João 13

ಯೆಸು ತಿನಾ ಶಿಷ್ಯಾವೊನಾ ಪಗೊ ಧ್ವಯಲ

1 ಫಸ್ಕ ಸನ್ನ ಯಕ್ಕ ದಿನ್ನ ಪೈಲಾನು ದಿನ್ನ ಐಯುತು. ತೆ ಎ ಜಗತ ಛೊಡಿನ ಬಾ ಕನ ಜಾ಼ವಾನೊ ಟೈಮ ನಜಿಕ ಆಯುಸ ಕವಾನು ಯೆಸುನೆ ಗ್ವತ್ತ ಥಯು. ಎ ಲೊಕಮಾ ರ‍್ಹಯಲ ತಿನಾ ಮನಕ್ಹೊನೆ ತೆ ಹಮೆಶಾಬಿ ಮಯಾ ಕರ್ತೊತೊ. ವರಿ ತೆ ತ್ಯುನೊನೊಪರ ರ‍್ಹಯಲ ಘನ್ನಿ ಮಯಾ ದೆಕಾಡ್ಯೊ. 2 ಯೆಸು ವರಿ ತಿನಾ ಶಿಷ್ಯಾ ರಾತೆ ಖಾವಾನಾ ಹುತಿ ಬೈಟ್ಯಾತಾ. ಯೆಸುನೆ ಮೊಸ ಕರು ಕೈನ ಸೈತಾನ ಇಸ್ಕರಿಯುತ ಯುದನೆ ವಿಚಾರ ಘಾಲ್ಯು. ಯುದ ಸಿಮೊನನೊ ದಿಕ್ರೊ ವ್ಹೈ. 3 ಬಾ ಹರ ಯಕ್ಕಪರ ತಿನೆ ಅದಿಕಾರ ದಿದ್ಯೊಸ ಕವಾನು ಯೆಸುನೆ ಗ್ವತ್ತ ವ್ಹತ್ತು. ತೆನೈಸೊ ತೆ ಕ್ಹುದಾ ಕಂತೊ ಆಯಲ ವರಿ ಹಮ್ನಾ ಕ್ಹುದಾ ಕನ ಫರಿನ ಜಾ಼ವಾನಾ ಹುತಿ ತಿನೆ ಗ್ವತ್ತ ವ್ಹತ್ತು. 4 ತ್ಯುನೆ ಅನ್ನ ಖಾತಾಮಾ ಯೆಸು ಉಟಿನ ತಿನು ಉಪ್ಪರಲ್ಯು ಅಂಗ್ಡು ಕಾಡಿನ ಮ್ಹೆಲ್ಯೊ; ವರಿ ಯಕ್ಕ ಟುವಾಲ ಲಿನ ತಿನಾ ಕಂಬರೆ ಭಾಂದಿಲಿದ್ಯೊ. 5 ಪಾಚ಼ಲ್ತೊ ಯಕ್ಕ ತಾಂಬ್ಯಾಮಾ ಪಾನಿ ಭರ‍್ಯೊ. ಶಿಷ್ಯಾವೊನಾ ಪಗೊ ಧ್ವಯಿನ ತೆ ಭಾಂದಿಲಿದಲ ತೆ ಫೆರ್ಲಿದಲ ಟುವಾಲಕ್ಹು ತ್ಯುನಾ ಪಗೊ ನುಚ್ಯೊ. 6 ತೆ ಸಿಮೊನ ಪೆತ್ರಾಕನ ಆಯಲ ಪರ ಪೆತ್ರಾ"ಪ್ರಭು, ಹಮಾರಾ ಪಗೊ ತು ಧ್ವೌ ನೈ" ಕದ್ಯೊ. 7 ಯೆಸು"ಹಮ್ನಾ ಮಿ ಸು ಕರಾಡ್ಯೊಸ ಕವಾನು ತುಮೊನೆ ಗ್ವತ್ತ ನತ್ತಿ. ತೆನೈಸೊ ಅಗು ತುನೆ ಗ್ವತ್ತ ಥಾವಸ" ಕೈನ ಉತ್ತರ ದಿದ್ಯೊ. 8 ಪೆತ್ರಾ ತಿನೆ"ನೈ! ಮಾರಾ ಪಗೊ ತು ಕೆಳಾಮಾಜ ಧ್ವೌ ನೈ" ಕೈನ ಕದ್ಯೊ. ಯೆಸು "ತಾರಾ ಪಗೊ ಮಿ ನೈ ಧ್ವಯೊಮ ತು ಮಾರೊ ಶಿಷ್ಯೊ ಕೆಳಾಮಾಜ ಥಾತೊ ನೈ" ಕದ್ಯೊ. 