ಜ಼ಲಮ್ನಿ ವಾಕ್ಯಾ
1 ಶುರುತಿ ಪೈಲಾಜ ದುನಿಯಾಮಾ ವಾಕ್ಯಾ ವ್ಹತ್ತಿ. ತೆ ಕ್ಹುದಾನಾ ಕ್ಹಾತೆ ವ್ಹತ್ತೊ. ತೆಜ಼ ಕ್ಹುದಾ ವ್ಹತ್ತೊ. 2 ಕ್ಹಾರು ಶುರು ಥಾವಾತಿ ಪೈಲಾಜ ತೆ ಕ್ಹುದಾನಾ ಕ್ಹಾತೆ ವ್ಹತ್ತೊ. 3 ಕ್ಹುದಾ ಕ್ಹಾರುಜ ತಿನಾ ಮುಕಾಂತರ ತಯ್ಯಾರ ಕರ‍್ಯೊ. ತೆನೈಸೊ ಸುಜ಼ ತಯ್ಯಾರ ಥಯು ನೈ. 4 ತಿಮಾ ಮುಲ ಜ಼ಲಮ ವ್ಹತ್ತೊ. ತೆ ಜ಼ಲಮ ಮನಕ್ಹೊನೆ ಉಜಾಲು ಥೈನ ವ್ಹತ್ತು. 5 ಉಜಾಲು ಅಂದಾರಾಮಾ ಉಜಾಲು ದಿದ್ಯು. ತೆನೈಸೊ ಅಂದಾರು ಉಜಾಲಾನೆ ವಳಕ್ಯು ನೈ. 6 ಕ್ಹುದಾ ಸಂದೆಶ ಕವಾಲಾ ಯಕ್ಕ ಮನಕ್ಹನೆ ಮೊಕಲ್ಯೊ ತಿನು ನಾಮ ಯೊಹಾನ ವ್ಹತ್ತು. 7 ಯೊಹಾನ ಉಜಾಲಾನಾ ಹುತಿ ಮನಕ್ಹೊಕನ ಆಯೊ. ತಿನಾ ಮುಕಾಂತರ ಕ್ಹಾರಾ ಮನಕ್ಹೊ ತೆ ಸಂದೆಶ ಐಕಿನ ತಿನೆ ನಂಬು ಕೈನ ಆಯೊ. 8 ಯೊಹಾನಜ ತೆ ಕ್ಹರಿನು ಉಜಾಲು ನ್ಹೊತು 9 ಕ್ಹರಿನು ಉಜಾಲು ವ್ಹತ್ತು. ಎ ದುನಿಯಾಮಾ ಆವಾನು ವ್ಹತ್ತು. ತೆಜ಼ ಕ್ಹರಿನು ಉಜಾಲು ಕ್ಹಾರಾ ಮನಕ್ಹೊ ಪರ ಚಮಕಸ. 10 ವಾಕ್ಯಾ ಕವಾಲೊ ತೆಳಾಮಾಜ಼ ದುನಿಯಾಮಾ ವ್ಹತ್ತೊ. ವರಿ ಕ್ಹುದಾ ತಿನಾ ಮುಕಾಂತರ ದುನಿಯಾ ತಯ್ಯಾರ ಕರ‍್ಯೊ. ವರಿಬಿ ತಿನೆ ಎ ದುನಿಯಾವಾಲಾ ವಳಕ್ಯಾ ನೈ. 11 ತೆ ತಿನಾ ಸ್ವಂತ ದೆಶೆ ಆಯೊ. ತೆನೈಸೊ ತಿನಾ ಸ್ವಂತ ಮನಕ್ಹೊ ತಿನೆ ವಪ್ಪಿಲಿದ್ಯಾ ನೈ. 12 ತೆನೈಸೊ ಕುನ್ನ-ಕುನ್ನ ತಿನೆ ವಪ್ಪಿಲಿದ್ಯಾ ಕದ್ಯಾಮ ತಿನಾ ನಾಮ ಪರ ಬರೊಕ್ಹೊ ಕರ‍್ಯಾ ತ್ಯುನೊನೆ ತೆ ಕ್ಹುದಾನಾ ಬಚ್ಚಾ಼ ಥಾವಾನೆ ಹಕ್ಕ ದಿದ್ಯೊ. 