1 ಕ್ಹುದಾನೊ ದಿಕ್ರೊ ಯೆಸು ಕ್ರಿಸ್ತನಿ ಸುವಾರ್ತೆ (ಚೊ಼ಕಿಯೊ ವಾತೊ) ಶುರು. 2 ಪ್ರವಾದಿ ಥಯಲ ಯೆಶಾಯ ಬುಕ್ಮಾ ಬರ್ದಲ ನಿಂಗತ ಕ್ಹುದಾ ಕದಲ ಅಮ್ಮ ವ್ಹೈ.

ಹಮ್ನಾ ಮಿ ಮಾರಿಯೊ ವಾತೊ ಕವಾಲಾನೆ ತಾರಾ ಕ್ಹಾಮೊ ಮೊಕ್ಲುಸ.

ತು ಜಾ಼ವಾನಿ ವಾಟ ತೆ ಚೊ಼ಕಿ ಕರಸ.'

3 ಕರ್ತಾನಿ ವಾಟ ತಯ್ಯಾರ ಕರೊ;

ತಿನಿ ಜಾ಼ವಾನಿ ಯಕ್ಕ ವಾಟ ಚೊ಼ಕಿ ಕರೊ;

ರಾನ್ಮಾ ವದ್ರಾಲಾನು ಅವಾಜ಼ ಐಕು ಆವಾಡುಸ.

4 ಯೊಹಾನ ಐನ ಮನಕ್ಹೊನೆ, ತುಮೆ ಪಾಪ ಪರಿಹಾರನಾಹುತಿ ಕ್ಹುದಾಕನ ಫರಿನ ಬಾಪ್ತಿಸ್ಮ ಕರೈಲಿವೊ. ತೆಳಾಮಾ ಕ್ಹುದಾ ತುಮಾರು ಪಾಪ ಮಾಫ ಕರಸ" ಕತೊ ಮನಕ್ಹೊನೆ ಬಾಪ್ತಿಸ್ಮ ಕರಾತೊ ವ್ಹತ್ತೊ. 5 ತೆಳಾಮಾ ಯುದಾಯತಾ ವರಿ ಯೆರುಸಲೆಮಾತಾಬಿ ಕ್ಹಾರಾ ಮನಕ್ಹೊ ಯೊಹಾನಕನ ಐನ ತ್ಯುನೆ ತ್ಯುನಾ ಪಾಪನೆ ಪಶ್ಚಾತಾಪ ಕರ್ಲಿನ ಯೊರ್ದನ ನದಿಮಾ ತಿನಾ ಹತೆ ಬಾಪ್ತಿಸ್ಮ ಕರೈಲಿವಾಡಾತಾ. 6 ಆಂ ಯೊಹಾನ ಹುಂಟನಾ ಬಾಲೊನಾ ವಣ್ಣಾ ಘಾಲ್ಲಿನ, ಕಂಬರನೆ ಯಕ್ಕ ಚಾ಼ಂಬಡಾನಿ ಪಟ್ಟಿ ಭಾಂದಿಲೆತೊತೊ; ಫಿರಕಾ ವರಿ ರಾನ್ಮಾನು ಜೆನ ತಿನು ಅನ್ನ ವ್ಹತ್ತು. 7 ತೆ ಮನಕ್ಹೊನೆ ಕದ್ಯೊ, ಮಾರಾ ಪಾಚೊ಼ ಆವಾಲೊ, ತೆ ಮಾರಾತಿಬಿ ಘನ್ನಿ ತಾಕತವಾಲೊ ವ್ಹೈ, ತಿನಿಯೊ ಚಪ್ಪಲನಿಯೊ ದೊರಿಯೊ ಡೊಗ್ಗಿನ ಛೊಡಾನೆಬಿ ಮಿ ಲಾಯಕ ನತ್ತಿ. 8 ಮಿ ತುಮೊನೆ ಪಾನಿಕ್ಹು ಬಾಪ್ತಿಸ್ಮ ಕರಾಯೊಸ. ತೆ ತುಮೊನೆ ಪವಿತ್ರ ಆತ್ಮಾಕ್ಹು ಬಾಪ್ತಿಸ್ಮ ಕರಾವಸ ಕೈನ ಕದ್ಯೊ.

