Cânticos 2

Xanuntenyie xa tofanyi

Ginɛ xa masenyi xɛmɛ bɛ

1 «N tan luma nɛ alɔ sansi fuge tofanyi,

naxan mɔɔli toma Sarɔn gulunba yire.»

Xɛmɛ xa masenyi ginɛ bɛ

2 «I tan luxi nɛ alɔ sansi fuge tofanyi tunbee ya ma.

I tofan ginɛdimɛe birin bɛ.»

Ginɛ xa masenyi a xa xɛmɛ xa fe ra

3 «N xanuntenyi luxi nɛ alɔ mangoe bili wondi kui.

A fan sɛgɛtalae birin bɛ.

N bara wa lufe a xa niini bun ma,

a xa fe rafan n ma

alɔ mangoe rafanma mixi ma ki naxɛ.

4 A bara n xanin a xɔnyi,

a xa xanunteya bara findi ɲɛlɛxinyi ra n bɛ.»

Ginɛ xa masenyi a xa xɛmɛ bɛ

5 «Donse ɲɔxunmɛ so n yi, n ki mangoe,

barima xanunteya naxan na n bɔɲɛ kui,

a bara n sɛnbɛ ba n yi ra.

6 N xunyi na n xanuntenyi bɛlɛxɛ,

a na n mafurukufe a yirefanyi ra.»

Ginɛ xa masenyi ginɛdimɛe bɛ

7 «Darisalamu ginɛdimɛe, n bara wo mayandi,

tɔɔkɛ nun xeli xili ra naxee na wula i,

wo naxa xanunteya raxunu, wo naxa a rakeli,

beenu a wama a xɔn ma tɛmui naxɛ.»

Ginɛ xa masenyi a xa xɛmɛ xa fe ra

8 «N xanuntenyi xui na a ra,

a na fafe a gi ra geyae fari.

9 A gima alɔ tɔɔkɛ,

a tuganma alɔ xeli.

A na be won ma tɛtɛ xanbi ra,

a na be matofe wundɛri ra.

10 A naxa a fala n bɛ,

‹N xanuntenyi tofanyi, keli, i xa fa,

11 barima ɲɛmɛ tɛmui bara dangi,

tunɛ mu birama sɔnɔn.

12 Sansi na bogife daaxa,

ɲɛlɛxin waxati bara a li,

xɔnie na e xui raminife won ma bɔxi ma.

13 Xɔrɛ bili na bogife,

wɛni bili na fugafe, a xiri fan.

N xanuntenyi, keli, i xa fa.

14 N ma ginɛ, i naxa i nɔxun

alɔ ganbɛ a nɔxunma gɛmɛe longori ra ki naxɛ.

Mini, n wama i xui ɲɔxunmɛ mɛfe,

n wama i yatagi tofanyi tofe.›»

Xɛmɛ xa masenyi a xa mixie bɛ

15 «Wo xulumasee suxu,

naxee wama muxu xa wɛni bili fugaxie kanafe.»

Ginɛ xa masenyi xɛmɛ bɛ

16 «N xanuntenyi findixi n gbe nan na,

n fan findixi a gbe nan na.

A a xa xurusee dɛ madonma sansi fugaxie ya ma.

17 N xanuntenyi, beenu kuye xa iba,

i xa gbilen, i xa i gi alɔ tɔɔkɛ,

i xa i gi geyae fari alɔ xeli.»