Naum 1

Ala xa xɔnɛ Ninewe xili ma

1 Masenyi xɔrɔxɔɛ nan ya Ninewe xa fe ra, Ala naxan masen Annabi Naxumu Elekosika bɛ.

Alatala magaaxu, a gbeɲɔxɔfe mu kanama.

2 Alatala a gbeɲɔxɔma nɛ,

a xa xɔnɛ sɛnbɛ gbo a yaxuie mabiri,

a mu diɲɛma e ma mafuren mafuren.

3 Kɔnɔ Alatala mu xɔnɔma mafuren mafuren,

a sɛnbɛ gbo han.

Alatala mixi ɲaaxi sare ragbilenma nɛ fe ɲaaxi rabae ma.

A xa ɲɛrɛ luma nɛ alɔ turunnaadɛ naxan xube ratema,

a tixi nuxuie fari.

4 A na xaaɲɛ baa ma, a xɔrima nɛ,

a xure birin naxara,

a Basan nun Karemele findi gbengberenyi ra,

a Liban sansie lisima nɛ.

5 A geyae rasɛrɛnma nɛ, e xunu alɔ kumi ture.

Bɔxi sɛrɛnma nɛ a ya i, duniɲa mixie bɔɲɛ minima nɛ.

6 Nde nɔma tide a xa xɔnɛ ya ra?

Nde nɔma tide a xa bɔɲɛte ya i?

A xa xɔnɛ luma nɛ alɔ tɛ, naxan gɛmɛe bulama.

7 Alatala fan, a kantari fima nɛ tɔɔrɔmixie ma,

a mɛɛnima nɛ mixie ma naxee e yɛtɛ taxuma a ra.

8 Kɔnɔ a Ninewe xun nakanama nɛ,

a a yaxuie kerima dimi nan kui.

9 Ninewe, wo fɛɛrɛ mundun fenfe Alatala xili ma?

A tan nan sɔntɔɛ tima kerenyi ra.

10 E fama nɛ lude alɔ e kankanxi tunbe kunsie nan na,

alɔ e siisixi beere nan na,

alɔ sɛxɛ xaraxi naxan ganxi feo.

11 Nineweka nde bara fe ɲaaxi raba Alatala ra,

a mixie rasixi fe kobi nan ma.

12 Ala xa masenyi nan ya e xa fe ra:

«Hali wo yaxuie wuya, e xun fama nɛ rakanade, e ɲɔn.

N bara wo tan Yudayakae tɔɔrɔ,

kɔnɔ n mu na rabama sɔnɔn.

13 Yakɔsi n wo bama nɛ wo yaxuie xa nɔɛ bun ma,

n luutie bolon wo xirixi naxee ra.»

14 Alatala xa masenyi nan ya wo tan Ninewekae xa fe ra:

«Wo bɔnsɔɛ fama nɛ ɲɔnde.

N wo xa kuye masolixie nun wo xa kuye naxee yailanxi wure ra,

naxee na wo xa alae xa banxie kui, n nee birin kanama nɛ.

N wo sɔntɔma nɛ, barima wo ɲaaxu.»