ದಾನಿಯಲ 9:4-19

4 ಮಾರೊ ಕ್ಹುದಾ ಥಯಲ ಯಹೊವಾನೆ ಇಮ್ಮ ಪಾಪನಿ ಅರಿಕೆ ಕರಿನ ಮಾಂಗಿಲಿದ್ಯೊ- ಎ ಕ್ಹುದಾ, ಮಹೊನ್ನತ ಭಯಂಕರ ಥಯಲ ಕ್ಹುದಾ, ತುನೆ ಮಯಾ ಕರಿನ ತಾರಿ ಆಗನ್ಯಾವೊನೆ ಚಾ಼ಲಿಲಿನ ಜಾ಼ವಾಲಾವೊನೆ ಕರಲ ಕೃಪಾನಾ ವಾಗ್ದಾನೊನೆ ಪುರಾ ಕರಾಲಾ, 5 ಹಮೆ ಪಾಪೊ ಅಪರಾದೊ ಕರಿನ ಕೆಟ್ಟ ಥೈನ ರ‍್ಹೈನ ತುನೆ ಫರಿನ ತಾರಿ ಆಗನ್ಯಾವೊನೆ ಛೊಡಿನ 6 ಹಮಾರಾ ರಾಜಾ಼, ಮ್ಹೊಟಾ ಮನಕ್ಹೊ, ಶಾನಾ, ಸಾಮಾನ್ಯ ಮನಕ್ಹೊ, ಇವ್ನೊನೆ ಕ್ಹಾರಾವೊನೆ ತಾರಾ ನಾಮನಾ ಉಪ್ಪರ ಕದಲ ತಾರಾ ಸೆವಕೊ ಥಯಲ ಪ್ರವಾದಿಯೊಕನ ಕಾನ ದಿದ್ಯಾ ನೈ. 7 ಕರ್ತಾ, ತು ಧರ್ಮ ಸ್ವರುಪ ವ್ಹೈ, ಹಮೆ ಸರಮನೆ ಗುರಿ ಥಯಲವಾಲಾ ವ್ಹೈ; ಹೊ, ಹಮ್ನಾಜ಼ ಯಹುದಿಯೊ ಯೆರುಸಲೆಮಮಾ ರ‍್ಹವಾನೆಲಾ ತುನೆ ವಿರುದ್ದ ಥೈನ ಕರಲ ದ್ರೊಹನಾ ಮುಲಕ ತುಕ್ಹು ದೆಶ ದೆಶನೆ ನ್ಹಟಾಡಲವಾಲಾ ಥೈನ ದುರಬಿ ನಜಿಕಬಿ ಚದರಿ ಗಯಲ ಕ್ಹಾರಾ ಇಸ್ರಾಯೆಲೊ ಸರಮನೆ ಗುರಿ ಥಯಾಸ. 8 ಕರ್ತಾ, ತುನೆ ವಿರುದ್ದ ಥಯಲ ಪಾಪ ಕರ್xಯಲಕ್ಹು ಹಮೆ ಹಮಾರಾ ರಾಜಾ಼ವೊ ಮ್ಹೊಟಾ ಮನಕ್ಹೊ ಶಾನಾ ಸರಮನೆ ಗುರಿ ಥಯಾಸ. 9 ಕರ್ತಾ ಥಯಲ ಅಪ್ನೊ ಕ್ಹುದಾ ಕರುಣಾ ಕರಾಲೊ ಕ್ಷಮಾ ಕರಾಲೊ ಥಯೊಸ; ಅಪೆ ತಿನೆ ಉಲ್ಟಾ ಫರ್xಯಾಸತೊ; 10 ಕರ್ತಾ ಥಯಲ ಅಪ್ನಾ ಕ್ಹುದಾನಿ ವಾತನೆ ಐಕ್ಯಾ ನೈ, ತಿನಾ ಸೆವಕೊ ಥಯಲ ಪ್ರವಾದಿಯೊನಾ ಮುಲಕ ಅಪೊನೆ ತಿಳ್ಸಾಯಲ ಧರ್ಮನಿ ವಾಟಮಾ ಚಾ಼ಲ್ಯಾ ನೈ. 