1 Ngwalaa, ɛmɔtie ɛmɔ awofo dwirɛ wɔ Awurade nu, ofikyɛ ɛhe yeɛ ɔte pa ɔ. 2 "Fa nidie ma wɔ maame ne wɔ baba," na ɛhe yeɛ ole mmeraa bɔ oli moa bɔ bɔhyɛ boka so, 3 "ná wasi wɔ yé wɔ aseɛ naso, maa anyi ahyɛ." 4 Baba mɔ, nnɛmɔyɛ nikye bɔ ɔkɔmaa ɛmɔ mmaa nemɔ kɔfɛ yaa, mmom ɛmɔhɔ so bɛfa Awurade ndeɛsoɛ ne ngyerɛkyerɛ bɛtete bɛ.

5 Ngoaa, ɛmɔfi ɛmɔ ahone nu bɛfa esuronyi ne nidie bɛma ɛmɔ wuramɔ bɔ bɛte mmenia ne, te kyɛ bɔ ɛmɔyɛ bɛma Kristo ne. 6 Nnɛmɔyɛ ɛhe, mmerɛ bɔ mmenia nwu ɛmɔ ne ngome, ná wanyɛ kyɛ ɛmɔsɔ sona nye, mmom ɛmɔyɛ ye kyɛ Kristo ngoaa bɔ bɛfi bɛ kra mukoraati nu bɛyɛ bɔ Nyameɛ kuro ɔ. 7 Mmom, ɛmɔfa suban pa bɛsõ bɛ, te kyɛ bɔ ɛmɔyɛ bɛma Awurade ne, nná sona, 8 ofikyɛ ɛmɔse kyɛ, pa bɔ ɛmɔ nu biala kɔyɛ ne, sɛ ɔte akoaa oo, ɔte dehyeɛ oo, okonya ye nwo akatua kofi Awurade berɛ. 9 Ɛmɔ bɔ ɛmɔte bɛ wura ne koso, ɛmɔyɛ bɛ sɔ ala, nnɛmɔ nwuna-nwuna bɛ, ofikyɛ ɛmɔse kyɛ, ɛmɔ ne bɛ mukoraati, ɛmɔ wura wɔ anwuro, na ye de, ɔnnea sona nyunu.

10 Afei, ɛmɔyɛ se wɔ Awurade ne ye tumi bɔ ɔyɛ se nanu. 11 Ɛmɔfa Nyameɛ akodeɛ namukoraati bɛwura, na wamaa ɛmɔ ahora bagyina pindinn baho batia Abɔnzam nnaka-naka ne, 12 ofikyɛ, nná mogya ne anwoɔnaen yeɛ yɛne bɛ kõ ɔ, mmom yɛne awaen ahoroɛ, tumidie, ewiase awosii nu atumvoɛ, ɔne sunzummɔne bɛ bɛwɔ anwuro dɔ ne yeɛ yɛkõ ɔ. 13 Ɛhe ati, ɛmɔwura akodeɛ bɔ ofi Nyameɛ berɛ namukoraati, ná ɛmɔ ahora bagyina kyẽa tɛɛ bɔ ɔba ne noa baho, na sɛ ɛmɔyie nikye biala a, ɛmɔ agyina pindinn.

14 Yeti, ɛmɔgyina berɛ pindinn, na ɛmɔfa nahorɛ ne bɛyɛ bɛlɛt* bɛbɔ ɛmɔ sisia, ɛmɔfa tenenee bɛkata ɛmɔ hue so, 15 na ɛmɔwura mmaboa bɔ okyire kyɛ ɛmɔ ayɛ krado kyɛ ɛmɔkɔha asomdwie nzɛmba ne. 16 Ɛhe mukoraati si ne, ɛmɔfa gyidie kyɛm ne bɛtira, ná ɛhene yeɛ ɛmɔkɔfa bɛkonua ɔbɔnefoɛ ne agyan bɔ ɔsɔ namukoraati. 17 Afei, ɛmɔfa ngoa buralɛ-kyerɛ ne, ɔne honhom nu dadeɛ ne, ɛhene yeɛ ole Nyameɛ dwirɛ ne. 18 Ɛmɔfa mbaeɛ ne ngotosrɛ biala so bɛbɔ mbaeɛ daa wɔ honhom né tumi nu. Yeti, ɛmɔma ɛmɔ nye la berɛ, na ɛmɔsrɛ bɛma akrongronfoɛ nemɔ. 19 Me koso, ɛmɔ bɔ mbaeɛ bɛma me, na mmerɛ biala bɔ ngɔbukye me noa ne, bama me dwirɛ bɔ nga ɔ, na mahora mafa akukuduro maha nzɛmba nanwo dwirɛ krongron bɔ wafea né mahyire mmenia. 20 Sɔ nzɛmba ne bɔ ngyi ye gya nu nati yeɛ bafa kyenyi bakyekye me bato prizin ne. Yeti ɛmɔbɔ mbaeɛ bɛma me, ná wamaa mahora mafa akukuduro maha, kyɛbɔ odikyɛ meyɛ ne.

21 Bɔ ɔkɔyɛ na ɛmɔ koso ɛmɔ anwu kyɛbɔ me nwo te, ɔne bɔ ɔkɔ so wɔ ɛwa ne, nniema Tikiko bɔ medɔ ye, na odi nahorɛ wɔ Awurade nu ne, ɔkɔfa ye mukoraati nwo amaneɛ kɔɔbɔ ɛmɔ. 22 Ɛhe ati yeɛ mesoma ye meba ɛmɔ berɛ ne, kyɛbɔ ɔkɔyɛ a ɛmɔ konwu kyɛbɔ yɛ nwo te ɔ, na wasa wahyɛ ɛmɔ* nguraen.

23 Asomdwie ha aliemaa mɔ, na ɛmɔnya ɔdɔ ne gyidie bɛfi Nyameɛ bɔ ɔte Baba ne, ɔne y’Awurade Yesu Kristo berɛ. 24 Bɛ bɔ bɛfi b’ahone nu bɛkuro y’Awurade Yesu Kristo dwirɛ namukoraati ne, adom ha bɛ.