1 ಜೆಜುನ್ ಹೆ ಸಗ್ಳೆ ಶಿಕ್ವುನ್ ಸರಲ್ಲ್ಯಾ ತನ್ನಾ ಅಪ್ನಾಚ್ಯಾ ಶಿಸಾಕ್ನಿ. 2 "ತುಮ್ಕಾ ಗೊತ್ತ್ ಹೊತ್ತ್ಯಾ ಸರ್ಕೆ ದೊನ್ ದಿಸಾಂಚ್ಯಾ ಮಾನಾ ಪಾಸ್ಕಾಚೊ ಸನ್ ಹಾಯ್ ಅನಿ ಮಾನ್ಸಾಚ್ಯಾ ಲೆಕಾಕ್ ಕುರ್ಸಾರ್ ಮಾರುಕ್ ಮನುನ್ ಧರುನ್ ದಿವ್ನ್ ಹೊತಾ." ಮನುನ್ ಸಾಂಗಟ್ಲ್ಯಾನ್.

3 ತನ್ನಾ ಮುಖ್ಯ ಯಾಜಕಾ ಅನಿ ಜಾನ್ತಿ ಲೊಕಾ ಕಾಯಿಫಾಸ್ ಮನ್ತಲ್ಯಾ ಮಹಾಯಾಜಕಾಚ್ಯಾ ಘರಾಕ್ಡೆ ಜಮ್ಲೆ. 4 ಅನಿ ಕೊನಾಕ್ಬಿ ಕಳಿನಸ್ತಾನಾ ಜೆಜುಕ್ ಧರುನ್ ಜಿವಾನಿ ಮಾರ್‍ತಲೆ ಕಶೆ ಮನುನ್ ಯವ್ಜನ್ ಘಾಟ್ಲ್ಯಾನಿ. 5 ತನ್ನಾ ತೆನಿ,"ಸನಾಚ್ಯಾ ದಿಸಾತ್ನಿ ಹೆ ಸಗ್ಳೆ ಕರ್‍ತಲೆ ನಕ್ಕೊ ಲೊಕಾ ಡಂಗೊ ಉಟ್ವುತಿಲ್." ಮಟ್ಲ್ಯಾನಿ.

6 ಜೆಜು ಬೆಥನಿ ಮನ್ತಲ್ಯಾ ಗಾಂವಾತ್ ಎಕ್ ಕಾಲಾತ್ ಕುಸ್ಟ್ ರೊಗ್ ಲಾಗುನ್ ತರಾಸ್ ಕರುನ್ ಘೆಟಲ್ಲ್ಯಾ ಸಿಮಾವಾಚ್ಯಾ ಘರಾತ್ ಹೊತ್ತೊ. 7 ಜೆಜು ಜೆವಾನ್ ಕರುನ್ಗೆತ್ ಬಸಲ್ಲ್ಯಾ ತನ್ನಾ ಎಕ್ ಬಾಯ್ಕೊಮಾನುಸ್ ಲೈ ಮ್ಹಾಗ್ರೆ ಬರಿ ವಾಸ್ ಯೆತಲೆ ತೆಲ್ ಅಲಾಬಾಸ್ಟರ್ ಮನ್ತಲ್ಯಾ ಗುಂಡ್ಯಾನಿ ಕರಲ್ಲ್ಯಾ ಭರ್‍ನಿ ಘೆವ್ನ್ ಯೆಲಿ ಅನಿ ತೆ ತೆಲ್ ಜೆಜುಚ್ಯಾ ಟಕ್ಲ್ಯಾ ವರ್‍ತಿ ವೊತ್ಲಿನ್. 8 ಜೆಜುಚ್ಯಾ ಶಿಸಾಕ್ನಿ ಹೆ ಬಗುನ್ ರಾಗ್ ಯೆಲೊ, ಅನಿ ತೆನಿ, "ಕಶ್ಯಾಕ್ ಹೆ ಎವ್ಡೆ ಸಗ್ಳೆ ಹಾಳ್ ಘಾಲ್ತಲೆ? 9 ಹೆ ತೆಲ್ ಜಾಸ್ತಿ ಪೈಸ್ಯಾಕ್ನಿ ಇಕುನ್ ತೆ ಪೈಸೆ ಗರಿಬಾಕ್ನಿ ದಿಲ್ಯಾರ್ ಹೊಯ್‍ ಹೊತ್ತೆ ನ್ಹಯ್!" ಮನುನ್ ಇಚಾರ್‍ಲ್ಯಾನಿ.

10 ಜೆಜುಕ್ ತೆನಿ ಕಾಯ್ ಮನುಲ್ಯಾತ್ ಮನ್ತಲೆ ಕಳ್ಳೆ. ತಸೆಮನುನ್ ತೆನಿ ತೆಂಕಾ,"ಕಶ್ಯಾಕ್ ಮನುನ್ ತುಮಿ ಹ್ಯಾ ಬಾಯ್ಕೊಮನ್ಸಿಕ್ ತರಾಸ್ ದಿವ್ಕ್ ಲಾಗ್ಲ್ಯಾಶಿ? ತೆನಿ ಮಾಜೆಸಾಟ್ನಿ ಎಕ್ ಬರೆ ಕಾಮ್ ಕರ್‍ಲಿನಾಯ್. 11 ಗರಿಬ್ ಲೊಕಾ ಕನ್ನಾಬಿ ತುಮ್ಚ್ಯಾ ವಾಂಗ್ಡಾ ರ್‍ಹಾತ್ಯಾತ್, ಖರೆ ಮಿಯಾ ತುಮ್ಚ್ಯಾ ವಾಂಗ್ಡಾ ಕನ್ನಾಬಿ ರ್‍ಹಾಯ್ನಾ. 12 ತೆನಿ ಮಾಜ್ಯಾ ಆಂಗಾ ವರ್‍ತಿ ತೆಲ್ ವೊತುನ್ ಮಾಕಾ ಮಾಟಿ ದಿವ್ಕ್ ಮನುನ್ ತಯಾರ್ ಕರ್‍ಲಿನ್. 13 ಮಿಯಾ ತುಮ್ಕಾ ಖರೆಚ್ ಸಾಂಗ್ತಾ, ಖೈ ಹ್ಯಾ ಜಗಾತ್ ಬರಿ ಖಬರ್ ಸಾಂಗುನ್ ಹೊತಾ, ಥೈ ಥೈ ತೆನಿ ಕರಲ್ಲ್ಯಾ ಕಾಮಾಚ್ಯಾ ವಿಶಯಾತ್ ಸಾಂಗುನ್ ತಿಚಿ ಯಾದ್ ಕರುನ್ ಹೊತಾ."

