1 ಅಹಶ್ವೆರೊಷನೊ ದಿಕ್ರೊ ಮೆದ್ಯೆಯ ವಂಶನೊ ಕಸ್ದಿಯನಾ ರಾಜ್ಯನಿ ಅದಿಕಾರ ರ‍್ಹಯಲವಾಲೊ ಥಯಲ ದಾರ್ಯಾವೆಶನಾ ಆಳ್ವಿಕೆನಾ ಪಸ್ಟ ವಕ್ಹಮಾ 2 ದಾನಿಯಲ ಥಯಲ ಮಿ ಶಾಸ್ತ್ರನೆ ಪರಿಕ್ಷಾ ಕರಿನ ಯಹೊವಾ ಪ್ರವಾದಿ ಥಯಲ ಯೆರೆಮಿಯನೆ ದಿದಲ ವಾಕ್ಯಾ ನಿಂಗತ ಯೆರುಸಲೆಮ ಹಾಳ ಥೈನ ಪಡಾನಾ ಪುರಾ ಕಾಲನಾ ವರಕ್ಹೊನಾ ಲಕ್ಕೊ ಸತ್ತರ ವ್ಹೈ ಕೈನ ತಿಳ್ದಿಲಿನ 3 ಉಪಾಸ ರ‍್ಹೈನ ಕೊತ್ಳೊ ಸುತ್ತಿ ಲಿನ ರಾಕ ಲಗಾಡಿ ಲಿನ ಕರ್ತಾ ಥಯಲ ಕ್ಹುದಾಕನ ಮ್ಹೊಡು ಉಚೈನ ಪ್ರಾಥನಾ ಮಾಂಗಿಲೆತೊ ರ‍್ಹಯೊ. 4 ಮಾರೊ ಕ್ಹುದಾ ಥಯಲ ಯಹೊವಾನೆ ಇಮ್ಮ ಪಾಪನಿ ಅರಿಕೆ ಕರಿನ ಮಾಂಗಿಲಿದ್ಯೊ- ಎ ಕ್ಹುದಾ, ಮಹೊನ್ನತ ಭಯಂಕರ ಥಯಲ ಕ್ಹುದಾ, ತುನೆ ಮಯಾ ಕರಿನ ತಾರಿ ಆಗನ್ಯಾವೊನೆ ಚಾ಼ಲಿಲಿನ ಜಾ಼ವಾಲಾವೊನೆ ಕರಲ ಕೃಪಾನಾ ವಾಗ್ದಾನೊನೆ ಪುರಾ ಕರಾಲಾ, 5 ಹಮೆ ಪಾಪೊ ಅಪರಾದೊ ಕರಿನ ಕೆಟ್ಟ ಥೈನ ರ‍್ಹೈನ ತುನೆ ಫರಿನ ತಾರಿ ಆಗನ್ಯಾವೊನೆ ಛೊಡಿನ 6 ಹಮಾರಾ ರಾಜಾ಼, ಮ್ಹೊಟಾ ಮನಕ್ಹೊ, ಶಾನಾ, ಸಾಮಾನ್ಯ ಮನಕ್ಹೊ, ಇವ್ನೊನೆ ಕ್ಹಾರಾವೊನೆ ತಾರಾ ನಾಮನಾ ಉಪ್ಪರ ಕದಲ ತಾರಾ ಸೆವಕೊ ಥಯಲ ಪ್ರವಾದಿಯೊಕನ ಕಾನ ದಿದ್ಯಾ ನೈ. 