9 ತೆ ದಿನ್ನಮಾ ಯೆಸು ಗಲಿಲಾಯ ಗಾಮನೆ ಮಳಲ ನಜ಼ರೆತ ಕವಾನಾ ಗಾಮತೊ ಐನ. ಯೊರ್ದನ ನದಿಮಾ ಯೊಹಾನ ರ‍್ಹಯಲ ಜ಼ಗಾ ಐನ, ತಿನಾ ಹತೆ ಬಾಪ್ತಿಸ್ಮ ಕರೈಲಿದ್ಯೊ. 10 ಬಾಪ್ತಿಸ್ಮ ಕರೈಲಿದಲ ಬರೊಬ್ಬರ ತೆ ಪಾನಿಮಾತೊ ಉಪ್ಪರ ಆತಾಮಾ ಸ್ವರ್ಗ ಕ್ಹುಲ್ಲಾ ಥೈನ, ಕ್ಹುದಾನಿ ಆತ್ಮಾ ಕ್ಹಬುತರ ನಿಂಗತ ತಿಪರ ಉತರಾನು ದೆಕ್ಯೊ. 11 ತೆಳಾಮಾ, ತು ಮಯಾನೊ ಥಯಲ ಮಾರೊ ದಿಕ್ರೊ ವ್ಹೈ. ತುನೆ ಮಿ ಮೆಚ್ಯೊಸ ಕೈನ ಸ್ವರ್ಗಮಾತು ಅವಾಜ಼ ಐಯು.

12 ತೆಳಾಮಾಜ಼ ಕ್ಹುದಾನಿ ಆತ್ಮಾ ಯೆಸುನೆ ರಾನ್ಮಾ ಚ಼ಲೈ. 13 ತೆ ಚಾ಼ಳಕ್ಹ ದಿನ್ನ ಕುನ್ನಜ಼ ರ‍್ಹವಾನೆ ಥಾಯೆ ನೈಸೊ ಜ಼ಗಾ ಜಾನ್ವರೊನಾ ಕ್ಹಾತೆ ರ‍್ಹೈನ, ಸೈತಾನ ಯೆಸುನೆ ಶೊದನೆಮಾ ಪಾಡಾನೆ ದೆಕ್ಯೊ. ತಿನಾ ಹತೆ ಥಯು ನೈ. ವರಿ ಕ್ಹುದಾನಾ ದುತೊ ಐನ ತಿನಿ ಸೆವಾ ಕರ‍್ಯಾ.

14 ಪಾಚ಼ಲ್ತಾ ಯೊಹಾನನೆ ಜೆಲಮಾ ಘಾಲಲ್ಪರ, ಯೆಸು ಗಲಿಲಾಯ ಗಾಮೆ ಐನ ಮನಕ್ಹೊನೆ ಸುವಾರ್ತೆ ಕವಾನು ಚಾ಼ಲು ಕರ‍್ಯೊ. 15 ತೆ ದಿನ್ನೊ ಪುರಾ ಥಯಾ ಕ್ಹುದಾನಿ ರಾಜ್ಯ ನಜಿ಼ಕ ಐ. ತುಮಾರಾ ಪಾಪನೆ ಪಶ್ಚಾತಾಪ ಪಡಿನ ಕ್ಹುದಾ ಬಗಲ ಫರಿನ ಸುವಾರ್ತೆ (ಸುವಾರ್ತೆ ಕದ್ಯಾಮ ಕ್ಹುದಾನಿಯೊ ವಾತೊ) ನಂಬೊ ಕೈನ ಕ್ಹುದಾನಿಯೊ ಚೊ಼ಕಿಯೊ ವಾತೊ ಕತೊ ಗಯೊ.

