ಹಾಗರಳನಿ ವರಿ ಸಾರಳನಿ ಉದಾಹರಣೆ
21 ತುಮೊಮಾ ದಕ್ಹಾಜ಼಼ನಾ ಮೊಶೆನು ಧರಮ ಶಾಸ್ತ್ರನೆ ಹಜು಼ನಬಿ ಅಧಿನ ಥಾವಾನೆ ಆಸ ಕರೊಶಿ. ಧರಮ ಶಾಸ್ತ್ರ ಸು ಕವಸ ಕವಾನು ತುಮೊನೆ ಗ್ವತ್ತ ಛೆ ಸು? ಮನೆ ಕವೊ. 22 ಪವಿತ್ರ ಗ್ರಂಥ ಸು ಕವಸ ಕದ್ಯಾಮ, ಅಬ್ರಹಾಮನೆ ಬೆ ಪಟ್ಟಾ ವ್ಹತ್ತಾ. ಯಕ್ಲಾ ಪಟ್ಟಾನಿ ಮಾ ಆಳ ಥೈನ ವ್ಹತ್ತಿ, ಬಿಜಕ್ಲಾನಿ ಮಾ ಸ್ವತಂತ್ರ ವ್ಹತ್ತಿ. 23 ಮನಕ್ಹನಿ ಆದತ ರ‍್ಹಯಲ ರಿತಿಮಾ ಅಬ್ರಹಾಮನೊ ದಿಕ್ರೊ ತೆ ಆಳನಿ ಪೆಟ್ಮಾ ಹುಟ್ಯೊ. ಸ್ವತಂತ್ರ ಥಯಲ ಹೆಣ ಮನಕ್ಹಮಾ ಹುಟ್ಟಲ ದಿಕ್ರೊತೊ ಕ್ಹುದಾ ಅಬ್ರಹಾಮನೆ ಕರಲ ವಾಗ್ದಾನನೊ ಪ್ಹಲಾ ವ್ಹತ್ತೊ. 24 ಎ ಸಂಗತಿಯೊ ಹಮೊನೆ ಹೊಲಿಕೆ ಕರಿನ ದೆಕಾಡ್ಯಾಸ. ಕ್ಹುದಾನಾ ವರಿ ಮನಕ್ಹನಾ ವಚ್ಮಾ಼ ಥಯಲ ಬೆ ವಡಂಬಡಿಕೆನೆ ಎ ಬೆ ಹೆಣ ಮನಕ್ಹೊ ವಳಕ ಥಯ್ಯೊಸ. ಸಿನಾಯ ಡೊಂಗರನಾ ಉಪ್ಪರ ಕ್ಹುದಾ ದಿದಲ ಧರಮ ಶಾಸ್ತ್ರಜ಼ ಪಸ್ಟಲಿ ವಡಂಬಡಿಕೆ ವ್ಹೈ. ಎ ವಡಂಬಡಿಕೆನಾ ಅಧಿನ್ಮಾ ರ‍್ಹಯಲ ಮನಕ್ಹೊ ಗುಲಾಮೊ ನಿಂಗತ ವ್ಹತ್ತಾ. ಮಾ ಥಯಲ ಹಾಗರಳ ತೆ ವಡಂಬಡಿಕೆ ನಿಂಗತ ವ್ಹತ್ತಿ. 25 ತಿನಾಹುತಿ ಹಾಗರಳ ಅರೆಬಿಯಾಮಾ ರ‍್ಹಯಲ ಸಿನಾಯಿ ಡೊಂಗರ ನಿಂಗತ ಛೆ. ಯಹುದ್ಯೊನಾ ಗಾಮ ರ‍್ಹಯಲ ಜೆರುಸೆಲಿಮನೆ ತೆ ತಿನಾ ನಿಂಗತ ಛೆ. ಎ ಗಾಮ ಗುಲಾಮ ಗಿರಿಮಾ ಛೆ ವರಿ ತ್ಯಾನಾ ಮನಕ್ಹೊ ಕ್ಹಾರಾ ಧರಮ ಶಾಸ್ತ್ರನೆ ಗುಲಾಮೊ ಥಯಾಸ. 26 ತೆನೈಸೊ ಸ್ವರ್ಗಮಾ ರ‍್ಹಯಲ ಜೆರುಸೆಲೆಮ ಸ್ವತಂತ್ರ ಥಯಲ ಹೆಣ ಮನಕ್ಹ ನಿಂಗತ ಛೆ. ಎಜ಼ ಅಪ್ನಿ ಮಾ ವ್ಹೈ.