1 ಕ್ಹುದಾನಿ ಚಿತ್ತ ನಿಂಗತ ಕ್ರಿಸ್ತ ಯೆಸುನೊ ಅಪೊಸ್ತಲ ಥಯಲ ಪೌಲಾ ವರಿ ಭೈ ಥಯಲ ತಿಮೊಥಿನಾ ಕ್ಹಾತೆ ಮಳಿನ

ಕೊರಿಂಥಮಾ ರ‍್ಹಯಲ ಕ್ಹುದಾನಿ ಸಬೆವಾಲಾವೊನೆ ಅಖಾಯ ಸಿಮೆಮಾ ರ‍್ಹಯಲ ಕ್ಹಾರಾ ಕ್ಹುದಾನಾ ಮನಕ್ಹೊನೆ ಎ ಪತ್ರ ಬರ್ದಾಡೊಸ.

2 ಅಪ್ನೊ ಬಾ ಥಯಲ ಕ್ಹುದಾಕ್ಹು ವರಿ ಪ್ರಭು ಥಯಲ ಯೆಸು ಕ್ರಿಸ್ತಕ್ಹು ತುಮೊನೆ ಕೃಪಾ, ಶಾಂತಿ ಮಳಾದೆ.

3 ಅಪ್ನೊ ಕರ್ತಾ ಥಯಲ ಯೆಸು ಕ್ರಿಸ್ತನೊ ಬಾ ಥಯಲ ಕ್ಹುದಾನೆ ಸ್ತೊತ್ರ. ತೆ ಮರಗಾಲೊ ಬಾ ವರಿ ಕ್ಹಾರಿ ತರಾಕ್ಹು ಕಾಳಜಿ ಕರಾಲೊ ಕ್ಹುದಾ ರ‍್ಹೈನ, 4 ಅಪೊನೆ ಆವಾನಾ ಕ್ಹಾರಾ ದುಕ್ಕೊಮಾಬಿ ಅಪೊನೆ ಸಂತೈಸಾಲೊ ವ್ಹೈ. ಅಪೆ ಕಿಮ್ಮ ದುಕ್ಕಮಾ ರ‍್ಹತಾಮಾ ಕ್ಹುದಾ ಅಪೊನೆ ಸಂತೈಸ್ಯೊ ತಿನಾ ನಿಂಗತ ಅಪೆ ಬಿಜಾ಼ವೊನೆ ಕರು. 5 ಕಾಕದ್ಯಾಮ ಕ್ರಿಸ್ತನಾಹುತಿ ಅಪೊನೆ ಕಿಮ್ಮ ತ್ರಾಸ ಹೆಚ್ಕಿ ಥಾತು ಆವಸ ತಿನಾ ನಿಂಗತ ಕ್ರಿಸ್ತಕ್ಹು ಹೆಚ್ಕಿ ಆದರಣೆ ಮಳಸ. 6 ಅಪೊನೆ ತ್ರಾಸ ರ‍್ಹಯಲಜ಼ ರ‍್ಹಯೊಮ ತೆ ತ್ರಾಸೊ ತುಮೊನೆ ಆದರಣೆ ಥೈನ ವರಿ ರಕ್ಷಣೆನಾಹುತಿ ಅಪೊನೆ ಆದರಣೆ ರ‍್ಹಯುಮ ತೆ ತುಮೊನೆ ಆದರಣೆನಾಹುತಿ ಅಪೊನೆ ರ‍್ಹಯಲ ತ್ರಾಸೊ ತುಮೆ ತಡ್ದಿಲಿನ ವಪ್ಪಿಲಿವಾನೆ ಎ ತುಮೊನೆ ಮದತ ಥಾವಸ. 7 ತುಮಾರಿ ವಿಷಯಮಾ ಹಮೊನೆ ಘನ್ನಿ ನಿರಿಕ್ಷೆ ಛೆ. ತುಮೆ ಹಮಾರಾ ತ್ರಾಸೊಮಾ ಕ್ಹಾತೆ ಹಿಸ್ಸೊ ಲಿದಲಹುತಿ ಹಮೊನೆ ಆವಾನಿ ಆದರಣೆಮಾ ತುಮೆ ಹಿಸ್ಸೊ ಲಿವಾಲಾ ಥಾವೊಶಿ ಕೈನ ಹಮೊನೆ ಗ್ವತ್ತ ಛೆ.

