1 ಶುರುತಿ ಪೈಲಾಜ ದುನಿಯಾಮಾ ವಾಕ್ಯಾ ವ್ಹತ್ತಿ. ತೆ ಕ್ಹುದಾನಾ ಕ್ಹಾತೆ ವ್ಹತ್ತೊ. ತೆಜ಼ ಕ್ಹುದಾ ವ್ಹತ್ತೊ. 2 ಕ್ಹಾರು ಶುರು ಥಾವಾತಿ ಪೈಲಾಜ ತೆ ಕ್ಹುದಾನಾ ಕ್ಹಾತೆ ವ್ಹತ್ತೊ. 3 ಕ್ಹುದಾ ಕ್ಹಾರುಜ ತಿನಾ ಮುಕಾಂತರ ತಯ್ಯಾರ ಕರ‍್ಯೊ. ತೆನೈಸೊ ಸುಜ಼ ತಯ್ಯಾರ ಥಯು ನೈ. 4 ತಿಮಾ ಮುಲ ಜ಼ಲಮ ವ್ಹತ್ತೊ. ತೆ ಜ಼ಲಮ ಮನಕ್ಹೊನೆ ಉಜಾಲು ಥೈನ ವ್ಹತ್ತು. 5 ಉಜಾಲು ಅಂದಾರಾಮಾ ಉಜಾಲು ದಿದ್ಯು. ತೆನೈಸೊ ಅಂದಾರು ಉಜಾಲಾನೆ ವಳಕ್ಯು ನೈ. 6 ಕ್ಹುದಾ ಸಂದೆಶ ಕವಾಲಾ ಯಕ್ಕ ಮನಕ್ಹನೆ ಮೊಕಲ್ಯೊ ತಿನು ನಾಮ ಯೊಹಾನ ವ್ಹತ್ತು. 7 ಯೊಹಾನ ಉಜಾಲಾನಾ ಹುತಿ ಮನಕ್ಹೊಕನ ಆಯೊ. ತಿನಾ ಮುಕಾಂತರ ಕ್ಹಾರಾ ಮನಕ್ಹೊ ತೆ ಸಂದೆಶ ಐಕಿನ ತಿನೆ ನಂಬು ಕೈನ ಆಯೊ. 8 ಯೊಹಾನಜ ತೆ ಕ್ಹರಿನು ಉಜಾಲು ನ್ಹೊತು 9 ಕ್ಹರಿನು ಉಜಾಲು ವ್ಹತ್ತು. ಎ ದುನಿಯಾಮಾ ಆವಾನು ವ್ಹತ್ತು. ತೆಜ಼ ಕ್ಹರಿನು ಉಜಾಲು ಕ್ಹಾರಾ ಮನಕ್ಹೊ ಪರ ಚಮಕಸ. 10 ವಾಕ್ಯಾ ಕವಾಲೊ ತೆಳಾಮಾಜ಼ ದುನಿಯಾಮಾ ವ್ಹತ್ತೊ. ವರಿ ಕ್ಹುದಾ ತಿನಾ ಮುಕಾಂತರ ದುನಿಯಾ ತಯ್ಯಾರ ಕರ‍್ಯೊ. ವರಿಬಿ ತಿನೆ ಎ ದುನಿಯಾವಾಲಾ ವಳಕ್ಯಾ ನೈ. 11 ತೆ ತಿನಾ ಸ್ವಂತ ದೆಶೆ ಆಯೊ. ತೆನೈಸೊ ತಿನಾ ಸ್ವಂತ ಮನಕ್ಹೊ ತಿನೆ ವಪ್ಪಿಲಿದ್ಯಾ ನೈ. 12 ತೆನೈಸೊ ಕುನ್ನ-ಕುನ್ನ ತಿನೆ ವಪ್ಪಿಲಿದ್ಯಾ ಕದ್ಯಾಮ ತಿನಾ ನಾಮ ಪರ ಬರೊಕ್ಹೊ ಕರ‍್ಯಾ ತ್ಯುನೊನೆ ತೆ ಕ್ಹುದಾನಾ ಬಚ್ಚಾ಼ ಥಾವಾನೆ ಹಕ್ಕ ದಿದ್ಯೊ. 