ಯರುಸಲೆನಾ ಗರಿಬ ಕ್ರೈಸ್ತರೊನಾಹುತಿ ದೊಕ್ಡಾನಿ ಮದತ ಕರಾನಾ ವಿಶಯ
1 ಮಯಾನಾ ಭಾಯೊ ಭೆನೊ ಮೆಕೆದೊನನಾ ಸಭೆವೊನೆ ದಿದಲ ಕ್ಹುದಾನಾ ಕೃಪೆನಾಹುತಿ ತುಮೊನೆ ಕಳುಕೈನ ಆಸ ಕರಿಯೆಸ, 2 ತೆ ಸಭೆಕನ ಘನಾ ಕಸ್ಟೊ ಐತಬಿ ಅಪ್ನಾ ವಿಪರಿತ ಥಯಲ ಗರಿಬಿಮಾ ಘನಾ ಕ್ಹುಶಿಕ್ಹು ಭರಲವಾಲಾ ಥೈನ ಉದ್ದಾರ ಥಯಿ ಗಯಾ. 3 ತ್ಯುನೆ ತ್ಯುನಾ ತಾಕತಕ್ಹುಜ಼ ತಾಕತನೆ ಮಿರಿನ ತ್ಯುನಾ ಪಸಂದನೆ ತ್ಯುನೆಜ ಉದ್ದಾರ ಥೈನ ದಾನ ಕರ‍್ಯಾ. 4 ಇನೆ ಹಮೆಜ಼ ಸಾಕ್ಷಿ ವ್ಹೈ. ಕ್ಹುದಾನಾ ಮನಕ್ಹೊನೆ ಮದತ ಕರಾನಾ ಕಾಮಮಾ ತ್ಯುನೆ ಪಾಲಗಾರ ಥಾವಾನೆ ಅನುಮತಿ ಥವು ಕೈನ ಹಮೊನೆ ಘನಾ ಮಾಂಗಿಲಿದ್ಯಾ. 5 ಹಮೆ ಇನೆ ಇನ್ಕಾರ ಕರಲ ರಿತಿಮಾ ತ್ಯುನೆ ದಿದೆವಾಚಿ, ಪೈಲಾ ತ್ಯುನೊನೆ ಕರ್ತಾಕನ ಒಪ್ಸನ ದಿದ್ಯಾ; ತೆ ಥಯಲ್ಪರ ಕ್ಹುದಾನಾ ಚಿತ್ತನಾಹುತಿ ಹಮೊನೆ ವರಿ ತ್ಯುನೊನೆ ಒಪ್ಸಾಯಾ. 6 ತಿತಾ ಶುರು ಕರಲ ತಿಮ್ಮ ಧರ್ಮನಾ ಕಾಮೊನೆ ಪೂರಾ ಕರು ಕೈನ ಹಮೆ ತಿನೆ ಪುಚ್ಯಾಸ. 7 ತುಮೆ ಕ್ಹುದಾಪರ ಮ್ಹೆಲಲ ಭರೊಕ್ಹಾಮಾ, ಗ್ಯಾನಮಾ, ಘನಾ ಬಿಜಾ಼ ಥಯಲ ಆಸಕ್ತಿಮಾ ವರಿ ಹಮಾರಿ ಮಯಾಕ್ಹು ತುಮೊಮಾ ಹುಟ್ಟಲ ಮಯಾಮಾ ಕಿಮ್ಮ ಸಮೃದ ಥೈನ ವ್ಹತ್ತಾತೊ ತಿಮ್ಮಜ಼ ಎ ಧರ್ಮನಾ ಕಾಮೊಮಾ ಸಮೃದ್ದ ಥೈನ ಅಗಾ ಬಡೊ. 8 ಎ ಕ್ಹಾರು ಆಗನ್ಯಾ ರೂಪಮಾ ಕವಾಡಾ ನತ್ತಿ ತೆನೈಸೊ ಬಿಜಾ಼ ಆಸಕ್ತಿನಾ ಹೊಲಸಿನ ತುಮಾರಿ ಮಯಾ ಕೆಕ್ಲಿ ಯಥಾರ್ಥ ವ್ಹಯ ಕೈನ ಸಾಬಿತ ಕರುಕೈನ ಕೌಸ. 9 ಹಮಾರೊ ಕರ್ತಾ ಥಯಲ ಯೆಸು ಕ್ರಿಸ್ತನಿ ಕೃಪಾ ತುಮೊನೆ ಗೊತ್ತ ಥಾತಿ ನೈ; ತೆ ಸೌಕಾರ ರ‍್ಹೈತಬಿ ತಿನಾ ಗರಿನಾ ಮುಕಾಂತರ ತುಮೆ ಸೌಕಾರ ಥೌಕೈನ ತುಮಾರಾಹುತಿ ತೆ ಗರಿಬ ಥಯೊ. 