1 ತ್ಯಾ ಎಳಾರ್ ಗಾಲಿಲಿಯಾಚೊ ರಾಜಾ ಹೊವ್ನ್ ಹೊತ್ತ್ಯಾ ಹೆರೊದಾನ್ ಜೆಜುಚ್ಯಾ ವಿಶಯಾತ್ ಆಯಿಕ್ಲ್ಯಾನ್. 2 ತನ್ನಾ ತೆನಿ ಅಪ್ನಾಚ್ಯಾ ಅದಿಕಾರ್‍ಯಾಕ್ನಿ, "ತೊ ಖರೆಚ್ ಜುವಾಂವ್ ಬಾವ್ತಿಸ್ ಮರಲ್ಲೊ ಝಿತ್ತೊ ಹೊವ್ನ್ ಯೆಲಾ, ತಸೆ ಮನುನ್ ತೆಕಾ ಮೊಟಿ ವಿಚಿತ್ರ್ ಕಾಮಾ ಕರ್‍ತಲಿ ತಾಕತ್ ಹಾಯ್," ಮನುನ್ ಸಾಂಗಟ್ಲ್ಯಾನ್.

3 ಅದ್ದಿ ಹೆರೊದಾನ್ ಜುವಾಂವಾಕ್ ಧರುನ್ ಹಾನುಕ್ ಹುಕುಮ್ ದಿಲ್ಲ್ಯಾನ್ ಅನಿ ತೆಕಾ ಸರ್‍ಪೊಳಿನಿ ಭಾಂದುನ್ ಬಂದಿಖಾನ್ಯಾತ್ ಘಾಟಲ್ಲ್ಯಾನ್. ತೆಚ್ಯಾ ಭಾವಾಚ್ಯಾ ಪಿಲಿಪಾಚ್ಯಾ ಬಾಯ್ಕೊಕ್ ಹೆರೊದಿಯಾಸಾಕ್ ಲಾಗುನ್ ತೆನಿ ಅಶೆ ಕರಲ್ಲ್ಯಾನ್. 4 ಎಕ್ ಉಲ್ಲೆಂದಾ ಜುವಾಂವ್ ಬಾವ್ತಿಸ್ ಹೆರೊದಾಕ್, "ತಿಯಾ ಹೆರೊದಿಯಾಸಾಕ್ಡೆ ನಗಿನ್ ಹೊತಲೆ ಖಾಯ್ದ್ಯಾಚ್ಯಾ ವಿರೊದ್ ಹಾಯ್". ಮನುನ್ ಸಾಂಗುಕ್ ಲಾಗಲ್ಲೊ. 5 ಹೆರೊದ್ ಜುವಾಂವಾಕ್ ಜಿವಾನಿ ಮಾರುಕ್ ಬಗಿ, ಖರೆ ತೊ ಜುದೆವ್ ಲೊಕಾಕ್ನಿ ಭಿಂವಲ್ಲೊ. ಕಶ್ಯಾಕ್ ಮಟ್ಲ್ಯಾರ್ ತೆನಿ ಜುವಾಂವ್ ಎಕ್ ಪ್ರವಾದಿ ಮನುನ್ ಮಾನುನ್ ಘೆಯ್ತ್.

6 ಹೆರೊದಾಚ್ಯಾ ಜಲ್ಮಾಚ್ಯಾ ದಿಸಿ ಹೆರೊದಿಯಾಸಾಚ್ಯಾ ಲೆಕಿನ್ ಸಗ್ಳ್ಯಾಂಚ್ಯಾ ಇದ್ರಾಕ್ ನಾಚ್ಲಿನ್ ತಸೆಮನುನ್ ಹೆರೊದಾಕ್ ಲೈ ಕುಶಿ ಹೊಲಿ. 7 ತನ್ನಾ ಹೆರೊದಾನ್ ತಿಕಾ,"ಹೆಚೆಸಾಟ್ನಿ ಮಿಯಾ ಆನ್ ಘಾಲುನ್ ಸಾಂಗ್ತಾ ತಿಯಾ ಕಾಯ್ ಮಾಗಟ್ಲ್ಯಾರ್‍ಬಿ, ಮಿಯಾ ತುಕಾ ದಿತಾ". ಮನುನ್ ಗೊಸ್ಟ್ ದಿಲ್ಯಾನ್.

