1 ಕ್ಹುದಾನಾ ಮನಕ್ಹೊನಾಹುತಿ ತುಮೆ ವಿಚಾ಼ರ ಕರಲ ದೊಕ್ಡಾನಾಹುತಿ ಮಿ ತುಮೊನೆ ಲಿಕ್ಕಾನು ಅವಶ್ಯ ನತ್ತಿ. 2 ತಾರಾ ಮನಸನಿ ಇಚ್ಚಾ ಸುವೈ ಕೈನ ಮನೆ ಗೊತ್ತ ಛೆ. ಪಾಚ಼ಲ್ಯಾ ವರಕ್ಹತಿಬಿ ಅಕ್ಹಾಯವಾಲಾ ಮದತ ಕರಾನಾಹುತಿ ತಯ್ಯಾರ ಥಯಾಸ ಕೈನ ಮೆಕೆದೊನಿಯೊನಾ ಕ್ಹಾಮಾ ತುಮಾರಾಹುತಿ ಚೊ಼ಕು ಕತೊ ಛೆ. ವರಿ ತಾರಿ ಆಸಕ್ತಿ ತ್ಯುನಾಮಾ ಘನಾಜ಼ನಾ ಪ್ರೆರಪ ಥವು. 3 ತೆನೈಸೊ ಹಮೆ ತುಮೊನೆ ಹೊಗಳಲಕ್ಹು ಆದಾರ ರಹಿತ ಥಯುಸ ಮಿ ಕದಲ ತಿಮ್ಮಜ ತುಮೆಬಿ ತಯ್ಯಾರ ಥಾವೊಕೈನ ತೆ ಭಾಯೊನೆ ವಳಾಯೊಸ. 4 ತುಮೆ ತಯ್ಯಾರ ಥಯಾರೆ ಯಕ್ಕ ವಕ್ಹತ ಮೆಕೆದೊನಿಯೊ ವಾಲಾವೊಮಾ ಕುನ್ನತಬಿ ಮಾರಾ ಕ್ಹಾತೆ ಐನ ತುಮೆ ತಯ್ಯಾರ ಥಯಾ ನತ್ತಿ ಕೈನ ದೆಕಿನ ಹಮೊನೆ ತುಮಾರಾಪರ ಹವೊ ಭರೊಕ್ಹೊ ಮ್ಹೆಲಲಕ್ಹು ಹಮೆ ಸರಮೌ ಲಾಗ್ಯು; ತುಮೊನೆ ಸರಮ ಆವಸಕೈನ ಮಿ ಅಮ್ಮ ಕೌಸ. 5 ಇಮ್ಮ ರ‍್ಹತಾಮಾ ಎ ಭಾಯೊ ಪೈಲಾಜ಼ ತುಮೊಕನ ಐನ ತುಮೆ ಪೈಲಾಜ಼ ವಾಗ್ದಾನ ಕರಲ ಕೊಡುಗೆನೆ ತಯ್ಯಾರ ಕರಾನೆ ತುಮೊನೆ ಮದತ ಕರಾನಾಹುತಿ ಇವ್ನೊನೆ ಮಾಂಗಿಲ್ಯುಸ ಅವಶ್ಯ ವ್ಹೈ ಕೈನ ಮನೆ ಗೊತ್ತ ಥಯು , ಆಂ ದಾನಾ ವತ್ತಾಯನು ವಸೂಲಿ ರ‍್ಹಯಾರೆ ಪೂರಾ ಮನಸಕ್ಹು ದಿದಲ ದಾನ ಥಯಲ ರ‍್ಹವಸ.

