1 ದುನಿಯಾಮಾ ರ‍್ಹಾವಾಲಾ ಕ್ಹಾರಾ ಜನಾಂಗ ಖಾಂದಾನವಾಲಾ ಜಾ಼ತವಾಲಾವೊನೆ ನೆಬುದೆಕನೆಚರ ಪ್ರಕಟಣೆ 2 ತುಮೊನೆ ಸುಖಾ ಜಾಸ್ತ ಥಾವಾದೆ! ಪರಾತ್ಪರ ಥಯಲ ಕ್ಹುದಾ ಮಾರಿ ವಿಶಯಮಾ ಚ಼ಲಾಯಲ ಮಹತ್ತೊನೆ ಅದ್ಬುತೊನೆ ಪ್ರಚಾರ ಕರು ಕವಾನು ಮನೆ ಮನಸ ಛೆ. 3 ತಿನಾ ಮಹತ್ತೊ ಘನ್ನಾ ಮ್ಹೊಟಾ ವ್ಹೈ! ತಿನಾ ಅದ್ಬುತೊ ಘನ್ನಾ ಖಾಸ ವ್ಹೈ! ತಿನಿ ರಾಜ್ಯ ಹಮೆಶಾನಿ ರಾಜ್ಯ ವ್ಹೈ, ತಿನಿ ಆಳ್ವಿಕೆ ತಲತಲಾಂತರ ಲಕ್ಕಾ ಹುಬ್ರ್ಯವಸ. 4 ನೆಬುಕದ್ಬೆಚ್ಚರ ಥಯಲ ಮಿ ಆಲಯಮಾ ಅರಾಮ ವ್ಹತ್ತೊ, ಹೊ ಮಾರಾ ಮಹೆಲಮಾ ಮಸ್ತ ವ್ಹತ್ತೊ. 5 ಇಮ್ಮ ರ‍್ಹತಾಮಾ ಮನೆ ಭುಚ್ಕಾ಼ಡಾನು ಯಕ್ಕ ಕ್ಹಪನ ಪಡ್ಯು; ವಚ್ಚಾ಼ನಾಮಾ ಮನೆ ಆಯಲ ವಿಚಾರೊ ಮಾರಾ ಮನಸನೆ ಪಡಲ ಕ್ಹಪನೊ ಮನೆ ಕಳವಳ ಕರ‍್ಯಾ. 6 ತಿನಾಹುತಿ ಕ್ಹಪನನು ಮತ್ಲಬ ಕವಾನೆ ಬಾಬೆಲನಾ ಕ್ಹಾರಾ ವಿದ್ವಾಂಸೊನೆ ಬಲಾವಾನೆ ಆಗನ್ಯಾ ದಿದ್ಯೊ. 7 ಜೊಯಿಸರೊ, ಮಾಟಾ ಮಂತ್ರಾ ಕರಾಲಾ, ಪಂದಿತೊ, ಶಕುನಾ ಕವಾಲಾ, ಇವ್ನೆ ಕ್ಹಾಮಾ ಆಯಲ್ಪರ ಮಿ ಆಂ ಕ್ಹಪನ ಕತಾಮಾ ತ್ಯುನೆ ಅನು ಮತ್ಲಬ ಕದ್ಯಾ ಬಗರ ಗಯಾ. 8 ಮಾರಾ ಕ್ಹುದಾನು ನಾಮ ಮಳಲ ಬೆಲ್ತೆಶಚ್ಚರ ಕೈನ ಅಡ್ಡನಾಮ ಮ್ಹೆಲ್ಲಿದಲವಾಲೊ ಪರಿಶುದ್ದ ಕ್ಹುದಾವೊನಿ ಆತ್ಮಾ ರ‍್ಹಯಲವಾಲೊ ಥಯಲ ದಾನಿಯಲ ಕ್ಹಾರಾವೊತಿ ಲಾಸ್ಟ ಮಾರಿ ಸನ್ನಿದಿನೆ ಆತಾಕ್ಹು ಮಿ ಮಾರು ಕ್ಹಪನ ಅಮ್ಮ ತಿಳಸಾಯೊ- 9 ಬೆಲ್ತೆಶಚ್ಚರ, ಜೊಯಿಸರೊಮಾ ಕ್ಹಾಸ ರ‍್ಹಯಲವಾಲಾ, ಪರಿಶುದ್ದ ಕ್ಹುದಾವೊನಿ ಆತ್ಮಾ ತಾರಾಮಾ ಛೆ ಕೈನ ತಿಳದ್ಯೊಸ, ಕೈ ರಹಸ್ಯ ತುನೆ ಡದಿನ ರ‍್ಹಯು ನತ್ತಿ ಕೈನ ಮನೆ ಗ್ವತ್ತ ಛೆ. ತಿನಾಹುತಿ ಮಿ ದೆಕಲ ಕ್ಹಪನನೆ ತಿನು ಮತ್ಲಬ ಮನೆ ತಿಳ್ಸಾ. 10 ಮಿ ವಚ್ಚಾ಼ನಾಮಾ ಕ್ಹುರಯಲ ಟೈಮಮಾ ಮಾರಾ ಮನಸನೆ ಪಡಲ ಕ್ಹಪನೊ ಎಜ಼ ವ್ಹೈ- ದೆಕ, ದುನಿಯಾನಾ ವಚ್ಮಾ ಘನ್ನು ಉಚ್ಚು಼ ರ‍್ಹಯಲ ಯಕ್ಕ ಝಾಡ ದೆಕ್ಯೊ. 11 ತೆ ಝಾಡ ಬೆಳ್ದಿನ ತಾಕತವರ ಥಯುತು. ತಿನಿ ತುದಿ ಹಬಾಳನೆ ಮುಟ್ಯುತು. ತೆ ದುನಿಯಾನಾ ಲಾಸ್ಟ ಲಕ್ಕಾತುಬಿ ದಿಕ್ಹತುತು. 12 ತಿನಾ ಪಾಲೊ ಚೊ಼ಕಾ, ಫಲ್ಲೊ ಘನಾ ತಿನಾಕ್ಹು ಕ್ಹಾರಾವೊನೆ ಅನ್ನ, ಛೌಲಿ ವರಿ ಬುಜಂತುವೊನೆ ಆಸರೊ, ಠೊಂಗಿಯೊ ಹಬಾಳನಾ ಪಕ್ಷಿಯೊನೆ ಆಸರೊ, ತೆ ಕ್ಹಾರಾ ಜಿವಿಯೊನೆಬಿ ಜ಼ಲಮ ವ್ಹೈ. 13 ಮಿ ವಚ್ಚಾ಼ನಾಮಾ ಕ್ಹುರಯಲ ಟೈಮಮಾ ಮಾರಾ ಮನಸನೆ ಪಡಲ ಕ್ಹಪನಮಾ ಅನಿಮಿಷ ಥಯಲ ದೆವದುತ ಹಬಾಳತೊ ಉತ್ರಲ ದೆಕ್ಯೊ. ಜೊ಼ರ ವದ್ರಿನ- 14 ಝಾಡನೆ ಕಾಟೊ, ಠೊಂಗಿಯೊನೆ ಕಾಟೊ, ಪಾಲೊನೆ ಕಿತ್ತೊ, ಫಲ್ಲೊನೆ ನಾಕೊ; ಜಾನವರೊ ಛೌಲಿನೆ ಛೊಡಿ ಪಡಾದೆ, ಪಕ್ಷಿಯೊ ಠೊಂಗಿಯೊನೆ ಛೊಡಿನ ಜಾ಼ವಾದೆ! 15 ತೆನೈಸೊ ಬುಡನ ಬೆರನೆ ಜಿಮಿನಮಾ ಛೊಡೊ ಲ್ಹೊಡಾನಾ ತಾಂಬಾನಾ ಪಟ್ಟಿಯೊ ತಿನೆ ಭಾಂದೊ; ರಾನನೊ ಚಾ಼ರೊ ತಿನಾ ಸುತ್ತೆ ಬೆಳದಾದೆ, ಹಬಾಳನಿ ಠಾರ ತಿನೆ ಭಿಂಜಾ಼ವಾದೆ, ಜಿಮಿನನೊ ಚಾ಼ರೊ ಜಾನವರೊನೆ ಗತಿ ಥಯಲ ತಿಮ್ಮ ತಿನೆ ಗತಿ ಥಾವಾದೆ; 16 ತಿನೆ ಮನಕ್ಹನು ಮನಸ ಗೈನ ಜಾನವರನು ಮನಸ ಆವಾದೆ; ಇಮ್ಮ ತಿನೆ ಕ್ಹಾತ ವರಕ್ಹ ಥಾವಾದೆ. 