14 ಬಾರಾ ಜಾನಾ ಶಿಸಾನಿತ್ಲೊ ಎಕ್ಲೊ ಜುದಾಸ್ ಇಸ್ಕರಿಯೊತ್ ಮನ್ತಲೊ ಮುಖ್ಯ ಯಾಜಕಾನಿಕ್ಡೆ ಗೆಲೊ. 15 ಅನಿ, "ಮಿಯಾ ಜೆಜುಕ್ ಧರುನ್ ದಿಲ್ಯಾರ್ ತುಮಿ ಮಾಕಾ ಕಾಯ್ ದಿತ್ಯಾಶಿ?" ಮನುನ್ ಇಚಾರ್‍ಲ್ಯಾನ್. ತನ್ನಾ ತೆನಿ ತಿಸ್ ಚಾಂದಿಚೆ ಪೈಸೆ ಮೆಜುನ್ ತೆಕಾ ದಿಲ್ಯಾನಿ. 16 ತನ್ನಾಚ್ಯಾನ್ ಜುದಾಸ್ ಇಸ್ಕರಿಯೊತ್ ಜೆಜುಕ್ ಧರುನ್ ದಿತಲೊ ಬರೊ ಅವ್ಕಾಸ್ ಹುಡ್ಕುನ್ಗೆತ್ ಹೊತ್ತೊ.

17 ಫುಗ್ ಯೆಯ್ ನಸಲ್ಲ್ಯಾ ಭಾಕ್ರಿಚ್ಯಾ ಸನಾಚ್ಯಾ ಪಯ್ಲೆಚ್ಯಾ ದಿಸಿ, ಶಿಸಾ ಜೆಜುಕ್ಡೆ ಯೆಲಿ ಅನಿ ತೆಕಾ," ಅಮಿ ಪಾಸ್ಕಾಚೆ ಜೆವಾನ್ ಖೈ ತಯಾರ್ ಕರುಚೆ ಮನುನ್ ತಿಯಾ ಮನ್ತೆಯ್?" ಮನುನ್ ಇಚಾರ್‍ಲ್ಯಾನಿ. 18 ತನ್ನಾ ಜೆಜುನ್ ತೆಂಕಾ,"ಶಾರಾತ್ಲ್ಯಾ ಅಮುಕ್‌ ಹ್ಯಾ ಮಾನ್ಸಾಕ್ಡೆ ಜಾವಾ, ಅನಿ,‘ಗುರುಜಿ, ಮಾಜೊ ಎಳ್ ಜಗ್ಗೊಳ್ ಯೆಲಾ; ಮಿಯಾ ಮಾಜ್ಯಾ ಶಿಸಾಂಚ್ಯಾ ವಾಂಗ್ಡಾ ತುಜ್ಯಾ ಘರಾತ್ ಪಾಸ್ಕಾಚ್ಯಾ ಸನಾಚೆ ಜೆವಾನ್ ಕರ್‍ತಾ,’ ಮನುಲಾ ಮನುನ್ ಸಾಂಗಾ." ಮನುನ್ ಸಾಂಗ್ಲ್ಯಾನ್.

19 ಶಿಸಾನಿ ಜೆಜುನ್ ಸಾಂಗಲ್ಲ್ಯಾ ಸರ್ಕೆಚ್ ಕರ್‍ಲ್ಯಾನಿ ಅನಿ ಪಾಸ್ಕಾಚ್ಯಾ ಸನಾಚೆ ಜೆವಾನ್ ತಯಾರ್ ಕರ್‍ಲ್ಯಾನಿ.

20 ಸಾಂಜ್ ಹೊಲ್ಲ್ಯಾ ತನ್ನಾ ಜೆಜು ಅನಿ ಬಾರಾ ಜಾನಾ ಶಿಸಾ ಜೆವ್ನಾಕ್ ಬಸ್ಲಿ. 21 ತೆನಿ ಜೆವಾನ್ ಕರ್‍ತಾನಾ ಜೆಜುನ್,"ಮಿಯಾ ತುಮ್ಕಾ ಖರೆಚ್ ಸಾಂಗ್ತಾ. ತುಮ್ಚ್ಯಾತ್ಲೊ ಎಕ್ಲೊ ಮಾಕಾ ವಿಶ್ವಾಸ್‍ ಘಾತ್ ಕರ್‍ನಾರ್ ಹಾಯ್." ಮಟ್ಲ್ಯಾನ್.

22 ಹೆ ಆಯ್ಕುನ್ ಶಿಸಾಕ್ನಿ ಲೈ ಬೆಜಾರ್ ಹೊಲೊ ಅನಿ ತೆನಿ ಎಕೆಕ್ಲೊಚ್ ಜೆಜುಕ್, "ಧನಿಯಾ, ಮಿಯಾ ತರ್ ನ್ಹಯ್, ನ್ಹಯ್?" ಮನುನ್ ಇಚಾರುಕ್‍ ಲಾಲ್ಯಾನಿ.