13 ಇವ್ನೆ ರಗತಕ್ಹು ರ‍್ಹೈನೆಕಾ ಅಂಗನಾ ಆಸಕ್ಹು ರ‍್ಹೈನೆಕಾ ದಾಣ್ಗಾನಾ ಆಸಕ್ಹು ರ‍್ಹೈನೆಕಾ ಹುಟ್ಟಲ ನ್ಹವೈ. ತೆ ಇವ್ನೆ ಕ್ಹುದಾಕ್ಹುಜ ಹುಟ್ಟಲ ವ್ಹೈ. 14 ವಾಕ್ಯಾ ಕವಾಲೊ ಮನಕ್ಹನೊ ರುಪತಾಳಿನ. ತೆ ಪುರಾ ಕೃಪಾಕ್ಹು ವರಿ ಕ್ಹರಿಕ್ಹು ಭರ‍್ಯೊತೊ. ಅಪ್ನಾ ಕ್ಹಾತೆ ಜಿವ್ನಾ ಕರ‍್ಯೊ ಅಪೆ ತಿನಿ ಮಹಿಮಾ ದೆಕ್ಯಾ. ತೆ ಮಹಿಮಾ ಬಾನೊ ಯಕ್ಲೊಜ಼ ದಿಕ್ರೊ ರ‍್ಹಯಲ ತಿನೆ ಮಹಿಮಾ ವ್ಹತ್ತಿ. 15 ಯೊಹಾನ ತಿನಾಹುತಿ ಸಾಕ್ಷಿ ದಿನ್ನ ವರಿ ವದ್ರಿನ ಕದ್ಯೊ" ಎ ತೆಜ಼ ವ್ಹೈ ಕಿನಾಹುತಿ ಮಿ ಕದ್ಯೊ, ತೆ ಮಪರ್ತೊ ಆವಸ, ಮುಪರತೊ ಆವಾಲೊ ಯಕ್ಲೊ ಮುತ್ತಿ ಮ್ಹೊಟೊ ವ್ಹೈ. ತೆ ಮಿ ಹುಟ್ಟಾತಿ ಪೈಲಾಜ ಕಾಕದ್ಯಾಮ ತೆ ಅಸ್ತಿತ್ವಮಾ ವ್ಹತ್ತೊ. 16 ತಿನಿ ಕರುಣಾ ವರಿ ಪರಿಪುರ್ಣ ಕೃಪಾಕ್ಹು ಭರಲ ವ್ಹತ್ತೊ. ತಿನಾಕ್ಹುಜ ಅಪೆ ಕ್ಹಾರಾ ಮನಕ್ಹೊ ಆಶಿರ್ವಾದ ಪರ ಆಶಿರ್ವಾದ ವ್ಹಂದ್ಯಾ. 17 ಕ್ಹುದಾ ಮೊಶೆನಾ ಮುಲಕ ನಿಯಮೊ ದಿದ್ಯೊತೊ. ತೆನೈಸೊ ಕೃಪಾ ಕ್ಹರಿ ಯೆಸು ಕ್ರಿಸ್ತನಾ ಮುಲಕ ಆಯು. 18 ಕ್ಹುದಾನೆ ಕುನ್ನಜ ಕೆಳಾಮಾಜ ದೆಕ್ಯಾ ನತ್ತಿ. ತೆನೈಸೊ ಯಕ್ಲೊಜ಼ ದಿಕ್ರೊ ತೆ ಕ್ಹುದಾನ ನಿಂಗತ ಛೆ ವರಿ ಬಾನಾ ಬಾಜು಼ಮಾ ಛೆ. ತೆ ದಿಕ್ರೊ ಕ್ಹುದಾನೆ ಅಪೊನೆ ದೆಕಾಡಿನ ದಿದ್ಯೊಸ.

