1 အခိင်ရႎါရ်ႈဇံဝ် ယဇ်ပုရောဟိတ်ဒါင်ဂဲ၊ ဘီအဆာႇဒါင်ဂဲ၊ တာဆရာနံပ်ဘေဲႇကျံမ်ဂဲဂါရ် တာဒါင်လူမ်ကောင်ဆီဂဲဒီန် ဘံန်ဂဲဟွည်ႇ က်ုရ်မိုန်ဖာည်ဖာည် ဂဲတုယေဆု ဒိူည်လာ်ႈအာပ်ပဲတ်အ်ုန် တတာမျိုဇာပိလတ်။ 2 အခိင်ဒီန် တာမျိုဇာပိလတ် ဆ်ုရ်မွံတ်အ်ုန်၊ "မီမိူဝ်ႈကော ခူန်ဟောခံမ်ယုဒဂဲအဲႈ၊"

ယေဆု ႎီရ်ဒါႈ၊ "မိူဝ်ႈအေ့၊ ခိူည်ဒါႈမီဒီန်။"

3 ယဇ်ပုရောဟိတ်ဒါင်ဂဲ တာင်အပေတ် တွံန်မျိုတွံန်နဲ တယေဆု။ 4 ကောပ်ခိူည်ဒီန် တာမျိုဇာပိလတ် ႎီရ်ဆ်ုရ်မွံတ်ထဲင် အ်ုန်၊ "ဆေညာ ငဲအူမိုတ်လိုည် မီကာႎီရ်ဒါႈအဲႈ။ ဆတီုင်မေန် ဘ်ုရ်မောဂဲဒါႈဒေ တာင်အပေတ် တပါင်မီ။"

5 ဘံန်ယေဆု ကာႎီရ်ဒါႈငဲတဂဲ ဆံင်မှာ်ႈ၊ ပိလတ် ညာအာမ်ပွံတ်ဒေ။

6 တွံန်ရောတ် အခိင်ပ္လေါည်ပသခါ အတွပ်ုန်မှာန်ဘီဂဲ တာမျိုဇာပိလတ် ကျာင်ဒေပ္လေါည်ဒဲႈ ဘီဇာ်ႈထံင် အူကူအူကူ။ 7 ယာမ်ပဲန်ႎှီုန် ဘံန်ဘီႎှီုန်ဂဲ ပျံမ်အဆာႇဘီ ဂဲဘ်ုပ်ဒေဇာ်ႈထံင် ဘ္လံမ်၊ တန်ုဂဲဒီန် ပါပည်အီကူဇီုဝ်ဗာရဗ္ဗ။ 8 ဖုင်ဘီကီုန်ဂဲ လာ်ႈပေါဒေမှာန် တတာမျိုဇာပိလတ် အတွရ်ုရ်ဒဲႈတဂဲ ခိူည်ပ်ုန်ကျာင်ဒေရ်ုရ်အ်ုန်။ 9 ပိလတ်ဆ်ုရ်မွံတ်ဂဲ၊ "ပဲဆ်ုန်ဒဲႈကော အောပ္လေါည် ခူန်ဟောခံမ်ယုဒအီုဝ် အတွပဲ။" 10 ကောပ်ဆေ အ်ုန်တဆ်ုရ်မွံတ်ဂဲ ညာခိူည်ဒီန်၊ အ်ုန်မေန်နံပ် ယဇ်ပုရောဟိတ်ဒါင်ဂဲ ယိူဝ်ဖိူမ်ကနာလို ဆ်ုန်အာပ်ယေဆု တဒေ။