7 ಕರ್ತಾ, ತು ಧರ್ಮ ಸ್ವರುಪ ವ್ಹೈ, ಹಮೆ ಸರಮನೆ ಗುರಿ ಥಯಲವಾಲಾ ವ್ಹೈ; ಹೊ, ಹಮ್ನಾಜ಼ ಯಹುದಿಯೊ ಯೆರುಸಲೆಮಮಾ ರ‍್ಹವಾನೆಲಾ ತುನೆ ವಿರುದ್ದ ಥೈನ ಕರಲ ದ್ರೊಹನಾ ಮುಲಕ ತುಕ್ಹು ದೆಶ ದೆಶನೆ ನ್ಹಟಾಡಲವಾಲಾ ಥೈನ ದುರಬಿ ನಜಿಕಬಿ ಚದರಿ ಗಯಲ ಕ್ಹಾರಾ ಇಸ್ರಾಯೆಲೊ ಸರಮನೆ ಗುರಿ ಥಯಾಸ. 8 ಕರ್ತಾ, ತುನೆ ವಿರುದ್ದ ಥಯಲ ಪಾಪ ಕರ್xಯಲಕ್ಹು ಹಮೆ ಹಮಾರಾ ರಾಜಾ಼ವೊ ಮ್ಹೊಟಾ ಮನಕ್ಹೊ ಶಾನಾ ಸರಮನೆ ಗುರಿ ಥಯಾಸ. 9 ಕರ್ತಾ ಥಯಲ ಅಪ್ನೊ ಕ್ಹುದಾ ಕರುಣಾ ಕರಾಲೊ ಕ್ಷಮಾ ಕರಾಲೊ ಥಯೊಸ; ಅಪೆ ತಿನೆ ಉಲ್ಟಾ ಫರ್xಯಾಸತೊ; 10 ಕರ್ತಾ ಥಯಲ ಅಪ್ನಾ ಕ್ಹುದಾನಿ ವಾತನೆ ಐಕ್ಯಾ ನೈ, ತಿನಾ ಸೆವಕೊ ಥಯಲ ಪ್ರವಾದಿಯೊನಾ ಮುಲಕ ಅಪೊನೆ ತಿಳ್ಸಾಯಲ ಧರ್ಮನಿ ವಾಟಮಾ ಚಾ಼ಲ್ಯಾ ನೈ. 11 ಕ್ಹಾರಾ ಇಸ್ರಾಯೆಲೊ ತಾರಿ ನಿಯಮನಾ ಪ್ರಮಾಣನೆ ದಾಟಿನ ತಾರಿ ವಾತನೆ ಐಕ್ಯಾ ಬಗರ ದಡಿನ ರ‍್ಹಯಾ; ತಿನಾಹುತಿ ತಾರಿ ಶಾಪನಾ ಕೆಡೊ ಕ್ಹುದಾನೊ ಸೆವಕ ಥಯಲ ಮೊಶೆನಾ ಧರ್ಮ ಶಾಸ್ತ್ರಮಾ ತು ಕ್ಹಮ್ಮ ಘಾಲಿನ ಕದಲ ತ್ರಾಸೊ ಹಮಾರಾ ಉಪ್ಪರ ಆಯಾಸ; ಹಮೆ ಕ್ಹುದಾನೆ ದ್ರೊಹ ಕರಲವಾಲಾ ವ್ಹೈ. 12 (ಆಹಾ, ಅಪ್ನೊ ಕ್ಹುದಾ) ಅಪ್ನಾ ಉಪ್ಪರ ಮ್ಹೊಟಾ ತ್ರಾಸನೆ ಆವಾ ಲಗಾಡಿನ ಹಮೊನೆ ಆಳಾನಾ ಅದಿಪತಿಯೊನಾಹುತಿ ಎಚ್ಚರಿಕೆ ದಿನ ಕದಲ ವಾತೊನೆ ಪುರಾ ಕರ‍್ಯೊಸ; ಯೆರುಸಲೆಮನೆ ಥಯಲ ತ್ರಾಸ ಭುಲೊಕಮಾ ಕಿಜಾ಼ಜ಼ ಕೆಳಾಮಾಜ಼ ಥಯು ನೈತೊ. 