1 ဟွည်ႇဘိုန်ဆငီဆဒါင် မာရိ ကွံန်ကုင်မာဂဒလ၊ မာရိ မာယာကုပ်ဂါရ် ရှာလုံဂဲ ဒါႈဒေလာ်ႈဖွံန်ဒဲႈနံမ်ဆာ တတိုယံမ်ယေဆု ဂဲဇိူရ်ႈဒေဒိူည် နံမ်ဆာအူရ်ႈငှူရ်။ 2 န်ုပူရ်ဆငီ တဆငီဇူႈအူ ရႎါရ်ႈဇံဝ်ဇံဝ်၊ အခိင်ဆငီလေႈ ဂဲလာ်ႈပေါဒိုည်ႇဒေ တဘီုင်ဆာင်ခဲင်။ 3 ယာမ်လာ်ႈတရဒေင် ဂဲလာည်က်ုရ်မိုန်တဒေ အူကူတောအူကူ၊ "အဆေဒီဂ္လိင်ပိူဝ်ႈဒဲႈ မိုပိတမူရ် ဘီုင်ဆာင်ခဲင်ဒီန် အတွအယ်အဲႈ။" (ကလူမ်မိုဒီန် ဒါင်ညှိုႈညှိုႈ။)

4 အခိင်ဒီန် ဂဲယိူဝ်ဒေငိူပ် မိုဒီန်ဟွည်ႇဂ္လိင်ပိူဝ်ႈပဲတ်ဒေ။ 5 ဘံန်ညာခိူည်ဒီန် ဂဲလီပ်ပွံတ် တန်ုဘီုင်ဆာင်ခဲင်၊ ဘံန်ဂဲယိူဝ်ဒေငိူပ် ကွံန်ရလျံင်အူကူ ဒါဆဒေါလှိူင်ဘ္လောႇဘ္လူႈ ဒါ့်မာ့်ဒေလ်ုပ်ခေါန်ညှိုႈ ဂဲညာယောယ်ုရ်ယ်ုရ်ဒိုည်ႇပွံတ်ဒေ။

6 အ်ုန်ဒါႈ၊ "ပဲမာည်ယိူဝ်ဖိူမ် ယောယ်ုရ်ယ်ုရ်။ အောနံပ်အေ့ ပဲလာ်ႈပေါဒေလဲမ် ကွံန်ကုင်နာဇရက်ယေဆု ဘ်ုပ်ခါမ်တာင် တပါင်တီုင်ဒါ်ႈစံပ်တာႇတီဒီန်။ အ်ုန်ဟွည်ႇႎီရ်ယိူဝ်ႇအီမ်ဒိုရ်ယံမ်၊ ကာယိူဝ်ယာ့်အ်ုန် က်ုရ်တောအီုဝ်။ ငိူပ်မေန်၊ ဟာရအူန်တိုယံမ်အ်ုန်နာန်။ 7 ✝၁၆.၇ မ ၂၆.၃၂; မာ ၁၄.၂၈ အူဒီန်ဒဲႈပဲလာ်ႈ ဂြည်ပွံတ်ဆဒါင်အီုဝ် တတဘဲႇအ်ုန်ဂဲဂါရ် ပည်တပေတရု၊ ‘အ်ုန်စွလာ်ႈ တကုင်ဂါလိလဲ ရအာတ်ပဲယာ့်၊ ပဲဒီလာ်ႈ ယိူဝ်ဒေငိူပ်အ်ုန် အရာပ်ဒီန်၊ ခိူည်ငဲပ်ုန်ဂြည်အူန်အ်ုန်တပဲ။’"

8 ဘံန်ညာခိူည်ဒီန် ပည်ဂဲဖိူမ်နာ့်နွံရ်ႈ ယောယ်ုရ်ယ်ုရ် ဒူလေႈဒိုည်ႇပွံတ်ဒေ ဒိုရ်ဘီုင်ဆာင်ခဲင်။ ကောပ်မိူဝ်ႈဂဲ ယောလူတ်လာည် တအဆေမိူဝ်ႈ ဂဲကာယာႇဂြည်။

[ 9 ဟွည်ႇဒီန် ယေဆု ႎီရ်ယိူဝ်ႇအီမ်ဒိုရ်ယံမ် န်ုပူရ်ဆငီ ဆငီဇူႈအူ ရႎါရ်ႈဇံဝ်ဇံဝ်၊ အ်ုန်ပျလိူရ်ႈတိုဒေ တမာရိ ကွံန်ကုင်မာဂဒလ ရအာတ်၊ မာရိဒီန်မိူဝ်ႈ ယေဆု တိူမ်ရူပ်လေႈဒဲႈပဲတ် ကီုရ်နံမ်ချှိုပူရ်တို ဒိုရ်အ်ုန်။ 10 ယာမ်ဘူဂေါဘူဆေအ်ုန်ဂဲ နာ့်နွံရ်ႈဖိူမ်ကာပျော ဒါ့်ယာမ် အ်ုန်လာ်ႈဇူ ဂြည်ပျပွံတ်တဂဲ အကျံင်ဒီန်။ 11 ဟွည်ႇဒီန် ဘံန်ဂဲယိူဝ်ဒေဆတီုင် ပ်ုန်ဂြည်မာရိ အကျံင်ယေဆုႎီရ်အီမ်ဒေဂါရ် အကျံင်ယိူဝ်ဒေငိူပ်ဒေဒိူည်အ်ုန်ဒီန်၊ ဂဲကာညှိုမ်ပဲတ်။