19 ತು ಕುನ್ನ ವ್ಹೈ? ಕೈನ ಯೊಹಾನನೆ ಪುಚ್ಚಾನಾ ಹುತಿ ಯೆರುಸಲೆಮನಾ ಯಹುದ್ಯೊನಾ ಅದಿಕಾರಿಯೊ ಯೊಹಾನಕನ ದಕ್ಹಾ ಯಾಜಕೊನೆ ವರಿ ಲೆವಿಯೊನೆ ಮೊಕಲ್ಯಾ. 20 ಯೊಹಾನ ಝಾಕ್ಯಾವಾಚಿ"ಮಿ ಕ್ರಿಸ್ತ ನ್ಹವೈ" ಕೈನ ಕ್ಹಾರಾವೊನಾ ಕ್ಹಾಮೊ ಕದ್ಯೊ. 21 ವರಿ ತ್ಯುನೆ ತಿನೆ"ತಿಮ್ಮ ರ‍್ಹಯುಮ ತು ಕುನ್ನ ವ್ಹೈ? ತು ಎಲಿಯಾ ವ್ಹೈಸು ಕೈನ ಪುಚ್ಯಾ. ತೆ"ನ್ಹವೈ, ಮಿ ಎಲಿಯಾ ನ್ಹವೈ ಕೈನ ಕದ್ಯೊ. ವರಿ ತ್ಯುನೆ"ತು ಪ್ರವಾದಿ ವ್ಹೈಸು? ಕೈನ ಪುಚ್ಯಾ. ಯೊಹಾನ"ನ್ಹವೈ, ಮಿ ಪ್ರವಾದಿ ನ್ಹವೈ ಕೈನ ಕದ್ಯೊ. 22 ತಿಮ್ಮ ರ‍್ಹಯುಮ"ಹಮೊನೆ ಕೆ ತು ಕುನ್ನ ವ್ಹೈ. ಹಮೊನೆ ವಳಾಯಲವಾಲಾವೊನೆ ಹಮೆ ಸು ಕೈಯೆ. ತಾರಾ ಹುತಿ ತು ಸು ಕಶಿ? 23 ತೆ ವಾತೆ ಯೊಹಾನ,ಪ್ರವಾದಿ ಥಯಲ ಯೆಶಾಯ ಕದಲ ತಿಮ್ಮ ಕದ್ಯೊ. "ಪ್ರಭು ಆವಾನಾ ಹುತಿ ವಾಟ ಸಿದಾ ತಯ್ಯಾರ ಕರೊ ಕೈನ ರಾನ್ಮಾ ವದ್ರಾನು ಅವಾಜ಼ ಮಿ ವ್ಹೈ" 24 ವಳಾಯಲ ವಾಲಾವೊಮಾನಾ ದಕ್ಹಾ ಜ಼ನಾ ಪರಿಸಾಯರೊ ವ್ಹತ್ತಾ. 25 ತ್ಯುನೆ ಯೊಹಾನನೆ ಪುಚ್ಯಾ"ತು ತಾರಾ ಹುತಿ"ಮಿ ಕ್ರಿಸ್ತ ಬಿ ನ್ಹವೈ ಕವಾನು ರ‍್ಹಯುಮ, ಎಲಿಯಾಬಿ ನ್ಹವೈ, ಪ್ರವಾದಿಬಿ ನ್ಹವೈ ಕೈನ ಕವಾಡ್ಯೊಸ. ಇಮ್ಮ ರ‍್ಹಯುಮ ತು ಮನಕ್ಹೊನೆ ಕಾ ಬಾಪ್ತಿಸ್ಮ ಕರಾವಾಡೊಸ? 26 ಯೊಹಾನ ಕದ್ಯೊ"ಮಿ ಮನಕ್ಹೊನೆ ಪಾನಿಕ್ಹು ಬಾಪ್ತಿಸ್ಮ ಕರೌಸ. ತೆನೈಸೊ ತುಮೊನೆ ಗ್ವತ ನೈ ರ‍್ಹಯಲವಾಲೊ ನ್ಹ್ಯಾ ಛೆ. 27 ಮಾರಾ ಪಾಚೊ಼ ಆವಾಲೊ ತೆಜ಼ ವ್ಹೈ. ತಿನಿಯೊ ಚಪ್ಲೊನಿಯೊ ದೊರಿಯೊ ಖೊಲಾನೆ ಮಿ ಯೊಗ್ಯ ನತ್ತಿ ಕೈನ ಕದ್ಯೊ. 28 ಯೊರ್ದನ ನದಿನಾ ತಿನಾ ಪುರ್ವ ದಿಕ್ರಾನಾ ಬಗಲ ರ‍್ಹಯಲ ಬೆಥನಿ ಕವಾನಾ ಗಾಮಮಾ ಎ ಸಂಗತಿಯೊ ಥಯ್ಯೊ. ಯೊಹಾನ ಮನಕ್ಹೊನೆ ಬಾಪ್ತಿಸ್ಮ ಕರಾನು ನ್ಹ್ಯಾಜ ವ್ಹೈ.