23 ತನ್ನಾ ಜೆಜುನ್ ತೆಂಕಾ,"ಜೆ ಕೊನ್ ಮಾಜ್ಯಾ ವಾಂಗ್ಡಾಚ್ ಆಯ್ದಾನಾತ್ ಅಪ್ನಾಕ್ಲ್ಯಾ ಭಾಕ್ರಿಚೊ ತುಕ್ಡೊ ಬುಡ್ವುತಾ, ತೊಚ್ ತೊ ಮಾಕಾ ವಿಶ್ವಾಸ್ ಘಾತ್ ಕರ್‍ತಲೊ. 24 ಪವಿತ್ರ್ ಪುಸ್ತಕಾತ್ ಸಾಂಗಲ್ಲ್ಯಾ ಸರ್ಕೆ ಮಾನ್ಸಾಚೊ ಲೆಕ್ ಮರುಕುಚ್ ಮಾಜೆ, ಅನಿ ತೊ ಮರ್‍ತಾಚ್ ಖರೆ ಮಾನ್ಸಾಚ್ಯಾ ಲೆಕಾಕ್ ವಿಶ್ವಾಸ್ ಘಾತ್ ಕರ್‍ತಲ್ಯಾಚಿ ಗತ್ ಕಾಯ್ ಸಾಂಗು! ತೊ ಉಪ್ಜುಕುಚ್ ನಸ್ಲ್ಯಾರ್ ತ್ಯಾ ಮಾನ್ಸಾಕುಚ್ ಬರೆ ಹೊತ್ತೆ!" ಮನುನ್ ಜಬಾಬ್ ದಿಲ್ಯಾನ್.

25 ವಿಶ್ವಾಸ್ ಘಾತ್ ಕರ್‍ತಲೊ ಜುದಾಸ್ ಬೊಲುಲಾಲೊ ಅನಿ "ಗುರುಜಿ, ಖರೆಬಿ ಮಿಯಾ ತರ್ ನ್ಹಯ್, ನ್ಹಯ್ ತೊ?" ಮನುನ್ ಜೆಜುಕ್ ಇಚಾರ್‍ಲ್ಯಾನ್.

ತನ್ನಾ ಜೆಜುನ್, "ತಿಯಾ ಸಾಂಗ್ಲೆ ತಸೆಚ್." ಮನುನ್ ಜಬಾಬ್ ದಿಲ್ಯಾನ್.

26 ತೆನಿ ಜೆವಾನ್ ಕರ್‍ತಾನಾ ಜೆಜುನ್ ಎಕ್ ಭಾಕ್ರಿ ಘೆವ್ನ್ ದೆವಾಕ್ ಧನ್ಯವಾದ್ ದಿಲ್ಯಾನ್, ಅನಿ ಮೊಡುನ್ ಅಪ್ನಾಚ್ಯಾ ಶಿಸಾಕ್ನಿ ದಿವ್ನ್. "ಹೆ ಘೆವಾ ಅನಿ ಖಾವಾ. ಹೆ ಮಾಜೆ ಆಂಗ್." ಮಟ್ಲ್ಯಾನ್.

27 ಮಾನಾ ತೆನಿ ಕಟೊರೊ ಘೆಟ್ಲ್ಯಾನ್ ಅನಿ ಅನಿಎಗ್ದಾ ದೆವಾಕ್ ಧನ್ಯವಾದ್ ದಿಲ್ಯಾನ್, ಅನಿ ಶಿಸಾಕ್ನಿ ದಿವ್ನ್, "ಹೆ ಘೆವಾ ಅನಿ ತುಮಿ ಸಗ್ಳೆ ಜಾನಾ ಫಿವಾ." 28 ಹೆ ದೆವಾಚ್ಯಾ ನವ್ಯಾ ಕರಾರಾಚ್ಯಾ ವರ್‍ತಿ ಛಪ್ಪೊ ಮಾರ್‍ತಲೆ ಮಾಜೆ ರಗಾತ್, ಲೈ ಜಾನಾಂಚ್ಯಾ ಪಾಪಾಂಚ್ಯಾ ಮಾಪಿ ಸಾಟ್ನಿ ವೊತಲ್ಲೆ. 29 ಮಿಯಾ ತುಮ್ಕಾ ಸಾಂಗ್ತಾ, ಮಾಜ್ಯಾ ಬಾಬಾಚ್ಯಾ ರಾಜಾತ್ ತುಮ್ಚ್ಯಾ ವಾಂಗ್ಡಾ ನ್ಹವಿ ವಾಯ್ನ್ ಫಿತಲ್ಯಾ ದಿಸಾ ಪತರ್ ಹಿ ವಾಯ್ನ್ ಮಿಯಾ ಅನಿ ಕನ್ನಾಚ್ ಫಿ ನಾ. ಮಟ್ಲ್ಯಾನ್.

30 ಮಾನಾ ತೆನಿ ಎಕ್ ಗಿತ್ ಗಾವ್ಲ್ಯಾನಿ ಅನಿ ಒಲಿವ್ ಮನ್ತಲ್ಯಾ ಮಡ್ಡಿಕ್ ಗೆಲ್ಯಾನಿ.