17 ಎ ಅನಿಮಿಷನೊ ಫೈಸಲೊ ವ್ಹೈ, ಕ್ಹುದಾನು ತಿರ್ಪ ವ್ಹೈ; ಪರಾತ್ಪರ ಕ್ಹುದಾ ಮನಕ್ಹೊನಾ ರಾಜ್ಯಮಾ ರಾಜೊ಼ ಥೈನ ತಿನಿ ಆಳ್ವಿಕೆನೆ ತಿನೆ ಚಾ಼ಯೆ ಥಯಲವಾಲಾವೊನೆ ವಪ್ಸಿನ ಕಮ್ಮ ರ‍್ಹಯಲವಾಲಾವೊನೆ ತಿನಾ ಉಪ್ಪರ ನೆಮಕ ಕರಸ ಕವಾನು ಜಿವ್ತಾ ರ‍್ಹವಾನೆಲಾವೊನೆ ತಿಳ್ದಿನ ಔ ಕೈನಜ಼ ಎ ಫೈಸಲೊ ಥಯೊ ಕೈನ ಕದ್ಯೊ. 18 ರಾಜೊ಼ ಥಯಲ ನೆಬುಕದ್ನೆಚ್ಚರ ಕವಾಲೊ ಮಿ ಎ ಕ್ಹಪನ ದೆಕ್ಯೊ; ಬೆಲ್ತೆಶಚ್ಚರ, ಮಾರಾ ರಾಜ್ಯನಾ ಕ್ಹಾರಾ ವಿದ್ವಾಂಸೊಮಾ ಕುನ್ನಜ಼ ತಿನು ಮತ್ಲಬ ಕೆ ನೈ ಸಕ್ತಾ; ಮಿ ತಿನು ಮತ್ಲಬ ತಿಳ್ಸಾ; ಪರಿಶುದ್ದ ಕ್ಹುದಾವೊನಿ ಆತ್ಮಾ ತಾರಾ ಕ್ಹಾತೆ ರ‍್ಹಯಲಕ್ಹು ತು ಕವಾಲೊ ವ್ಹೈ ಕೈನ ಮನೆ ಗ್ವತ್ತ ಛೆ.

19 ಬೆಲ್ತೆಶಚ್ಚರ ಕವಾನೊ ಅಡ್ಡ ನಾಮನೊ ದಾನಿಯಲ ತಿನಾ ಗ್ಯಾನನೆ ದಿಕ್ಹಿನ ಆಯಲಕ್ಹು ಘಾಬ್ರೊ ಥೈನ ದಕ್ಹಿಯೆಳ ಗಪ್ಪಚುಪ್ಪ ಥಯೊ. ರಾಜೊ಼ ಎ ದೆಕಿನ ಬೆಲ್ತೆಶಚ್ಚರ ಮಾರು ಕ್ಹಪನ ರ್ಹವಾದೆ ತಿನು ಮತ್ಲಬ ರ್ಹವಾದೆ ತುನೆ ಭುಚ್ಕಾಡ್ಯಾ ಬಗರ ರ್ಹವಾದೆ ಕೈನ ಕತಾಮಾ ಬೆಲ್ತೆಶಚ್ಚರ ಮಾರಾ ಮಾಲಕ, ತೆ ಕ್ಹಪನ ತಾರಾ ದುಶ್ಮನೊನೆ ಆವಾದೆ, ತಿನು ಮತ್ಲಬ ತಾರಾ ವಿರೊದಿಯೊನಾ ಅನುಭವನೆ ಆವಾದೆ! 