29 ಮರ್ನಾ ದಿನ್ನೆ ಯೊಹಾನ, ತಿಕನ ಆವಾನಾ ಯೆಸುನೆ ದೆಕ್ಯೊ ದೆಕಿನ "ದೆಕೊ, ಕ್ಹುದಾನು ಬಕ್ರಾನು ಬಚ್ಚು಼. ತೆ ಎ ದುನಿಯಾನಾ ಪಾಪೊ ಕಾಡಸ. 30 ಮಿ ಗಯಲ್ಪರ ಯಕ್ಕ ಮನಕ್ಹ ಆವಸ. ತೆ ಮಾರಾತಿಬಿ ಮ್ಹೊಟೊ ವ್ಹೈ. ಕಾಕದ್ಯಾಮ ತೆ ಮಾರಾತಿಬಿ ಪೈಲಾ ಹುಟ್ಟಿನ ಅಸ್ತಿತ್ವಮಾ ರ‍್ಹಯಲವಾಲೊ ವ್ಹೈ ಕೈನ ಮಿ ಕವಾನು ಇನಾಜ ವ್ಹೈ. 31 ತೆ ಕುನ್ನ ವ್ಹೈ ಕವಾನು ಮನೆಬಿ ಗ್ವತ ನ್ಹೊತು. ತೆನೈಸೊ ತಿನೆ ಇಸ್ರಾಯಲೊನೆ ತಿಳ್ಸಾನಿ ಹುತಿ ಮಿ ಮನಕ್ಹೊನೆ ಪಾನಿಕ್ಹು ಬಾಪ್ತಿಸ್ಮ ದಿಲಾವಾಡ್ಯೊತೊ" ಕೈನ ಕದ್ಯೊ. 32 ಯೊಹಾನ ಸಾಕ್ಷಿ ದಿನ್ನ ಕದ್ಯೊ ತೆ ಕುನ್ನ ವ್ಹೈ ಕೈನ ಮನೆಬಿ ಗ್ವತ ನ್ಹೊತು. ತೆನೈಸೊ ಮನಕ್ಹೊನೆ ಬಾಪ್ತಿಸ್ಮ ದಿವಾನೆ ಮನೆ ವಳಾಯಲವಾಲೊ ಮನೆ ಪವಿತ್ರ ಆತ್ಮಾ ಸ್ವರ್ಗತು ಉತ್ರಿನ ಐನ ಯಕ್ಕ ಮನಕ್ಹನಾ ಉಪ್ಪರ ಆವಾನು ತು ದೆಕ್ಷಿ. 33 ಪವಿತ್ರ ಆತ್ಮಾಕ್ಹು ಬಾಪ್ತಿಸ್ಮ ದಿಲಾವಾಲೊ ತೆಜ಼ ಮನಕ್ಹ ವ್ಹೈ "ಕೈನ ಕದಲ ಎ ಥಾವಾನು ಮಿ ಡೊಳಾ ಕ್ಹಾಮೊ ದೆಕ್ಯೊಸ. ಪವಿತ್ರ ಆತ್ಮಾ ಸ್ವರ್ಗತೊ ಕ್ಹಬುತರನಾ ರುಪಮಾ ಉತ್ರಿನ ಐನ ತಿನಾ ಉಪ್ಪರ ಆವಾನು ಮಿ ದೆಕ್ಯೊ. 34 ತಿನಾಹುತಿ "ಮಿ ಸು ದೆಕ್ಯೊಸ ತೆಜ಼ ಮಿ ಕೌಸ. ತೆಜ಼ (ಯೆಸು) ಕ್ಹುದಾನೊ ದಿಕ್ರೊ ವ್ಹೈ ಕೈನ ಮಿ ಮನಕ್ಹೊನೆ ತಿಳ್ಸುಸ "ಕದ್ಯೊ.