31 ತನ್ನಾ ಜೆಜುನ್ ಶಿಸಾಕ್ನಿ," ಆಜ್ ಹ್ಯಾಚ್ ರಾತ್ತಿನ್ ತುಮಿ ಸಗ್ಳೆ ಜಾನಾ ಮಾಕಾ ಸೊಡುನ್ ಪಳುನ್ ಜಾತ್ಯಾಶಿ. ಪವಿತ್ರ್ ಪುಸ್ತಕಾತ್ ದೆವ್ ಮನ್ತಾ, ಮಿಯಾ ಕುರ್‍ಬುರಾಕ್ ಜಿವಾನಿ ಮಾರ್‍ತಾ ಅನಿ ತಾಂಡ್ಯಾತ್ಲಿ ಬಕ್ರಿ ಸಗ್ಳಿ ಮಾಳ್ಬರ್ ಹೊತ್ಯಾತ್.*26:31 ಜೆಕ 13.7 32 ಖರೆ ಮಿಯಾ ಝಿತ್ತೊ ಹೊವ್ನ್ ಉಟಲ್ಲ್ಯಾ ತನ್ನಾ ತುಮ್ಚ್ಯಾನ್ಕಿ ಅದ್ದಿ ಗಾಲಿಲಿಯಾ ಮನ್ತಲ್ಯಾ ಜಾಗ್ಯಾಕ್ ಜಾತಾ." ಮನುನ್ ಸಾಂಗಟ್ಲ್ಯಾನ್.

33 ತನ್ನಾ ಪೆದ್ರು ಜೆಜುಕ್, "ಸಗ್ಳೆ ಜಾನಾ ತುಕಾ ಸೊಡುನ್ ಗೆಲ್ಯಾರ್‍ಬಿ, ಮಿಯಾ ತರ್ ತುಕಾ ಸೊಡುನ್ ಜಾಯ್ನಾ." ಮನುನ್ ಸಾಂಗುಕ್ ಲಾಗ್ಲೊ.

34 ತನ್ನಾ ಜೆಜುನ್ ಪೆದ್ರುಕ್,"ಮಿಯಾ ತುಕಾ ಸಾಂಗ್ತಾ ಆಜ್ ರಾಚ್ಚೆ ಕೊಂಬೊ ಭೊಕುಚ್ಯಾ ಅದ್ದಿ ತಿಯಾ ತಿನ್ ದಾ ಮಾಜಿ ತುಕಾ ವಳಕುಚ್ ನಾ ಮನುನ್ ಸಾಂಗ್ತೆಯ್." ಮಟ್ಲ್ಯಾನ್.

35 ತನ್ನಾ ಪೆದ್ರುನ್, "ಮಾಕಾ ತುಜ್ಯಾ ವಾಂಗ್ಡಾ ಮರ್‍ತಲಿ ಪರಿಸ್ತಿತಿ ಯೆಲ್ಯಾರ್‍ಬಿ, ಅಶೆ ಕನ್ನಾಚ್ ಮನಿ ನಾ!" ಮನುನ್ ಜಬಾಬ್ ದಿಲ್ಯಾನ್.

ಅನಿ ಹುರಲ್ಲ್ಯಾ ಶಿಸಾನಿಬಿ ಅಸೆಚ್ ಮಟ್ಲ್ಯಾನಿ.

36 ಮಾನಾ ಜೆಜು ಅಪ್ನಾಚ್ಯಾ ಶಿಸಾಂಚ್ಯಾ ವಾಂಗ್ಡಾ ಗೆತ್ಸೆಮನಿ ಮನ್ತಲ್ಯಾ ಮಳ್ಯಾಕ್ ಗೆಲೊ, ಅನಿ ತೆಂಕಾ,"ಮಿಯಾ ಉಲ್ಲೆ ಫಿಡೆ ಜಾವ್ನ್ ಮಾಗ್ನಿ ಕರ್‍ತಾ ತುಮಿ ಹಿತ್ತೆಚ್ ಬಸಾ." ಮಟ್ಲ್ಯಾನ್. 37 ಪೆದ್ರುಕ್ ಅನಿ ಜೆಬೆದೆವಾಚ್ಯಾ ದೊಗ್ಯಾ ಲೆಕಾಕ್ನಿ ತೆನಿ ಅಪ್ನಾಚ್ಯಾ ವಾಂಗ್ಡಾ ಬಲ್ವುನ್ ಘೆಟ್ಲ್ಯಾನ್. ದುಕ್ ಅನಿ ವಳ್ವಳೊ ತೆಚ್ಯಾ ಭುತ್ತುರ್ ಭರಲ್ಲೊ ಹೊತ್ತೊ, 38 ತೆನಿ ತೆಂಕಾ,"ಮಾಜ್ಯಾ ಜಿವಾಚೊ ಹ್ಯೊ ಮೊಟೊ ಸಂಕಟ್ ಮಾಕಾ ಚಿರ್ಡುನ್ ಮಾರುನ್ ಟಾಕ್ತಾ ಸರ್ಕೆ ಹೊವ್ಲಾ, ತುಮಿ ಹಿತ್ತೆ ಇಬೆ ರ್‍ಹಾವಾ ಅನಿ ಮಾಜ್ಯಾ ವಾಂಗ್ಡಾ ಜಾಗೆ ರ್‍ಹಾವಾ." ಮಟ್ಲ್ಯಾನ್.

39 ತೊ ಉಲ್ಲೆ ಫಿಡೆ ಗೆಲೊ ಅನಿ ಜಮ್ನಿ ವರ್‍ತಿ ಡಬ್ ಪಡುನ್, "ಮಾಜ್ಯಾ ಬಾಬಾ, ಹೊತಾ ಜಾಲ್ಯಾರ್, ಹೆ ಕಸ್ಟಾಚೆ ಆಯ್ದಾನ್ ಮಾಜ್ಯಾ ವೈನಾ ಕಾಡುನ್ ಘೆ! ಖರೆ ಮಾಜ್ಯಾ ಮನಾ ಸರ್ಕೆ ನ್ಹಯ್, ತುಜ್ಯಾ ಮನಾ ಸರ್ಕೆ ಹೊಂವ್ದಿತ್," ಮನುನ್ ಮಾಗ್ನಿ ಕರ್‍ಲ್ಯಾನ್.

