1 Aliemaa mɔ, nná honhom nu dwirɛ* biala yeɛ odikyɛ ɛmɔdɛ ye bɛdi ɔ. Mmom ɛmɔsɔ honhom nu dwirɛ* biala bɛnea sɛ ofi Nyameɛ berɛ a, ofikyɛ ngondombo adiifoɛ pee awa wiase. 2 Ɛhe yeɛ ɔkɔmaa ɛmɔ konwu honhom bɔ ofi Nyameɛ berɛ ne: Honhom biala bɔ ɔka kyɛ Yesu Kristo wale anwoɔnaen nu ne, ofi Nyameɛ berɛ, 3 nakoso honhom biala bɔ ɔka kyɛ Yesu amma anwoɔnaen nu ne, offi Nyameɛ. Ɛhe yeɛ ole honhom nu dwirɛ bɔ ɛmɔtele kyɛ okofi antikristo ne berɛ kɔwa ne, na kesaalae, wawa wiase. 4 Me mmaa mɔ, ɛmɔfi Nyameɛ berɛ, na ɛmɔ ali bɛ so ngunim, ofikyɛ bɔ ɔte ɛmɔ nu ne, ɔte piri tra bɔ ɔwɔ wiase ne. 5 Bɛfi wiase, yeti yeɛ bɛka edwirɛ bɔ ofi wiase, ná ewiase ne koso tie bɛ ne. 6 Yɛ de, yefi Nyameɛ berɛ, ebiala bɔ ɔse Nyameɛ ne tie yɛ, na ebiala bɔ offi Nyameɛ berɛ ne de, ondie yɛ. Ɛhe yeɛ ɔmaa yɛnwu honhom nu dwirɛ bɔ ɔte nahorɛ, ɔne honhom nu dwirɛ bɔ ɔtte nahorɛ ne.

7 Aliemaa mɔ, ɛmɔma yɛdodɔ yɛ nwo, ofikyɛ ɔdɔ fi Nyameɛ berɛ. Ebiala bɔ ole ɔdɔ ne, Nyameɛ yeɛ wawo ye ɔ, na ɔse Nyameɛ. 8 Ebiala bɔ olle ɔdɔ ne, ɔnze Nyameɛ, ofikyɛ Nyameɛ yeɛ ole ɔdɔ. 9 Atee bɔ Nyameɛ fale so lale ye dɔ ne ali hyirele yɛ yeɛ ole kyɛ, ɔsomane ɔwa komapɛ ne wale wiase, kyɛ yɛfa ye so yɛnya ngoa. 10 Ɛhe yeɛ ole ɔdɔ ne: Nná yɛ, yeɛ yɛlɔle Nyameɛ ɔ, mmom, ye yeɛ oli moa lɔle yɛ, na ɔsomane ɔwa ne kyɛ ɔfa ye ngoa bɔ afɔleɛ pata* yɛ bɔne.

11 Aliemaa mɔ, sɛ Nyameɛ alɔ yɛ de a, odikyɛ yɛ koso yɛdodɔ yɛ nwo. 12 Ebiala nnwuni Nyameɛ lle, nakoso sɛ yɛdodɔ yɛ nwo a, Nyameɛ kɔtena yɛ nu, na ye dɔ koli mu wɔ yɛ nu. 13 Bɔ ɔmaa yɛnwu kyɛ yɛne ye te kõ, na ye koso ɔne yɛ te kõ yeɛ ole kyɛ, wafa ye honhom ne wama yɛ. 14 Afei, yɛ bɔbɔ yanwu ye, na yɛdi ye nwo adanzeɛ kyɛ, Baba ne somane ɔwa ne kyɛ wiase ne Agyenkwa. 15 Ebiala bɔ odɛ́ to nu kyɛ Yesu te Nyameɛ awa ne, Nyameɛ ne ye te kõ, na ɔne Nyameɛ te kõ. 16 Yanwu ɔdɔ bɔ Nyameɛ le ma yɛ ne, na yedɛ yɛdi.

Nyameɛ te ɔdɔ, na ebiala bɔ ɔte ɔdɔ nu ne, ɔne Nyameɛ te kõ, na Nyameɛ koso ne ye te kõ. 17 Sɔ atee he aso yeɛ ɔdɔ di mu wɔ yɛ nu, kyɛbɔ ɔkɔyɛ a yekonya ahotɔsoɛ atemmuda ne, ofikyɛ kyɛbɔ Yesu te ne, sɔ ala yeɛ yɛte wɔ wiase he anu ɔ. 18 Esuronyi biala nne ɔdɔ nu, ofikyɛ ɔdɔ bɔ odi mu ne, otu esuronyi bo. Bɔ ɔte yeɛ ole kyɛ, esuronyi twe yɛ sa. Na ebiala bɔ esuronyi aha ye ne, ye dɔ nni mu. 19 Yɛle ɔdɔ, ofikyɛ ye yeɛ oli moa lɔle yɛ ɔ.

20 Ebiala bɔ ɔka kyɛ, "Medɔ Nyameɛ," nakoso ɔtane oliema ne, né ɔlaka. Ofikyɛ ebiala bɔ ɔnnɔ oliema bɔ onwu ye ne, ɔngɔhora ngɔlɔ Nyameɛ bɔ onnwu ye ne. 21 Ahyɛdeɛ he yeɛ wafa wama yɛ ɔ: Ebiala bɔ ɔdɔ Nyameɛ ne, odikyɛ ɔdɔ oliema koso.