13 ಮೊಶೆನಾ ಧರ್ಮ ಶಾಸ್ತ್ರಮಾ ಬರ್ದಲ ನಿಂಗತಜ಼ ಎ ತ್ರಾಸೊ ಕ್ಹಾರಾ ಹಮಾರಾ ಉಪ್ಪರ ಆಯಾಸ; ತೆನೈಸೊ ಹಮೆ ಹಮಾರಾ ಕೆಟ್ಟ ವಾಟೊ ಛೊಡಿನ ತಾರಾ ಸತ್ಯ ಉಪದೆಶನೆ ತಿಳ್ದಿಲಿನ ಚಾ಼ಲಾವರ್ಕ್ಹು ಅಪ್ನೊ ಕ್ಹುದಾ ಥಯಲ ಯಹೊವಾ ಕವಾಲಾ ತಾರಿ ಮರ್ಗಾನೆ ಮಾಂಗಿಲಿದ್ಯಾ ನೈ. 14 ತಿನಾಹುತಿ ಯಹೊವಾ ತೆ ತ್ರಾಸನೆ ದೆಕಿಲಿನ ಅಪ್ನಾ ಉಪ್ಪರ ಆವಾಲಗಾಡ್ಯೊಸ; ಅಪ್ನೊ ಕ್ಹುದಾ ಥಯಲ ಯಹೊವಾ ತೆ ಕರಾನಾ ಕ್ಹಾರಾ ಕಾಮೊಮಾ ಧರ್ಮ ಸ್ವರುಪಿ ವ್ಹೈ; ಅಪೆ ತಿನಿ ವಾತ ಐಕ್ಯಾ ನೈ. 15 ಕರ್ತಾ, ಹಮಾರಾ ಕ್ಹುದಾ, ಘನ್ನಿ ತಾಕತನೆ ದೆಕಾಡಿನ ತಾರಾ ಮನಕ್ಹೊನೆ ಐಗುಪ್ತ ದೆಶತೊ ಪಾರ ಕರಿನ ಆಜ಼ ಲಕ್ಕಾ ಮಶುರ ಥಯಲ ನಾಮನೆ ವ್ಹಂದಿಲಿದಲವಾಲೊ ವ್ಹೈ, ಹ್ನಾ ತಾರಿ ಚಿತ್ತ ಪುರಾ ಕರ. ಹಮೆ ಪಾಪ ಕರಿನ ಕೆಟ್ಟ ಥೈನ ಚಾ಼ಲಿಲಿನ ಗಯಾಸ. 16 ಕರ್ತಾ, ತಾರಾ ಪುರಾ ಧರ್ಮನಾ ಕಾಮೊ ನಿಂಗತ ತಾರು ಗಾಮ ತಾರು ಪವಿತ್ರ ಡೊಂಗರ ಥಯಲ ಯೆರುಸಲೆಮನಾ ಉಪ್ಪರ ರ‍್ಹಯಲ ತಾರಿ ಶಿಟ್ಟನೆ, ತಾರಿ ಶಿಟ್ಟನಿ ಆಗನೆ ದಯಾ ಕರಿನ ಛೊಡಿಪಡ; ಹಮಾರಾ ವರಿ ಹಮಾರಾ ಪಿತೃವೊನಾ ಪಾಪ ಅಪರಾದೊನಾಹುತಿ ಯೆರುಸಲೆಮಬಿ ತಾರಾ ಮನಕ್ಹೊಬಿ ಆಜು಼ ಬಾಜು಼ನಾ ಕ್ಹಾರಾ ಅವಮಾನನೆ ಗುರಿ ಥಯಾಸತೊ. 17 ಹಮಾರೊ ಕ್ಹುದಾ, ತಾರಾ ಸೆವಕನಿ ಪ್ರಾಥನಾವೊನೆ ಹಮ್ನಾ ಐಕ; ಹಾಳ ಥಯಲ ತಾರಿ ಪವಿತ್ರ ಆಯಲನೆ ಕರ್ತಾ ಥಯಲ ತಾರಾ ನಾಮನಾಹುತಿ ಕ್ಹುಶಿನಾ ಮ್ಹೊಡಾಕ್ಹು ದೆಕ. 18 ಮಾರಾ ಕ್ಹುದಾ, ಕಾನ ದಿನ ಐಕ, ಡೊಳಾ ಕಾಡಿನ ಹಮಾರಾ ಹಾಳ ಪಡಿಗಯಲ ಜ಼ಗಾವೊನೆ ತಾರು ನಾಮ ರ‍್ಹಯಲ ಗಾಮನೆ ದೆಕ; ಹಮೆ ಸಧರ್ಮಿಯೊ ನಿಂಗತ ನ್ಹವೈ ತಾರಿ ಮ್ಹೊಟಿ ಕೃಪಾನೆ ನಂಬಿನ ಎ ಪ್ರಾಥನಾವೊನೆ ತಾರಾ ಕ್ಹಾಮಾ ಅರಿಕೆ ಕರಾಡಾಸ. 19 ಕರ್ತಾ, ಐಕ! ಸ್ವಾಮಿ, ಕ್ಷಮಾ ಕರ! ಸ್ವಾಮಿ, ಐಕ, ಕಾಮ ಪುರಾ ಕರ! ತಡಾ ನಕೊ ಕರು! ಮಾರಾ ಕ್ಹುದಾ, ತಾರಾ ಮನಕ್ಹೊಬಿ ಗಾಮಬಿ ತಾರಾ ನಾಮನಾ ರ‍್ಹಯಲಕ್ಹು ತಾರು ನಾಮ ವಚಾ಼ಡಿಲೆ! 20 ಮಿ ಮ್ಹೊಡು ಕ್ಹೊಲಿನ ಮಾಂಗಿಲಿನ ಮಾರಾ ಮನಕ್ಹೊ ಥಯಲ ಇಸ್ರಾಯೆಲೊನಾ ಪಾಪೊನೆ ಅರಿಕೆ ಕರ್ತೊ ಮಾರಾ ಕ್ಹುದಾನಾ ಪವಿತ್ರ ಡೊಂಗರನಾ ವಿಷಯಮಾ ಮಾರೊ ಕ್ಹುದಾ ಥಯಲ ಯಹೊವಾಕನ ಮಾಂಗಿಲಿನ ಪ್ರಾಥನಾ ಕರ್ತಾಮಾ 21 ಪೈಲಾ ಮಾರಾ ದರ್ಶನ ದೆಕಲ ಗಬ್ರಿಯೆಲ ಕವಾನಾ ಮನಕ್ಹ ಅಸುರುಸುರ ಥೈನ ಉಡಿನ ಐನ ಪಾಟೆ ಕ್ಹಾಂಜೆ ಚ಼ಡಾವಾನಿ ನೈವೆದ್ಯ ಟೈಮಮಾ ಮನೆಬಿ ಮಳಿನ 22 ಮಾರಾ ಕ್ಹಾತೆ ಇಮ್ಮ ಬೊಲಿನ ಉಪದೆಶ ಕರ‍್ಯೊ; ದಾನಿಯಲ, ತುನೆ ಗ್ಯಾನನಿ ಬೊದನೆ ಕರಾನಾಹುತಿ ಹಮ್ನಾ ಆಯೊಸ; 23 ತು ಪೈಲಾಜ಼ ಮಾಂಗಿಲಿದಲ ಟೈಮಮಾ ಕ್ಹುದಾನಿ ಅಪ್ಪಣೆ ಥೈ; ತೆ ತುನೆ ಕವಾನೆ ನ್ಹ್ಯಾ ಆಯೊಸ; ತು (ಕ್ಹುದಾನೆ) ಘನ್ನೊ ಮಯಾನೊ ವ್ಹೈ; ಎ ಕ್ಹುದಾನಿ ವಾಣಿನೆ ವಿಚಾರ ಕರ, ಎ ದರ್ಶನನೆ ತಿಳ್ದಿಲೆ. 