13 ಇವ್ನೆ ರಗತಕ್ಹು ರ‍್ಹೈನೆಕಾ ಅಂಗನಾ ಆಸಕ್ಹು ರ‍್ಹೈನೆಕಾ ದಾಣ್ಗಾನಾ ಆಸಕ್ಹು ರ‍್ಹೈನೆಕಾ ಹುಟ್ಟಲ ನ್ಹವೈ. ತೆ ಇವ್ನೆ ಕ್ಹುದಾಕ್ಹುಜ ಹುಟ್ಟಲ ವ್ಹೈ. 14 ವಾಕ್ಯಾ ಕವಾಲೊ ಮನಕ್ಹನೊ ರುಪತಾಳಿನ. ತೆ ಪುರಾ ಕೃಪಾಕ್ಹು ವರಿ ಕ್ಹರಿಕ್ಹು ಭರ‍್ಯೊತೊ. ಅಪ್ನಾ ಕ್ಹಾತೆ ಜಿವ್ನಾ ಕರ‍್ಯೊ ಅಪೆ ತಿನಿ ಮಹಿಮಾ ದೆಕ್ಯಾ. ತೆ ಮಹಿಮಾ ಬಾನೊ ಯಕ್ಲೊಜ಼ ದಿಕ್ರೊ ರ‍್ಹಯಲ ತಿನೆ ಮಹಿಮಾ ವ್ಹತ್ತಿ. 15 ಯೊಹಾನ ತಿನಾಹುತಿ ಸಾಕ್ಷಿ ದಿನ್ನ ವರಿ ವದ್ರಿನ ಕದ್ಯೊ" ಎ ತೆಜ಼ ವ್ಹೈ ಕಿನಾಹುತಿ ಮಿ ಕದ್ಯೊ, ತೆ ಮಪರ್ತೊ ಆವಸ, ಮುಪರತೊ ಆವಾಲೊ ಯಕ್ಲೊ ಮುತ್ತಿ ಮ್ಹೊಟೊ ವ್ಹೈ. ತೆ ಮಿ ಹುಟ್ಟಾತಿ ಪೈಲಾಜ ಕಾಕದ್ಯಾಮ ತೆ ಅಸ್ತಿತ್ವಮಾ ವ್ಹತ್ತೊ. 16 ತಿನಿ ಕರುಣಾ ವರಿ ಪರಿಪುರ್ಣ ಕೃಪಾಕ್ಹು ಭರಲ ವ್ಹತ್ತೊ. ತಿನಾಕ್ಹುಜ ಅಪೆ ಕ್ಹಾರಾ ಮನಕ್ಹೊ ಆಶಿರ್ವಾದ ಪರ ಆಶಿರ್ವಾದ ವ್ಹಂದ್ಯಾ. 17 ಕ್ಹುದಾ ಮೊಶೆನಾ ಮುಲಕ ನಿಯಮೊ ದಿದ್ಯೊತೊ. ತೆನೈಸೊ ಕೃಪಾ ಕ್ಹರಿ ಯೆಸು ಕ್ರಿಸ್ತನಾ ಮುಲಕ ಆಯು. 18 ಕ್ಹುದಾನೆ ಕುನ್ನಜ ಕೆಳಾಮಾಜ ದೆಕ್ಯಾ ನತ್ತಿ. ತೆನೈಸೊ ಯಕ್ಲೊಜ಼ ದಿಕ್ರೊ ತೆ ಕ್ಹುದಾನ ನಿಂಗತ ಛೆ ವರಿ ಬಾನಾ ಬಾಜು಼ಮಾ ಛೆ. ತೆ ದಿಕ್ರೊ ಕ್ಹುದಾನೆ ಅಪೊನೆ ದೆಕಾಡಿನ ದಿದ್ಯೊಸ.
ಬಾಪ್ತಿಸ್ಮ ದಿಲಾವಾಲಾ ಯೊಹಾನನು ಸಂದೆಶ
(ಮತ್ತಾಯ 3:1-12; ಮಾರ್ಕ 1:2-8; ಲುಕ 3:15-17)