Lucas 19

28 Jisas komina dora baba doragafotudi, urigegi nugeab maig tuadüdi erekobo daiudi Jerusalem komeaga.

Jisas erekokayau sibe Jerusalem iruweaga

29 Jisas fib Betfageie Betani iroto taideaga, girtorub Oliv gen baba gam. Bangüdi daidaigegi aküre sugurungeaga. 30 ✝19.30-31 Mt 21.2-3; Mk 11.2-3Bangüdi nugeküre menüm wangeaga, "Ninaküre fib egina büreaga baba gam kümünane. Ninaküre baba fib gam kümünadiba, donki sogub güre keneigaberedi büreaga baba, ninaküre kegeweregenan. Egime fere güre nu gam gotogaurarge. Donki baba muri kuregafotudi igaiudi meag ogurane. 31 Bangarbere, fere gürede wangüdi, ‘Amure donki baba kuregenan?’ banüm totongarba, bana ninaküre dora nub menüm towane, ‘Erekokai nu gam fünai tugu.’"

32 ✝ 19.32 Lu 22.13 Jisasde nugeküre sugurungar, nugeküre kümünen baba, daba daba gürenakuti nugede wangeaga baba sibenana kegewegin. 33 Nugeküre donki babab muri kuregedibere, donki ememanade nugeküre menüm totongen, "Ninaküre amure donki baba kuregenan?" 34 Bangar nugeküre wagen, "Erekokai nu gam fünai tugu."

35 ✝ 19.35 2 Kin 9.13; Mt 21.7; Mk 11.7; Jo 12.14 Bana nugeküre donki düdi Jisas gam oguren. Bangüdi nugeküre enegi aküre aküre enenwaib baba, enegi kuab kuab mube obgoira baba, kuguregudi, donki kekia ibarbürügen. Bangüdi Jisas saguwedi donki kekia gotogeaga. 36 ✝19.36 2 Kin 9.13; Mt 21.8Donki kekia gotogüdi kümünar, ferefinabur nugengab enegi kuab kuab mube obgoira baba kuguregudi erekobo gam ibabarwegin. 37 Nu erekobo güre Oliv gir gamde kaneaga baba erekobo iroto taideaga. Bangar nugeab daidaigegi gin ere ebebear toaden. Nini dora migu gürenakuti kegewenwaib baba utungüdi, erenana yogüdi Keriabüb yanim siradgaberen. 38 ✝19.38 Sng 118.26; Lu 2.14; 13.35; Ef 2.14Menüm yogen, "Baba erekokayau Erekokaib yanim gamde ogureaga, Keriabüde nu gam nama geregeaga. Keriab kekia asaub yanim siradgaberegi! Fib nama gam kob dab fanam Keriab keab büreaga."

39 Farisi gürewar baba ferefinabur gin ere kodigo büren babawarde, Jisas menüm wawen, "Sibam sarigegi, nagüb daidaigegi simai baba nunurunge. Nini dora babanüm doragebena." 40 ✝19.40 Hab 2.11Bangar dora menüm toweaga, "Ye wangün, sube gütüwediba, kegenam toide igyogüdi, Keriabüb yanim siradgabereregen."