11 ကောည်လိုည် ယဇ်ပုရောဟိတ်ဒါင်ဂဲ ဆောနွံရ်ႈဖိူမ် ဖုင်ဘီက်ုရ်စုဂဲမှာန် တတာမျိုဇာပိလတ် ပ္လေါည်ဒဲႈဂိူဝ်ဗာရဗ္ဗ အတွဂဲ။ 12 အခိင်ဒီန် တာမျိုဇာပိလတ် ႎီရ်ဒါႈ တဖုင်ဘီကီုန်ဂဲ၊ "က်ုန်ဒါႈခိူည်ဒီန် ပ်ုန်တောႇပဲ ခူန်ဟောခံမ်ယုဒအီုဝ် ခိူည်မောပဲ ဆ်ုန်ဒဲႈအောရ်ုရ် တအ်ုန်အဲႈ။"

13 ဂဲႎီရ်ပြိုႈဒေဒါႈ၊ "တာင်စံပ်အ်ုန် တတီုင်ဒါ်ႈစံပ်တာႇတီ။"

14 ပိလတ်ဆ်ုရ်မွံတ်ဂဲ၊ "အပေတ်ဆေ အ်ုန်က်ုရ်လူတ်အဲႈ။"

ဂဲဒီန် ႎရပြိုႈဒေဒါႈ၊ "တာင်စံပ်အ်ုန် တတီုင်ဒါ်ႈစံပ်တာႇတီ။"

15 ပိလတ် ဆ်ုန်ဒဲႈဖိူမ်ဖုင်ဘီက်ုရ်စုဂဲဟျာႈ၊ အ်ုန်ပ္လေါည်ဒဲႈပွံတ် ဗာရဗ္ဗ အတွဂဲ။ ဟွည်ႇဒီန် အ်ုန်ဆူတ်ဂဲ ဒါရဖျြံတ်လ်ုရ်ႈပွံတ်ယေဆု အာပ်ဒဲႈပဲတ်တဂဲ အတွပျံမ်ယံမ်အ်ုန် တတီုင်ဒါ်ႈစံပ်တာႇတီ။

16 အခိင်ဒီန် ဘီဆီုဝ့်ဂဲ တောႇဒေဒိူည်လာ်ႈယေဆု န်ုကာင်လာင်က္လာႇ တရခြူမ်ဟော တလူမ်တရာ၊ ဂဲဒဲႈပွံတ် ဘီဆီုဝ့်ဂဲက်ုရ်စုဒေ။ 17 ဟွည်ႇဒီန် ဂဲဒဲႈပွံတ်ယေဆု ချူပ်ဂြူ ညောတ်မိုင်ကံမ်၊ ဘံန်ဂဲဟွည်ႇ တဲင်ကာႇတီုင်ႎံရ်ပ်ုရ်အောႇ ဒဲႈအ်ုန်ပဲန် မှာ့်ပါန်ဂုင် ချူပ်ဒဲႈပွံတ် တပါင်ကိင်အ်ုန်၊ 18 ဟွည်ႇဒီန် ဂဲကူပ်ကိင်ဒေရိုဆေ ဒါႈတအ်ုန်၊ "ဒဲႈအဆာႇ ခူန်ဟောခံမ်ယုဒ လှိူင်။" 19 ဆဲႈဒီန် ဂဲလ်ုရ်ႈပွံတ်ကိင်အ်ုန် တဒု တီုင်ခွည်ခဲ၊ ဂဲဘဲ့အိုမ်ဘဲ့၊ ဂဲမာ့်ပ်ုရ်ဒ်ုပ်ဒေ ညာရာင်ဂြူပ်ပွံတ်အ်ုန်။ 20 အခိင်ဂဲဟွည်ႇ ပ်ုန်ဘဝ်ယူမ်ဆငဲႈအ်ုန်၊ ဂဲလူည့်ပဲတ် ဂြူညောတ်မိုင်ကံမ်အ်ုန်ဒီန် ဂဲႎီရ်ဒဲႈအ်ုန် ချူပ်ဒေဒါ ဆဒေါဒေ။ ဟွည်ႇဒီန် ဂဲထုဒေဒိူည်လာ်ႈပွံတ်အ်ုန် အတွတာင် တတီုင်ဒါ်ႈစံပ်တာႇတီ။