16 ಇಮ್ಮ ರ‍್ಹತಾಮಾ ತೆ ಗಲಿಲಾಯ ಸಮುಂದರಕನ ಜಾ಼ತಾ ಟೈಮಮಾ ಸಿಮೊನ ವರಿ ಸಿಮೊನನೊ ನ್ಹಾನೊ ಭೈ ರ‍್ಹಯಲ ಅಂದ್ರೆಯಾನೆ ಸಮುಂದರಮಾ ಬಲಿ ನಾಕಾನು ದೆಕ್ಯೊ. ತ್ಯುನೆ ಬೆಸ್ತರೊ ವ್ಹತ್ತಾ. (ಕದ್ಯಾಮ ಮಚ಼್ಲಿ಼ಯೊ ಧರಾಲಾ) 17 ಯೆಸು ತ್ಯುನೊನೆ, ಮಾರಾಪಾಚಾ಼ ಆವೊ ಮಿ ತುಮೊನೆ ಮನಕ್ಹೊನೆ ಕ್ಹುದಾನಾ ರಾಜ್ಯಮಾ ಲಾವಾಲಾ ನಿಂಗತ ಕರುಸ" ಕದ್ಯೊ. 18 ತೆಳಾಮಾಜ಼ ತ್ಯುನೆ ಬಲಿಯೊ ಛೊಡಿನ ತಿನಾ ಪಾಚಾ಼ ಗಯಾ.

19 ಹಜು಼ನ ದಕ್ಹಾ ದುರ ಗೈನ ಜೆಬೆದಾಯನೊ ದಿಕ್ರೊ ಯಾಕೊಬನೆ ತಿನೊ ನ್ಹಾನೊ ಭೈ ಥಯಲ ಯೊಹಾನ ಕವಾಲಾನೆ ದೆಕ್ಯೊ. ತ್ಯುನೆ ಹಡಗಾವೊಮಾ ಬೈಟಿನ ಬಲಿಯೊ ಸಿದಾ ಕರಾಡಾತಾ. 20 ಜೆಬೆದಾಯನೆ ಕುಲಿ ಆಳೊನಾ ಕ್ಹಾತೆ ಹಡಗಾಮಾ ಚೊ಼ಡಿನ ತಿನಾ ಪಾಚಾ಼ ಗಯಾ.

21 ಪಾಚ಼ಲ್ತಾ ತ್ಯುನೆ ಕಪೆನೌರ್ಮಿ ಕವಾನಾ ಗಾಮೆ ಐನ ಮುಟ್ಟ್ಯಾ. ತೆಳಾಮಾ ಸಬ್ಬತ ದಿನ್ನಮಾ ಯೆಸು ಸಭಾಮಂದಿರಮಾ ಗೈನ ಉಪದೆಶ ಕರ‍್ಯೊ. 22 ಮನಕ್ಹೊ ತೆ ಉಪದೆಶ ಕರಾನು ದೆಕಿನ ಘನ್ನಾ ಘಾಬ್ರಾಥಯಾ. ಕಾಕದ್ಯಾಮ ತೆ ಶಾಸ್ತ್ರಿಯೊನಿಂಗತ ಉಪದೆಶ ಕರ‍್ಯಾವಾಚಿ ಅದಿಕಾರ ರ‍್ಹಯಲವಾಲಾ ನಿಂಗತ ತ್ಯುನೊನೆ ಉಪದೆಶ ಕರಾಡೊತೊ. 23 ತೆಳಾಮಾ ತ್ಯುನಾ ಸಭಾಮಂದಿರಮಾ ಕೆಟ್ಟ ಆತ್ಮಾ ಧರಲ ಯಕ್ಕ ದಾಣಗೊ ಐನ ವದರ‍್ಯೊ. 24 ತೆ ಕೆಟ್ಟ ಆತ್ಮಾ , ನಜ಼ರೆತನಾ ಯೆಸು ಹಮಾರಿ ಉಸಾಬರಿ ತುನೆ ಕಾ? ಹಮೊನೆ ನಾಶ (ಹಾಳ) ಕರಾನೆ ಆಯೊ ಸು? ತುನೆ ವಳಕ್ಯಾಸ; ತು ಕ್ಹುದಾ ವಳಾಯಲ ಪರಿಶುದ್ಧ ವ್ಹೈ ಕೈನ ಹಮೊನೆ ಗ್ವತ್ತ ಛೆ ಕೈನ ವದ್ರಿನ ಕದ್ಯೊ.

