Gênesis 16

Агарь тай Измаило

1 Сара, ромни Аврамохкири, на бэяндёлас лэсти чяворэн. Латэ сля копыльница Египтостар, ла акхарэнас Агарь. 2 Сара пхэнда Аврамости:

— РАЙ на дыня манди чяворэн. Джя, пэр копыльницаґа: сар на авэна латар мандэ чяворэ?

Аврамости чялиля када. 3 Тай акэ, кала Аврамо проджюда дэ Ханаано дэш бэрш, Сара, лэхкири ромни, лиля пэхкиря копыльница, Агарь, сави сля Египтостар, тай отдыня дэ ромнен пэхкирэсти ромэсти. 4 Вов пыля Агарьяґа, тай вой ачиля пхари. Кала вой уджянгля, со пхари, Агарь ачиля тэ подасапэ пэхкирятар хулаятар. 5 Тунчи Сара пхэнда Аврамости:

— Ту вуджило дэ када, со мэ дэ холи. Мэ отдынём копыльница тути дэ пато, ай кана вой джянэл, со пхари, тай подасалпэ мандар. Мэк РАЙ сундисарэл амэн туґа.

6 — Тири копыльница дэ тирэн вастэн, — пхэнда Аврамо. — Тер лаґа вса, со камэх.

Тунчи Сара ачиля кади врыто пэ тэ лиджя Агаряґа, со кодыя унашля латар.

7 Ангело РАЕХКИРО аракхля Агарь дэ шуки пхув, надур лэнёратар; кадыя лэнёри сля пашэ дромэстэ дэ Шуро. 8 Вов пхучля:

— Агарь, копыльница Саратири, катар ту авилян тай тев джях?

— Мэ нашав мурятар хуланятар Саратар, — пхэнда вой.

9 Тунчи Ангело РАЕХКИРО пхэнда лати:

— Рисяв пэхкирятэ хуланятэ тай тэлюв лати.

10 Инте Ангело РАЕХКИРО пхэнда лати:

— Мэ кади терава бут тирэн потомконэн, со лэн нащи авэла тэ побинэ.

11 Инте Ангело РАЕХКИРО пхэнда лати:

— Ту кана пхари тай бэянэґа чявэ. Акхар лэ Измаило*16.11 Измаило — пур. евр. лав «Йишмаэл» исин «Дэвэл шунэл»., пала када со РАЙ ушунда пала тири дукх.

12 Вов авэла, сар дыко магари:

Вов авэла всаворэнди врыжымашы,

тай лэсти всаворэ авэна врыжымашы.

Вов авэла тэ джювэ дэ холя

всаворэнца пэхкирэнца пхралэнца.

13 РАЕСТИ, Саво дэдуманя лаґа, Агарь дэня лав «Эл-Рои*16.13 Эл-Рои — пэ пур. евр. када исин «Дэвэл, Саво дыкхэл ман».», пала кода со вой пхэнда:

— Екхатар мэ дыкхлём Колэ, Ко дыкхэл ман.

14 (Акэ сости кодэва ханинг сля акхардо Бээр-Лахай-Рои*16.14 Бээр-Лахай-Рои — пэ пур. евр. када исин «ханинг Кодэлэхкиро, саво вечно джювэл тай дыкхэл ман». , вов и екхатар котэ, машкар Кадешоґа и Бередоґа.)

15 Агарь бэянда Аврамости чявэ, тай Аврамо дэня чявэсти, савэ вой бэянда, лав Измаило. 16 Кала Агарь бэянда Аврамости Измаило, лэсти сля 86 бэрш.