40 ಮಾನಾ ತೊ ಪರ್ತುನ್ ತಿಗ್ ಜಾನಾ ಶಿಸಾನಿಕ್ಡೆ ಯೆಲೊ. ತೆನಿ ನಿಜೆನ್ ಝೆಮುಲಾಗಲ್ಲೆ. ತನ್ನಾ ಜೆಜುನ್ ಪೆದ್ರುಕ್, "ತುಮ್ಕಾ ತಿಗ್ಯಾಕ್ನಿ ಮಾಜೆಸಾಟ್ನಿ ಎಕ್ ತಾಸ್‍ಬರ್ ಸೈತ್ ಜಾಗೆ ರ್‍ಹಾವ್ಕ್ ಹೊಯ್ನಾ ಕಾಯ್? 41 ಜಾಗೆ ರ್‍ಹಾವಾ ಅನಿ ತುಮಿ ಪಾಪಾತ್ ಪಡ್ತಲ್ಯಾ ವಿಶಯಾತ್ನಿ ಪಡಿನಸ್ತಾನಾ ರ್‍ಹವ್‍ಸಾಟ್ನಿ ಮಾಗ್ನಿ ಕರಾ. ಅತ್ಮ್ಯಾಕ್ ಮನ್ ಹಾಯ್ ಹೊಯ್ ಖರೆ ಆಂಗಾಕ್ ತವ್ಡೊ ಬಳ್ ನಾ." ಮನುನ್ ಸಾಂಗಟ್ಲ್ಯಾನ್.

42 ಅನಿ ಎಗ್ದಾ ಜೆಜು ಫಿಡೆ ಗೆಲೊ ಅನಿ, "ಮಾಜ್ಯಾ ಬಾಬಾ, ಹೆ ಕಸ್ಟಾಚೆ ಆಯ್ದಾನ್ ಮಿಯಾ ಫಿಲ್ಯಾ ಸಿವಾಯ್ ಧುರ್ ಕರುಕ್ ಹೊಯ್ನಾ ಮನುನ್ ರ್‍ಹಾಲ್ಯಾರ್, ತುಜ್ಯಾ ಮನಾ ಸರ್ಕೆಚ್ ಹೊಂವ್ದಿತ್." ಮನುನ್ ಮಾಗುಕ್‍ಲಾಲೊ. 43 ತೊ ಅನಿ ಪರ್ತುನ್ ಶಿಸಾನಿಕ್ಡೆ ಗೆಲೊ ತನ್ನಾ ತೆಂಕಾ ಭರ್‍ತಿ ನಿಜ್‍ ಯೆಲ್ಲಿ; ನಿಜೆನ್ ತೆಂಚೆ ಡೊಳೆ ಉಗ್ಡಿನಸಿತ್.

44 ಅನಿ ಪರ್ತುನ್ ಜೆಜು ತೆಂಕಾ ಸೊಡುನ್ ಫಿಡೆ ಗೆಲೊ ಅನಿ ತಿನ್ವೆಪಟಿಬಿ ತೆನಿ ತಸೆಚ್ ಮನುನ್ ಮಾಗ್ನಿ ಕರ್‍ಲ್ಯಾನ್. 45 ತನ್ನಾ ತೊ ಅಪ್ನಾಚ್ಯಾ ಶಿಸಾನಿಕ್ಡೆ ಪರ್ತುನ್ ಯೆಲೊ, ಅನಿ. "ಅಜುನ್‍ಬಿ ತುಮಿ ನಿಜುನ್ ಅರಾಮ್ ಕರುಕ್ ಲಾಗ್ಲ್ಯಾಶಿ? ಅಬಕಾ! ಮಾನ್ಸಾಚ್ಯಾ ಲೆಕಾಕ್ ಧರುನ್ ಪಾಪಿ ಲೊಕಾಂಚ್ಯಾ ಹಾತಿತ್ ಒಪಸ್ತಲೊ ಎಳ್ ಯೆಲೊ". 46 "ಉಟಾ ಅಮಿ ಜಾಂವಾ. ಅಬಕಾ, ಮಾಕಾ ವಿಶ್ವಾಸ್‍ ಘಾತಾನ್ ಧರುನ್ ದಿತಲೊ ಮಾನುಸ್!" ಮಟ್ಲ್ಯಾನ್.

47 ಅಶೆ ಜೆಜು ಬೊಲುನ್ಗೆತ್ ಹೊತ್ತ್ಯಾ ತನ್ನಾಚ್ ಜುದಾಸ್ ಮನ್ತಲೊ ಬಾರಾ ಜಾನಾ ಶಿಸಾನಿತ್ಲೊ ಎಕ್ಲೊ ಥೈ ಯೆವ್ನ್ ಪಾವ್ಲೊಚ್. ತೆಚ್ಯಾ ಫಾಟ್ನಾ ಕೊಯ್ತೆ ಅನಿ ಟೊನೆ ಘೆವ್ನ್ ಎಕ್ ಮೊಟೊ ಲೊಕಾಂಚೊ ತಾಂಡೊ ಹೊತ್ತೊ. ಮುಖ್ಯ ಯಾಜಕಾನಿ ಅನಿ ಜುದೆವಾಂಚ್ಯಾ ಜಾನ್ತ್ಯಾನಿ ತೆಂಕಾ ಧಾಡುನ್ ದಿಲ್ಲ್ಯಾನಿ. 48 ಘಾತಾನ್ ಧರುನ್ ದಿತಲ್ಯಾನ್. "ಮಿಯಾ ಕೊನಾಕ್ ಉಪ್ಪಾ ದಿತಾ ತೊಚ್ ತೊ ತೆಕಾ ತುಮಿ ಧರಾ." ಮನುನ್ ಎಕ್ ವಳಕ್ ಅದ್ದಿಚ್ ತೆಂಕಾ ದಿಲ್ಲ್ಯಾನ್.

