Salmos 33

Ala na wɔyɛn, a fe ragirima nɛ

Ala matɔxɔɛ

1 Tinxintɔɛe, wo xa Alatala matɔxɔ wo xui itexi ra.

Tinxintɔɛe lan e xa Ala matɔxɔ.

2 Wo xa Alatala tantu kɔra ra,

wo xa bɛɛti ba kɔra ra luuti fu daaxi.

3 Wo xa bɛɛti nɛɛnɛ ba a bɛ,

wo xa na raba maxasee ra wo xui itexi ra.

4 Alatala xa masenyi tinxin,

a a xa wali birin nabama sɔɔbɛ ra.

5 Tinxinyi nun sɛriyɛ rafan a ma,

duniɲa birin nafexi Alatala xa hinnɛ ra.

6 Alatala naxa koore daa a xa wɔyɛnyi ra.

A to wɔyɛn keren fala, tunbuie naxa mini keren na.

7 A naxa baa fan malan yire keren,

a xa ye ragata.

8 Bɔxi birin xa gaaxu Alatala ya ra.

Duniɲa mixi birin xa a binya.

9 A na wɔyɛn, a fe ragirima nɛ.

A na yaamari fi, a rabama nɛ.

10 Alatala sie xa natɛe kanama nɛ.

A mu e xa wali sɔɔnɛyama.

11 Kɔnɔ Alatala xa fe ragirixie buma abadan.

A waxɔnfe sɔɔnɛyama nɛ waxati birin.

12 Ɲɛlɛxinyi na si bɛ naxan marigi findixi Alatala ra.

Ɲɛlɛxinyi na bɔnsɔɛ bɛ Alatala naxan sugandixi.

13 Alatala a ya ragoroma duniɲa ma kelife ariyanna,

a mixi birin mato.

14 Kelife a xɔnyi, a duniɲa mixi birin matoma nɛ.

15 Naxan adamadie bɔɲɛ daaxi,

a a ɲɛngi sama e xa walie xɔn.

16 Mangɛ yo mu kisima a xa sɔɔrie saabui ra.

Sɔɔri fan mu kisima a yɛtɛ sɛnbɛ ra.

17 Sɔɔri ɲɔxɔ a ma a xa soe nɔma a rakiside,

kɔnɔ na tan mu findima kisi ra a bɛ.

18 Alatala nan mɛɛnima mixie ma

naxee gaaxuma a ya ra,

naxee e xaxili tima a xa hinnɛ ra,

19 alako e nii naxa laaxira,

alako e xa balo kaamɛ waxati.

20 Won xaxili tixi Alatala nan na.

A tan nan won malima ra,

a tan nan won kantama ra.

21 Won bɔɲɛe sɛɛwaxi a tan nan ma fe ra,

barima won bara la a xili sɛniyɛnxi ra.

22 Alatala, i xa hinnɛ muxu ra,

barima muxu xaxili tixi i tan nan na.