20 ಕಯು ಝಾಡ ಬೆಳದಿನ ತಾಕತವರ ಥೈನ ಹಬಾಳನಾ ತುದಿನೆ ಲಾಗತು ಪರಾ ದುನಿಯಾವಾಲಾವೊನೆ ದಿಕ್ಹತು 21 ಚೊ಼ಕಾ ಪಾಲೊ ಘನ್ನಾ ಫಲೊ ದೆತು ಕ್ಹರಾವೊನೆ ಅನ್ನ ದೆತು ತಿನಿ ಛೌಲಿನೆ ಜಾನ್ವರೊ ಆಸರೊ ಕರಿನ ತಿನಾ ಠೊಂಗಿಯೊನೆ ಹಬಾಳನಾ ಪಕ್ಷಿಯೊನೆ ಆಸರೊ ಕರತು ಕ್ಹಪನಮಾ ತುನೆ ದಿಕ್ಯುತೊ ತೆ ಝಾಡ ತುಜ಼ ವ್ಹೈ; 22 ರಾಜಾ಼ ತು ಬೆಳದಿನ ತಾಕತವರ ಥಯೊಸ, ತಾರಿ ಮಹಿಮಾ ಬೆಳ್ದಿನ ಹಬಾಳನೆ ಮುಟ್ಟಿಸ, ತಾರಿ ಆಳ್ವಿಕೆ ದುನಿಯಾನಾ ಲಾಸ್ಟ ಲಕ್ಕಾ ಫೈಲಿಸ. 23 ಅನಿಮಿಷ ಥಯಲ ದೆವದುತ ಹಬಾಳತೊ ಉತ್ರಿನ- ಝಾಡನೆ ಕತ್ರಿನ ಹಾಳ ಕರೊ; ತೆನೈಸೊ ತಿನಾ ಬುಡನೆ ಜಿಮಿನಮಾ ಛೊಡಿನ ಲ್ಹೊಡಾ ತಾಂಬಾನಾ ಪಟ್ಟಿಯೊ ತಿನೆ ಭಾಂದೊ, ರಾನನೊ ಚಾ಼ರೊ ತಿನಾ ಸುತ್ತ ಬೆಳದಾದೆ, ಹಬಾಳನು ಠಾರ ತಿನೆ ಭಿಂಜಾ಼ವಾದೆ, ತಿನೆ ಕ್ಹಾತ ವರಕ್ಹ ಥಯೆಲಕ್ಕಾ ರಾನನಾ ಜಾನವರೊನೆ ಆವಾನಿ ಗತಿ ತಿನೆಬಿ ಆವಾದೆ ಕೈನ ಕವಾನು ರಾಜೊ಼ ಥಯಲ ತು ದೆಕ್ಯೊಸ; 24 ರಾಜಾ಼, ಇನು ಮತ್ಲಬ ಸು ವ್ಹೈ ಕದ್ಯಾಮ, ಮಾರಾ ಮಾಲಕ ಥಯಲ ರಾಜಾ಼ನೆ ಥಾವಾನಿ ಪರಾತ್ಪರ ಥಯಲ ಕ್ಹುದಾನಿ ಫೈಸಲೊ ಇಮ್ಮ ಛೆ- 25 ತು ಮನಕ್ಹೊತೊ ದುರ ಥೈನ ರಾನನಾ ಜಾನವರೊನಾ ಕ್ಹಾತೆ ರ‍್ಹಶಿ, ಬೈಲೊ ನಿಂಗತ ಚಾ಼ರೊ ಚ಼ರಾನುಜ಼ ತುನೆ ಗತಿ ಥಾವಸ, ಹಬಾಳನಿ ಠಾರ ತುನೆ ಭಿಂಜಾವಸ; ಪರಾತ್ಪರ ಥಯಲ ಕ್ಹುದಾ ಮನಕ್ಹೊನಾ ರಾಜ್ಯಮಾ ರಾಜೊ಼ ಥೈನ ತಿನೆ ಚಾ಼ಯೆ ಥಯಲವಾಲಾವೊನೆ ವಪ್ಸಸ ಕವಾನು ತುನೆ ತಿಳ್ದೆ ಲಕ್ಕಾ ಕ್ಹಾತ ವರಕ್ಹ ತುನೆ ಇಮ್ಮಜ಼ ಜಾ಼ವಸ. 26 ಝಾಡನಾ ಬುಡನೆ ಛೊಡೊ ಕೈನ ಅಪ್ಪಣೆ ಥಯುತೊ; ಇನು ಮತ್ಲಬ ಸು ವ್ಹೈ ಕದ್ಯಾಮ ಪರಲೊಕನೆ ಸರ್ವಾದಿಕಾರ ಛೆ ಕವಾನು ತು ತಿಳ್ದಿಲಿದಲ್ಪರ ತಾರಿ ರಾಜ್ಯ ತುನೆ ಉಗ್ರಸ ಕವಾನುಜ಼ ವ್ಹೈ. 