21 ✝ ယာမ်ဒီန် ဘံန်ဂဲလာ်ႈယိူဝ် အီကူဇီုဝ်ရှိမုန် ယိူဝ်ႇဒိုရ်တရူ ႎက်ုရ်ခါမ်ဂဲတဒေင်၊ ဘီဆီုဝ့်ဂဲ ဘဲဒေဟောမ် ဆူတ်အ်ုန်ကွံတ်ပွံတ် တီုင်ဒါ်ႈစံပ်တာႇတီ ယေဆု။ (ရှိမုန်ဒီန် မိူဝ်ႈကွံန်ကုင်ကုရေနေ၊ မိူဝ်ႈကူန် အာလေဇန္ဒြုဂါရ် ရုဖု။) 22 ဂဲတောႇဒေဒိူည်လာ်ႈယေဆု တအရာပ်ဂေါလဂေါသ၊ တီုင်အိုမ်ငဲအ်ုန်ဒီန်မိူဝ်ႈ၊ "အရာပ်က်ုန်အာင်ကိင်။" 23 အရာပ်ဒီန် ဂဲဒဲႈအ်ုန်တျံင် အိုမ်မရာတ်က်ုရ်ဆူရ် ဇောမ်ဆန်ုမ် ဇီုဝ်မုရန်၊ ကောည်လိုည် ယေဆုကာတျံင်စိ။ 24 ဟွည်ႇဒီန် ဂဲတာင်ပွံတ်အ်ုန် တပါင်တီုင်ဒါ်ႈစံပ်တာႇတီ၊ က်ုန်မိူဝ်ႈဂြူရ်ုန်ဒါအ်ုန် ဂဲက်ုရ်ချမဲတဒေ အဆေဒီဘိူန်။ 25 ယာမ်ဂဲတာင်အ်ုန် တတီုင်ဒါ်ႈစံပ်တာႇတီဒီန် မိူဝ်ႈအခိင်ရႎါရ်ႈ တီမ်နာရီ။ 26 ဘေဲႇပ်ုန်ဘဝ်ဒဲႈဆဒိ တပါင်တီုင်အ်ုန်ဒီန် ဒါႈ၊ "ခူန်ဟောခံမ်ယုဒဂဲ။" 27 ဂဲတာင်ရူမ်ပွံတ် ဘီစိုန်အာရ်ကူဒီန် ဇောမ်ယေဆု၊ တတီုင်ဒါ်ႈစံပ်တာႇတီ တီုင်လ်ုပ်ခေါန်ညှိုႈအူကူ၊ တီုင်လ်ုပ်ခေါန်ကာတ်အူကူ။ 28 *

29 ဘီအ်ုန်လာ်ႈက်ုရ်ခါမ် အရာပ်ဒီန် ႎံတ်ႎံတ်ပွံတ်ကိင်ဒေ ငဲပ်ုန်ဘဝ်ဒါႈ တယေဆု၊ "ဟိူည်၊ မီဒါႈဒေယာ်ႈပ်ုန်လူ ကျောင်ဗိမာန် တန်ုအွည်ဆငီ အီအ်ုန်ဒါႈဒေႎီရ်ရ်ုရ်ဒီန်။" 30 "လေႈပွံတ်မီ ဒိုရ်တီုင်ဒါ်ႈစံပ်တာႇတီ အူဒီန်အီုဝ် ပ်ုန်လောတ် ကောည်ဘိူဝ်တိုမီ။"

31 စံမ်ညာခိူည်ဒီန် ယဇ်ပုရောဟိတ်ဒါင်ဂဲဂါရ် တာဆရာနံပ်ဘေဲႇကျံမ်ဂဲ ပ်ုန်ဘဝ်ယူမ်ဆငဲႈဒိုည်ႇ ယေဆု၊ ဂဲက်ုရ်ဒါႈတဒေ အူကူတောအူကူ၊ "အ်ုန်ဘိူည်ပ်ုန်လောတ်ဒဲႈဂံတ် ဘီဟံရ်၊ အ်ုန်ကာဘဲလိုည်ဒေ ပ်ုန်လောတ်တိုဒေ။ 32 အယ်က်ုန်ယိူဝ်အယ်ငိူပ် မေရှိယ၊ ခူန်ဟောခံမ်ဣသရေလ လေႈပွံတ်ဒေ ဒိုရ်တီုင်ဒါ်ႈစံပ်တာႇတီ အူဒီန်အီုဝ်၊ အယ်ဒီညှိုမ်အ်ုန်။"