49 ಜುದಾಸ್ ಯೆಲ್ಲೊಚ್ ನಿಟ್ ಜೆಜುಕ್ಡೆ ಗೆಲೊ, ಅನಿ "ಗುರುಜಿ ಶಾಂತಿ ತುಮ್ಕಾ," ಮಟ್ಲ್ಯಾನ್ ಅನಿ ಜೆಜುಚಿ ಉಪ್ಪಾ ಘೆಟ್ಲ್ಯಾನ್.

50 ಜೆಜುನ್ ತೆಕಾ, "ಮಾಜ್ಯಾ ದೊಸ್ತಾ, ತಿಯಾ ಕಾಯ್ ಕರುಚೆ ಮನುನ್ ಯೆಲೆ ತೆ ಕಾಮ್ ಲಗ್ಗುನಾಚ್ ಕರುನ್ ಸಾರ್," ಮಟ್ಲ್ಯಾನ್.

ತವ್ಡ್ಯಾಕ್ ಮಟ್ಲ್ಯಾರ್ ತ್ಯಾ ಲೊಕಾನಿ ಯೆವ್ನ್ ಜೆಜುಕ್ ಧರುನ್ ಘೆಟ್ಲ್ಯಾನಿ.

51 ತನ್ನಾ ಜೆಜುಚ್ಯಾ ವಾಂಗ್ಡಾ ಹೊತ್ತ್ಯಾ ಎಕ್ಲ್ಯಾನ್ ಅಪ್ನಾಚೊ ಮೊಟೊ ಚಾಕು ಕಾಡುನ್ ಮೊಟ್ಯಾ ಯಾಜಕಾಚ್ಯಾ ಎಕ್ ಆಳಾಚ್ಯಾ ಕಾನಾಕ್ ಮಾರ್‍ಲ್ಯಾನ್, ತೆಚೊ ಕಾನುಚ್ ತುಟುನ್ ಪಡ್ಲೊ.

52 ತನ್ನಾ ಜೆಜುನ್ ತ್ಯಾ ಮಾನ್ಸಾಕ್ "ತುಜೊ ಮೊಟೊ ಚಾಕು ತುಜ್ಯಾ ಪಿಸ್ವಿತ್ ಘಾಲ್, ಜೆ ಕೊನ್ ಮೊಟೊ ಚಾಕು ಘೆತ್ಯಾತ್ ತೆನಿ ಚಾಕ್ವಾನಿಚ್ ನಾಸ್ ಹೊವ್ನ್ ಜಾತ್ಯಾತ್." 53 "ಮಿಯಾ ಮಾಜ್ಯಾ ಬಾಬಾಕ್ಡೆ ಮಾಗಟ್ಲ್ಯಾರ್ ತೊ ಮಾಜ್ಯಾ ಮಜತಿಕ್ ಮನುನ್ ಸೈನಿಕಾಂಚ್ಯಾ ಬಾರಾ ತಾಂಡ್ಯಾಂನ್ಚ್ಯಾನ್ಕಿ ಜಾಸ್ತಿ ದೆವಾಚ್ಯಾ ದುತಾಕ್ನಿ ಧಾಡಿನಸ್ತಾನಾ ರ್‍ಹಾತಾ ಮನುನ್ ತಿಯಾ ಚಿಂತ್ಲೆ ಕಾಯ್? 54 ಖರೆ ಅಶೆ ಹೊಲ್ಯಾರ್, ಹೊವ್ಕುಚ್ ಪಾಜೆ ಮನುನ್ ಪವಿತ್ರ್ ಪುಸ್ತಕಾತ್ ಲಿವಲ್ಲೆ ಪುರಾ ಹೊತಲೆ ಕಶೆ?" ಮಟ್ಲ್ಯಾನ್.

55 ತನ್ನಾ ಜೆಜುನ್ ತ್ಯಾ ಲೊಕಾಂಚ್ಯಾ ತಾಂಡ್ಯಾಕ್, "ಎಕ್ ಚೊರಾಕ್ ಧರುಕ್ ಯೆಲ್ಯಾ ಸರ್ಕೆ ಕೊಯ್ತೆ ಅನಿ ಟೊನೆ ಘೆವ್ನ್ ತುಮಿ ಮಾಕಾ ಧರುಕ್ ಯೆಲ್ಯಾಶಿ? ಸದ್ದಿಚ್ ಮಿಯಾ ದೆವಾಚ್ಯಾ ಗುಡಿತ್ ತುಮ್ಚ್ಯಾ ಮದ್ದಿಚ್ ಬಸುನ್ ತುಮ್ಕಾ ಶಿಕ್ವಿ, ತನ್ನಾ ತುಮಿ ಮಾಕಾ ಧರುಕ್‍ನ್ಯಾಶಿ. 56 ಖರೆ ಪ್ರವಾದ್ಯಾನಿ ಅಪ್ನಾಚ್ಯಾ ಪುಸ್ತಕಾತ್ನಿ ಸಾಂಗಲ್ಲೆ ಪುರಾ ಹೊವ್‍ಸಾಟ್ನಿ ಅಶೆ ಸಗ್ಳೆ ಹೊಲೆ." ಮಟ್ಲ್ಯಾನ್.

ತವ್ಡ್ಯಾಕ್ ಮಟ್ಲ್ಯಾರ್ ಸಗ್ಳಿ ಶಿಸಾ ಜೆಜುಕ್ ಸೊಡುನ್ ಪಳುನ್ ಗೆಲಿ.