9 ತೆಳಾಮಾ ಸಿಮೊನ ಪೆತ್ರಾ, ಪ್ರಭು, ಮಾರಾ ಪಗೊ ಯಕ್ಕಜ಼ ನೈಸೊ ಮಾರಾ ಹತೊ ವರಿ ಮಾತು ಧೊ" ಕೈನ ಮಾಂಗಿಲಿದ್ಯೊ. 10 ಯೆಸು ತಿನೆ "ಅಂಗ ಧ್ವಯಲವಾಲಾನು ಅಂಗ ಕ್ಹಾರು ಶುದ್ಧ ರ‍್ಹವಸ. ತೆ ತಿನಾ ಪಗೊ ಧ್ವೈಲಿದ್ಯಮ ಬಸ್ಸ. ತುಮೆಬಿ ಶುದ್ಧ ಥಯಾಸ, ತೆನೈಸೊ ತುಮೊಮಾ ಹರ ಯಕ್ಲೊ ಶುದ್ಧ ನತ್ತಿ. 11 ತಿನೆ ಮೊಸ ಕರಾಲೊ ಕುನ್ನ ವ್ಹೈ ಕೈನ ತಿನೆ ಗ್ವತ್ತ ವ್ಹತ್ತು. ತಿನಾಹುತಿ ತೆ"ತುಮಾರಾಮಾ ಹರ ಯಕ್ಲೊ ಶುದ್ಧ ನತ್ತಿ" ಕೈನ ಕದ್ಯೊ. 12 ಯೆಸು ತ್ಯುನಾ ಪಗೊ ಧ್ವಯಲ ಪರ ತಿನು ಉಪ್ಪರಲ್ಯು ಅಂಗ್ಡು ಘಾಲಿನ ವರಿ ತಿನಿ ಜ಼ಗಾಪರ ಬೈಟ್ಯೊ. ವರಿ ಅಮ್ಮ ಕದ್ಯೊ; "ಹಮ್ನಾ ಮಿ ಸು ಕರ‍್ಯೊ ತೆ ತುಮೊನೆ ಗ್ವತ್ತ ಥಯು ಸು? 13 ತುಮೆ ಮನೆ"ಗುರು ವರಿ ಪ್ರಭು ಕೈನ ಬಲಾವೊಸಿ. ತುಮೆ ಇಮ್ಮ ಬಲಾವಾನು ಕರೆಟ್ಟ ವ್ಹೈ. ಕಾಕದ್ಯಾಮ ಮಿ ತೆಜ಼ ವ್ಹೈ. 14 ತಿನಾಹುತಿ ಪ್ರಭು ವರಿ ಗುರು ಥಯಲ ಮಿ ತುಮಾರಾ ಪಗೊ ಸೆವಕ ನಿಂಗತ ಧ್ವಯೊಸ. ಕಾಕದ್ಯಾಮ ತುಮೆಬಿ ಬಿಜಾ಼ವೊನಾ ಪಗೊ ಧೌ. 15 ಎ ಕಾಮೊನೆ ಮಿಜ಼ ಸಾಕ್ಷಿ ಥಯೊಸ. ಕಾಕದ್ಯಾಮ ಮಿ ತುಮೊನೆ ಕರಲ ತಿಮ್ಮಜ಼ ತುಮೆಬಿ ಬಿಜಾ಼ವೊನಾ ಕ್ಹಾತೆ ಕರು. 16 ಮಿ ತುಮೊನೆ ಕ್ಹರಿಜ ಕೌಸ. ಸೆವಕ ಮಾಲಕ್ತಿ ಮ್ಹೊಟೊ ನ್ಹವೈ. ತಿನಾಹುತಿ ಸಂದೆಶ ಹುತಿ ಆಯಲವಾಲೊ ಮೊಕ್ಲಲವಾಲಾತಿ ಮ್ಹೊಟೊ ನ್ಹವೈ. 17 ತುಮೆ ಎ ಸಂಗತಿಯೊ ತಿಳದಿಲಿನ ಇನಾನಿಂಗತ ಚಾ಼ಲಿಲಿನ ಗಯಾಮ ಖುಶಿಕ್ಹು ರ‍್ಹವೊಸಿ.