33 Boye, balongwaki na ngomba ya Yawe mpe batambolaki mikolo misato ya mobembo. Sanduku ya Boyokani ya Yawe etambolaki liboso na bango na mobembo oyo ya mikolo misato mpo na kolukela bango esika ya kopema. 34 Na moyi, lipata na Yawe ezalaki likolo na bango, na tango bazalaki kolongola molako.

35 Tango nyonso Sanduku ezalaki kokende, Moyize azalaki koloba :

« Oh Yawe, telema !

Tika ete banguna na Yo bapalangana !

Tika ete banguna na Yo bakima liboso na Yo ! »

36 Mpe tango nyonso lipata ezalaki kopema, azalaki koloba :

« Oh Yawe, zonga kati na bana ya Isalaele,

pamba te bazali ebele penza ! »