1 ಮಯಾನಾ ಭಾಯೊ ಭೆನೊ, ಎ ವಾಗ್ದಾನೊ ಅಪೊನೆ ರ‍್ಹಯಲಕ್ಹು, ಅಪೆ ಅಂಗನಿ ಆತ್ಮಾನೆ ಶುದ್ದ ಕರಲಿನ ಅಪೊನೆ ಸ್ವಚ್ಚ ಕರಲಿನ ಕ್ಹುದಾನಾ ಭೆಂಕ್ಹು ಭರಲವಾಲಾ ಥೈನ ಪವಿತ್ರಾತಾಮಾ ರ‍್ಹವಾನಿ ಕೊಶಿಶ ಕರಿಯೆ.

2 ತುಮಾರಾ ಮನಸೊಮಾ ಹಮೊನೆ ಜ಼ಗಾ ದಿವೊ. ತುಮೊಮಾ ಕಿನೆಜ಼ ಅನ್ಯಾಯ ಕರ್ಯಾ ನೈ. ಕಿನೆಜ಼ ತ್ರಾಸ ಕರ್ಯಾ ನೈ. ಕಿನೆಜ಼ ಮೊಸ ಕರ್ಯಾ ನೈ. 3 ತುಮಾರಾ ಉಪ್ಪರ ಘಾಲು ಕೈನ ಹಮೆ ಎ ಕವಾಡಾ ನತ್ತಿ; ತುಮಾರಾ ಕ್ಹಾತೆ ಮರ್ಯಾರೆ, ಜ್ಯುತಾ ರ‍್ಹೈತಬಿ ಕವಾ ನಿಂಗತ ತುಮೆ ಹಮಾರಾ ಮನಸೊಮಾ ಛೆ ಕೈನ ಮಿ ಪೈಲಾಜ಼ ಕದ್ಯೊತೊ. 4 ತುಮಾರಾಮಾ ಮನೆ ಘನೊ ಭರೊಕ್ಹೊ ಛೆ, ಘಟ್ಟ ರ‍್ಹಯಲ ಅಬಿಮಾನ ಛೆ. ಮಿ ಕ್ಹಾರಾ ತ್ರಾಸೊಮಾ ತುಟಲ ಮನಸಕ್ಹು ಕ್ಹುಶಿ ಕರಾಲೊ ಥಯೊಸ. 5 ಅಪೆ ಮೆಕೆದೊನಿಯೆ ಆಯಲ್ಪರ ಹಮಾರಾ ಅಂಗೊನೆ ನೆಮ್ಮದಿ ನತ್ತಿ. ತೆನೈಸೊ ಕ್ಹಾರಾ ವಿಶಯೊಮಾ ಹಮೊನೆ ತ್ರಾಸೊ ವ್ಹತ್ತಾ. ಭಾರಾ ಲಡೆ, ಮ್ಹೈಂ ಭೆಂ 6 ತೆನೈಸೊ ದಿನಾ ವಸ್ಥೆಮಾ ರ‍್ಹವಾಲಾವೊನೆ ಸ್ಹೆಂ ಕರಾಲೊ ಕ್ಹುದಾ ತಿತಾನೆ ವಳಾವಾನಾ ಮೂಲಕ ಹಮೊನೆ ಸ್ಹೆಂ ಕರ‍್ಯೊ. 7 ತಿನಾ ಲಿಕಾವಟಕ್ಹು ತುಮಾರಾಕ್ಹು ಘನು ಸಮಾದಾನ ಹೊಂದ್ಯೊಸ ಕೈನ, ತುಮಾರಿ ಚೊ಼ಕಿ ಮಯಾ, ತುಮಾರು ದುಕ್ಕ, ಮಾರಾಪರ ರ‍್ಹವಾನಿ ತುಮಾರಿ ಕಾಳಜಿ; ಎ ಕ್ಹಾರು ಹಮೊನೆ ಕತಾಮಾ ಮಿ ಹಜಿ ಘನೊ ಕ್ಹುಶಿ ಥಯೊ. 8 ಮಿ ಲಿಕ್ಕಲ ಪತ್ರಕ್ಹು ತುಮೊನೆ ದುಕ್ಕ ಥೈತಬಿ ಮನೆ ಸುಜ಼ ಕೆಟ್ಟ ನತ್ತಿ. ತೆ ತುಮೊನೆ ದಕ್ಹೊ ಟೈಮ ದುಕ ಕರ‍್ಯುಸ ಕೈನ ಮಿ ಪೈಲಾಜ ಪಶ್ಚಾತಾಪ ಪಡಿತಬಿ ಹಮ್ನಾ ಕ್ಹುಶಿ ಥವುಸ. 9 ತುಮೊನೆ ತ್ರಾಸ ಥಯು ಕೈನ ಮಿ ಹಮ್ನಾ ಕ್ಹುಶಿ ಥಯೆವಾಚಿ ತುಮೆ ದುಕಿ ಥೈನ ಪಶ್ಚಾತಾಪ ಪಡ್ದಿನ ಮಾನಸಾಂತರ ಹೊಂದಾನಾಹುತಿ ಕ್ಹುಶಿ ಥವುಸ. ತುಮೆ ಕ್ಹುದಾನಾ ಚಿತ್ತನಾಹುತಿ ದುಕಿ ಥಯಲಕ್ಹು ಹಮಾರಾಕ್ಹು ಕಿಮಾಜ಼ ತುಮೊನೆ ಕೆಟ್ಟ ಥಯು ನೈ. 