57 ಜೆಜುಕ್ ಧರುನ್ ಘೆವ್ನ್ ಯೆಲ್ಲ್ಯಾನಿ, ತೆಕಾ ಮಹಾಯಾಜಕಾ ಕಾಯಿಫಾಸಾಚ್ಯಾ ಘರಾಕ್ಡೆ ಘೆವ್ನ್ ಗೆಲ್ಯಾನಿ. ಥೈ ಶಾಸ್ತರಾ ಶಿಕ್ವುತಲಿ ಲೊಕಾ ಅನಿ ಜಾನ್ತಿ ಲೊಕಾ ಜಮಲ್ಲಿ. 58 ಪೆದ್ರು ಧುರ್-ಧುರ್‍ನಾಚ್ ತೆಂಚ್ಯಾ ಫಾಟ್ನಾ ಮಹಾಯಾಜಕಾಚ್ಯಾ ಘರಾಚ್ಯಾ ದಾರಾತ್ ಪತರ್ ಯೆಲೊ, ತೊ ದಾರಾತ್ ಭುತ್ತುರ್ ಗುಸ್ಲೊ ಅನಿ ಕಾಯ್ ಕಾಯ್ ಹೊತಾ ಬಗುಸಾಟ್ನಿ ಮನುನ್ ರಾಕ್ವಾಲ್ಯಾಂಚ್ಯಾ ವಾಂಗ್ಡಾ ಬಸ್ಲೊ. 59 ತನ್ನಾ ಮುಖ್ಯ ಯಾಜಕಾ ಅನಿ ಸಗ್ಳಿ ಜುದೆವಾಂಚಿ ನ್ಯಾಯ್ ನಿರ್‍ನಯ್ ಕರ್‍ತಲಿ ಸಭಾ ಮಿಳುನ್ ಜೆಜುಚ್ಯಾ ವಿರೊದ್ ತೆಕಾ ಮರ್‍ನಾಚಿ ಶಿಕ್ಷಾ ದಿ ಸರ್ಕಿ ಕಸ್ಲಿಬಿ ಝುಟಿ ಸಾಕ್ಷಿ ಗಾವ್ತಾ ಕಾಯ್ ಮನುನ್ ಹುಡಕ್ಲ್ಯಾನಿ. 60 ಖರೆ ತೆಂಕಾ ಎಕ್‍ಬಿ ಸಾಕ್ಷಿ ಗಾವುಕ್ನಾ; ಜಾಲ್ಯಾರ್‍ಬಿ ಲೈ ಲೊಕಾ ತೆಚ್ಯಾ ವಿಶಯಾತ್ ಝುಟ್ಯಾ ಸಾಕ್ಷಿಯಾ ಸಾಂಗುಕ್ ಫಿಡೆ ಯೆಲಿ. ಆಕ್ರಿಕ್ ದೊಗೆ ಫಿಡೆ ಯೆವ್ನ್, 61 "ಹ್ಯೊ ಮಾನುಸ್, ದೆವಾಚಿ ಗುಡಿ ಪಾಡ್ವುನ್ ತಿನ್ ದಿಸಾತ್ನಿ ಅನಿಪರ್‍ತುನ್ ಭಾಂದ್ತಾ ಮನುನ್ ಸಾಂಗುಕ್ ಲಾಗಲ್ಲೊ." ಮಟ್ಲ್ಯಾನಿ.

62 ತನ್ನಾ ಮಹಾಯಾಜಕ್ ಇಬೆ ರ್‍ಹಾಲೊ ಅನಿ," ಹೆನಿ ತುಜೆ ವರ್‍ತಿ ಘಾಲ್ತಲ್ಯಾ ಹ್ಯಾ ಅಪ್ವಾದಾಚ್ಯಾ ವಿಶಯಾತ್ ತಿಯಾ ಕಾಯ್ಬಿ ಸಾಂಗಿನೆಯ್ ಕಾಯ್?" ಮನುನ್ ಇಚಾರ್‍ಲ್ಯಾನ್. 63 ಖರೆ ಜೆಜು ಗಪ್ಪುಚ್ ಹೊತ್ತೊ. ತನ್ನಾ ಮಹಾಯಾಜಕಾನ್, "ಮಿಯಾ ಝಿತ್ತ್ಯಾ ದೆವಾಚ್ಯಾ ಆನೆನ್ ತುಕಾ ಇಚಾರುಲಾ, ತಿಯಾ ದೆವಾಚೊ ಲೆಕ್ ಕ್ರಿಸ್ತ್ ಹೊಲ್ಯಾರ್ ಅಮ್ಕಾ ಸಾಂಗ್." ಮಟ್ಲ್ಯಾನ್. 64 ತನ್ನಾ ಜೆಜುನ್, "ಹೊಯ್,ತಿಯಾ ಸಾಂಗಲ್ಲ್ಯಾ ಸರ್ಕೆಚ್. ಖರೆ ಮಿಯಾ ತುಮ್ಕಾ ಸಗ್ಳ್ಯಾಕ್ನಿ ಸಾಂಗ್ತಾ, ಅತ್ತಾಚ್ಯಾನ್ ತುಮಿ ಮಾನ್ಸಾಚೊ ಲೆಕ್ ಪರಮೊನ್ನತ್ ದೆವಾಚ್ಯಾ ಉಜ್ವ್ಯಾ ಬಾಜುಕ್ ಬಸಲ್ಲೊ ಅನಿ ಸರ್‍ಗಾಚ್ಯಾ ಮೊಡಾಂಚ್ಯಾ ವೈನಾ ಯೆತಲೊ ಬಗ್ತ್ಯಾಶಿ." ಮಟ್ಲ್ಯಾನ್.

