1 Nnaa ɛmɔ anwu ɔdɔ kandinga bɔ Baba nala ye ali ahyire yɛ ne, yeɛ ole kyɛ bɛfrɛ yɛ Nyameɛ mmaa. Na yɛte ye mmaa koso. Ɛhene ati yeɛ wiase ne nze yɛ ne, ofikyɛ benya bɛnwuni ye. 2 Aliemaa mɔ, kesaalae, yɛte Nyameɛ mmaa, nakoso, bɔ yɛkɔyɛ ye kyẽa bie ne de, yɛnnya yɛnwuni ye. Yɛse kyɛ sɛ Kristo ye ye nwo ali a, yɛkɔyɛ kyɛ ye, ofikyɛ yekonwu ye, kyɛbɔ ɔte nala. 3 Ebiala bɔ ole sɔ anidasoɛ he wɔ yenu ne, ye nwo ate, kyɛbɔ Kristo nwo ate nala.

4 Ebiala bɔ ɔyɛ bɔne ne, wato mmeraa, ofikyɛ ɛto mmeraa a, ayɛ bɔne. 5 Nakoso, ɛmɔse kyɛ Kristo wale kyɛ ɔbaaye yɛ bɔne fi berɛ, na ye de, bɔne nne ye nwo. 6 Ebiala bɔ ɔne Ye ayɛ kõ ne, ɔtte bɔne nu;* ebiala bɔ ɔte bɔne nu ne de, onwunni Nyameɛ, anaa ɔnze ye. 7 Me mmaa mɔ,* nnɛmɔ maa ebiala laka-laka ɛmɔ, ebiala bɔ ɔyɛ bɔ ɔtengyɛ ne, ɔte teneneeniɛ, kyɛbɔ Ye koso ɔte teneneeniɛ nala. 8 Ebiala bɔ ɔte bɔne nu ne, ofi Abɔnzam, ofikyɛ Abɔnzam yeɛ wayɛ bɔne fi tete.* Ɛhene ati yeɛ bɛlale Nyameɛ awa ne ali, kyɛ ɔɔsɛkye Abɔnzam nyumaa. 9 Ebiala bɔ Nyameɛ awo ye ne, ɔtte bɔne nu, ofikyɛ Nyameɛ suban* te ye nu, na ɔngɔhora ngɔtena bɔne nu, ofikyɛ Nyameɛ yeɛ wawo ye ɔ. 10 Ɛhe yeɛ ɔmaa yɛnwu Nyameɛ mmaa ne Abɔnzam mmaa ɔ: Ebiala bɔ ɔnyɛ bɔ ɔtengyɛ ne, offi Nyameɛ berɛ, na bɔ ɔnnɔ oliema ne koso, offi Nyameɛ berɛ.

11 Edwirɛ bɔ ofi ahyɛaseɛ ne, ɛmɔtele yeɛ ole kyɛ: Ɛmɔdodɔ ɛmɔ nwo. 12 Nnɛmɔyɛ kyɛ Kain bɔ ofi Abɔnzam, bɔ ohuni oliema ne. Nzuati yeɛ ohuni ye ne? Ofikyɛ, ye bɔbɔ ye nneyɛɛ te bɔne, na oliema ne de, ye deɛ te pa. 13 Yeti aliemaa mɔ, sɛ wiase ne tane ɛmɔ a, nnɛmɔ maa ɔyɛ ɛmɔ nwanwa. 14 Yɛse kyɛ yafi ewue nu yawa ngoa nu, ofikyɛ yɛdɔ yɛliema mɔ. Ebiala bɔ ɔnnɔ oliema ne, ɔtɛ́ te ewue nu. 15 Ebiala bɔ ɔtane oliema ne te wudiniɛ, na ɛmɔse kyɛ wudiniɛ biala nne berɛ bɔ daa ngoa te ye nu ɔ.

16 Ɛhe yeɛ ɔmaa yɛnwu bɔ ɔdɔ kyire ɔ: Yesu fale ye ngoa tole berɛ mane yɛ, yeti odikyɛ yɛ koso yɛfa yɛ ngoa yɛto berɛ yɛma yɛliema mɔ. 17 Sɛ ebie bɔ ole wiase ahonyadeɛ nwu kyɛ oliema nwo kyere ye, ná onnwu ye anwunvo a, nzu yeɛ okyire kyɛ Nyameɛ dɔ te ye nu ɔ? 18 Me mmaa mɔ, nnɛmɔ maa yɛfa yɛ noa, anaa yɛ temverema ngome yɛka kyɛ yɛdɔ yɛliema mɔ, mmom ɛmɔma yɛfa yɛ nneyɛɛ, na yɛyɛ ye wɔ nahorɛ nu.

19 Ɛhe yeɛ ɔmaa yɛnwu ye kyɛ yɛwɔ nahorɛ nanu ne, na ɔmaa y’ahone tɔ yɛ kunu wɔ ye nyunu: 20 Sɛ y’ahone bu yɛ fɔ po a, Nyameɛ te piri tra y’ahone, na ɔse nikye biala. 21 Nniema mɔ, sɛ y’ahone mmu yɛ fɔ a, yɛkora yɛfa ahotɔsoɛ yɛkɔ Nyameɛ nyunu; 22 na nikye biala bɔ yɛkobisa ye ne, yɛ sa kɔha ye, ofikyɛ yɛdi Ye mmraa so, na yɛyɛ bɔ ɔsɔ ye nye. 23 Ná y’ahyɛdeɛ ne yeɛ ole kyɛ, yɛnya gyidie wɔ ɔwa Yesu Kristo dumaa nanu, na yɛdodɔ yɛ nwo, kyɛbɔ wafa ahyɛdeɛ wama yɛ ne. 24 Ebiala bɔ odi sɔ ahyɛdeɛ naso ne, ɔne ye ayɛ kõ, na ye koso, ɔne sɔ sona ne ayɛ kõ. Na honhom bɔ ɔfa mane yɛ ne yeɛ ɔmaa yɛnwu kyɛ yɛne ye ayɛ kõ.