25 ಯೆಸು ತಿನೆ, ಭುಚ್ಕಾ಼ಡಿನ ಗಪ ರ‍್ಹೆ ಅನಾಮಾತೊ ಭಾರೊ ಜಾ಼ ಕತಾಮಾ, 26 ತೆ ಕೆಟ್ಟ ಆತ್ಮಾ ತಿನೆ ವದ್ಯಾಡಸಿನ ಘಾಬ್ರು ಥೈನ ಛೊಡಿನ ವದ್ರಿನ ಗಯು.

27 ತಿನಾಹುತಿ ಕ್ಹಾರಾ ಜ಼ನಾ ಘಾಬ್ರಾ ಥೈನ, ಆಂ ಸುವೈ? ನವು ಉಪದೆಶ. ಆಂ ಅದಿಕಾರಕ್ಹು ಕೆಟ್ಟ ಆತ್ಮಾವೊನೆಬಿ ಆಗನ್ಯಾ ದಿವಸ ತ್ಯುನೆ ತಿನಿ ವಾತ ಐಕಸ" ಕೈನ ತ್ಯುನೊ-ತ್ಯುನೊಮಾಜ಼ ವಿಚಾರ ಕರಲಿದ್ಯಾ. 28 ತೆಳಾಮಾ ತಿನಿ ಸುದ್ದಿ ಗಲಿಲಾಯ ಪ್ರಾಂತ್ಯಮಾ ಫೈಲಿ ಗೈ.

29 ತೆ ಥಯಲ್ಪರ ಯೆಸು ವರಿ ತಿನಾ ಶಿಷ್ಯಾ ಸಭಾಮಂದಿರಮಾತಾ ಗೈನ ಯಾಕೊಬ ಯೊಹಾನನಾ ಕ್ಹಾತೆ ಸಿಮೊನ ಅಂದ್ರೆಯನಾ ಘರೆ ಆಯಾ. 30 ತ್ಯಾ ಸಿಮೊನನಿ ಪ್ಹೈ ತೌ ಐನ ಕ್ಹುರೈತಿ ತ್ಯುನೆ ತೆಳಾಮಾಜ಼ ಯೆಸುಕನ ಕದ್ಯಾ. 31 ತೆ ನಜಿಕ ಐನ ತಿನೊ ಹತ್ತ ಧರಿನ ಉಟಾಡತಾಮಾ ತಿನೆ ತೌ ರ‍್ಹಯಲ ಗೈ ಪಾಡ್ಯೊ. ತೆ ತ್ಯುನೊನೆ ಉಪಚಾರ ಕರಿ.

32 ಕ್ಹಾಂಜ಼ ಥೈನ ದಿನ್ನ ಡುಬ್ತಾಮಾ ಮನಕ್ಹೊ ಅರಾಮ ನೈಸೊವಾಲಾವೊನೆ ಕೆಟ್ಟ ಆತ್ಮಾ ಧರಲವಾಲಾವೊನೆ ತಿಕನ ಲಾಯಾ. 33 ಗಾಮವಾಲಾ ಸಿಮೊನನಾ ಘರನಾ ಬಾಕಲನಾ ಕ್ಹಾಮಾ ಗುಂಪ ಥೈನ ವ್ಹತ್ತಾ. 34 ತೆ ಬಿಜಾ಼-ಬಿಜಾ಼ ರೊಗೊ ರ‍್ಹಯಲವಾಲಾ ಘನ್ನಾ ಮನಕ್ಹೊನೆ ಅರಾಮ ಕರಿನ ಘನ್ನಿಯೊ ಕೆಟ್ಟ ಆತ್ಮಾವೊನೆ ಛೊಡೈನ ವರಿ ತೆ ಕುನ್ನ ವ್ಹೈ ಕೈನ ಕೆಟ್ಟ ಆತ್ಮಾವೊನೆ ಗ್ವತ್ತ ರ‍್ಹಯಲಕ್ಹು ತ್ಯುನೊನೆ ಬೊಲಾನೆ ದಿದ್ಯೊ ನೈ.

