João 4

46 ಯೆಸು ಗಲಿಲಾಯನಾ ಕಾನಾ ಗಾಮೆ ವರಿ ಯಕ್ಕೆಮ ಆಯೊ. ತೆ ಪಾನಿಕ್ಹು ದ್ರಾಕ್ಷಿಯೊನು ರಕ್ಹ ಕರಲ ತೆ ಗಾಮ್ಮಾ ವ್ಹೈ. ತೆಜ಼ ಗಾಮ್ಮಾ ಯಕ್ಕ ಮ್ಹೊಟೊ ಅದಿಕಾರಿ ಕಪೆನೌರ್ಮಿಮಾ ರ‍್ಹತೊತೊ. ತಿನಾ ದಿಕ್ರಾನೆ ಅರಾಮ ನ್ಹೊತು. 47 ಯೆಸು ಯುದೆಯತೊ ಐನ ಗಲಿಲಾಯಮಾ ಛೆ ಕೈನ ಸುದ್ದಿ ತೆ ಐಕ್ಯೊ. ತಿನಾ ಹುತಿ ತೆ ತಿಕನ ಗೈನ ತಿನಾ ದಿಕ್ರಾನೆ ಅರಾಮ ಕರಾನಾಹುತಿ ತಿನೆ ಕಪೆನೌರ್ಮಿ ಔ ಕೈನ ತಿಕನ ಕೈಲಿದ್ಯೊ. ತಿನೊ ದಿಕ್ರೊ ಮರ್ವಾನಿ ಪರಸ್ತಿತಿಮಾ ವ್ಹತ್ತೊ. 48 ಯೆಸು ತಿನೆ"ಸುಚಕ ಕಾಮೊ ವರಿ ಘಾಬ್ರಾಥಾವಾನಾ ಕಾಮೊ ದೆಕ್ಯಾವಾಚಿ ಮನೆ ನಂಬತಾಜ಼ ನೈ" ಕೈನ ಕದ್ಯೊ.

49 ತೆ ಮ್ಹೊಟೊ ಅದಿಕಾರಿ"ಸ್ವಾಮಿ, ಮಾರೊ ದಿಕ್ರೊ ಮರಾತಿ ಪೈಲಾಜ ತು ಔ" ಕೈನ ಮಾಂಗಿಲಿದ್ಯೊ.

50 ಯೆಸು ತಿನೆ"ಜಾ಼ ತಾರೊ ದಿಕ್ರೊ ವಾಚಸ "ಕೈನ ಕದ್ಯೊ.

ಯೆಸುನಿ ವಾತ ನಂಬಿನ ತೆ ತಿನಾ ಘರೆ ಗಯೊ. 51 ತೆ ಘರೆ ಜಾ಼ತಾಮಾ ತಿನಾ ಆಳೊ ತಿಕನ ಐನ"ತಾರೊ ದಿಕ್ರೊ ಅರಾಮ ಥಯೊಸ "ಕೈನ ಕದ್ಯೊ.

52 ತೆ, ಮಾರಾ ದಿಕ್ರಾನೆ ಕೆಳಾಮಾ ಅರಾಮ ಥಯು ಕೈನ ಪುಚ್ಚೊ. ತೆಳಾಮಾ ತೆ ಆಳೊ "ತಾರಾ ದಿಕ್ರಾನೆ ಕಾಲ ದುಪಾರೆಜ ಯಕ್ಕ ವಾಸ್ತಾ ತಿನೆ ರ‍್ಹಯಲ ತೌ ಛೊಡಿನ ಗೈ ಪಾಡ್ಯೊಸ" ಕೈನ ಕದ್ಯಾ. 53 ತಾರೊ ದಿಕ್ರೊ ವಾಚಸ" ಕೈನ ಯೆಸು ಕದಲ ಎಜ಼ ಟೈಮೆ ವ್ಹೈ ಕೈನ ತೆ ದಿಕ್ರಾನಾ ಬಾನೆ ಗ್ವತ್ತ ವ್ಹತ್ತು. ತಿನಾಹುತಿ ತೆ ವರಿ ತಿನಾ ಘರವಾಲಾ ಕ್ಹಾರಾ ಯೆಸುನೆ ನಂಬ್ಯಾತಾ.

54 ಯೆಸು ಯುದೆಯತೊ ಗಲಿಲಾಯಯೆ ಆಯಲ್ಪರ ಎ ಬೆಂವಾ ಸುಚಕ ಕಾರ್ಯ ವ್ಹೈ.