65 ತನ್ನಾ ಮಹಾಯಾಜಕಾನ್ ರಾಗಾನ್ ಅಪ್ನಾಚೆ ಕಪ್ಡೆ ಪಿಜುನ್ ಘೆವ್ನ್, "ಹಿ ದೆವಾಚಿ ನಿಂದಾ ಹೊಲಿ! ಅನಿ ಜಾಸ್ತಿಚಿ ಮೊಟಿ ಸಾಕ್ಷಿ ಅಮ್ಕಾ ಪಾಜೆ ಮನುನ್ ನಾ! ತೆನಿ ಬೊಲಲ್ಲಿ ದೆವಾಚಿ ನಿಂದ್ಯಾ ತುಮಿಚ್ ಆಯಿಕ್ಲ್ಯಾಶಿ!" ಮಟ್ಲ್ಯಾನ್. 66 ಅನಿ, "ಹೆಕಾ ತುಮಿ ಕಾಯ್ ಮನ್ತ್ಯಾಶಿ?" ಮನುನ್ ಇಚಾರ್‍ಲ್ಯಾನ್.

ತನ್ನಾ ತೆನಿ, "ತೊ ಎಕ್ ಚುಕಿದಾರ್, ತೆಕಾ ಮರ್‍ನಾಚಿ ಶಿಕ್ಷಾ ಹೊವ್ಕುಚ್ ಪಾಜೆ." ಮನುನ್ ಜಬಾಬ್ ದಿಲ್ಯಾನಿ.

67 ತನ್ನಾ ತೆನಿ ತೆಚ್ಯಾ ತೊಂಡಾರ್ ಥುಕ್ಲ್ಯಾನಿ, ಅನಿ ಮುಟ್ಕ್ಯಾನಿ ಮಾರ್‍ಲ್ಯಾನಿ; ಅನಿ ತೆಕಾ ಠಪ್ರಾಕ್ಯಾ ಮಾರುನ್, 68 "ಕ್ರಿಸ್ತಾ!, ತುಕಾ ಮುಟ್ಕೊ ಮಾರಲ್ಲೊ ಕೊನ್ ಮನುನ್ ಪ್ರವಾದ್ ಕರುನ್ ಸಾಂಗ್!" ಮಟ್ಲ್ಯಾನಿ.

69 ಹಿಕ್ಡಿನ್ ಪೆದ್ರು, ಭಾಯ್ರ್ ದಾರಾತ್ ಬಸಲ್ಲೊ ಹೊತ್ತೊ, ತನ್ನಾ ಮಹಾಯಾಜಕಾಚ್ಯಾ ಘರಾತ್ ಕಾಮ್ ಕರ್‍ತಲಿ ಎಕ್ ಬಾಯ್ಕೊಮನುಸ್ ತೆಚೆಕ್ಡೆ ಯೆಲಿ, ಅನಿ,"ತಿಯಾಬಿ ಗಾಲಿಲಿಯಾಚ್ಯಾ ಜೆಜುಚ್ಯಾ ವಾಂಗ್ಡಾ ಹೊತ್ತೆ ನ್ಹಯ್!" ಮಟ್ಲಿನ್.

70 ಖರೆ ಪೆದ್ರುನ್ ತಿರಸ್ಕಾರ್ ಕರುನ್, "ತಿಯಾ ಖಚ್ಚ್ಯಾ ವಿಶಯಾತ್ ಬೊಲುಲೆಯ್ ಮನುನ್ ಮಾಕಾ ಗೊತ್ತ್ ನಾ." ಮನುನ್ ಜಬಾಬ್ ದಿಲ್ಯಾನ್. 71 ಅನಿ ಮಹಾಯಾಜಕಾಚ್ಯಾ ದಾರಾತ್ ಯೆತಲ್ಯಾ ವಾಟೆಕ್ಡೆ ಗೆಲೊ. ಥೈ ಅನಿ ಎಕ್ ಕಾಮಾಚ್ಯಾ ಬಾಯ್ಕೊಮನ್ಸಿನ್ ತೆಕಾ ಥೈ ಬಗಟ್ಲಿನ್. ಅನಿ ಥೈ ಹೊತ್ತ್ಯಾ ಘೊಮನ್ಸಾಕ್ನಿ,"ಹ್ಯೊಬಿ ನಜರೆತಾಚ್ಯಾ ಜೆಜುಚ್ಯಾ ವಾಂಗ್ಡಾ ಹೊತ್ತೊ" ಮಟ್ಲಿನ್.

72 ಅನಿಬಿ ಪೆದ್ರುನ್ ತಿರಸ್ಕಾರ್ ಕರುನ್, "ಆನ್ ಘಾಲುನ್ ಮಿಯಾ ಸಾಂಗ್ತಾ ತೊ ಕೊನ್ ಮನುನ್ ಮಾಕಾ ಗೊತ್ತ್ ನಾ!" ಮಟ್ಲ್ಯಾನ್.

73 ಎಕ್ ಉಲ್ಲೊ ಎಳ್ ಹೊಲ್ಲ್ಯಾ ಮಾನಾ ಥೈ ಇಬೆ ಹೊತ್ತಿ ಘೊಮನ್ಸಾ ಪೆದ್ರುಕ್ಡೆ ಯೆಲಿ. "ಖರೆಚ್ ತಿಯಾಬಿ ತೆಂಚ್ಯಾತ್ಲೊ ಎಕ್ಲೊ, ತುಜ್ಯಾ ಬೊಲ್ನ್ಯಾ ವೈನಾಚ್ ಕಳುಕ್ ಲಾಗ್ಲಾ!" ಮಟ್ಲ್ಯಾನಿ.

74 ತನ್ನಾ ಪೆದ್ರುನ್, "ಮಿಯಾ ಖರೆಬಿ ಖರೆಚ್ ಸಾಂಗುಕ್ ಲಾಗ್ಲಾ. ಮಿಯಾ ಝುಟೆ ಬೊಲುಲಾ ಹೊಲ್ಯಾರ್ ದೆವ್ ಮಾಕಾ ಶಿಕ್ಷಾ ದಿಂವ್ದಿತ್. ಮಿಯಾ ತ್ಯಾ ಮಾನ್ಸಾಕ್ ವಳ್ಕಿಚ್ ನಾ!" ಮಟ್ಲ್ಯಾನ್.