35 ಮರ್ನಾ ದಿನೆ ವರಿ ಯೊಹಾನ ತಿನಾ ಬೆ ಶಿಷ್ಯಾವೊನೆ ಕ್ಹಾತೆ ತ್ಯಾ ರ‍್ಹತಾಮಾ, 36 ನಜಿಕ್ಮಾ ಚಾಲ್ತೊ ರ‍್ಹತಾಮಾ ಯೆಸುನೆ ದೆಕ್ಯೊ ತೆಳಾಮಾ ಯೊಹಾನ ಕದ್ಯೊ ಎ ಕ್ಹುದಾನು ಬಕ್ರಾನು ಬಚ್ಚು಼, 37 ಯೊಹಾನನಾ ಎ ವಾತೊ ಐಕಿನ ತೆ ಬೆ ಶಿಷ್ಯಾ ಯೆಸುನಾ ಪಾಚಾ಼ ಗಯಾ. 38 ಯೆಸು ಪಾಚೊ಼ ಫರಿನ ದೆಕ್ಯೊ ತ್ಯುನೆ ಪಾಚಾ಼ ಆವಾನು ದೆಕಿನ ತುಮೊನೆ ಸು ಚಾ಼ಯೆ? ಕೈನ ಪುಚ್ಯೊ. ತೆ ಬೆ ಜ಼ನಾ, ತಿನೆ ಉತ್ತರ ದಿದ್ಯಾ" ರಬ್ಬಿ, ತು ಕಿಜ್ಗಾ ರ‍್ಹಯೊಸ? ಕೈನ ಪುಚ್ಯಾ. ರಬ್ಬಿ" ಕದ್ಯಾಮ" ಗುರು" ಇನೊ ಮತ್ಲಬ ವ್ಹೈ. 39 ಯೆಸು ತ್ಯುನೊನೆ "ಮಾರಾ ಕ್ಹಾತೆ ಆವೊ, ತೆಳಾಮಾ ತುಮೆಜ಼ ದೆಕೊಶಿ" ಕೈನ ಕದ್ಯೊ. ತಿನಾಹುತಿ ತೆ ಬೆಜ಼ನಾ ಗೈನ ಯೆಸು ರ‍್ಹಯಲ ಜ಼ಗಾ ದೆಕಿಲಿದ್ಯಾ. ತೆಳಾಮಾ ಕ್ಹಾಂಜ಼ನಾ ಟೈಮ್ಮಾ ಚಾರ ವಾಜಾ಼ತಾ ತೆ ದಿನೆ ತ್ಯುನೆ ತ್ಯಾಜ ಕ್ಹಾರೊ ತಿನಾ ಕ್ಹಾತೆ ವ್ಹತ್ತಾ. 40 ತೆ ಬೆ ಜ಼ನಾ ಯೊಹಾನನಿಯೊ ವಾತೊ ಐಕಿನ ಯೆಸುನಾ ಪಾಚಾ಼ ಗಯಲ ಬೆ ಶಿಷ್ಯಾಮಾ. ಸಿಮೊನ ಪೆತ್ರಾನೊ ನ್ಹಾನೊ ಭೈ ಥಯಲ ಅಂದ್ರೆಯ ಇವ್ನೊಮಾ ಯಕ್ಲೊ ವ್ಹತ್ತೊ. 41 ಪೈಲಾ, ತೆ ತಿನೊ ಭೈ ಥಯಲ ಸಿಮೊನೆ ಮಳಿನ ಕದ್ಯೊ" ಅಪೊನೆ ಮಸಿಹಾ ಮಳ್ಯೊಸ ಕದ್ಯೊ. (ಮಸ್ಸಿಹಾ ಕದ್ಯಾಮ ಕ್ರಿಸ್ತ ವ್ಹೈ) 42 ತೆ ಸಿಮೊನನೆ ಯೆಸುಕನ ಬಲೈ ಲಾಯೊ. ಯೆಸು ಸಿಮೊನನೆ ದೆಕಿನ"ಯೊಹಾನನೊ ದಿಕ್ರೊ ರ‍್ಹಯಲ ತಾರು ನಾಮ ಸಿಮೊನ ವ್ಹೈ. ತು ಕೆಫ ಕೈನ ಕವೈಲೆಸಿ" ಕೈನ ಕದ್ಯೊ. ಕೆಫ ಕದ್ಯಾಮ ಮ್ಹೊಟೊ ದಗ್ಡೊ ವ್ಹೈ.