12 ယာမ်တဘဲႇအ်ုန်အာရ်ကူ လာ်ႈဒေင်တရူ ယေဆု ပျလိူရ်ႈတိုဒေ ပည်ပုင်ရံင်က်ုရ်လှာႇ တဂါရ်အာရ်ကူ။ 13 ဂါရ်ဒီန်အာရ်ကူမိူဝ်ႈ ႎီရ်ရောတ်ဒေ ဂြည်ပျတတဘဲႇဟံရ်၊ ကောည်လိုည် ဂဲကာညှိုမ်ပဲတ် အကျံင်ဒီန်။

14 ယာမ်တဘဲႇကိူရ်အူကူဂဲ ဒါ့်မာ့်ဟောမ်ပ်ုန်ဟောမ် ယေဆုပျတိုဒေတဂဲ။ ဟွည်ႇဒီန် အ်ုန်ႎှိုင်ပွံတ်တဂဲ၊ ကောပ်မိူဝ်ႈဂဲကာယိူဝ်ဖိူမ်ညှိုမ်၊ နွံရ်ႈဖိူမ်ခေါ ကာညှိုမ်ငဲပ်ုန်ဂြည် အီအ်ုန်ယိူဝ်ဒေငိူပ် အကျံင်အ်ုန်ႎီရ်ယိူဝ်ႇအီမ်ဒေဒီန်။ 15 ✝၁၆.၁၅ တ ၁.၈အ်ုန်ဒါႈတဂဲ၊ "ဒဲႈပဲလာ်ႈဟောဂြည်ဒိုည်ႇ ဆဒါင်ကျအီုဝ် တန်ုကံမ်ဖာ အရာပ်တွံန်တီတွံန်ဒဲန်အေ့။ 16 အဆေမိူဝ်ႈဟွည်ႇ အီအ်ုန်ယိူဝ်ဖိူမ်ညှိုမ် ခါမ်ဗတ္တိဇံဒီန် ဒီဘိူန်ဒေပ်ုန်လောတ်။ အီအ်ုန်ကာယိူဝ်ဖိူမ်ညှိုမ်ဒီန် ဒီဘ်ုပ်ဒေခါမ်ဂ်ုမ်တရာ တာမ်အပေတ်။ 17 အီအ်ုန်ယိူဝ်ဖိူမ်ညှိုမ်ဒီန် ဒီဘိူန်ဒေဒါအဖုင်တီုင်ဂို အတွရ်ုရ်နမိလက္ခဏာ၊ ဂဲဒီဒါဇီုဝ်အော ရူပ်လေႈဒိုည်ႇ ကီုရ်နံမ်ချှိုဂဲ၊ ဂဲဒီဒါႈဒိုည်ႇငဲက်ုရ်လှာႇ။ 18 ဂဲက်ုန်ဒါတီဒေ တိုည်ကံင်ဟိင် က်ုန်ကာမိူဝ်ႈ ဂဲဘိူည်က်ုရ်လူတ်ဂံတ်ဒေ တျံင်ခံင်ပဲန်က်ုရ်ဘူရ်ဆမာယံမ် ကာပဲန်စိဖေတဂဲ။ ဂဲဒီဂံမ်တီဒေ တပါင်ဘီဆူဖိူဝ်နာ ဒီချံမ်ဆာဒိုည်ႇဒေ။"

19 ✝ ၁၆.၁၉ တ ၁.၉–၁၁ အခိင်ဒီန် ကီုရ်ညာယေဆု ဒါႈငဲပ်ုန်ဟွည်ႇ တဂဲ၊ အ်ုန်ဟွည်ႇဘ်ုပ်ခါမ် တိူဝ်ႈဟာ့်ပွံတ် တပ္လေင် အ်ုန်မာ့်ပွံတ်ဒေ လ်ုပ်တီ ခေါန်ညှိုႈဖြာ။ 20 အခိင်ဒီန် တဘဲႇအ်ုန်ဂဲ လာ်ႈဟောဂြည်ဒိုည်ႇတရာ အရာပ်တွံန်တီတွံန်ဒဲန်၊ ကီုရ်ညာဖြာမိူဝ်ႈ ရ်ုရ်ရူမ်ဇောမ်ဂဲ၊ ဟွည်ႇဒီန် အ်ုန်ဒါနမိလက္ခဏာ ခံင်မှိူမ်အာမ် ပျဆာ့်ဆေ တအကျံင်တရာ ပ်ုန်ဟောဂြည်ဂဲမှာန်။]

[ 21 အီပ်ုန်ဂဲဒီန် လာ်ႈဇူပေတရုဂါရ် ဘူဂေါအ်ုန်ဂဲ ပ်ုန်အဲမ်ဒေတာင်ပျ ဘ်ုရ်ယိူဝ်အကျံင် ပ်ုန်က်ုရ်တူႈဒေဂဲ။ 22 ဟွည်ႇဒီန် ယေဆုတိူဝ်ႈတိုဒေ ပ္လေါည်လာ်ႈတဘဲႇဒေ ဒဲႈဂဲဂြည်လေႈ ငဲတရာဖြာ က်ုရ်ဆဲင်ဒေ တအကျံင်ထာဝရ ပ်ုန်လောတ်အီုဝ် ယိူဝ်ႇဒိုရ်အရာပ်လ်ုပ်လေႈဆငီ မောတအရာပ်လ်ုပ်လီပ်ဆငီ။]