಗಾವಾಕ್ ಯೆಲ್ಯಾನಿ. ತೆನಿ ಎಕ್ ಘರಾತ್ ಹೊತ್ತ್ಯಾ ತನ್ನಾ ಜೆಜುನ್ ಅಪ್ಲ್ಯಾ ಶಿಸಾಕ್ನಿ "ಆಜ್ ತುಮಿ ಯೆತಾನಾ ವಾಟೆ ವರ್‍ತಿ ಕಾಯ್ ವಾದ್ ಕರುಕ್ ಲಾಗಲ್ಲ್ಯಾಸಿ?" ಮನುನ್ ಇಚಾರ್‍ಲ್ಯಾನ್.

34 ತನ್ನಾ ಶಿಸಾನಿ ಕಾಯ್ಬಿ ಜಬಾಬ್ ದಿವ್ಕನ್ಯಾತ್. ಕಶ್ಯಾಕ್ ಮಟ್ಲ್ಯಾರ್, ಅಮ್ಚ್ಯಾ ಮದ್ದಿ ಕೊನ್ ಮೊಟೊ ಮನುನ್ ತೆನಿ ವಾದ್ ಕರುಕ್ ಲಾಗಲ್ಲ್ಯಾನಿ. 35 ಜೆಜು ಬಸ್ಲೊ ಅನಿ ಬಾರಾ ಜಾನಾಕ್ನಿಬಿ ಅಪ್ನಾಕ್ಡೆ ಬಲ್ವುನ್ "ತುಮ್ಚ್ಯಾ ಮದ್ದಿ ಕೊನಾಕ್ ಮೊಟೊ ಮನುನ್ ಘೆವ್ಕ್ ಮನ್ ಹಾಯ್, ತೊ ಹುರಲ್ಲೆ ಸಗ್ಳೆ ಜಾನಾ ಅಪ್ನಾಚ್ಯಾನ್ಕಿ ಮೊಟೆ ಮನುನ್ ಯೌಜುಕ್ ಪಾಜೆ, ಅನಿ ತೆಂಚೊ ಸೆವಕ್ ಹೊವ್ಚೊ," ಮನುನ್ ಸಾಂಗ್ಲ್ಯಾನ್. 36 ಮಾನಾ ಜೆಜುನ್ ಎಕ್ ಬಾರಿಕ್ಲ್ಯಾ ಪೊರಾಕ್ ಬಲ್ವುನ್ ಶಿಸಾಂಚ್ಯಾ ಇದ್ರಾಕ್ ಇಬೆ ಕರ್‍ಲ್ಯಾನ್, ಅನಿ ತ್ಯಾ ಪೊರಾಕ್ ಯ್ಯಾಂಗ್ ಮಾರುನ್ 37 "ಜೊ ಮಾನುಸ್ ಎಕ್ ಬಾರಿಕ್ ಪೊರಾಕ್ ಮಾಜ್ಯಾ ನಾವಾನ್ ಸ್ವಿಕಾರ್ ಕರ್‍ತಾ, ತೊ ಮಾಕಾಚ್ ಸ್ವಿಕಾರ್ ಕರ್‍ತಾ, ಮಾಕಾ ಜೊ ಕೊನ್ ಸ್ವಿಕಾರ್ ಕರ್‍ತಾ ತೊ ಮಾಕಾ ಎವ್ಡೆಚ್ ನ್ಹಯ್, ಮಾಕಾ ಧಾಡಲ್ಲ್ಯಾಕುಚ್ ಸ್ವಿಕಾರ್ ಕರ್‍ತಾ" ಮಟ್ಲ್ಯಾನ್.

38 ಜುವಾಂವಾನ್ ಜೆಜುಕ್ "ಗುರುಜಿ, ಕೊನ್ಕಿ ಎಕ್ಲೊ ತುಜ್ಯಾ ನಾವಾನ್ ಗಿರೆ ಕಾಡ್ತಲೆ ಅಮಿ ಬಗಟ್ಲಾವ್, ತೊ ಅಮ್ಚೊ ಮಾನುಸ್ ನ್ಹಯ್, ತಸೆ ಮನುನ್ ತುಜೆ ನಾವ್ ಘೆವ್ನ್ ಹೆ ಸಗ್ಳೆ ಕರುನಕೊ ಮನುನ್ ಅಮಿ ತೆಕಾ ಸಾಂಗ್ಲಾಂವ್" ಮಟ್ಲ್ಯಾನ್.