ယာမ်ဒီန် ဘီအာရ်ကူ ဘ်ုပ်တာင်ရူမ်ဇောမ်ယေဆု တတီုင်ဒါ်ႈစံပ်တာႇတီဒီန်မိူဝ်ႈ ပ်ုန်ဘဝ်ယူမ်ဆငဲႈဒိုည်ႇအ်ုန်။

33 ရောတ်အခိင်က်ုန်ဒီဆငီ အံပ်လံပ်ဆီင်ပေါဒေ ဖလူမ်ဒိုည်ႇတကပီုန်ကုင်ဒီန် မောဟိူဝ့်ဆံန် အွည်နာရီ။ 34 တအခိင်အွည်နာရီ ယေဆုပြိုႈဒေဒါႈ၊ "ဧလိ၊ ဧလိ၊ လာမရှာဗခသာနိ" အိူမ်ငဲအ်ုန်ဒီန် မိူဝ်ႈ၊ "အိူဝ် ဖြာအော၊ အိူဝ် ဖြာအော၊ ကောပ်ဆေ မီပဲတ်ပဲတ်အော ညာခိူည်အီုဝ်။"

35 ဘံန်ဘီဂဲပ်ုရ်ဒီ ဒါ့်ဇံင်တပြောဒီန် ယိူဝ်ဒေဆတီုင်ငဲအ်ုန် ဂဲဒါႈ၊ "ဆတီုင်ဘိူဝ်၊ အ်ုန်ဒါ့်တောႇ ဧလိယ။" 36 အခိင်ဒီန် ဘီအူကူ ခူန်လာ်ႈတိူဝ်ႈဒေဒိူည် အိုမ်ဘူရ်ႈပ္လိူည်၊ ဟွည်ႇစူတ် တအိုမ်မရာတ်ဘြာင် ဒဲႈအ်ုန်နာ့်၊ ႎှတကီုရ်တောႇတီုင်ခွည်ခဲ ယီုဝ်ပွံတ်တမူရ်ယေဆု ဒဲႈအ်ုန်တျံင်၊ ဟွည်ႇဒီန် အ်ုန်ဒါႈ၊ "ရဲ့ဘိူဝ်အယ်ငိူပ်၊ ဧလိယ ဒီရောတ်ကောဒေ ချလေႈအ်ုန်ရခြူမ် ဒိုရ်တီုင်ဒါ်ႈစံပ်တာႇတီအီုဝ်။"

37 ယေဆု ဟွည်ႇပြိုႈရျံင်ယာမ် အဆာႇအ်ုန် ဒိုည်ႇပွံတ်ဒေ။

38 အခိင်ဒီန် ဖကံင် န်ုကျောင်ဗိမာန် က်ုရ်ဆဲႈပဲန်ပွံတ်ဒေ အာရ်က်ုန်ဒါႈ ယိူဝ်ႇဒိုရ်တကီုရ်ႎိူည် မောဂိူပ်ရောတ်ရခြူမ်။ 39 တာဒါင်ဟိုဆီုဝ့်အူကူ ဒါ့်ဇံင်ဒေတရအာတ် တီုင်ဒါ့်စံပ်တာႇတီဒီန် ဘံန်အ်ုန်ယိူဝ်ဒေငိူပ် ခိူည်မောယေဆု ညာဒေယံမ်။* အ်ုန်ဒါႈ၊ "ဘီကူအီုဝ် မိူဝ်ႈညှိုႈ ကွံန်ဖြာယာ့်။"

