ಯೊಹಾನ 6

ಯೆಸು ಪಾಂಚ಼ ಹಜಾ಼ರ ಮನಕ್ಹೊನೆ ಅನ್ನ ಖಲಾಯಲ

1 ತೆಳಾಮಾ, ಯೆಸು ಗಲಿಲಾಯ ಸಮುಂದರ ದಾಟಿನ ಬಿಜಿ ದಂಡಿಯೆ ಗಯೊ. ತೆ ಸಮುಂದರನೆ ತಿಬೆರಿಯ ಸಮುಂದರಬಿ ಕವಸ. 2 ಘನ್ನಾ ಮನಕ್ಹೊ ಯೆಸುನಾ ಪಾಚಾ಼ ಗಯಾ. ಕಾಕದ್ಯಾಮ ತ್ಯುನೆ ಯೆಸುನಾ ಮುಲಕ ರೊಗಿಯೊನೆ ಅರಾಮ ಕರಾನು ಅದ್ಭುತ ದೆಕ್ಯಾತಾ. 3 ತೆಳಾಮಾ ಯೆಸು ಡೊಂಗರ ಚ಼ಡಿನ ತಿನಾ ಶಿಷ್ಯಾವೊನಾ ಕ್ಹಾತೆ ಬೈಟ್ಯೊ. 4 ಯಹುದ್ಯೊನಾ ಫಸ್ಕ ಸನ್ನ ಘನ್ನು ನಜಿಕ ವ್ಹತ್ತು. 5 ಯೆಸು ಡೊಳಾ ಉಚೈನ ದೆಕ್ತಾಮಾ, ತಿಕನ ಆವಾನು ಮನಕ್ಹೊನು ಮ್ಹೊಟು ಗುಂಪನೆ ದೆಕಿನ ತಿನಾಹುತಿ ಫಿಲಿಪ್ಪನೆ"ಎ ಕ್ಹಾರಾ ಮನಕ್ಹೊನೆ ಚಾ಼ಯೆ ಥಯಲ ತೆಕ್ಲು ಅನ್ನ ಅಪೆ ಕಿಜ್ಗಾ ಲಿಯೆ? ಕೈನ ಪುಚ್ಯೊ. 6 ಫಿಲಿಪ್ಪನೆ ಪರಿಕ್ಷಾ ಕರಾಹುತಿ ತೆ ಅಮ್ಮ ಪುಚ್ಯೊ. ತೆನೈಸೊ ಕ್ಹರಿಮಾಜ಼ ತೆ ಸು ಕಾಮ ಕರು ಕವಾನು ತಿನೆ ಪೈಲಾಜ ಗ್ವತ್ತ ವ್ಹತ್ತು

7 ಫಿಲಿಪ್ಪ "ನ್ಹ್ಯಾ ರ‍್ಹಯಲ ಹರಿ ಯಕ್ಲಾನೆ ರೊಕ್ಲಾನು ಯಕ್ಕ ತುಕ್ಡೊ ದ್ಯು ಕದ್ಯಾಮ, ಬೆಕ್ಹೊ ರುಪ್ಪಾನಾ ಬಿಲ್ಲಾ ತಿಬಿ ಜಾಸ್ತಿ ಚಾ಼ಯೆ" ಕೈನ ಕದ್ಯೊ.

8 ಯೆಸುನೊ ಬಿಜೆಕ್ಲೊ ಶಿಷ್ಯೊ ರ‍್ಹಯಲ ಸಿಮೊನ ಪೆತ್ರಾನೊ ಭೈ ಅಂದ್ರೆಯಾ ಕದ್ಯೊ, 9 "ನ್ಹ್ಯಾ ರ‍್ಹಯಲ ಯಕ್ಲಾ ಪಟ್ಟಾಕನ ಘ್ಹೌನಾ ಪಾಂಚ಼ ರೊಕ್ಲಾ ವರಿ ಬೆ ನ್ಹಾನಿಯೊ ಮಚ್ಲಿಯೊ ಛೆ. ತೆನೈಸೊ ಕ್ಹರಿಮಾಜ಼ ತೆ ಎ ಮನಕ್ಹೊನಾ ಗುಂಪನೆ ಬಸ್ಸ ಥಾತು ನೈ" ಕೈನ ಕದ್ಯೊ.

10 ಯೆಸು"ಮನಕ್ಹೊನೆ ಬೈಟಾನೆ ಕವೊ" ಕೈನ ಕದ್ಯೊ. ತೆ ಜ಼ಗಾಪರ ಚಾರೊ ಘನ್ನೊ ಬೆಳದ್ಯೊತೊ ತ್ಯಾ ಬೈಟಲವಾಲಾವೊಮಾ ಕಮ್ಸೆ ಕಮ ಪಾಂಚ಼ ಹಜಾರ ದಾಣ್ಗಾಜ ವ್ಹತ್ತಾ. 11 ಪಾಚ಼ಲ್ತೊ ಯೆಸು ತೆ ರೊಕ್ಲಾ ಲಿನ ಕ್ಹುದಾನೆ ಸ್ತೊತ್ರಾ ಕರಿನ, ಬೈಟಲ ಮನಕ್ಹೊನೆ ವಾಟ್ಯೊ. ತೆ ಮಚ್ಲಿಯೊನೆಬಿ ತಿನಾನಿಂಗತ ಕರ‍್ಯೊ. ಕ್ಹಾರಾ ಜ಼ನಾ ತ್ಯುನೊನೆ ಚಾ಼ಯೆ ಥಯಲ ತೆಕ್ಲು ಕೈನ ತೃಪ್ತ ಥಯಾ. 12 ತ್ಯುನೆ ಕ್ಹಾರಾ ಕೈನ ತೃಪ್ತ ಥಯಲ್ಪರ ಯೆಸು ತಿನಾ ಶಿಷ್ಯಾವೊನೆ"ಉಗ್ರಲ ತುಕ್ಡಾ ಕ್ಹಾರಾ ಜಮಾ ಕರೊ. ಕಯುಜ಼ ಹಾಳ ಕರೊ ನಕೊ ಕೈನ ಕದ್ಯೊ. 13 ವರಿ ಶಿಷ್ಯಾ ಮನಕ್ಹೊನೆ ವಾಟಲ ಪಾಂಚ಼ ರೊಕ್ಲಾಮಾ ಉಗ್ರಲ ತುಕ್ಡಾವೊಕ್ಹು ಬಾರಾ ಟೊಪ್ಲಿಯೊ ಭರ‍್ಯಾ.

14 ಯೆಸು ಕರಲ ಎ ಅದ್ಭುತ ಕಾಮ ದೆಕಲ ಕ್ಹಾರಾ ಮನಕ್ಹೊ"ಎ ದುನಿಯಾಮಾ ಆವಾನೊ ರ‍್ಹಯಲ ಪ್ರವಾದಿ ಕ್ಹರಿಮಾಜ಼ ಎಜ಼ ವ್ಹೈ" ಕೈನ ಕವಾಡಾತಾ.