23 Авраамо поджиля пашэдэр Лэстэ тай пхэнда:

— Со, чяче, Ту умарэґа чячюнэ манушэ екхтханэ бэзэхалэґа? 24 Со, сар дэ форо исин панчдэша чячютнэ? Ту всаекх умарэґа тай на дэґа Тири мила калэсти тханэсти важ панчдэша чячютнэ? 25 На авэґа Ту тэ терэ кацаво — тэ умарэ чячюнэ ектханэ бэзэхалэґа кади ж. На авэґа Ту кади тэ терэ! Со ж Сундисари всаворя люмлятиро авэла ли тэ терэ хохавимо?

26 РАЙ пхэнда:

— Сар Мэ аракхава дэ Содомо панчдэша чячютнэн, то пала лэн сикавава Мури мила пэ всаворо кодэва тхан.

27 Тунчи Авраамо пхэнда инте:

— Акэ, мэ исин прахо тай пепло, ай мэ би даратиро ачилём тэ дэдумэ Хулаеґа. 28 Со, сар дэ панчдэша чячютнэн на хутилэла панч ? Умарэґа Ту всаворо форо пала када, со на хутилэл панч манушэн?

— Сар Мэ аракхава котэ саранда панч, — пхэнда Вов, — на умарава лэ.

29 Авраамо пхэнда Лэсти инте екхвар :

— Со, сар котэ аракхэнапэ кацик саранда?

Вов пхэнда:

— Пала саранда Мэ на терава када.

30 Тунчи Авраамо пхэнда:

— На холявэл, Хулай, ай дэла манди тэ пхэнэ. Со, сар аракхэнапэ котэ кацик трянда?

Вов пхэнда:

— Мэ на терава када, сар аракхава котэ трянда.

31 Авраамо пхэнда:

— Акэ, мэ инте камав тэ пхучяв Тутар, Хулай. Со, сар аракхэнапэ котэ кацик биш?

Вов пхэнда:

— Пала биш Мэ на умарава лэ.

32 Тунчи Авраамо пхэнда:

— Тэ на холявэл Хулай, ай дэла манди тэ пхэнэ инте екхвар. Со, сар аракхэнапэ котэ кацик дэш?

Вов пхэнда:

— Пала дэш Мэ на умарава лэ.

33 РАЙ пэрэачиля тэ дэдумэ Авраамоґа тай уджиля, ай Авраамо рисиля цэрэ.