1 ಎ ಜಗತ ಶುರು ಥಾವಾತಿ ಅಗ್ದುರಜ಼ ರ‍್ಹಯಲ ಜ಼ಲಮ ರ‍್ಹಯಲ ಕ್ಹುದಾನಿ ವಾಕ್ಯಾನಾ ಹುತಿ ಹಮೆ ತುಮೊನೆ ಬರ್ದಾಡಾಸ; ಎ ಕ್ಹಾರು ಕಾನೊಕ್ಹು ಐಕ್ಯಾಸ; ಡೊಳಾಕ್ಹು ದೆಕ್ಯಾಸ; ಧ್ಯಾನ ದಿನ ದೆಕ್ಯಾಸ, ಹತೊಕ್ಹು ಮುಟ್ಟಿನ ದೆಕ್ಯಾಸ. 2 ತೆ ಜ಼ಲಮ ಹಮೊನೆ ದಿಕ್ಹ್ಯೊಸ. ಹಮೆ ತೆ ದೆಕಲಹುತಿ ತಿನಾಹುತಿ ಸಾಕ್ಷಿ ಕೈಯೆಸ. ಹಮೆ ಹಮ್ನಾ ತುಮೊನೆ ತೆ ಜಿವ್ತಾ ಜ಼ಲಮ್ನಿ ಸಾಕ್ಷಿ ಕವಾಡಾಸ. ತೆ ಬಾ ಥಯಲ ಕ್ಹುದಾನಾ ಕ್ಹಾತೆ ಹಮೆಶಾನೊ ಜ಼ಲಮ ವ್ಹೈ. ಕ್ಹುದಾ ತೆ ಹಮೆಶಾನೊ ಜ಼ಲಮ ಹಮೊನೆ ದೆಕಾಡ್ಯೊ.

3 ಹಮೆ ದೆಕಲ ಕ್ಹಾರು ವರಿ ಐಕಲ ಹಮ್ನಾ ಹಮೆ ತುಮೊನೆ ಕಯೆಸ. ಕಾ ಕದ್ಯಾಮ ತುಮೆ ಹಮಾರಿ ಅನ್ಯುನತೆಮಾ ಪಾಲಲಿವಾಲಾ ಥೌ ಕೈನ ಹಮಾರಿ ಆಸ ವ್ಹೈ. ಅಪ್ನಿ ಅನ್ಯುನೆತೆ ಬಾ ಥಯಲ ಕ್ಹುದಾ ವರಿ ತಿನೊ ದಿಕ್ರೊ ಯೆಸು ಕ್ರಿಸ್ತನಾ ಕ್ಹಾತೆ ರ‍್ಹವಾನು ವ್ಹೈ. 4 ಅಪ್ನಿಕ್ಹುಶಿ ಪುರಾ ಥಾವಾದೆ ಕೈನ ಹಮೆ ತುಮೊನೆ ಎ ಸಂಗತಿಯೊ ಬರ್ದಾಡಾಸ.

5 ಹಮೆ ಕ್ಹುದಾಕಂತು ಐಕಿನ ತುಮೊಕನ ಕವಾನಿಯೊ ವಾತೊ ಕಯ್ಯೊ ವ್ಹೈ ಕದ್ಯಾಮ, ಕ್ಹುದಾ ಉಜಾಲು ವ್ಹೈ. ತಿಮಾ ಅಂದಾರು ನತ್ತಿ. 6 ತಿನಾಹುತಿ ಕ್ಹುದಾನಾ ಕ್ಹಾತೆ ಅನ್ಯುನ್ಯೆತಾಮಾ ಛೆ ಕೈನ ಹಮೆ ಕೈಲಿನ, ಅಂದಾರಾಮಾ ಜಿವಸ್ತಾ ರ‍್ಹಯ್ಯಾಮ ಸುಳ್ಳ ಕದಲನಿಂಗತ ಥಯ್ಯು. ಕಾಕದ್ಯಾಮ ಅಪೆ ಕ್ಹರಿ ಪಾಲನ ನತ್ತಿ ಕರಾಡಾ. 7 ಕ್ಹುದಾ ಉಜಾಲು ಥೈನ ಛೆ. ತಿನಾಹುತಿ ಅಪೆ ಉಜಾಲಾಮಾ ಜಿವ್ನಾ ಕರು. ಅಪೆ ಉಜಾಲಾಮಾ ಜಿವ್ನಾ ಕರಾಲಾ ರ‍್ಹಯಾಮ ಯಕ್ಕನೆ ಯಕ್ಕ ಅನ್ಯುನ್ಯೆತಾಮಾ ಛೆ ಕೈನ ವರಿ ಕ್ಹುದಾನೊ ದಿಕ್ರೊ ಯೆಸು ರಗತ ಅಪ್ನಾ ಕ್ಹಾರಾ ಪಾಪೊಕ್ಹು ಛೊಡಾವಸ.

8 ಅಪೊಮಾ ಪಾಪ ನತ್ತಿ ಕೈನ ಕೈಲಿದ್ಯಾಮ, ಅಪೊನೆ ಅಪೆಜ಼ ಮೊಸ ಕರಲಿವಾಲಾ ಥಯಾಸ. ವರಿ ಅಪೊಮಾ ಕ್ಹರಿ ನತ್ತಿ. 9 ತೆನೈಸೊ ಅಪ್ನಾ ಪಾಪೊ ಕೈಲಿದ್ಯಾಮ, ತೆ ಬರೊಕ್ಹೊವಾಲೊ ನಿತಿವಂತವಾಲೊ ರ‍್ಹಯಲಹುತಿ ಅಪ್ನಾ ಕ್ಹಾರಾ ಕೆಟ್ಟ ಕಾಮೊ ಮಾಫ ಕರಿನ ಅಪೊನೆ ಶುದ್ಧ ಕರಸ. 10 ಅಪೆ ಪಾಪ ಕರ‍್ಯಾ ನತ್ತಿ ಕೈನ ಕದ್ಯಾಮ ಕ್ಹುದಾನೆಜ಼ ಸುಳ್ಳ ವ್ಹೈ ಕೈನ ಕವಾಲಾ ಥಯಾಸ ವರಿ ಕ್ಹುದಾನಿ ವಾಕ್ಯಾನೆ ನೈ ವಪ್ಪಿಲಿವಾಲಾ ಥೈಯೆಸ.