28 ಎ ಕ್ಹಾರು ರಾಜೊ಼ ಥಯಲ ನೆಬುಕದ್ನೆಚ್ಚರನಾ ಅನುಭವನೆ ಐಯು. 29 ಬಾರಾ ಮ್ಹೈನಾ ಥಯಲ್ಪರ ತೆ ಬಾಬೆಲನಾ ಮಹೆಲನಾ ಉಪ್ಪರ ಫರ್ತೊ- 30 ಮಾರಿ ಮಹಿಮಾ ಮಶುರ ಥಾಯೆ ನಿಂಗತ ಮಾರಿ ತಾಕತಕ್ಹು ರಾಜೊ಼ ರ‍್ಹವಾನೆನಾಹುತಿ ಮಿ ಭಂದಾಯಲ ವ್ಹೈ ದೆಕೊ, ಮ್ಹೊಟು ಗಾಮ ಥಯಲ ಎ ಬಾಬೆಲ ವ್ಹೈ ಕೈನ ಅಹಂಕಾರ ಕರ್ಯೊ. 31 ಎ ವಾತ ರಾಜಾ಼ನಾ ಮ್ಹೊಡಾತು ಆತಾಮಾ- ರಾಜಾ಼ ಥಯಲ ನೆಬುಕದ್ನೆಚ್ಚರ, ತುನೆ ಥಯಲ ಕ್ಹುದಾನಿ ವಾತ ಐಕ; 32 ರಾಜ್ಯ ತಾರಾಕ್ಹು ಛುಟಿನ ಗಯುಸ, ತು ಮನಕ್ಹೊಮಾತೊ ಜು಼ದೊ ಥೈನ ರಾನನಾ ಜಾನವರೊನಾ ಕ್ಹಾತೆ ರ‍್ಹಶಿ, ಬೈಲೊ ನಿಂಗತ ಚಾ಼ರೊ ಚ಼ರಾನುಜ಼ ತಾರಿ ಗತಿ ಥಾವಸ; ಪರಾತ್ಪರ ಥಯಲ ಕ್ಹುದಾ ಮನಕ್ಹೊನಾ ರಾಜ್ಯಮಾ ರಾಜೊ಼ ಥೈನ ತಿನೆ ಚಾ಼ಯೆ ಥಯಲವಾಲಾವೊನೆ ವಪ್ಸಸ ಕವಾನು ತುನೆ ತಿಳ್ದೆ ಲಕ್ಕಾ ಕ್ಹಾತ ವರಕ್ಹ ತುನೆ ಇಮ್ಮಜ಼ ಜಾ಼ವಸ ಕೈನ ಹಬಾಳತಿ ಸುದ್ದಿ ಥಯು. 33 ಎ ವಾತ ನೆಬುಕದ್ನೆಚ್ಚರಮಾ ತೆಳಾಮಾಜ಼ ಪುರಾ ಥಯು;ತೆ ಮನಕ್ಹೊಮಾತೊ ಜು಼ದೊ ಥೈನ ಬೈಲೊ ನಿಂಗತ ಚಾ಼ರೊ ಚ಼ರತೊ ಹಬಾಳನಿ ಠಾರಕ್ಹು ಭಿಂಜಾತೊ ವ್ಹತ್ತೊ; ತಿನಾ ಬಾಲೊ ಘಾರೊನಿ ಗರಿ ನಿಂಗತಬಿ ತಿನಾ ನಕ್ಕೊ ಪಕ್ಷಿನಾ ನಕ್ಕೊ ನಿಂಗತ ಬೆಳದ್ಯಾ.
ನೆಬುದಕನೆಚರ ಕ್ಹು ಕ್ಹುದಾನಿ ಸ್ತುತಿ
34 ತೆ ಟೈಮ ಥಯಲ್ಪರ ನೆಬುಕದ್ನಚ್ಚರ ಥಯಲ ಮಿ ಹಬಾಳಕನ ದೆಕ್ತಾಮಾ ಮಾರಿ ಗ್ಯಾನ ಫರಿನ ಮನೆ ಮಳಿ. ತೆಳಾಮಾ ಮಿ ಪರಾತ್ಪರ ಥಯಲ ಕ್ಹುದಾನೆ ಸ್ತುತಿ ಕರಿನ ಹಮೆಶಾ ಜ್ಯುತಾ ರ್ಹವಾಲಾನೆ ಸ್ತೊತ್ರಾ ಕರ್ಯೊ; ತಿನಿ ಆಳ್ವಿಕೆ ಹಮೆಶಾನಿ ವ್ಹೈ, ತಿನಿ ರಾಜ್ಯ ತಲತಲಾಂತರ ಲಕ್ಕಾ ಹುಬ್ರ್ಯವಸ; 35 ಭುಮಿಪರ ರ‍್ಹವಾನೆಲಾ ಕ್ಹಾರಾ (ತಿನಾ ನಜ಼ರಮಾ) ಸುಜ಼ ನೈಸೊವಾಲಾ ನಿಂಗತ ಛೆ, ಪರಲೊಕ ಸೈನ್ಯವಾಲಾವೊಮಾಬಿ ಭುಲೊಕವಾಲಾವೊಮಾಬಿ ತಿನಾ ಪಸಂದ ನಿಂಗತ ಚಾ಼ಲಸ; ಕುನ್ನ ತಿನಾ ಹತ್ತನೆ ಪಾಚಾ಼ ನೈ ಢಕಲ ಸಕ್ತಾ, ತು ಸು ಕರ್ಶಿ ಕೈನ ಕುನ್ನ ಪುಚ್ಚ ನೈ ಸಕ್ತು. 36 ತೆಜ಼ ಟೈಮಮಾ ಮಾರಿ ಗ್ಯಾನ ಮಾರಾ ಪಾಲೆ ಥೈ; ಮಾರಿ ಪ್ರಭಾವ ಮಹಿಮಾ ಮನೆ ಫರಿನ ಮಳಿನ ಮಾರಿ ರಾಜ್ಯನಿ ಕಿರ್ತಿ ದಿಕ್ಹಿನ ಐ; ಮಾರಾ ಮಂತ್ರಿಯೊ ಅದಿಪತಿಯೊ ಮನೆ ಕ್ಹುಶ ಕರ‍್ಯಾ; ಮಾರಾ ರಾಜ್ಯಮಾ ರಾಜೊ಼ ಥೈನ ಮಿ ರ‍್ಹಯೊ; ಮಾರಿ ಮಹಿಮಾ ಹಜು಼ನ ಘನ್ನಿ ಥೈ. 37 ಹಮ್ನಾ ನೆಬುಕದ್ನೆಚ್ಚರ ಥಯಲ ಮಿ ಪರಲೊಕನಾ ರಾಜಾ಼ನೆ ಹೊಗಳಿನ ಸ್ತುತಿ ಕರಿನ ಮಹಿಮಾ ಕರುಸ; ತಿನಾ ಕ್ಹಾರಾ ಕಾಮೊ ಸತ್ಯ ವ್ಹೈ, ತಿನಾ ಕ್ಹಾರಾ ವಾಟೊ ನ್ಯಾಯನಾ ವ್ಹೈ; ಸೊಕ್ಕಕ್ಹು ರ‍್ಹವಾನೆಲಾವೊನೆ ಡೊಗ್ಗಾಡ ಸಕಸ.