1 Yeti, me bɔ Awurade ti nna prizin ne, mesrɛ ɛmɔ kyɛ ɛmɔbɔ ɛmɔ bra ma ɔfata ɛfrɛlɛ bɔ bafrɛ ɛmɔ ne. 2 Ɛmɔdwo, na ɛmɔfa anwobraseɛ mukoraati ne aboterɛ bɛbɔ ɛmɔ bra, ná ɛmɔ ne ɛmɔ nwo tena wɔ ɔdɔ nu. 3 Ɛmɔyɛ bɔ ɛmɔkɔhora biala bɛbɔ ngabɔnu bɔ honhom ne amaa wawa ɛmɔ nu nanwo waen, na ɛmɔtena asomdwie bɔ waha ɛmɔ wabɔ nu nanu. 4 Nipadua komapɛ ne honhom komapɛ yeɛ ɔwɔ berɛ ɔ, kyɛbɔ bafrɛ ɛmɔ bawa anidasoɛ komapɛ nu ne, 5 Awurade kõ, gyidie kõ, asubɔ kõ, 6 Nyameɛ komapɛ bɔ ɔte yɛ mukoraati Baba ne, ye yeɛ odi ebiala so, ɔkora fa ebiala yɛ adwuma, na ɔwɔ ebiala nu ne. 7 Nyameɛ adom bɔ bafa bama yɛ nu biala ne, Kristo yeɛ wasusu akyɛdeɛ ne wafa wama yɛ ɔ. 8 Ná tworɔnzɛm ne ka kyɛ:

"Mmerɛ bɔ ɔfo hɔle anwuro ne,

ɔfale ngoaa hɔle;

na ɔfale mmenia mane kyɛ akyɛdeɛ."

9 Sɛ ɔka kyɛ "ɔfo hɔle" a, okyire sɛɛ? Bɔ okyire yeɛ ole kyɛ oli moa dwu wale ase, kyire kyɛ ɔwale aseɛ he aso. 10 Na bɔ odwu wale ne, ye ala yeɛ ɔfo hɔle nekaa bɔ ɔtra anwuro mukoraati ne, kyɛbɔ ɔkɔyɛ a, ɔkɔmaa nikye biala koli mu ɔ. 11 Ná wamaa ebiemɔ ayɛ asomafoɛ, ebiemɔ ayɛ adiifoɛ, ebiemɔ ka nzɛmba, ebiemɔ nea asafo ne, ná ebiemɔ kyirekyire, 12 kyɛbɔ ɔkɔyɛ a ɔkɔtete akrongronfoɛ nemɔ kɔma ɔsom adwuma ne, na wamaa Kristo nipadua ne ayɛ se, 13 kodwu kyɛ yɛ mukoraati yɛkɔyɛ kõ wɔ gyidie nanu, yanya Nyameɛ Awa nanwo nimdeɛ bɔ odi mu, ná yayɛ mmenia bɔ yanyi yayie na yali mu te kyɛ Kristo pɛpɛɛpɛ. 14 Yeti, nnɛmɔ maa yɛkɔ so yɛyɛ kyɛ ngwalaa bɔ ngyerɛkyerɛ mvrama biala woso bɛ biri-biri fa bɛ di akɔ-ne-aba te kyɛ ɛpo asorɔkye, na bɛmaa mmenia fa nnaka-naka ne edwirɛ bɔ ɔtte nahorɛ laka-laka bɛ ne. 15 Mmom ɛmɔma yɛha nahorɛ, na yefi ɔdɔ nu yɛnyi wɔ nikye biala nu yɛhɔ Kristo bɔ ɔte nipadua ne ti nanu. 16 Ye nu yeɛ nipadua namukoraati aha abɔnu, ofikyɛ akwaa namukoraati aha asiesie so pɛpɛɛpɛ, na akwaa biala yɛ adwuma ye. Ɔba sɔ a, nipadua ne nyi, na ɔyɛ se wɔ ɔdɔ nu.

17 Yeti, bɔ meka mekyire ɛmɔ na medi ye nwo adanzeɛ wɔ Awurade nu ɛhe, nnɛmɔbɔ ɛmɔ bra kyɛbɔ maen-maen ne yɛ ye wɔ b’adwene bɔ ɔnze hwee nanu ne. 18 Bɛ de, awosii akata b’adwene naso, na bahwe bɛ nwo bafi ngoa bɔ Nyameɛ fa ma nanwo, ofikyɛ bɛlle nimdeɛ, ná bɛ so yɛ se. 19 Ná ɔnate kyɛ bɛmvɛle hwee nati, ahohwibra ali bɛ ti, na bɛbɔ bra-bɔne biala bɔ hwee nzi bɛ atee ɔ. 20 Nakoso ɛmɔ de, ɛmɔanwu ye kyɛ nná sɔ yeɛ Kristo te ɔ, 21 amba, ɛmɔtele ye nwo dwirɛ, na bɛnate ye so bɛhyirehyirele ɛmɔ, kyɛbɔ nahorɛ bɔ ɔwɔ Yesu nu ne te ne. 22 Ohyirehyirele ɛmɔ kyɛ ɛmɔye suban daa ne bɛgua; ɛmɔ daa abrabɔ bɔ nnaka-naka akɔnnɔ ma ɔsɛkye ne, 23 na ɛmɔma bɛhɔ so bɛyɛ ɛmɔ adwene* ne foforɛ, 24 na ɛmɔwura suban foforɛ bɔ Nyameɛ bɔle ye kyɛbɔ okuro ne, sɔ suban ne gyi tenenee ne nahorɛlilɛ so.

25 Yeti, kesaalae bɔ ɛmɔ aye ngondombo bagua nekaa bie ne, ɛmɔ nu biala ha nahorɛ hyire ye mmango, ofikyɛ yɛ mukoraati yɛte akwaa wɔ nipadua kõ anu. 26 "Ɛmɔfɛ yaa, nakoso nnɛmɔyɛ bɔne." Nnɛmɔfɛ yaa tonn kodwu kyɛ eyia kɔtɔ, 27 na nnɛmɔma Abɔnzam atee. 28 Nnɛmaa awieniɛ wia kõ, mmom ɔyɛ adwuma, ɔfa ye sa yɛ adwuma pa, ná wanya bie wama ebie bɔ wahia ye ne. 29 Nnɛmɔ maa edwirɛ bɔ waporɔ fite fi ɛmɔ noanu, mmom ɛmɔha edwirɛ bɔ ɔte pa na ɔhyɛ nguraen, ɛhene yeɛ bɛ bɔ betie ne konya so mvasoɛ ɔ. 30 Afei, nnɛmɔ maa Nyameɛ honhom krongron ne wora bɔ.* Ofikyɛ ye yeɛ bafa bahyɛ ɛmɔ nzorɛ bama kyẽa bɔ bɛkole ɛmɔ ngoa ne. 31 Ɛmɔgyi ɛhe amukoraati bɛgua: ɔtaen, ɛyaa ne ahone tɛɛ, ndeɛteamuɛ ne mmusue dwirɛ, ɔne nikye biala bɔ ɔttemaye. 32 Mmom ɛmɔ huro-huro ɛmɔ nwo dwirɛ, ɛmɔnwu ɛmɔ nwo anwunvoin, ná ɛmɔfa ɛmɔ mmango bɔne bɛhyɛ bɛ, kyɛbɔ Nyameɛ nate Kristo so fa ɛmɔ deɛ kyɛ ɛmɔ koraa ne.