8 ಭಾಯೊ ಭೆನೊ, ಹಮೆ ಎಶ್ಯಾ ಸಿಮೆಮಾ ಖಾದಲ ಕಷ್ಟ ತ್ರಾಸ ತುಮೊನೆ ಗ್ವತ್ತ ರ‍್ಹೌ ಕೈನ ಆಸ ಕರಿಯೆಸ. ತ್ಯಾ ಹಮಾರಿ ತಡ್ದಿಲಿವಾನಿ ತಾಕತತಿಬಿ ಜಾಸ್ತಿ ತ್ರಾಸ ಅನುಭವಿಶಾ ತ್ಯಾ ಹಮೆ ತುಟಿ ಗಯಾ ಜಿವ್ತಾ ರ‍್ಹಯೆಸ ಕೈನ ಆಸ ಜ಼ವೈ ಲಿದ್ಯಾ. 9 ಮರಾನು ತೊ ಗ್ಯಾರಂಟಿ ವ್ಹೈ ಕೈನ ಲಾಗತಾ ಟೈಮಮಾ ಹಮೆ ಹಮೊಪರ ಬರೊಕ್ಹೊ ಮ್ಹೆಲ್ಯಾ ಬಗರ ಮರೆಲವಾಲಾವೊನೆ ಜಿವ್ತೊ ಕರಾಲಾ ಕ್ಹುದಾಪರ ಬ್ಹರೊಕ್ಹೊ ಮ್ಹೆಲು ಕೈನ ಆಂ ಕ್ಹಾರು ಹಮಾರಾ ಕ್ಹಾತೆ ಥಯು. 10 ತೆ ಹಮೊನೆ ತೆಕ್ಲು ಖತರನಾಕ ಮೌತಕ್ಹು ವಚಾ಼ಡ್ಯೊ. ಅಗೊಬಿ ಕೆಳಾಮಾಬಿ ವಚಾ಼ಡಸ. 11 ತುಮೆ ಹಮಾರಾಹುತಿ ಪ್ರಾರ್ಥನಾ ಕರೊಶಿ ತಿನಾಹುತಿಬಿ ತೆ ಹಮೊನೆ ಆಗೊಬಿ ವಚಾ಼ಡಸ ಕೈನ ತಿಪರ ಆಸ ಮ್ಹೆಲ್ಯಾಸ. ಅಮ್ಮಜ಼ ಘನ್ನಾ ಜ಼ನಾವೊನಿ ಪ್ರಾರ್ಥನಾಕ್ಹು ಹಮೊನೆ ಥಾವಾನಾ ಉಪಕಾರನಾಹುತಿ ಘನ್ನಾ ಮನಕ್ಹೊಕ್ಹು ಕ್ಹುದಾನೆ ಕೃತಜ್ಞತಾ ಸ್ತುತಿ ಥಾವಸ.

