ಹಬಕುಕನಿ ಪ್ರಾಥನಾ
1 ಯೆಹೊವಾ, ಐಕ್ಯೊಸ ತಾರಿ ವೈಭವ
ಅಜ಼ಬಥಯೊ ಐಕಿ ತಾರಾ ಮ್ಹೊಟ ಕಾಮೊ
2 ಫರಿನ ಕರ ಹಮಾರಾ ವಕ್ಹತಮಾ ತೆ ಕ್ಹಾರು
ದೆಕಾಡಿನೆ ದೆ ಹಮ್ನಾಜ಼ ತೆ ಕ್ಹಾರು.
ಘನ್ನೊ ಶಿಟ್ಟ ಥಯೊತಬಿ ಇಕ್ಹುರು ನಕೊ ಮರ್ಗಾ
3 ಆವಾಡ್ಯೊಸ ಕ್ಹುದಾ, ತೆಮಾನ ಬಗಲ್ತೊ!
ತೆ ಪವಿತ್ರ ಪಾರಾನ ಪರ್ವತೊ!
ಫೈಲಸ ತಿನು ಪ್ರಭಾವ ಆಕಾಶಮಂಡಲಮಾ
ಭರಿಜಾ಼ವಸ ತಿನಿ ಮಹಿಮಾ ಭುಂಡಲ ಕ್ಹಾರು
4 ಸುರ್ಯಾ ನಿಂಗತ ಛೆ ತಿನು ಚಮಕನು ಮೆರ್ದಾನು
ಕಿರಣೊ ಭಾರಿಯೊ ಆವಾಡಿಯೊ ತಿನಾ ಹತ್ಮಾತಿಯೊ
ಝಕಾಯುಸ ತ್ಯಾಜ಼ ತಿನಿ ಶಕ್ತಿ ಸಾಮರ್ಥ.
5 ಚಾ಼ಲಿಯೊಸ ವ್ಯಾದಿಯೊ ತಿನಾ ಕ್ಹಾಮಿಯೊ
ಆವಾಡ್ಯುಸ ಮೌತ ತಿನಾ ಪಾಚು಼.
6 ಕಾಪಸ ಜಿಮಿನ ತೆ ಹುಬ್ರಯೊಮ
ಉದ್ರಿ ಜಾ಼ವಸ ದುನಿಯಾ ತೆ ದೆಕ್ತಾಮಾ,
ಚಿರೈ ಜಾ಼ವಸ ಪೈಲಾನಾ ಡೊಂಗ್ರೊ .
ಕತ್ರೈನ ಪಡಿಜಾ಼ವಸ ಸನಾತನನಿಯೊ ಗಿರಿಯೊ
ಪೈಲಾನಿಂಗತಜ಼ ರ‍್ಹವಸ ತೆ ಆವಾನು.
7 ದೆಕೊ, ತಳಮಳ ಥಯುಸ ಕುಶಾನನಾ ಝುಪ್ಡಾ,
ಕಾಪಾಡ್ಯಾಸ ಮಿದ್ಯಾನಮಾ ರ‍್ಹಯಲ ಕ್ಹಾರಾ ಝುಪ್ಡಾ
8 ಮ್ಹಾಡೊಪರ ತು ಆಯೊ ಕಾ?
ಝಿತ್ತಾನಾ ಘೊಡಾವೊಪರ ಬೈಟಿನ ಆಯೊ ಕಾ?
ಯೆಹೊವಾ, ತುನೆ ಘನ್ನಿ ಶಿಟ್ಟ ಛೆಸು ನದಿಯೊಪರ
ಶಿಟ್ಟ ಸಿಡುಕ ಛೆಸು ಹೊಂಡೊಪರ
ಘನ್ನೊ ಶಿಟ್ಟ ಛೆಸು ಸಮುದ್ರಪರ
9 ಕಾಡಿನ ಮ್ಹೆಲ್ಯೊ ಬಿಲ್ಲು ಬಾಣೊ ಖಾಂದಾಪರ್ತೊ
ಮಾರ್ಯೊ ಬಾಣೊ ತಿಮಾತಿಯೊ
ಚಿರಿಪಾಡ್ಯೊಸ ಜಿಮಿನ ನದಿಯೊಕ್ಹು .
10 ಕಾಪಸ ಡೊಂಗ್ರೊ ತುನೆ ದೆಕಿನ ;
ಹರ್ದಸ ಆಗಸತು ಪ್ರವಾಹ;
ಹತ್ತ ಉಚೈನ ಅವಾಜ ಕರಸ ಸಮುದ್ರೊ.
11 ಉಡಿನ ನ್ಹಾಟಸ ತಾರಿಯೊ ಬಾಣೊ ಉಜಾಲಕ್ಹು
ಚಮ್ಕಸ ತಾರಿ ಚಮಕಕ್ಹು.