8 ತೆನಿ ಅಪ್ನಾಚ್ಯಾ ಬಾಯ್‍ಕಡೆ ಇಚಾರುನ್ ಘೆಟ್ಲಿನ್. ತನ್ನಾ ತೆನಿ ರಾಜಾಕ್ಡೆ, " ಹಿತ್ತೆ ಅತ್ತಾಚ್ ಮಾಕಾ ಜುವಾಂವ್ ಬಾವ್ತಿಸಾಚೆ ಟಕ್ಲೆ ಎಕ್ ಆಯ್ದಾನಾತ್ನಾ ಪಾಜೆ!" ಮನುನ್ ಮಾಗಟ್ಲಿನ್.

9 ರಾಜಾಕ್ ಬೆಜಾರ್ ದಿಸ್ಲೊ. ಖರೆ ಸಗ್ಳ್ಯಾ ಯೆಲ್ಲ್ಯಾ ಸೊಯ್ರ್ಯಾಂಚ್ಯಾ ಇದ್ರಾಕ್ ದಿಲ್ಲ್ಯಾ ಗೊಸ್ಟಿಕ್‍ಲಾಗುನ್ ತ್ಯಾ ಚೆಡ್ವಾನ್ ಇಚಾರಲ್ಲೆ ಕರುಕ್ ಸೈನಿಕಾಕ್ನಿ ಹುಕುಮ್ ದಿಲ್ಯಾನ್. 10 ಅಶೆ ತೆನಿ ಬಂದಿಖಾನ್ಯಾತುಚ್ ಜುವಾಂವಾಚೆ ಚಂಡ್ ತೊಡುಕ್ ಲಾವ್ಲ್ಯಾನ್. 11 ಅಶೆ ತೆ ಟಕ್ಲೆ ಎಕ್ ಆಯ್ದಾನಾತ್ನಾ ಹಾನುನ್ ತ್ಯಾ ಚೆಡ್ವಾಚ್ಯಾ ಹಾತಿತ್ ದಿವ್ನ್ ಹೊಲೆ. ತ್ಯಾ ಚೆಡ್ವಾನ್ ತೆ ಅಪ್ನಾಚ್ಯಾ ಬಾಯ್‍ಕಡೆ ನ್ಹೆವ್ನ್ ದಿಲ್ಯಾನ್. 12 ಜುಂವಾವಾಚಿ ಶಿಸಾ ಯೆವ್ನ್ ಜುವಾಂವಾಚೆ ಮಡೆ ಘೆವ್ನ್ ಗೆಲ್ಯಾನಿ ಅನಿ ಮಾಟಿ ದಿಲ್ಯಾನಿ. ಮಾನಾ ತೆನಿ ಜೆಜುಕ್ಡೆ ಗೆಲೆ ಅನಿ ಹೆ ಸಗ್ಳೆ ಜೆಜುಕ್ ಸಾಂಗ್ಲ್ಯಾನಿ.