27 ತಿನಾಹುತಿ ರಾಜಾ಼, ಎ ಮಾರಿ ಗ್ಯಾನನಿ ವಾತೊ ತುನೆ ವಪ್ಪಿಗೆ ಥಾವಾದೆ- ತು ನಿತಿ ಕರಿನ ತಾರಾ ಪಾಪೊನೆ ನಾಶ ಕರ, ಗರಿಬೊನೆ ಕರುಣಾ ದೆಕಾಡಿನ ತಾರಾ ಅಪರಾದೊನೆ ನಾಶ ಕರ; ಇನಾಕ್ಹು ತಾರಿ ನೆಮ್ಮದಿನು ಟೈಮ ಜಾಸ್ತ ಥಾಸ ಕೈನ ಕದ್ಯೊ. 28 ಎ ಕ್ಹಾರು ರಾಜೊ಼ ಥಯಲ ನೆಬುಕದ್ನೆಚ್ಚರನಾ ಅನುಭವನೆ ಐಯು. 29 ಬಾರಾ ಮ್ಹೈನಾ ಥಯಲ್ಪರ ತೆ ಬಾಬೆಲನಾ ಮಹೆಲನಾ ಉಪ್ಪರ ಫರ್ತೊ- 30 ಮಾರಿ ಮಹಿಮಾ ಮಶುರ ಥಾಯೆ ನಿಂಗತ ಮಾರಿ ತಾಕತಕ್ಹು ರಾಜೊ಼ ರ‍್ಹವಾನೆನಾಹುತಿ ಮಿ ಭಂದಾಯಲ ವ್ಹೈ ದೆಕೊ, ಮ್ಹೊಟು ಗಾಮ ಥಯಲ ಎ ಬಾಬೆಲ ವ್ಹೈ ಕೈನ ಅಹಂಕಾರ ಕರ‍್ಯೊ. 31 ಎ ವಾತ ರಾಜಾ಼ನಾ ಮ್ಹೊಡಾತು ಆತಾಮಾ- ರಾಜಾ಼ ಥಯಲ ನೆಬುಕದ್ನೆಚ್ಚರ, ತುನೆ ಥಯಲ ಕ್ಹುದಾನಿ ವಾತ ಐಕ; 32 ರಾಜ್ಯ ತಾರಾಕ್ಹು ಛುಟಿನ ಗಯುಸ, ತು ಮನಕ್ಹೊಮಾತೊ ಜು಼ದೊ ಥೈನ ರಾನನಾ ಜಾನವರೊನಾ ಕ್ಹಾತೆ ರ‍್ಹಶಿ, ಬೈಲೊ ನಿಂಗತ ಚಾ಼ರೊ ಚ಼ರಾನುಜ಼ ತಾರಿ ಗತಿ ಥಾವಸ; ಪರಾತ್ಪರ ಥಯಲ ಕ್ಹುದಾ ಮನಕ್ಹೊನಾ ರಾಜ್ಯಮಾ ರಾಜೊ಼ ಥೈನ ತಿನೆ ಚಾ಼ಯೆ ಥಯಲವಾಲಾವೊನೆ ವಪ್ಸಸ ಕವಾನು ತುನೆ ತಿಳ್ದೆ ಲಕ್ಕಾ ಕ್ಹಾತ ವರಕ್ಹ ತುನೆ ಇಮ್ಮಜ಼ ಜಾ಼ವಸ ಕೈನ ಹಬಾಳತಿ ಸುದ್ದಿ ಥಯು. 33 ಎ ವಾತ ನೆಬುಕದ್ನೆಚ್ಚರಮಾ ತೆಳಾಮಾಜ಼ ಪುರಾ ಥಯು;ತೆ ಮನಕ್ಹೊಮಾತೊ ಜು಼ದೊ ಥೈನ ಬೈಲೊ ನಿಂಗತ ಚಾ಼ರೊ ಚ಼ರತೊ ಹಬಾಳನಿ ಠಾರಕ್ಹು ಭಿಂಜಾತೊ ವ್ಹತ್ತೊ; ತಿನಾ ಬಾಲೊ ಘಾರೊನಿ ಗರಿ ನಿಂಗತಬಿ ತಿನಾ ನಕ್ಕೊ ಪಕ್ಷಿನಾ ನಕ್ಕೊ ನಿಂಗತ ಬೆಳದ್ಯಾ.