43 ಮರ್ನಾ ದಿನೆ ಯೆಸು ಗಲಿಲಾಯೆ ಜೌ಼ಸ ಕೈನ ನಿರ್ದಾರ ಕರ‍್ಯೊ. ಯೆಸು ಫಿಲಿಪ್ಪನೆ ದೆಕಿನ ತಿನೆ"ಮಾರಾ ಪಾಚೊ಼ ಆ" ಕೈನ ಕದ್ಯೊ. 44 ಅಂದ್ರೆಯಾ ವರಿ ಪೆತ್ರಾ ನಿಂಗತ ಫಿಲಿಪ್ಪಬಿ ಬೆತ್ಸಾಯಿ ಗಾಮವಾಲಾ ವ್ಹತ್ತಾ. 45 ಫಿಲಿಪ್ಪ ನತಾನಿಯೆಲನೆ ಮಳಿನ ತಿನೆ"ಕಿನಾಹುತಿ ಮೊಶೆ ಧರಮಶಾಸ್ತ್ರಮಾ ಬರ್ದ್ಯೊ ವರಿ ಪ್ರವಾದಿಯೊ ಬರ್ದ್ಯಾ, ತೆ ಹಮೊನೆ ಮಳ್ಯೊಸ. ತೆ ಯೊಸೆಫನೊ ದಿಕ್ರೊ ಯೆಸು ನಜರೆತವಾಲೊ ವ್ಹೈ ಕೈನ ಕದ್ಯೊ. 46 ತೆನೈಸೊ ನತಾನಿಯೆಲ ಫಿಲಿಪ್ಪನೆ"ನಜರೆತತೊ ಚೊ಼ಕು ರ‍್ಹಯಲ ಸುಬಿ ಆವಸ ಸು? ಕೈನ ಪುಚ್ಚೊ. ಫಿಲಿಪ್ಪ"ಐನ ದೆಕ" ಕೈನ ಜವಾಬ ದಿದ್ಯೊ. 47 ಯೆಸು ತಿಕನ ಆವಾನಾ ನತಾನಿಯೆಲನೆ ದೆಕಿನ ತಿನಾ ಹುತಿ"ಎ ಕ್ಹರಿನೊ ಇಸ್ರಾಯಲ ವ್ಹೈ. ಇನಾಮಾ ಕಪಟ ನತ್ತಿ" ಕೈನ ಕದ್ಯೊ. 48 ನತಾನಿಯೆಲ"ತು ಮನೆ ಕಿಮ್ಮ ವಳಕ್ಯೊ? ಕೈನ ಪುಚ್ಚೊ. ಯೆಸು"ಫಿಲಿಪ್ಪ ತುನೆ ಬಲಾವಾತಿ ಅಗ್ದುರಜ಼ ತು ಉಂಬ್ರೊನಾ ಝಾಡನಾ ಹೆಟೊ ರ‍್ಹತಾಮಾ ಮಿ ತುನೆ ದೆಕ್ಯೊ" ಕೈನ ಕದ್ಯೊ. 49 ತೆಳಾಮಾ ನತಾನಿಯೆಲ ತಿನೆ"ಗುರು, ತುಜ಼಼ ಕ್ಹುದಾನೊ ದಿಕ್ರೊ ವ್ಹೈ. ತು ಇಸ್ರಾಯಲನೊ ರಾಜೊ಼ ವ್ಹೈ" ಕೈನ ಕದ್ಯೊ. 50 ಯೆಸು ತಿನೆ"ತು ಉಂಬ್ರೊನಾ ಝಾಡನಾ ಹೆಟೊ ಬೆಟಲ ದೆಕ್ಯೊಸ. ಅಮ್ಮ ಮಿ ಕದಲಕ್ಹು ತು ಮಪರ ಬರೊಕ್ಹೊ ಕರ್ಸಿ ಸು? ತೆನೈಸೊ ತಿತ್ತಿಬಿ ಘನ್ನಾ ಮ್ಹೊಟಾ ಕಾಮೊ ತು ದೆಕ್ಷಿ" ಕೈನ ಕದ್ಯೊ. 51 ತೆನೈಸೊ ಯೆಸು ತ್ಯುನೊನೆ"ಮಿ ತುನೆ ಕ್ಹರಿಜ ಕೌಸ. ಸ್ವರ್ಗ ಖುಲ್ಲಾ ಕರಲನೆ ಮನಕ್ಹನಾ ದಿಕ್ರಾನಾ ಉಪ್ಪರ ದೆವ ದುತೊ ಉಪ್ಪರ ಜಾ಼ವಾನು ಹೆಟು ಆವಾನು ತುಮೆ ದೆಕೊಶಿ ಕೈನ ಕದ್ಯೊ.