ಲುಕ 16

ಸೌಕಾರ ವರಿ ಲಾಜರ

19 ವರಿ ಯೆಸು ತ್ಯುನೊಕನ ಅಮ್ಮ ಕದ್ಯೊ" ಯಕ್ಲೊ ಸೌಕಾರ ವ್ಹತ್ತೊ, ತೆ ಸೌಕಾರ ಘನ್ನಾ ಚೊ಼ಕಾ ವಣ್ಣಾ ಘಾಲ್ಲೆತೊತೊ. ತೆ ಘನ್ನೊ ಸೌಕಾರ ರ‍್ಹಯಲ ಹುತಿ ತೆ ದಿನ್ನೆಬಿ ಚೊ಼ಕು ಚೊ಼ಕೊಜ಼ ಅನ್ನ ಖಾತೊ ಖುಶಿ ಕರ್ತೊತೊ. 20 ತ್ಯಾ ಲಾಜ಼ರ ಕವಾಲೊ ಯಕ್ಲೊ ಗರಿಬ ಮನಕ್ಹ ವ್ಹತ್ತೊ. ತಿನೆ ಅಂಗ ಭರಿನ ಘುಮ್ಡಾ ವ್ಹತ್ತಾ ತೆ ಲಾಜ಼ರ ಸೌಕಾರನಾ ಘರನಾ ಕ್ಹಾಮೊ ಪಡಲ ರ‍್ಹತೊತೊ. 21 ವರಿ ಸೌಕಾರ ಖೈನ ಉಗ್ರಲ ಭಾರು ನಾಕಲ ಅಟ್ಟು ಅನ್ನ ಖಾತೊತೊ. ಕುತ್ರಾ ಐನ ಲಾಜ಼ರನಾ ಘುಮ್ಡಾ ಚಾ಼ಟ್ತಾತಾ.

22 "ದಕ್ಹಾ ದಿನ್ನ ಥಯಲಪರ ಲಾಜ಼ರ ಮರಯೊ. ಸ್ವರಗನಾ ದುತೊ ಐನ ತೆ ಲಾಜ಼ರನೆ ಅಬ್ರಹಾಮಕನ ಲಿನಗಯಾ, ಯಕ್ಕ ದಿನ್ನ ತೆ ಸೌಕಾರಬಿ ಮರಯೊ. ತಿನೆ ಮಜಾ಼ರಮಾ ಬುಜ್ಜಾ಼. 23 ತೆನೈಸೊ ತೆ ಸೌಕಾರ ನರಕಮಾ ತ್ರಾಸ ಖಾತೊ ಘನ್ನೊ ದುರ ರ‍್ಹಯಲ ಅಬ್ರಹಾಮನಾ ಕ್ಹಾತೆ ಲಾಜ಼ರನೆ ದೆಕಿನ,

24 ಹಮಾರೊ ಬಾ ಅಬ್ರಹಾಮ, ಮನೆ ಮರಗಿನ ಲಾಜ಼ರನೆ ಮಕನ ಮೊಕಲ. ತೆ ತಿನೊ ಬೊಟ ಪಾನಿಮಾ ಡುಬೈನ ಮಾರಿ ಜಿಬ್ಬ ಥಂಡಿ ಥಾವಾ ವರಕ್ಹಿ ಕರ, ಮಿ ಆಗಮಾ ಬಳವಾಡ್ಯೊಸ! ಕದ್ಯೊ.

25 ತೆ ವಾತೆ ಅಬ್ರಹಾಮ ತಿನೆ ದಿಕ್ರಾ ತಾರಿ ಜಿವಿತಮಾ ತು ಸು ಕರ‍್ಯೊ ತುನೆ ಗ್ವತ್ತ ನತ್ತಿಸು? ತ್ಯಾ ತುನೆ ಕ್ಹಾರಿ ಸುಕಾ ವ್ಹತ್ತಿ. ತೆನೈಸೊ ಲಾಜ಼ರತೊ ತಿನಿ ಜಿವಿತ ಪುರಾ ಕಷ್ಟ ವರಿ ತ್ರಾಸ ಖಾದ್ಯೊಸ. ತಿನಾ ಹುತಿ ತೆ ಸ್ವರ್ಗಮಾ ತಿನೆ ಸುಖಾ ಛೆ. ತು ಕಷ್ಟ ಖಾವಡ್ಯೊಸ. 26 ತೆನೈಸೊ ತಾರಾಮಾ ಹಮಾರಾಮಾ ಘನ್ನು ಮ್ಹೊಟು ಫರಕ ಛೆ ತ್ಯಾ ಐನ ತುನೆ ಮದತ ಕರಾನೆ ಕಿನೆಜ಼಼ ಸಾದ್ಯ ನತ್ತಿ. ತೆನೈಸೊ ತು ರ‍್ಹಯಲ ಜ಼ಗಾತೊ ಹಮೆ ರ‍್ಹಯಲ ಜ಼ಗಾ ಕಿನೆಜ಼಼ ಆವಾನೆ ಸಾದ್ಯ ನತ್ತಿ.

27 ತೆಳಾಮಾ ಸೌಕಾರ ಕದ್ಯೊ ತಿಮ್ಮ ರ‍್ಹಯುಮ ಲಾಜ಼ರನೆ ಭುಲೊಕಪರ ರ‍್ಹಯಲ ಮಾರಾ ಬಾನಾ ಘರೆ ಮೊಕಲ! 28 ಮಾರಾ ಪಾಂಚ಼ ಭಾಯೊ ಛೆ ತ್ಯುನೆ ಮಿ ತ್ರಾಸ ಖಾವಾನ ಜ಼ಗಾ ಆವಾನು ನಕೊ, ಕೈನ ತ್ಯುನೊನೆ ಹುಶಾರ ಕರಾದೆ ಕದ್ಯೊ.

29 ತೆ ವಾತೆ ಅಬ್ರಹಾಮ, ಮೊಶೆ ಬರ್ದಲ ಧರಮ ಶಾಸ್ತ್ರ ವರಿ ಪ್ರವಾದಿಯೊನಾ ಬುಕ್ಕೊ ತ್ಯುನೊಕನ ಛೆ ತ್ಯುನೆ ತ್ಯುನಿಯೊ ವಾತೊ ಐಕಾದೆ ಕದ್ಯೊ.

30 ತೆ ವಾತೆ ಸೌಕಾರ, ಬಾ ಅಬ್ರಹಾಮ ತಿಮ್ಮ ಕೌ ನಕೊ ಕುನ್ನಬಿ ಮರಲವಾಲಾವೊಮಾನೊ ಯಕ್ಲೊ ಜಿವ್ತೊ ಥೈನ ಉಟಿನ ಗೈನ ತ್ಯುನೊಕನ ಕವಾದೆ ತೆಳಾಮಾ ತ್ಯುನೆ ಚೊ಼ಕಾ ಥಾಸ ಕದ್ಯೊ.

31 ತೆ ವಾತೆ ಅಬ್ರಹಾಮ ತಿನೆ, ನೈ! ತಾರಾ ಭಾಯೊ ಮೊಶೆನು ಧರಮ ಶಾಸ್ತ್ರ ವರಿ ಪ್ರವಾದಿಯೊ ಕದಲ ವಾತೊ ನೈ ಐಕ್ಯಾಮ, ಮರಲವಾಲಾವೊಮಾನಾ ಮನಕ್ಹೊಮಾ ಜಿವ್ತಾ ಥೈನ ಉಟಲ ವಾಲಾವೊನಿಯೊ ವಾತೊ ನೈ ಐಕ್ತಾ"ಕದ್ಯೊ.