13 ಜುಂವಾವಾಚಿ ಹಿ ಖಬರ್ ಆಯ್ಕಲ್ಲ್ಯಾ ತನ್ನಾ ಜೆಜು ಎಕ್ ಢೊನಿತ್ ಚಡ್ಲೊ. ಅನಿ ತೊ ಅಪ್ನಾಚ್ಯಾ ಎವ್ಡ್ಯಾಕ್ ಎಕ್ ಕೊನ್‍ಬಿ ನಸಲ್ಲ್ಯಾ ಜಾಗ್ಯಾಕ್ ಗೆಲೊ. ಹೆ ಆಯ್ಕಲ್ಲಿ ಲೊಕಾ ಅಪ್ನಾಚ್ಯಾ ಗಾವಾನಿತ್ನಾ ಯೆವ್ನ್ ಪಾಯ್ ವಾಟಾನಿ ಚಲುನ್ಗೆತ್ ಜೆಜುಚ್ಯಾ ಫಾಟೊ-ಫಾಟ್ ಜೆಜು ಹೊತ್ತ್ಯಾಕ್ಡೆ ಗೆಲಿ. 14 ಜೆಜು ಢೊನಿತ್ನಾ ಭಾಯ್ರ್ ಯೆಲೊ ಅನಿ ಹ್ಯಾ ಎವ್ಡ್ಯಾ ಮೊಟ್ಯಾ ಲೊಕಾಂಚ್ಯಾ ತಾಂಡ್ಯಾಕ್ ಬಗುನ್ ತೆಕಾ ತೆಂಚ್ಯಾ ವರ್‍ತಿ ದಯಾ ಯೆಲಿ. ತೆನಿ ತ್ಯಾತುರ್‍ಲ್ಯಾ ಆರಾಮ್‍ನತ್ತ್ಯಾ ಲೊಕಾಕ್ನಿ ಆರಾಮ್ ಕರ್‍ಲ್ಯಾನ್. 15 ತ್ಯಾಚ್ ದಿಸ್ ಸಾಂಚೆಕ್ಡೆ ತೆಚಿ ಶಿಸಾ ಯೆಲಿ. ಅನಿ, "ಅತ್ತಾ ಬಗಟ್ಲ್ಯಾರ್ ಲೈ ಎಳ್ ಹೊಲೊ ಹ್ಯೊ ಜಾಗೊ ಬಗಟ್ಲ್ಯಾರ್ ಎಕ್ ನಮುನಿ ಭಾಯ್ರ್ ಕಾಡುನ್ ಟಾಕ್ಲ್ಯಾ ಸರ್ಕೊ ಹಾಯ್, ಲೊಕಾಕ್ನಿ ಧಾಡುನ್ ದಿ. ತೆನಿ ಗಾಂವಾತ್ನಿ ಜಾವ್ನ್ ಜೆವ್ನಾಕ್ ಇಕಾತ್ ಹಾನುನ್ದಿತ್." ಮಟ್ಲ್ಯಾನಿ.

16 ಜೆಜುನ್ ತೆಂಕಾ, "ಲೊಕಾ ಹಿತ್ನಾ ಜಾತಲೆ ನಕ್ಕೊ. ತುಮಿಚ್ ತೆಂಕಾ ಕಾಯ್ತರ್ ಖಾವ್ಕ್ ದಿವಾ!" ಮಟ್ಲ್ಯಾನ್ .

17 ತನ್ನಾ ತೆನಿ "ಅಮ್ಚೆಕ್ಡೆ ಖಾಲಿ ಪಾಚ್ ಭಾಕ್ರಿಯಾ ಅನಿ ದೊನ್ ಮೊಸೊಳ್ಯಾ ಹಾತ್." ಮಟ್ಲ್ಯಾನಿ.

18 ತನ್ನಾ ಜೆಜುನ್, "ತೆ ಮಾಜೆಕ್ಡೆ ಘೆವ್ನ್ ಯೆವಾ." ಮಟ್ಲ್ಯಾನ್. 19 ತೆನಿ ಲೊಕಾಕ್ನಿ ಜಿಮ್ನಿರ್ ಗವ್ತಾ ವರ್‍ತಿ ಬಸುಕ್ ಸಾಂಗ್ಲ್ಯಾನ್; ತನ್ನಾ ತೆನಿ ಪಾಚ್ ಭಾಕ್ರಿಯಾ ಅನಿ ದೊನ್ ಮೊಸೊಳ್ಯಾ ಹಾತಿತ್ ಘೆಟ್ಲ್ಯಾನ್ ಅನಿ ವೈರ್ ಸರ್‍ಗಾಕ್ ಅಪ್ನಾಚಿ ನದರ್ ಲಾವ್ಲ್ಯಾನ್ ಅನಿ ದೆವಾಕ್ ಧನ್ಯವಾದ್ ದಿವ್ನ್ ಭಾಕ್ರಿಯಾ ಮೊಡ್ಲ್ಯಾನ್ ಅನಿ ಶಿಸಾನಿಕ್ಡೆ ದಿಲ್ಯಾನ್ ತನ್ನಾ ಶಿಸಾನಿ ಲೊಕಾಕ್ನಿ ವಾಟ್ಲ್ಯಾನಿ. 20 ಸಗ್ಳ್ಯಾ ಲೊಕಾನಿ ಪೊಟ್‍ಭರ್ ಜೆವ್ಲ್ಯಾನಿ. ಮಾನಾ ಹುರಲ್ಲೆ ಶಿಸಾನಿ ಗೊಳಾ ಕರ್‍ಲ್ಯಾನಿ ತನ್ನಾ ಬಾರಾ ಭುಟಿಯಾ ಭರ್‍ಲ್ಯಾ. 21 ಜೆವಾನ್ ಕರಲ್ಲ್ಯಾ ಲೊಕಾತ್ನಿ ಸುಮಾರ್ ಪಾಚ್ ಹಜಾರ್ ಘೊಮನ್ಸಾಚ್ ಹೊತ್ತಿ. ಬಾಯ್ಕೊಮನ್ಸಾ ಅನಿ ಪೊರಾ ಕವ್ಡಿ ಹೊತ್ತಿ ಮನುನ್ ಮೆಜಲ್ಲೆ ನತ್ತೆ.