10 ಎ ಧರ್ಮಾನಾ ಕಾಮೊನಾಹುತಿ ಮಾರಿ ಸಲಹಾ ಕೌಸ, ಎ ತುಮಾರಾ ಮದತನೆ, ಎ ಕಾಮನೆ ಯಕ್ಕ ವರಕ್ಹನಾ ಪಾಚಾ಼ ಕರಾನಾಹುತಿ ತುಮೆ ಮನಸ ಕರಲ ಯೊಗ್ಯ ದಿಕ್ಹ್ಯುಸ. ಅಗು ಜಾವಾನೆ ಮನಸ ಕರಲ ತಿಮ್ಮಜ಼ ತಿನೆ ಕಾಮನಾ ರೂಪನೆ ಲಾವಾನೆ ಕೊಶಿಶ ಕರೊ. 11 ಎ ಕಾಮನೆ ಶುರು ಕರಾನೆ ತುಮೊಮಾ ಸಿದ್ದ ಮನಸ ರ‍್ಹವಾನಾ ತಿಮ್ಮಜ಼ ತುಮಾರಾ ತುಮಾರಾ ತಾಕತನಾ ನಿಂಗತ ತಿನೆ ಕರೊ. 12 ಯಕ್ಲೊ ದಿವಾ ನಿಂಗತ ಮನಸ ರ‍್ಹಯಲವಾಲೊ ಥೈನ ತೆ ತಿನಾ ಯೊಗ್ಯತೆನೆ ಅನುಸಾರ ಥೈನ ದಿದ್ಯಾರೆ ತೆ ಕರೆಟ್ಟ ಥಯಲ ರ‍್ಹವಸ; ತಿನೆ ಕ್ಹುದಾಕ್ಹು ಮೆಚ್ಚಿಕೆ ಮಳಸ. 13 ಬಿಜಾ಼ವೊನೆ ತ್ರಾಸ ಪರಿಹಾರ, ತುಮೊನೆ ತ್ರಾಸ ಥೌಕೈನ ಮಾರಿ ಆಸ 14 ಸರಿಸಮಾನ ರ‍್ಹೌ ಕೈನ ಮಾರು ಮನಸ ವ್ಹೈ. ತೆಳಾಮಾಜ಼಼ ತುಮಾರಿ ಸಮೃದ್ದಿಬಿ ತ್ಯುನು ತ್ರಾಸಬಿ ನಿಗಸಸ. ಅಗು ತ್ಯುನಿ ಸಮೃದ್ದಿ ತುಮಾರಿ ತ್ರಾಸ ನಿಗಸಾನಾಹುತಿ ಅನುಕೂಲ ಥಾವಸ. ಇಮ್ಮ ಸಮಾನ ಉಂಟ ಥಾವಸ.
ಧರ್ಮನಾ ದ್ರವ್ಯನೆ ಮಳಾವಾನಾಹುತಿ ಪೌಲಾ ಯೊಗ್ಯ ಥಯಲ ದಕ್ಹಾ ದಾಣ್ಗಾವೊನೆ ಕೊರಿಂಥೆ ವಳಾಯಲ
15 ಧರ್ಮ ಶಾಸ್ತ್ರಮಾ ಲಿಕ್ಕಲ ನಿಂಗತ ಘನು ಶೆಖರ ರ‍್ಹಯಲ ವಾಲಾನೆ ಅದಿಕಾರ ಥಯು ನೈ ಮಿತಿಮಿರಿನ ಶೆಖರ ವಾಲಾನೆ ಕಮ್ಮ ಥಯು ನೈ. 16 ತುಮಾರಾಹುತಿ ಮನೆ ರ‍್ಹವಾನಿ ಚಿಂತಾನೆ ಕ್ಹುದಾ ತಿತಾನಾ ಮನಸಮಾ ಹುಟ್ಸಾಯಲಕ್ಹು ತಿನೆ ಸೊತ್ರಾ ಕರುಸ. 17 ತೆ ತುಮೊಕನ ಜೌಕೈನ ಅಪೆ ಪುಚ್ತಾಮಾ ತೆ ಒಪ್ಪೆವಾಚಿ ಆಸಕ್ತಿವಾಲೊ ಥಯೊತೊ, ತಿನಾ ಕ್ಹುದ್ದಾನಾ ಚಿತ್ತಕ್ಹು ತುಮೊಕನ ಆಯೊ. 