39 ತನ್ನಾ ಜೆಜುನ್ "ತೆಕಾ ಅಡ್ವುನಕಾಶಿ, ಮಾಜ್ಯಾ ನಾವಾನ್ ಅಜಾಪಾ ಕರ್‍ತಲೊ ತನ್ನಾಚ್ ಮಾಜ್ಯಾ ವಿಶಯಾತ್ ಬುರ್ಶೆ ಸಾಂಗುಕ್ ಸಾದ್ಯ್ ನಾ, 40 ಜೆ ಕೊನ್ ಅಮ್ಕಾ ವಿರೊದ್ ನಾ ತೊ ಅಮ್ಚೊ ದೊಸ್ತುಚ್. 41 ಖರೆಚ್ ಮಿಯಾ ತುಮ್ಕಾ ಸಾಂಗ್ತಾ, ತುಮಿ ಮಾಜ್ಯೆ ಮನುನ್ ಕಳುನ್, ಕೊನ್ ತರ್ ತುಮ್ಕಾ ಎಕ್ ತಾಂಬ್ಯಾ ಪಾನಿ ದಿಲ್ಯಾರ್ಬಿ, ತೆಂಕಾ ತೆಚೊ ಪ್ರತಿಫಳ್ ಖರೆಚ್ ವಾವುನುಚ್ ಗಾವ್ತಾ." ಮಟ್ಲ್ಯಾನ್.