12 ಹಮೆ ಕ್ಹಾಲಿ ಮನಕ್ಹೊನು ಗ್ಯಾನಕ್ಹು ಕಾಮ ಕರ‍್ಯಾ ಬಗರ ಕ್ಹುದಾನಿ ಕೃಪಾನೆ ಧರ್ಲಿನ ಪರಿಶುದ್ಧ ವರಿ ನಿಯತ್ತಕ್ಹು ರ‍್ಹೈನ ಆಂ ದುನಿಯಾಮಾ ಕ್ಹಾರಾವೊತಿಬಿ ಪೈಲಾ ತುಮಾರಿ ವಿಷಯಮಾ ಚಾ಼ಲಿನ ಗಯಾಸ ಕೈನ ಹಮಾರಿ ಮನಸ ಸಾಕ್ಷಿ ಕವಸ. ಆಂಜ಼ ಹಮೊನೆ ರ‍್ಹಯಲ ಘಮಂಡ ವ್ಹೈ. 13 ತುಮೆ ಹಮಾರಾ ಪತ್ರ ಒದಿನ ಕಳೈಲಿವಾನಾ ಸಂಗತಿಯೊಜ಼ ಹೊತ್ತಾ ವರಿ ಬಿಜು಼ ಸುಜ಼ ಹಮೆ ತುಮೊನೆ ಬರದ್ಯಾ ನತ್ತಿ. 14 ತುಮೆ ಹಮೊನೆ ಕ್ಹಾಲಿ ನಕ್ಕರ ಕಳಿಲಿದ್ಯಾಸ ಲಾಸ್ಟಲಕ್ಕಾಬಿ ಒಪ್ಪಿಲಿವೊಶಿ ಕೈನ, ಅಪ್ನೊ ಪ್ರಭು ಥಯಲ ಯೆಸು ಆವಾನಾ ದಿನ್ನೆ ತುಮೆ ಹಮಾರಿ ಘಮಂಡ ಕರಾನೆ ಕಾರಣ ಥಯಲನಿಂಗತ ಹಮೆಬಿ ತುಮಾರಾ ಘಮಂಡ ಕರಾನೆ ಕಾರಣ ಥಯೆಸ ಕೈನ ತುಮೆ ಒಪ್ಪಿಲಿವೊಶಿ.