18 ತಿನಾಕ್ಹಾತೆ ಹಜಿ ಯಕ್ಲಾ ಭೈನೆ ವಳಾಯಾಸ. ಎ ಭೈತಿನಾ ರ‍್ಹ ಬಿಜಾ಼ ಹಮಾರಾ ಭೈ ಮೊಕ್ಲ. ಎ ಭೈ ಸುವಾರ್ತೆನಾ ಸೆವೆಮಾ ಕ್ಹಾರಾ ಸಭೆವೊಮಾ ಕಿರ್ತಿ ಪಡ್ದಾಲೊ ಥಯೊಸ. 19 ಎನೈಸೊ, ಕರ್ತಾನಾ ಮಹಿಮಾನಾಹುತಿ ವರಿ ಹಮಾರಾ ತಯಾರ ಮನಸನೆ ದೆಕಾಡಾನಾಹುತಿ ಹಮೆ ಕರಾನಾ ಧರ್ಮನಾ ಕಾಮೊನಾ ಸಂಬಂದ ಥೈನ ಹಮಾರಾ ಕ್ಹಾತೆ ಪ್ರಮಾಣ ಕರಲ ನಿಂಗತ ಸಭೆವೊಮಾತೊ ಇನೆ ಇನಿಲಿದ್ಯಾ. 20 ಅಪೆ ಜ಼ಮಾಕರಲ ಎ ಚೊಕಾ ಕೊಡುಗೆನಾ ವಿಶಯಮಾ ಯಕ್ಲಾ ಹಮಾರಾಪರ ತಪ್ಪ ಘಾಲಾನಾಹುತಿ ಆಸ್ಪದ ದ್ಯು ನೈ. 21 ತಿ ಕಾಕದ್ಯಾಮ ಕರ್ತಾನಾ ನಜ಼ರಮಾ ನೈಸೊ ಮನಕ್ಹೊನಾ ನಜ಼ರಮಾ ಯೊಗ್ಯ ಥಯಲ ಕರಾನು ಅಪ್ನು ಉದ್ದೆಶ ವ್ಹೈ. 22 ಎ ಭಂಬಿಜ಼ನಾ ಕ್ಹಾತೆ ಮಾರಾ ಭಾಯೊಮಾ ಹಜಿ಼ಯಕ್ಲಾನೆ ವಳಾಯಾಸ; ಹಮೆ ಘನಾ ವಕ್ಹತೊಮಾ, ಘನಾ ಕಾಮೊಮಾ ತಿನೆ ಪರಿಕ್ಷಾ ಕರಿನ ಆಸಕ್ತ ವ್ಹೈ ಕೈನ ಕಳೈಲಿದ್ಯಾಸ; ಹಮ್ನಾ ತೆ ತುಮೊಮಾ ಮ್ಹೆಲಲ ಕ್ಹಾಸ ಭರೊಕ್ಹಾಕ್ಹು ಹಜಿ಼ ಘನು ಹೆಚ್ಚ ಆಸಕ್ತಿವಾಲೊ ಥಯೊಸ. 23 ತಿತಾನಾಹುತಿ ಕವಾನು ರ‍್ಹಯಾರೆ, ತೆ ಮಾರೊ ಪಾಲಗಾರ ವ್ಹೈ ತುಮಾರಾ ಪ್ರಯೊಜನನೆ ಮನೆ ಮದತ ಕರಾಲೊ ಥಯೊಸ; ತೆ ಭಾಯೊನಾಹುತಿ ಕವಾನು ರ‍್ಹಯಾರೆ, ತ್ಯುನೆ ಸಭೆಮಾತಾ ವಳಾಯಲವಾಲಾ ವ್ಹೈ. ವರಿ ಕ್ರಿಸ್ತನಿ ಮಹಿಮಾ ಉಜಾ಼ಲು ಕರಾಲಾ ಥಯಾಸ. 24 ತಿನಾಹುತಿ ಇವ್ನೊನೆ ಮಯಾಕ್ಹು ದೆಕಿಲಿವೊ. ಹಮೆ ತುಮೊನೆ ಚೊಕು ಕದಲ ನಿಂಗತ ಚಾ಼ಲಿನ ಸಭೆವೊನೆ ತುಮಾರಿ ಯೊಗ್ಯಕ್ಹು ಮನಸಮಾ ವಿಚಾರ ಕರೊ.