24 ಅಧರ್ಮನೆ ಖಲಾಸ ಕರಸ, ಪಾಪೊನೆ ತಿರ್ಸಾವಸ, ಅಪರಾದೊನೆ ನಿವಾರಣೆ ಕರಸ, ಸನಾತನ ಧರ್ಮನೆ ಸ್ಥಾಪನೆ ಕರಾನು, ಕ್ಹಪನನೆ ಪ್ರವಾದಿನಾ ವಾತನೆ ಇಕ್ಕೊ ಮಾರಿನ ಯಥಾರ್ಥ ಕರಸ, ಘನ್ನು ಪರಿಶುದ್ದ ರ‍್ಹಯಲನೆ ಅಬಿಷೆಕ ಕರಸ, ಎ ಕ್ಹಾರು ಪುರಾ ಥಾವಾನೆ ಪೈಲಾ ತಾರಾ ಮನಕ್ಹೊನೆಬಿ ಮಾರಾ ಪರಿಶುದ್ದ ಗಾಮನೆಬಿ ಸತ್ತರ ಅಟ್ವಾಡಾ ಥೌ ಕೈನ ನಿರ್ಧಾರ ಥಯುಸ. 25 ಎ ತಿಳ್ದಿಲಿನ ಶೆಂ ಮ್ಹೆಲ್ಲೆ; ಯೆರುಸಲೆಮ ಯಕ್ಕ ವಿಚಾರನಾ ರುಪಮಾ ಭಾಂಧಾವಾದೆ ಕವಾನಿ ಕ್ಹುದಾನಿ ವಾತ ಆಯಲ ತೆಳತು ಅಬಿಷಕ ಥಯಲ ಪ್ರಭು ಆಯೆ ಲಕ್ಕಾ ಕ್ಹಾತ ಹಪ್ತಾ ಥೌ! ತೆ ವರಿ ಭಂದೈನ ಕ್ಹಾಟಪರ ಬೆ ಹಪ್ತಾ ರ‍್ಹವಸ; ತಿನಾಹುತಿ ಚೌಕಬಿ ಕಂದಕಬಿ ರ‍್ಹವಸ; ತೆ ಟೈಮ ಘನ್ನೊ ತ್ರಾಸನೊ ಟೈಮ ವ್ಹೈ. 26 ಕ್ಹಾಟ್ಪರ ಬೆ ಹಪ್ತಾ ಥಯಲ್ಪರ ಅಬಿಶೆಕ ಥಯಲವಾಲೊ ಯಕ್ಲೊ ಮೌತನೆ ಗುರಿ ಥಾವಸ; ತಿನೆ ಸುಜ಼ ರ‍್ಹತು ನೈ; ವ್ಹಕ್ಕಾನಾ ಪ್ರಭುನಾ ಮನಕ್ಹೊನಾ ಗಾಮೊನೆ ಪವಿತ್ರ ಆಲಯನೆ ಹಾಳ ಕರಸ; ಭರಿನ ಫುಟಾನು ತುಫಾನ ಗಾಮೊನೆ ನಾಶ ಕರಸ; ಅಂತ್ಯಕಾಲ ಲಕ್ಕಾ ಯುದ್ದೊ ಥಾವಸ, ಕ್ಹರಿ ಬಿ ನಾಶ ಥಾವಸ . 27 ತೆ ಪ್ರಭು ಯಕ್ಕ ಹಪ್ತಾ ಲಕ್ಕ ಘನ್ನಾ ಮನಕ್ಹೊನಾ ಕ್ಹಾತೆ ಘ್ಟ ರ‍್ಹಯಲ ಒಡಂಬಡಿಕೆ ಕರಿ ಲಿವಸ, ಅರ್ದೊ ಹಪ್ತೊ ಬಲಿನಾ ನೈವೆದ್ಯೊನೆ ಹುಬ್ರಾಡಸ; ಅಸೈ ರ‍್ಹಯಲನೆ ವಾಹನ ಕರಿ ಲಿನ ಯಕ್ಕ ನಾಶ ಕರಾಲೊ ಉಡಿನ ಐನ ಕ್ಹರಿಬಿ ತಿನೆ ತುಫಾನ ಡುಬಾಡೆ ಲಕ್ಕಾ ಹಾಳ ಕರಸ.