1 ಸಭೆಮಾ ಮ್ಹೊಟೊ ಥಯಲ ಮಿ ಕ್ಹರಿಕ್ಹು ಮಯಾ ಕರಲ
ಮಯಾನಾ ಭೈನೆ ಗಾಯನನೆ ಬರ್ದಾನು ಪತ್ರ.
2 ಮಯಾನಾ, ತು ತಾರಾ ಆತ್ಮನಾ ವಿಷಯಮಾ ಅಭಿವೃದ್ದಿ ಥಯಲ ನಿಂಗತ, ಕ್ಹಾರಾ ವಿಷಯಮಾ ಅಭಿವೃದ್ದಿ ಹೊಂದಿನ ಚೊ಼ಕೊ ಥೈನ ರ‍್ಹೌ ಕೈನ ಮಿ ಪ್ರಾರ್ಥನಾ ಕರುಸ. 3 ಕ್ರಿಸ್ತಮಾ ಭಾಯೊ ಥಯಲ ದಕ್ಹಾ ಜ಼ನಾ ಮಕನ ಐನ,ಜಿವ್ನಾಮಾ ರ್ಹವಾನು ಮನೆ ತಿಳ್ಸಾಯಾ. ತು ಕ್ಹರಿನಾ ವಾಟಮಾ ಚಾ಼ಲಾನು ವ್ಹೈ ಕವಾನು ತ್ಯುನೆ ಮನೆ ಕದ್ಯಾ. ಆಂ ಮನೆ ಘನ್ನಿ ಕ್ಹುಶಿ ದಿದ್ಯು. 4 ಮಾರಾ ಬಚ್ಚಾ಼ ಕ್ಹರಿನಿ ವಾಟಮಾ ಚಾ಼ಲ್ಯಾಸ ಕವಾನು ಐಕ್ತಾಮಾ ಮನೆ ಘನಿ ಕ್ಹುಶಿ ಥಾವಸ.
ಗಾಯನ
5 ಮಾರಾ ಮಯಾನಾ ದೊಸ್ತ, ಕ್ರಿಸ್ತಮಾ ಭಾಯೊ ಥಯಲ ವಾಲಾವೊನೆ ತು ಮದತ ಕರಾನು ಚೊ಼ಕು ವ್ಹೈ. ತುನೆ ಗೊತ್ತ ನೈ ರ್ಹಯಲ ಭೈನೆ ತು ಮದತ ಕರಾಡಪಸ! 6 ತ್ಯುನೆ ರ್xಹವಾನು ಮಯಾನಾಹುತಿ ಆಂ ಭಾಯೊ ಸಭೆನೆ ತಿಳ್ಸಾಯಾತ್ಯುನೆ ತ್ಯುನು ಪ್ರಯಾಣ ಅಗಾ ಶುರು ಕರಾನೆ ಮರಗಿನ ತ್ಯುನೊನೆ ಮದತ ಕರ. ಕ್ಹುದಾನೆ ಮೆಚ್ಚಿಗೆ ಥಾವಾನಾ ರಿತಿಮಾ ತ್ಯುನೊನೆ ಮದತ ಕರ. 7 ಆಂ ಭಾಯೊ ಕ್ರಿಸ್ತನಾ ಸೆವೆನಾಹುತಿ ಪ್ರಯಾಣನೆ ಚಾ಼ಲ್ಯಾಸ. ಅ ವಿಸ್ವಾಸಿಯೊಕ್ಹು ತ್ಯುನೆ ಕೈಜ಼ ಮದತ ಲಿದ್ಯಾ ನೈ. 8 ತಿನಾಹುತಿ, ಹಮೆ ಆಂ ಭಾಯೊನೆ ಮದತ ಕರು. ಹಮೆ ತ್ಯುನೊನೆ ಮದತ ಕರಲ್ಪರ, ಕ್ಹರಿನಾಹುತಿ ತ್ಯುನೆ ಕರಾನಾ ಕಾಮೊಮಾ ಹಮೆ ಪಾಲ ಥಯೆಸ.
ದಿಯೊತ್ರೆಫ ವರಿ ದೆಮೆತ್ರಿಯ
9 ಮಿ ಸಭೆನೆ ಯಕ್ಕ ಪತ್ರ ಲಿಕ್ಯೊ. ತೆನೈಸೊ ಹಮೆ ಕವಾನು ದಿಯೊತ್ರೆಫನ ಐಕ್ತೊ ನೈ. ತೆ ತೆಜ಼ ಮಾಲಕ ಥೌ ಕೈನ ಕೆಳಾಮಾಬಿ ಇಚ್ಛಾ ಕರಸ. 10 ಮಿ ಆಯಲ್ಪರ, ದಿಯೊತ್ರೆಫನ ಕರಾನಾಹುತಿ ತಿಳಸೌಸ. ತೆ ಹಮಾರಾಹುತಿ ಸುಳ್ಳ ವರಿ ಕೆಟ್ಟ ಸಂಗತಿಯೊನೆ ಕವಸ. ತೆನೈಸೊ ತೆಕ್ಲುಜ಼ ನ್ಹವೈ! ಕ್ರಿಸ್ತ ಸೆವಾ ಕರಾಲಾ ತೆ ಭಾಯೊನೆ ಮದತ ಕರಾನೆ ತೆ ವಪ್ತೊ ನೈ. ತೆ ನೈಸೊ ತೆ ಭಾಯೊನೆ ಮದತ ಕರಾಲಾ ಮನಕ್ಹೊನೆ ತೆ ತಡ್ದಸ. ತೆ ಮನಕ್ಹೊ ತೆ ಸಭೆನೆ ಛೊಡಿನ ಜ಼ವಾ ವರಕ್ಹು ಕರಸ.
11 ಮಾರಾ ಮಯಾನಾ ದೊಸ್ತ,ಕೆಟ್ಟನೆ ಕರು ನಕೊ; ಚೊ಼ಕುಜ಼ ಕರ. ಚೊ಼ಕು ಕರಾಲೊ ಕ್ಹುದಾನೆ ಸೆರಾಲೊ ಥಯೊಸ.ತೆನೈಸೊ ಕೆಟ್ಟ ಕರಾಲೊ ಕ್ಹುದಾನೆ ಕೈನ ನೈ ತಿಳದಲವಾಲೊ ಥಯೊಸ.
12 ಹಮೆ ಬಿ ತುಮೊನೆ ಆ ವಿಷಯಮಾ ಸಾಕ್ಷಿ ದಿವಾಲಾ ವ್ಹೈ; ಹಮಾರಿ ಸಾಕ್ಷಿ ಕ್ಹರಿ ವ್ಹೈ ಕೈನ ತುನೆ ಗೊತ್ತ ಛೆ.
ವಂದನಾ
13 ಮಿ ಬರ್ದಾನಿಯೊ ಸಂಗತಿಯೊ ಘನಿಯೊ ಛೆ. ತೆನೈಸೊ ಮಶಿಲಿನ ಬರ್ದಾನಾ ಯಕ್ಲಿ ಮಸಿಲಿನ ಬರ್ದಾನೆ ಮನೆ ಮನಸ ನತ್ತಿ. 14 ಮಿ ಭೆಗಿನ ಐನ ದೆಕುಸ ಕೈನ ಆಸ ಮ್ಹೆಲುಸ. ತೆಳಾಮಾ ಅಪೆ ಕ್ಹಾಮಾಜ಼ ಬೊಲಿಯೆ.
15 ತುನೆ ಸಮಾಧಾನ ರ‍್ಹವಾದೆ. ದೊಸ್ತೊ ತುನೆ ವಂದನೆ ಕರಸ.
ತ್ಯಾ ರ್ಹಯಲ ಕ್ಹಾರಾ ದೊಸ್ತೊನೆ ವಂದನೆ ಕೆ.