2 ಕೊರಿಂಥ 9

ಪೌಲಾ ಕೊರಿಂಥ ಸಭೆವಾಲಾವೊನೆ ಉದಾರ ಥೈನ ದಿವಾನೆ ಪ್ರೆರೆಪ ಕರಲ

6 ತೆನೈಸೊ ವಿರಳ ಥೈನ ಬಿತ್ತಾಲೊ ವಿರಳ ಥೈನ ಕಾಟಸ. ಕೈನ ಬಿತ್ತಾಲೊ ಕೈನ ಕಾಟಸ. ಆಂ ತುಮೊನೆ ತಿಳದಾದೆ. 7 ಹರಯಕ್ಲೊ ತಿನಾ ತಿನಾ ಮನಸಮಾ ಫೈಸಲೊ ಕರಲ ನಿಂಗತಜ಼ ದಿವಾದೆ ; ದುಕ್ಕಕ್ಹು ರ‍್ಹವಾದೆ ಒತ್ತಾಯಕ್ಹು ರ‍್ಹವಾದೆ ಕುನ್ನಜ಼ ದ್ಯು ನೈ; ಕಾ ಕದ್ಯಾಮ ಕ್ಹುಶಿ ಥಯನ ದಿವಾಲಾನೆ ಕ್ಹುದಾ ಮಯಾ ಕರಸ. 8 ಕ್ಹುದಾ ಕ್ಹಾರಾ ಬಿಜಾ ಥಯಲ ದಾನಾವೊನೆ ತುಮೊನೆ ಧಾರಾಳ ಥೈನ ದಿವಾನಾಹುತಿ ತಾಕತವರ ಥಯಲಕ್ಹು , ತುಮೆ ಕೆಳಾಮಾಬಿ ಕ್ಹಾರಾ ವಿಶಯೊಮಾ ಪರಿಪೂರ್ಣವಾಲಾ ಥಯನ ಘನಾ ಕಾಮೊನೆ ಕೈನ ಕರಾಲಾ ಥಯನ ರ‍್ಹೌ. 9 ತೆ ಗರಿಬೊನೆ ಧಾರಳ ಥೈನ ದಿವಸ; ತಿನಿ ನಿತಿಬಿ ಹಮೆಶ್ಯಾಬಿ ರ‍್ಹವಸ. 10 ಬಿತ್ತಾಲಾನೆ ಬಿಯಾನೆ ಕ್ಹಾವಾಲಾನೆ ಅನ್ನ ದಿವಾಲೊ ತುಮೊನೆ ಬಿತ್ತಾನಾಹುತಿ ಬಿಯೊ ದಿನ ತಿನೆ ಹೆಚ್ಚ ಕರಿನ ತುಮಾರಾ ಧರ್ಮನಾ ಕಾಮೊಕ್ಹು ಥಾವಾನು ಫಲನೆ ವೃದ್ದಿ ಕರಸ. 11 ಇಮ್ಮ ತುಮೆ ಕ್ಹಾರಾ ವಿಶಯೊಮಾ ಸೌಕಾರ ಥೈನ ರ‍್ಹೌ ಉದಾರ ಥೈನ ದಿವಾನೆ ತಾಕತವರ ಥಾವೊಸಿ; ತೆನೈಸೊ ತುಮಾರಾ ದಾನೊ ಹಮಾರಾ ಹತೊಕ್ಹು ಹಜಿ಼ಯಕ್ಲಾನೆ ಸೆರಲ್ಪರ ತೆ ಕ್ಹುದಾನೆ ಕೃತಜ್ಞತ ಸ್ತುತಿ ಉಂಟ ಕರಸ. 12 ಕಿಮ್ಮ ಕದ್ಯಾಮ ಕರಾನು ಎ ಧರ್ಮನು ಕಾಮ ಕ್ಹುದಾನಾ ಮನಕ್ಹೊನು ಕೊರತೆ ನಿಗಸಸ ಎನೈಸೊ ಘನಾ ತರಿಕಾಮಾ ಕ್ಹುದಾನೆ ಕೃತಜ್ಞತಾಸ್ತುತಿ ಉಂಟ ಕರಾನೆ ಆಂ ಕಾರಣ ಥಾವಸ.