40 ✝အီပ်ုန်ဂဲပ်ုရ်ဒီ ဒါ့်ဇံင်ရဲ့ဒေငိူပ် တအရာပ်ဟာရဆငါည်။ တန်ုဂဲဒီန်မိူဝ်ႈ မာရိ ကွံန်ကုင်မာဂဒလ၊ မာရိ မာယာကုပ်ဒျံတ်ဂါရ် ယောသေ၊ ပါပည် ရှာလုံ။ 41 ယာမ်ယေဆု ဂွည်တန်ုကပီုန်ကုင်ဂါလိလဲ ဂဲဒီန် မိူဝ်ႈဒိုည်ႇဘီဇောမ်ရဘံန် ကျာင်ဒေဟျံင်လူမ်လာအ်ုန်။ ဆဲႈဂဲဒီန် ယိူဝ်ထဲင်ဘိူဝ် အီပ်ုန်ဟံရ်ဂဲ ဘာ့်ဘာ့်ဘိူဝ်ဘိူဝ် လာ်ႈရူမ်ဇောမ်အ်ုန် တကုင်ယေရုရှလင်။

42 ဆငီဒီန် မိူဝ်ႈဆငီရဲန် (ကြိူည်ဆငီဆဒါင်)။ ဘံန်ရောတ် အခိင်စူန်ဆငီဒံတ်လီပ်၊ 43 ကွံန်ကုင်အရိမဿဲ ယောသပ် ရောတ်ပေါ။ အ်ုန်မိူဝ်ႈ ဘီလီပ်န်ုဖုင်ကောင်ဆီဂဲ၊ ယိူဝ်ဂုင်ဒါင် ထိူဝ်ႇဘီရိုဆေဒေ အ်ုန်မိူဝ်ႈဘီရဲ့မောင် ကပီုန်ကုင်ဖြာ။ အ်ုန်ပ်ုန်ႎါဝ်ပွံတ်ဒေ လီပ်တရအာတ် တာမျိုဇာပိလတ် မှာန်ပွံတ်တိုယံမ်ယေဆု။ 44 ဘံန်တာမျိုဇာပိလတ် ယိူဝ်ဒေဆတီုင် ယေဆုဟွည်ႇယံမ် အ်ုန်ညာအာမ်ပွံတ်ဒေ၊ အ်ုန်တောႇပွံတ်ဒေဆ်ုရ်မွံတ် တာဒါင်ဟိုဆီုဝ့် ယေဆုဟွည်ႇယံမ်ဇီုဝ့်၊ ညှံမ်ဇီုဝ့်။ 45 ဘံန်တာမျိုဇာပိလတ် ဟွည်ႇယိူဝ်ဒေဆတီုင် ငဲပ်ုန်တာင်ပျ တာဒါင်ဟိုဆီုဝ့်ဒီန်၊ အ်ုန်ဒဲႈပွံတ်တိုဘီယံမ် တယောသပ်။ 46 အခိင်ဒီန် ယောသပ် ပျာ်ႈလေႈပွံတ်တိုဘီယံမ်ဒီန်၊ ဒိုရ်တီုင်ဒါ်ႈစံပ်တာတီ၊ ဘံန်ဟွည်ႇဇိူရ်ႈဒေဒိူည် ပိဘံန်ချော၊ အ်ုန်က်ုရ်ပ်ုရ်ပွံတ်အ်ုန် လာ်ႈအူန်ပဲတ် တဘီုင်ဆာင်ခဲင်မို ပ်ုန်စာ်ႈအူန်ဒေ။ ဟွည်ႇဒီန် အ်ုန်ဂ္လိင်ပိအူန်ပဲတ်မို တမူရ်ဘီုင်ဆာင်ခဲင်ဒီန်။ 47 မာရိ ကွံန်ကုင်မာဂဒလဂါရ် မာရိ မာယောသေဂဲဒါ့်ငိူပ်၊ ယိူဝ်ပွံတ်ဒေငိူပ် အရာပ်ရအူန်တိုယေဆုဒီန်။