11 ಕ್ಹಾರಾ ಇಸ್ರಾಯೆಲೊ ತಾರಿ ನಿಯಮನಾ ಪ್ರಮಾಣನೆ ದಾಟಿನ ತಾರಿ ವಾತನೆ ಐಕ್ಯಾ ಬಗರ ದಡಿನ ರ‍್ಹಯಾ; ತಿನಾಹುತಿ ತಾರಿ ಶಾಪನಾ ಕೆಡೊ ಕ್ಹುದಾನೊ ಸೆವಕ ಥಯಲ ಮೊಶೆನಾ ಧರ್ಮ ಶಾಸ್ತ್ರಮಾ ತು ಕ್ಹಮ್ಮ ಘಾಲಿನ ಕದಲ ತ್ರಾಸೊ ಹಮಾರಾ ಉಪ್ಪರ ಆಯಾಸ; ಹಮೆ ಕ್ಹುದಾನೆ ದ್ರೊಹ ಕರಲವಾಲಾ ವ್ಹೈ. 12 (ಆಹಾ, ಅಪ್ನೊ ಕ್ಹುದಾ) ಅಪ್ನಾ ಉಪ್ಪರ ಮ್ಹೊಟಾ ತ್ರಾಸನೆ ಆವಾ ಲಗಾಡಿನ ಹಮೊನೆ ಆಳಾನಾ ಅದಿಪತಿಯೊನಾಹುತಿ ಎಚ್ಚರಿಕೆ ದಿನ ಕದಲ ವಾತೊನೆ ಪುರಾ ಕರ‍್ಯೊಸ; ಯೆರುಸಲೆಮನೆ ಥಯಲ ತ್ರಾಸ ಭುಲೊಕಮಾ ಕಿಜಾ಼ಜ಼ ಕೆಳಾಮಾಜ಼ ಥಯು ನೈತೊ. 13 ಮೊಶೆನಾ ಧರ್ಮ ಶಾಸ್ತ್ರಮಾ ಬರ್ದಲ ನಿಂಗತಜ಼ ಎ ತ್ರಾಸೊ ಕ್ಹಾರಾ ಹಮಾರಾ ಉಪ್ಪರ ಆಯಾಸ; ತೆನೈಸೊ ಹಮೆ ಹಮಾರಾ ಕೆಟ್ಟ ವಾಟೊ ಛೊಡಿನ ತಾರಾ ಸತ್ಯ ಉಪದೆಶನೆ ತಿಳ್ದಿಲಿನ ಚಾ಼ಲಾವರ್ಕ್ಹು ಅಪ್ನೊ ಕ್ಹುದಾ ಥಯಲ ಯಹೊವಾ ಕವಾಲಾ ತಾರಿ ಮರ್ಗಾನೆ ಮಾಂಗಿಲಿದ್ಯಾ ನೈ. 14 ತಿನಾಹುತಿ ಯಹೊವಾ ತೆ ತ್ರಾಸನೆ ದೆಕಿಲಿನ ಅಪ್ನಾ ಉಪ್ಪರ ಆವಾಲಗಾಡ್ಯೊಸ; ಅಪ್ನೊ ಕ್ಹುದಾ ಥಯಲ ಯಹೊವಾ ತೆ ಕರಾನಾ ಕ್ಹಾರಾ ಕಾಮೊಮಾ ಧರ್ಮ ಸ್ವರುಪಿ ವ್ಹೈ; ಅಪೆ ತಿನಿ ವಾತ ಐಕ್ಯಾ ನೈ. 