6 ತೆನೈಸೊ ವಿರಳ ಥೈನ ಬಿತ್ತಾಲೊ ವಿರಳ ಥೈನ ಕಾಟಸ. ಕೈನ ಬಿತ್ತಾಲೊ ಕೈನ ಕಾಟಸ. ಆಂ ತುಮೊನೆ ತಿಳದಾದೆ. 7 ಹರಯಕ್ಲೊ ತಿನಾ ತಿನಾ ಮನಸಮಾ ಫೈಸಲೊ ಕರಲ ನಿಂಗತಜ಼ ದಿವಾದೆ ; ದುಕ್ಕಕ್ಹು ರ‍್ಹವಾದೆ ಒತ್ತಾಯಕ್ಹು ರ‍್ಹವಾದೆ ಕುನ್ನಜ಼ ದ್ಯು ನೈ; ಕಾ ಕದ್ಯಾಮ ಕ್ಹುಶಿ ಥಯನ ದಿವಾಲಾನೆ ಕ್ಹುದಾ ಮಯಾ ಕರಸ. 8 ಕ್ಹುದಾ ಕ್ಹಾರಾ ಬಿಜಾ ಥಯಲ ದಾನಾವೊನೆ ತುಮೊನೆ ಧಾರಾಳ ಥೈನ ದಿವಾನಾಹುತಿ ತಾಕತವರ ಥಯಲಕ್ಹು , ತುಮೆ ಕೆಳಾಮಾಬಿ ಕ್ಹಾರಾ ವಿಶಯೊಮಾ ಪರಿಪೂರ್ಣವಾಲಾ ಥಯನ ಘನಾ ಕಾಮೊನೆ ಕೈನ ಕರಾಲಾ ಥಯನ ರ‍್ಹೌ. 9 ತೆ ಗರಿಬೊನೆ ಧಾರಳ ಥೈನ ದಿವಸ; ತಿನಿ ನಿತಿಬಿ ಹಮೆಶ್ಯಾಬಿ ರ‍್ಹವಸ. 10 ಬಿತ್ತಾಲಾನೆ ಬಿಯಾನೆ ಕ್ಹಾವಾಲಾನೆ ಅನ್ನ ದಿವಾಲೊ ತುಮೊನೆ ಬಿತ್ತಾನಾಹುತಿ ಬಿಯೊ ದಿನ ತಿನೆ ಹೆಚ್ಚ ಕರಿನ ತುಮಾರಾ ಧರ್ಮನಾ ಕಾಮೊಕ್ಹು ಥಾವಾನು ಫಲನೆ ವೃದ್ದಿ ಕರಸ. 11 ಇಮ್ಮ ತುಮೆ ಕ್ಹಾರಾ ವಿಶಯೊಮಾ ಸೌಕಾರ ಥೈನ ರ‍್ಹೌ ಉದಾರ ಥೈನ ದಿವಾನೆ ತಾಕತವರ ಥಾವೊಸಿ; ತೆನೈಸೊ ತುಮಾರಾ ದಾನೊ ಹಮಾರಾ ಹತೊಕ್ಹು ಹಜಿ಼ಯಕ್ಲಾನೆ ಸೆರಲ್ಪರ ತೆ ಕ್ಹುದಾನೆ ಕೃತಜ್ಞತ ಸ್ತುತಿ ಉಂಟ ಕರಸ. 12 ಕಿಮ್ಮ ಕದ್ಯಾಮ ಕರಾನು ಎ ಧರ್ಮನು ಕಾಮ ಕ್ಹುದಾನಾ ಮನಕ್ಹೊನು ಕೊರತೆ ನಿಗಸಸ ಎನೈಸೊ ಘನಾ ತರಿಕಾಮಾ ಕ್ಹುದಾನೆ ಕೃತಜ್ಞತಾಸ್ತುತಿ ಉಂಟ ಕರಾನೆ ಆಂ ಕಾರಣ ಥಾವಸ. 13 ತುಮೆ ಕರಾನಿ ಮದತ ವರಿ ತುಮಾರು ಯೊಗ್ಯನು ಭಾವ ಘನಾಜ಼ನಾ ದೆಕ್ತಾಮಾ, ತುಮೆ ಕರಲ ಕಾಮನೆ ಕರಟ್ಟ, ಕ್ರಿಸ್ತನಿ ಸುವಾರ್ತಾನೆ ತುಮೆ ಅನುಸರಸಲಕ್ಹು, ತ್ಯುನೊನೆ ವರಿ ವರಿ ಕ್ಹಾರಾಜ಼ನಾವೊನೆ ತುಮೆ ಉದಾರ ಥೈನ ಮದತಕರಾಲಾವೊಕ್ಹು ತ್ಯುನೆ ಕ್ಹುದಾನೆ ಸ್ತುತಿ ಕರಸ. 14 ತೆನೈಸೊ ತುಮಾರಾಹುತಿ ವಿಜ್ಞಾಪನ ಕರಿನ ಕ್ಹುದಾನು ಚೊಕಿ ರ‍್ಹಯಲ ಕೃಪಾ ತುಮೊನೆ ಮಳಲಕ್ಹು ತ್ಯುನೆ ತುಮೊನೆ ದೆಕಾನೆ ಆಸ ಕರ‍್ಯಾವಾಚಿ ತುಮಾರಾಹುತಿ ಪ್ರಾರ್ಥನಾ ಕರಸ. 15 ಮೊಜಾ಼ನೆ ಅಸಾದ್ಯ ಥಯಲ ದಾನೊನೆ ನಿಮಿತ್ತ ಕ್ಹುದಾನೆ ಸ್ತೊತ್ರಾ ಥಾವಾದೆ.