17 Wo naxa fe kobi ɲɔxɔ fe kobi ra. Wo xa kata mixie xa wo kolon fe fanyi rabae nan na. 18 Wo xa wo nɔ fe birin naba alako lanyi xa lu wo nun mixi birin tagi. 19 N xanuntenyie, wo naxa wo gbeɲɔxɔ wo yɛtɛ ra, wo xa na lu Ala ma, barima a sɛbɛxi Kitaabui kui,
«Ala naxɛ, n tan nan wo gbeɲɔxɔma,
n tan nan fe kobi ragbilenma a rabama ma.»
20 A man sɛbɛxi,
«Xa kaamɛ na i yaxui ma, i xa a ki donse ra.
Xa ye xɔli na a ma, i xa a ki ye ra.
Na kui a luxi nɛ alɔ i na tɛ wolee ibaganfe a xunyi ma.»
21 Wo naxa tin fe kobi xa nɔ wo ra, wo tan nan xa fe kobi nɔ, fe fanyi raba ra.