42 "ಮಾಜೆ ವರ್‍ತಿ ವಿಶ್ವಾಸ್ ಥವ್ತಲ್ಯಾ ಹ್ಯಾ ಬಾರಿಕ್ಲ್ಯಾತ್ನಿ, ಎಕ್ಲ್ಯಾಕ್ ಸೈತ್ ವಿಶ್ವಾಸ್ ಕಳ್ದುನ್ ಘೆವ್ಕ್ ಕೊನ್ ಕಾರನ್ ಹೊತಾ, ತೆಚಾ ಗಳ್ಯಾತ್ ಎಕ್ ಮೊಟೊ ಜಾತ್ಯಾಚೊ ಗುಂಡೊ ಭಾಂದುನ್ ಸಮುಂದರಾತ್ ತಾಕಲ್ಲೆ ಬರೆ, 43 ತುಜೊ ಹಾತ್ ತುಜೊ ವಿಶ್ವಾಸ್ ಕಳ್ದುನ್ ಘೆವ್ಕ್ ಕಾರನ್ ಹೊತಾ ಜಾಲ್ಯಾರ್, ತೊ ಕಾತ್ರುನ್ ಕಾಡುನ್ ಸೊಡ್, ದೊನ್ ಹಾತಾ ಘೆವ್ನ್ ಕನ್ನಾಚ್ ಇಜಿನಸಲ್ಲಿ ಆಗ್ ಹೊತ್ತ್ಯಾ ನರ್ಕಾತ್ ಜಾತಲ್ಯಾಚ್ಯಾನ್ಕಿ, ಎಕ್ ಹಾತ್ ನಸ್ತಾನಾ ನಿರಂತರ್ ಜಿವನಾಕ್ ಜಾತಲೆ ಕವ್ಡೆಕಿ ಬರೆ. 44 ಉಲ್ಲ್ಯಾ ಗ್ರಿಕ್ ಪ್ರತಿಯಾತ್ನಿ ಚಾಳಿಸಾರ್ ಚಾರ್ವೆವೆಚಿ ಗೊಸ್ಟ್ ಹಾಯ್, ತೆ ಚಾಳಿಸಾರ್ ಆಟ್ವೆಚಿ ಗೊಸ್ಟ್ ಅಸಲ್ಲ್ಯಾ ಸರ್ಕೆ ಹಾಯ್. 45 ತುಜೊ ಪಾಯ್ ತುಜೊ ವಿಶ್ವಾಸ್ ಕಳ್ದುನ್ ಘೆವ್ಕ್ ಕಾರನ್ ಹೊತಾ ಜಾಲ್ಯಾರ್, ತೊ ಪಾಯ್ ಕಾತ್ರುನ್ ಕಾಡ್, ದೊನ್ ಪಾಯಾ ಘೆವ್ನ್ ಕನ್ನಾಚ್ ಇಜಿನಸಲ್ಲಿ ಆಗ್ ಹೊತ್ತ್ಯಾ ನರ್ಕಾಕ್ ಜಾತಲ್ಲ್ಯಾಚ್ಯಾನ್ಕಿ ಎಕ್ ಪಾಯ್ ನಸ್ತಾನಾ ಸೊಟ್ಟೊ ಹೊವ್ನ್ ನಿರಂತರ್ ಜಿವನಾಕ್ ಜಾತಲೆ ಬರೆ. 46 ಉಲ್ಲ್ಯಾ ಗ್ರಿಕ್ ಪ್ರತಿಯಾತ್ನಿ 46 ವೆಚಿ ಗೊಸ್ಟ್ ಹಾಯ್, ತಿ ಗೊಸ್ಟ್ 48 ವೆಚಿ ಗೊಸ್ಟ್ ಹೊತ್ತ್ಯಾ ಸರ್ಕಿಚ್ ಹಾಯ್ . 47 ಅನಿ ತುಜೊ ಡೊಳೊ ತುಜೊ ವಿಶ್ವಾಸ್ ಕಳ್ದುನ್ ಘೆವ್ಕ್ ಕಾರನ್ ಹೊತಾ ಜಾಲ್ಯಾರ್, ತೊ ಡೊಳೊ ಕಾಡುನ್ ಟಾಕ್, ದೊನ್ ಡೊಳೆ ಥವ್ನ್ ಘೆವ್ನ್ ನರ್ಕಾತ್ ಜಾತಲ್ಯಾನ್ಕಿ ಎಕ್ ಡೊಳೊ ಘೆವ್ನ್ ದೆವಾಚ್ಯಾ ರಾಜ್ಜ್ಯಾಕ್ ಜಾತಲೆ ಕವ್ಡೆಕಿ ಬರೆ. 48 ನರ್ಕಾತ್ ತೆಂಕಾ ಚಾಂವ್ತಲೊ ಕಿಡೊ ಕನ್ನಾಚ್ ಮರಿನಾ, ಅನಿ ತೆಂಕಾ ಜಾಳ್ವುತಲಿ ಆಗ್ ಕನ್ನಾಚ್ ಇಜಿನಾ."

49 "ಬಲಿ ಮಿಟ್ಟಾನ್ ಪವಿತ್ರ್ ಕರ್ಲ್ಯಾ ಸರ್ಕೆ ಸಗ್ಳ್ಯಾ ಜಾನಾಕ್ನಿ ಆಗಿನ್ ಪವಿತ್ರ್ ಕರುನ್ ಹೊತಾ."

50 "ಮಿಟ್ ಬರೆ ಹೊಯ್, ಖರೆ ಮಿಟ್ಟಾನುಚ್ ಅಪ್ನಾಚಿ ರುಚಿ ಕಳ್ದುನ್ ಘೆಟ್ಲ್ಯಾನ್ ತರ್ ತೆಕಾ ಖಾರ್ಪಾನ್ ಖೈತ್ನಾ ಹಾಂತ್ಯಾಸಿ?

ತುಮ್ಚ್ಯಾ ಮದ್ದಿ ಮಿಟಾ ಸಾರ್ಕೊ ಪ್ರೆಮ್ ರ್‍ಹಂವ್ದಿತ್,

ಎಕಾಮೆಕಾಕ್ ಸಮಾದಾನಾನ್ ರ್‍ಹಾವಾ" ಮಟ್ಲ್ಯಾನ್.