10 ಕ್ಹುದಾನಿ ಚಿತ್ತನಾಹುತಿ ದುಕ್ಕ ರಕ್ಷಣೆ ದೆಕ್ತಾಮಾ ತ್ರಾಸನೆ ಶುರು ಕರಸ, ತೆ ತ್ರಾಸಮಾ ಪಶ್ಚಾತಾಪನೆ ಆಸ್ಪದ ನತ್ತಿ; ತೆನೈಸೊ ಲೊಕಮಾ ರ‍್ಹವಾನು ದುಕ್ಕಮೌತ ಆವಾಲಗಾಡಸ. 11 ತುಮೆ ಕ್ಹುದಾನಿ ಚಿತ್ತನಾಹುತಿ ಕ್ಹಾದಲ ದುಕ್ಕ ತುಮಾರಾಮಾ ಕೆಕ್ಲು ಹಂಬಲ, ತಪ್ಪ ರ‍್ಹಯಲವಾಲಾವೊನೆ ಶಿಕ್ಷಾ ದಿವಾನೆ ಕಸ್ಟ ಪಡದಿನ ತುಮೆ ನಿರ್ದೊಸಿಯೊ ವ್ಹೈ ಕೈನ ಕವಾನಾಹುತಿ ಕೆಕ್ಲಿಕಿ ಮ್ಹೈನತ ಕರ‍್ಯಾಸ, ಕೆಕ್ಲೊ ಮನೊವ್ಯಥೆನೆ ಅನುಭವಿಸ್ಯಾಸ; ಕೆವು ಬುಚಕ ದೆಕ್ಲಾಡ್ಯಾಸ; ಮನಕ್ಹನಾ ತ್ರಾಸನಾಹುತಿ ಕೆಕ್ಲಿಕಿ ಶಿಟ್ಟ ಕರಿನ ಶಿಕ್ಷಾ ಕರ‍್ಯಾಸ ಎ ಕ್ಹಾರು ಅದೃಶ ಥೈ ಗಯಾಸ. 12 ಮಿ ತುಮೊನೆ ಬರ್ದಲ ತಪ್ಪ ಕರಲವಾಲಾನೆ ಶಿಕ್ಷಾ ಥವು ಕೈನ ನವೈ, ತೆ ತಪ್ಪಕ್ಹು ಪಿಡಿತನೆ ನ್ಯಾಯಾ ಮಳುಕೈನ ನವೈ; ಹಮಾರಾಹುತಿ ತುಮೊನೆ ರ‍್ಹವಾನು ಅಕ್ಕರೆ, ಆಸ್ತಿಯೊ ಕ್ಹುದಾನಿ ಸನ್ನಿದಿಮಾ ತುಮೊನೆ ದಿಕ್ಹು ಕೈನ ಬರ್ದ್ಯೊಸ. ತಿನಾಹುತಿ ಹಮಾರಾ ಮನಸೆ ಶಾಂತಿ ಥಯಿಸ. 13 ತೆಕ್ಲು ನೈ, ತುಮೆ ಕ್ಹಾರಾ ತಿತಾನಾ ಮನಸನೆ ಶಾಂತ ಕರಲಕ್ಹು ತಿನಿ ಕ್ಹುಶಿ ದೆಕಿನ ಹಮೆ ಬಿದ್ದಕ್ಹಾ ತೃಪ್ತ ಥಯಾ.. 14 ಕಾಕದ್ಯಾಮ ಮಿ ತಿತಾನಾ ಕ್ಹಾಮೊ ತುಮಾರಾಹುತಿ ಚೊ಼ಕು ಕದ್ಯೊಸ ಕರಿಜ಼ ; ತಿಮ್ಮಜ ಚೊ಼ಕು ಕದಲಕ್ಹು ಮಿ ಸರಮಾತೊ ನೈ. ತಿನಾಹುತಿ ಮಿ ತುಮೊನೆ ಕದಲ ಕ್ಹಾರಾ ವಾತೊ ಕಿಮ್ಮ ಕ್ಹರಿ ವ್ಹತ್ತಾತೊ ತಿಮ್ಮಜ಼ ಅಪೆ ತಿತಾನಾ ಕ್ಹಾಮಾ ಕದಲ ಚೊ಼ಕಾ ವಾತೊ ಕ್ಹಾರಾ ಕ್ಹರಿ ವ್ಹೈ ಕೈನ ದಿಕ್ಹಿನ ಆಯಾ. 15 ತುಮೆ ವಿದೆಯತೆಮಾ ಭಯ ಭಕ್ತಿಕ್ಹು ತಿನಾ ಸ್ವಿಕಾರ ಕರಲಿದಲ ಸ್ಹೆಂ ಕರಲೆತಾಮಾ ತುಮಾರಾಪರ ತಿನೆ ರ‍್ಹವಾನಿ ಮಯಾ ಹೆಚ್ಚ ಥೈಸ. 16 ತುಮಾರಾಪರ ಮನೆ ತರಿಕಾಮಾ ಪೂರಾ ಭರೊಕ್ಹೊ ರ‍್ಹಯಲಕ್ಹು ಮಿ ಕ್ಹುಶಿ ಥವುಸ.