15 ಕರ್ತಾ, ಹಮಾರಾ ಕ್ಹುದಾ, ಘನ್ನಿ ತಾಕತನೆ ದೆಕಾಡಿನ ತಾರಾ ಮನಕ್ಹೊನೆ ಐಗುಪ್ತ ದೆಶತೊ ಪಾರ ಕರಿನ ಆಜ಼ ಲಕ್ಕಾ ಮಶುರ ಥಯಲ ನಾಮನೆ ವ್ಹಂದಿಲಿದಲವಾಲೊ ವ್ಹೈ, ಹ್ನಾ ತಾರಿ ಚಿತ್ತ ಪುರಾ ಕರ. ಹಮೆ ಪಾಪ ಕರಿನ ಕೆಟ್ಟ ಥೈನ ಚಾ಼ಲಿಲಿನ ಗಯಾಸ. 16 ಕರ್ತಾ, ತಾರಾ ಪುರಾ ಧರ್ಮನಾ ಕಾಮೊ ನಿಂಗತ ತಾರು ಗಾಮ ತಾರು ಪವಿತ್ರ ಡೊಂಗರ ಥಯಲ ಯೆರುಸಲೆಮನಾ ಉಪ್ಪರ ರ‍್ಹಯಲ ತಾರಿ ಶಿಟ್ಟನೆ, ತಾರಿ ಶಿಟ್ಟನಿ ಆಗನೆ ದಯಾ ಕರಿನ ಛೊಡಿಪಡ; ಹಮಾರಾ ವರಿ ಹಮಾರಾ ಪಿತೃವೊನಾ ಪಾಪ ಅಪರಾದೊನಾಹುತಿ ಯೆರುಸಲೆಮಬಿ ತಾರಾ ಮನಕ್ಹೊಬಿ ಆಜು಼ ಬಾಜು಼ನಾ ಕ್ಹಾರಾ ಅವಮಾನನೆ ಗುರಿ ಥಯಾಸತೊ. 17 ಹಮಾರೊ ಕ್ಹುದಾ, ತಾರಾ ಸೆವಕನಿ ಪ್ರಾಥನಾವೊನೆ ಹಮ್ನಾ ಐಕ; ಹಾಳ ಥಯಲ ತಾರಿ ಪವಿತ್ರ ಆಯಲನೆ ಕರ್ತಾ ಥಯಲ ತಾರಾ ನಾಮನಾಹುತಿ ಕ್ಹುಶಿನಾ ಮ್ಹೊಡಾಕ್ಹು ದೆಕ. 18 ಮಾರಾ ಕ್ಹುದಾ, ಕಾನ ದಿನ ಐಕ, ಡೊಳಾ ಕಾಡಿನ ಹಮಾರಾ ಹಾಳ ಪಡಿಗಯಲ ಜ಼ಗಾವೊನೆ ತಾರು ನಾಮ ರ‍್ಹಯಲ ಗಾಮನೆ ದೆಕ; ಹಮೆ ಸಧರ್ಮಿಯೊ ನಿಂಗತ ನ್ಹವೈ ತಾರಿ ಮ್ಹೊಟಿ ಕೃಪಾನೆ ನಂಬಿನ ಎ ಪ್ರಾಥನಾವೊನೆ ತಾರಾ ಕ್ಹಾಮಾ ಅರಿಕೆ ಕರಾಡಾಸ. 19 ಕರ್ತಾ, ಐಕ! ಸ್ವಾಮಿ, ಕ್ಷಮಾ ಕರ! ಸ್ವಾಮಿ, ಐಕ, ಕಾಮ ಪುರಾ ಕರ! ತಡಾ ನಕೊ ಕರು! ಮಾರಾ ಕ್ಹುದಾ, ತಾರಾ ಮನಕ್ಹೊಬಿ ಗಾಮಬಿ ತಾರಾ ನಾಮನಾ ರ‍್ಹಯಲಕ್ಹು ತಾರು ನಾಮ ವಚಾ಼ಡಿಲೆ!