22 ಲೊಕಾಕ್ನಿ ಧಾಡ್ತಾನಾ ಜೆಜುನ್ ಶಿಸಾಕ್ನಿ ಢೊನಿತ್ ಚೆಡುಕ್ ಲಾವ್ಲ್ಯಾನ್. ಶಿಸಾ ಢೊನಿತ್ ಚಡ್ಲಿ ಅನಿ ತೆಂಕಾ ಫಿಡೆ ಸಮುಂದರಾಚ್ಯಾ ತಿಕುಲ್ಯಾ ದಂಡೆಕ್ ಧಾಡ್ಲ್ಯಾನ್. 23 ಸಗ್ಳ್ಯಾ ಲೊಕಾಕ್ನಿ ಧಾಡುನ್ ಹೊಲ್ಲ್ಯಾ ತನ್ನಾ ತೊ ಎಕ್ಲೊಚ್ ಮಾಗ್ನಿ ಕರುಕ್ ಮನುನ್ ಎಕ್ ಮಡ್ಡಿ ವರ್‍ತಿ ಗೆಲೊ. ತನ್ನಾ ಕಾಳೊಕ್ ಹೊವ್ನಗೆತ್ ಯೆಲ್ಲೊ; ತನ್ನಾ ಥೈ ಜೆಜು ಎಕ್ಲೊಚ್ ಹೊತ್ತೊ. 24 ತನ್ನಾ ತಿ ಢೊನ್ ಜಮಿನ್ ಸೊಡುನ್ ಸಮುಂದರಾತ್ ಸುಮಾರ್ ಭುತ್ತುರ್ ಪಾವಲ್ಲಿ. ವಾರೊ ಢೊನ್ ಜಾತಲ್ಯಾ ವಿರೊದ್ ದಿಕ್ಕಾಕ್ ಮಾರಿ ತಸೆಮನುನ್ ಲ್ಹಾಟಾತ್ನಿ ಗಾವುನ್ ಢೊನ್ ವೈರ್-ಖಾಯ್ಲ್ ಹೊಯ್.

25 ಸಕ್ಕಾಳ್ಚೆ ಕೊಂಬೊ ಭೊಕ್ತಲ್ಯಾ ಏಳಾರ್ ಜೆಜು ಪಾನಿಯಾ ವರ್‍ತಿ ಚಲುನ್ಗೆತ್ ಶಿಸಾಂಚ್ಯಾಕ್ಡೆ ಯೆಲೊ. 26 ಜೆಜು ಪಾನಿಯಾ ವರ್‍ತಿ ಚಲುನ್ ಯೆತಲೆ ಬಗುನ್ ಶಿಸಾ ವಾಯ್ಟ್ ಭಿಂಯಾಲೆ. ಅನಿ "ಭುತ್", ಮನುನ್ ಭಿಯಾನಿ ತೆನಿ ಬೊಬ್ ಮಾರ್‍ಲ್ಯಾನಿ. 27 ತನ್ನಾ ಎಗ್ದಮ್ ಜೆಜುನ್ ತೆಂಕಾ,"ಧೈರೊ ಕರಾ, ಭಿಂವ್‍ನಕಾಶಿ. ಮಿಯಾ ತೊ!" ಮಟ್ಲ್ಯಾನ್.

28 ತನ್ನಾ ಪೆದ್ರುನ್,"ಧನಿಯಾ, ಖರೆಚ್ ತಿಯಾ ಹೊಯ್ ಹೊಲ್ಯಾರ್ ಪಾನಿಯಾ ವೈನಾ ಚಲುನ್ ತುಜೆಕ್ಡೆ ಯೆ ಮನುನ್ ಮಾಕಾ ಬಲ್ವು!" ಮಟ್ಲ್ಯಾನ್.