ಸುರ್ಯೊ ಚ಼ಂದಪ್ಪಾ ದಡಸ ಗುಡಮಾ
12 ಜಿಮಿನಪರ ಹೈದಿನ ಜಾ಼ಸಿ ಘನ್ನಿ ಶಿಟ್ಟಕ್ಹು
ದೆಶೊನೆ ಖುಂದಿಪಾಡುಸ ಅರ್ಬಾಟಕ್ಹು
13 ಚಾಲ್ಯೊಸ ತು ತಾರಾ ಮನಕ್ಹೊನೆ ರಕ್ಷಣೆ,
ತಾರಾ ಹತೆ ಅಭಿಶೆಕ ಥಯಲವಾಲಾನೆ ವಚಾ಼ಡಾನಾ ಹುತಿ;
ಬಡೈಪಾಡ್ಯೊಸ ಮನಕ್ಹನ ಟೌಕಾನೆ
ಜಿಮನನಾ ಸಮಾ ಕರಿಪಾಡ್ಯೊಸ ತಿನಾ ಗರನೆ. ಸೆಲಾ
14 ಗಳುಸ ದಡಿನ ದಿಕ್ಕ ನೈಸೊವಾಲಾನೆ ದಾಬಿನ ಫುಗ್ಗಾಲಾವೊನೆ
ಕೈನ ಕವಾಲಾ ಮನೆ ಝುದೊ ಕರುಕೈನ ಮಪರ
ತುಫಾನ ನಿಂಗತ ಪಡಿನ ತ್ಯುನಾ ಆಯುದೊಕ್ಹುಜ಼ ಮಾರ್ಯೊ.
15 ತಾರಾ ಘೊಡಾ ಛಡಲವಾಲಾವೊ ಥೈನ ತು ಬುರುಗ ರ‍್ಹಯಲ ಸಮುದ್ರ ಖುಂದತೊ
ಮ್ಹೊಟಾ ಪಾನಿಪರ ಚಾ಼ಲ್ತೊ ಗಯೊಸ.
16 ಎ ಐಕಿನ ತಳಮಳ ಥಯು ಮಾರು ಪೆಟ
ಹಲ್ಯಾ ತೆ ಅವಾಜ ಕ್ಹು ಮಾರಾ ಹೊಟೊ
ಕ್ಹಡಲ ನಿಂಗತ ತಯಾ ಮಾರಾ ಹಡ್ಕಾ
ಹುಬ್ರಯಲ ಜ಼ಗಾಜ಼ ಕಾಪ್ಯಾ ಮಾರಾ ಪೊಗೊ
ತ್ರಾಸ ಐಜ಼ಪಡಸ ಮನೆ ಘೆರೊ ಘಾಲಲ
ಕೈದಿ ರ‍್ಹೌಸ ಮಿ ತಡ್ದಿಲಿನ ತ್ಯಾಲಕ್ಕಾ.
17 ಅಂಜುರನು ಝಾಡ ಚಿಗರ‍್ಯಾವಾಚಿ ರ‍್ಹೈತಬಿ
ದ್ರಾಕ್ಷಿಯೊನ ಬಳ್ಳಿಮಾ ಪಲ್ಲ ನೈ ದಿಕ್ಹ್ಯುತಬಿ
ತೆಲಾನಾ ಜಾಡೊ ಉತ್ಪತ್ತಿ ಸುಜ಼ ನೈ ರ‍್ಹಯುತಬಿ
ಖೆತರೊಮಾ ಕಯುಜ ಅನಾಜ ನಯ ಹುಟ್ಯುತಬಿ
ಬಕ್ರಾನಿಯೊ ಹಟ್ಟಿಯೊ ಖಾಲಿ ರ‍್ಹಯುತಬಿ
ಢೊರನಿಯೊ ಹಟ್ಟಿಯೊ ಖಾಲಿರ‍್ಹಯುತಬಿ
18 ಕ್ಹುಶಿಕ್ಹು ರ‍್ಹೌಸ ಯೆಹೊವಾಮಾ
ಕ್ಹುಶಿಕ್ಹು ರ‍್ಹೌಸ ಮಾರಾ ಉದ್ದಾರ ಕರಾನಾ ಕ್ಹುದಾಮಾ
19 ಯಹೊವಾ ಕ್ಹುದಾ ದಿವಸ ಮನೆ ತಡ್ದಾನು
ಹುಶಾರ ಕರಸ ತೆ ಮಾರಾ ಪಗೊ ಚಿಗ್ರಿನಿಂಗತ
ಕರಸ ಡೊಂಗರೊನೆ ಮಿ ನ್ಹಾಟಾ ನಿಂಗತ