34 ತೆ ಟೈಮ ಥಯಲ್ಪರ ನೆಬುಕದ್ನಚ್ಚರ ಥಯಲ ಮಿ ಹಬಾಳಕನ ದೆಕ್ತಾಮಾ ಮಾರಿ ಗ್ಯಾನ ಫರಿನ ಮನೆ ಮಳಿ. ತೆಳಾಮಾ ಮಿ ಪರಾತ್ಪರ ಥಯಲ ಕ್ಹುದಾನೆ ಸ್ತುತಿ ಕರಿನ ಹಮೆಶಾ ಜ್ಯುತಾ ರ್ಹವಾಲಾನೆ ಸ್ತೊತ್ರಾ ಕರ್ಯೊ; ತಿನಿ ಆಳ್ವಿಕೆ ಹಮೆಶಾನಿ ವ್ಹೈ, ತಿನಿ ರಾಜ್ಯ ತಲತಲಾಂತರ ಲಕ್ಕಾ ಹುಬ್ರ್ಯವಸ; 35 ಭುಮಿಪರ ರ‍್ಹವಾನೆಲಾ ಕ್ಹಾರಾ (ತಿನಾ ನಜ಼ರಮಾ) ಸುಜ಼ ನೈಸೊವಾಲಾ ನಿಂಗತ ಛೆ, ಪರಲೊಕ ಸೈನ್ಯವಾಲಾವೊಮಾಬಿ ಭುಲೊಕವಾಲಾವೊಮಾಬಿ ತಿನಾ ಪಸಂದ ನಿಂಗತ ಚಾ಼ಲಸ; ಕುನ್ನ ತಿನಾ ಹತ್ತನೆ ಪಾಚಾ಼ ನೈ ಢಕಲ ಸಕ್ತಾ, ತು ಸು ಕರ್ಶಿ ಕೈನ ಕುನ್ನ ಪುಚ್ಚ ನೈ ಸಕ್ತು. 36 ತೆಜ಼ ಟೈಮಮಾ ಮಾರಿ ಗ್ಯಾನ ಮಾರಾ ಪಾಲೆ ಥೈ; ಮಾರಿ ಪ್ರಭಾವ ಮಹಿಮಾ ಮನೆ ಫರಿನ ಮಳಿನ ಮಾರಿ ರಾಜ್ಯನಿ ಕಿರ್ತಿ ದಿಕ್ಹಿನ ಐ; ಮಾರಾ ಮಂತ್ರಿಯೊ ಅದಿಪತಿಯೊ ಮನೆ ಕ್ಹುಶ ಕರ‍್ಯಾ; ಮಾರಾ ರಾಜ್ಯಮಾ ರಾಜೊ಼ ಥೈನ ಮಿ ರ‍್ಹಯೊ; ಮಾರಿ ಮಹಿಮಾ ಹಜು಼ನ ಘನ್ನಿ ಥೈ. 37 ಹಮ್ನಾ ನೆಬುಕದ್ನೆಚ್ಚರ ಥಯಲ ಮಿ ಪರಲೊಕನಾ ರಾಜಾ಼ನೆ ಹೊಗಳಿನ ಸ್ತುತಿ ಕರಿನ ಮಹಿಮಾ ಕರುಸ; ತಿನಾ ಕ್ಹಾರಾ ಕಾಮೊ ಸತ್ಯ ವ್ಹೈ, ತಿನಾ ಕ್ಹಾರಾ ವಾಟೊ ನ್ಯಾಯನಾ ವ್ಹೈ; ಸೊಕ್ಕಕ್ಹು ರ‍್ಹವಾನೆಲಾವೊನೆ ಡೊಗ್ಗಾಡ ಸಕಸ.