15 ಮಿ ಆಂ ಕ್ಹಾರಾ ವಿಷಯಮಾ ಘನ್ನೊ ಬರೊಕ್ಹಾವಾಲೊ ವ್ಹತೊ. ತಿನಾಹುತಿ ಮಿ ತುಮೊನೆ ಮಳಾನೆ ವಿಚಾರ ಕರ‍್ಯೊತೊ. ತೆಳಾಮಾ ತುಮೊನೆ ಬೆಸಲಾ ಆಶಿರ್ವಾದ ಮಳತುತು. 16 ಪೈಲಾ ತುಮೊಕನ ಐನ ಪಾಚ಼ಲ್ತೊ ಮೆಕೆದೊನಿಯಾನೆ ಗೈನ ತೆ ಥಯಲ್ಪರ ಮೆಕೆದೊನಿಯಾತೊ ವರಿ ತುಮೊಕನ ಐನ ತುಮೆ ಮನೆ ಯುದಾಯನೆ ಜಾ಼ವಾನಾಹುತಿ ಮನೆ ಮದತ ಕರೊ ಕೈನ ಕವಾನಿ ವಿಚಾರ ವ್ಹತಿ. 17 ಮಿ ಎ ವಿಚಾರ ಕರ್ತಾಮಾ ತುಮೊಕನ ಆವಾನು ಉದ್ದೆಶ ಕ್ಹರಿಮಾಜ಼ ಮನೆ ನ್ಹೊತು ಕೈನ ವಿಚಾರ ಕರೊಶಿ ಸು? ಮಿ ದುನಿಯಾವಾಲಾ ವಿಚಾರ ಕರಲನಿಂಗತ ವಿಚಾರ ಕರ‍್ಯೊಸ ಸು? ತ್ಯುನೆತೊ ವಿಚಾರ ಕರ್ತಾಮಾ ಯಕ್ಕೆಮ ಹುಂ ಯಕ್ಕೆಮ ನೈ ಕವಸ. 18 ತುಮೆ ಕ್ಹುದಾಪರ ನೈ ಬರೊಕ್ಹೊ ಕರಾಲಾ ರ‍್ಹವತ್ತೊ. ಹಮೆ ತುಮೊನೆ ಯಕ್ಕಜ಼ ಟೈಮಮಾ ಹೊ ನೈತೊ ನೈ ಕವಾನು ತುಮೆ ನತ್ತಿ ಕದ್ಯಾ ಕವಾನು ಬರೊಕ್ಹೊ ಕರ್ತಾನ್ಹೊತಾ. 19 ಮಿ ವರಿ ಸಿಲ್ವಾನ, ತಿಮೊಥಿ ವರಿ ತುಮೊನೆ ಕ್ಹಾರವೊನೆ ಗ್ವತ್ತ ರ‍್ಹಯಲ ಕ್ಹುದಾನೊ ದಿಕ್ರೊ ಯೆಸು ಕ್ರಿಸ್ತ ಹಮ್ನಾ ಹುಂ ಕೈನ ಪಾಚಾ಼ತಾ ಫರಾಲೊ ನ್ಹವೈ. ಕೆಳಾಮಾಬಿ ಕ್ಹರಿನೆ ಕ್ಹರಿಜ಼ ವ್ಹೈ ಕೈನ ಕವಾಲೊ ವ್ಹೈ ತೆ ಕೆಳಾಬಿ ಯಕ್ಕ ಸೆಮ ರ‍್ಹವಾಲೊ ವ್ಹೈ. 20 ತಿನಾಹುತಿ ಕ್ಹುದಾ ಕರಲ ಪುರಾ ವಾಗ್ದಾನೊ ಕ್ರಿಸ್ತಮಾ ಕ್ಹರಿನಾ ವ್ಹೈ. ಅಪೊಕಂತಿ ಕಿಮ್ಮ ಕ್ಹುದಾನೆ ಮಹಿಮಾ ಥಾಯೆ ನಿಂಗತ ಹಮೆ ಕ್ರಿಸ್ತನಾ ಮೂಲಕ ಆಮೆನ್ ಕಯ್ಯೆಸ. 21 ತುಮೊನೆ ವರಿ ಹಮೊನೆ ಕ್ರಿಸ್ತಮಾ ಘಟ್ಟ ಕರಾಲೊ ಕ್ಹುದಾಜ಼ ವ್ಹೈ. ಕ್ಹುದಾ ತಿನಾ ಖಾಸ ಆಶಿರ್ವಾದೊ ಅಪೊನೆ ದಿದ್ಯೊಸ. 22 ಅಪೆ ತಿನಾ ವ್ಹೈ ಕೈನ ದೆಕಾಡಾನೆ ತೆ ಅಪೊಪರ ಶಿಕ್ಕೊ ಘಾಲ್ಯೊಸ. ತೆ ತಿನಿ ಪವಿತ್ರ ಆತ್ಮಾ ಅಪ್ನಾ ಮನಸ್ಮಾ ಮ್ಹೆಲ್ಯೊಸ. ತೆ ಅಪೊನೆ ದಿದಲ ವಾಗ್ದಾನ ಪುರಾ ಕರಸ ಕವಾನೆ ಪವಿತ್ರ ಆತ್ಮಾಜ಼ ಅಪೊನೆ ಸಾಕ್ಷಿ ಥೈಸ.

23 ತುಮೊನೆ ಶಿಕ್ಷಾದಿವಾನ ರ‍್ಹೈನೆಕಾ ದುಖ ದಿವಾನು ರ‍್ಹೈನೆಕಾ ಮನೆ ಮನಸ ನ್ಹೊತು. ತಿನಾಹುತಿ ಮಿ ತುಮೊಕನ ವಾಪಸ ಫರಿನ ನತ್ತಿ ಆಯೊ. 24 ತುಮಾರೊ ಬರೊಕ್ಹೊ ಹತೊಟಿಮಾ ಮ್ಹೆಲ್ಲಿವಾನಾ ಹುತಿ ಹಮೆ ಕೊಶಿಸ ಕರಾಡ್ಯಾಸ ಕೈನ ಮಿ ಕವಾಡ್ಯೊ ನತ್ತಿ.ತುಮೆ ಬರೊಕ್ಹಾಮಾ ಘಟ್ಟ ಛೆ. ತೆನೈಸೊ ಹಮೆ ತುಮಾರಿ ಖುಶಿನಾ ಹುತಿ ತುಮಾ ಕ್ಹಾತೆ ಕಾಮ ಕರಾಲಾ ಥಯಾಸ.