29 ಜೆಜುನ್ ತೆಕಾ,"ಯೆ, ತರ್!" ಮನುನ್ ಜಬಾಬ್ ದಿಲ್ಯಾನ್. ತನ್ನಾ ಪೆದ್ರು ಢೊನಿತ್ನಾ ಪಾನಿಯಾ ವರ್‍ತಿ ಯೆಲೊ ಅನಿ ಪಾನಿಯಾ ವರ್‍ತಿ ಚಲುನ್ಗೆತ್ ಜೆಜುಕ್ಡೆ ಯೆವ್‍ಲಾಗಲ್ಲೊ. 30 ಖರೆ ಭೊತ್ಯಾನಿ ಹೊತ್ತ್ಯಾ ಮೊಟ್ಯಾ ವಾರ್‍ಯಾಕ್ ಬಗುನ್ ತೊ ಭಿಂಯಾಲೊ ಅನಿ ಪಾನಿಯಾತ್ ಬುಡುಕ್‍ಲಾಲೊ. ಅನಿ,"ಧನಿಯಾ, ಮಾಕಾ ಹುರ್‍ವುನ್ ಘೆ!" ಮನುನ್ ಬೊಬ್ ಮಾರ್‍ಲ್ಯಾನ್.

31 ತನ್ನಾ ತಾಬೊಡ್ತೊಬ್ ಜೆಜು ತೆಚೆಕ್ಡೆ ಯೆಲೊ ಅನಿ ತೆಕಾ ಧರ್‍ಲ್ಯಾನ್. ಅನಿ, "ಕವ್ಡೊ ಕಮಿ ವಿಶ್ವಾಸ್ ತುಜೊ! ತಿಯಾ ಕಶ್ಯಾಕ್ ಸಂಶೆವ್ ಕರ್‍ಲೆ?" ಮಟ್ಲ್ಯಾನ್.

32 ತೆನಿ ದೊಗೆಬಿ ಢೊನಿತ್ ಚೆಡ್ಲ್ಯಾನಿ. ತನ್ನಾ ವಾರೊ ಬಂದ್ ಹೊಲೊ. 33 ತನ್ನಾ ಢೊನಿತ್ಲ್ಯಾ ಶಿಸಾನಿ ಜೆಜುಚೆ ಆರಾದನ್ ಕರ್‍ಲ್ಯಾನಿ, ಅನಿ "ತಿಯಾ ಖರೆಚ್ ದೆವಾಚೊ ಲೆಕ್." ಮಟ್ಲ್ಯಾನಿ.

34 ತೆನಿ ಸಮುಂದರ್ ದಾಟುನ್ ಗೆನಜರೆತ್ ಮನ್ತಲ್ಯಾ ಜಾಗ್ಯಾರ್ ಯೆವ್ನ್ ಪಾವ್ಲೆ. 35 ಥೈತ್ಲ್ಯಾ ಲೊಕಾನಿ ಜೆಜುಕ್ ವಳಕ್ಲ್ಯಾನಿ ಅನಿ ಅಪ್ನಾಚ್ಯಾ ದೆಸಾತ್ಲ್ಯಾ ಸಗ್ಳ್ಯಾ ಶಿಕ್ ಹೊತ್ತ್ಯಾ ಲೊಕಾಕ್ನಿ ಜೆಜುಕ್ಡೆ ಘೆವ್ನ್ ಯೆಲ್ಯಾನಿ. 36 ತೆನಿ ಶಿಕ್ ಹೊತ್ತ್ಯಾ ಲೊಕಾಕ್ನಿ ತುಜ್ಯಾ ಅಂಗಿಚ್ಯಾ ತುದಿಚ್ಯಾ ಘೊಂಡ್ಯಾಕ್ ತರ್‍ಬಿ ಹಾತ್ ಲಾವಿ ಸರ್ಕೊ ಅವ್ಕಾಸ್ ಕರುನ್ ದಿ ಮನುನ್ ಮಾಗ್ಲ್ಯಾನಿ. ಅನಿ ಕೊನ್ ಕೊನ್ ತೆಚ್ಯಾ ಅಂಗಿಕ್ ಅಪಡ್ಲ್ಯಾನಿ ತೆನಿ ಬರೆ ಹೊಲ್ಯಾನಿ.