35 ದಿನ್ನ ನಿಕ್ಹಳಾತಿ ಅಗ್ದುರಜ಼ ತೆ ಉಟಿನ ಕುನ್ನಜ಼ ನೈಸೊ ಜ಼ಗಾ ಗೈನ ಕ್ಹುದಾನೆ ಪ್ರಾಥನಾ ಕರಾಡೊತೊ. 36 ಸಿಮೊನ ವರಿ ತಿನಾ ಕ್ಹಾತೆ ರ‍್ಹಯಲವಾಲಾ ತಿನೆ ಹುಡಕ್ತಾ ಆಯಾ. 37 ತಿನೆ ದೆಕಲ ಬರೊಬ್ಬರ ಕ್ಹಾರಾಜ಼ನಾ ತುನೆ ಹುಡಕಾಡಾಸ ಕದ್ಯಾ.

38 ಯೆಸು ತ್ಯುನೊನೆ ಅಪೆ ನಜಿಕ ರ‍್ಹಯಲ ಬಿಜಾ಼ ಗಾಮೆ ಗಯ್ಯೆ ತ್ಯಾಬಿ ಮಿ ಸುವಾರ್ತೆ ಕೌ; ಇನಾಹುತಿ ಮಿ ಐಪಡ್ಯೊ ಕದ್ಯೊ. 39 ಪಾಚ಼ಲ್ತೊ ಗಲಿಲಾಯ ಪ್ರಾಂತ್ಯಮಾ ಕ್ಹಾರಿ ಜ಼ಗಾ ಗೈನ ತ್ಯುನಿಯೊ ಸಭಾ ಮಂದಿರೊಮಾ ಗೈನ ಸುವಾರ್ತೆ ಕತೊ ಕೆಟ್ಟ ಆತ್ಮಾ ಛೊಡಾತೊ ವ್ಹತ್ತೊ.

40 ಯಕ್ಕ ಕುಷ್ಟ ರೊಗಿ ಯೆಸುಕನ ಐನ ತಿನಾ ಕ್ಹಾಮೊ ಉಂದಾ ಗುಡಗಾ ಘಾಲ್ಲಿನ ಬೈಟಿನ ತುನೆ ಮನಸ ರ‍್ಹಯುಮ ಮನೆ ಶುದ್ಧ ಕರಶಿ (ಅರಾಮ ಕರಶಿ) ಕೈನ ಮಾಂಗಿಲೆತಾಮಾ,

41 ಯೆಸು ತಿನೆ ಮರಗಿನ ಹತ್ತ ದಿನ ಮುಟ್ಟಿನ, ಮನೆ ಮನಸ ಛೆ ಶುದ್ಧ ಥಾ" ಕದ್ಯೊ. 42 ತೆಳಾಮಾಜ಼ ತಿನೊ ಕುಷ್ಟರೊಗ ಗೈನ ತೆ ಶುದ್ಧ ಥಯೊ.

43 ತೆಳಾಮಾ ಯೆಸು ತಿನಾ ಕ್ಹಾತೆ ಬೊಲಿನ ವಳಾಯೊ. 44 ಸು ಕೈನ ವಳಾಯೊ ಕದ್ಯಾಮ, ಯೆಸು ತಿನೆ, ಕಿನೆಜ಼಼ ಸು ಕೌ ನಕೊ ದೆಕ ತು ಗೈನ ಯಾಜಕನೆ ತಾರು ಅಂಗ ದೆಕಾಡ ಮೊಶೆ ಕದಲ ಪದ್ದತ ಕರಿನ ತಾರು ಶುದ್ಧವಿಚಾರ ಪುರಾ ಕರ. ತೆ ಮನಕ್ಹೊನೆ ಸಾಕ್ಷಿ ಥಾವಾದೆ ಕೈನ ಕ್ಹರಿಕ್ಹು ಕೈನ ತಿನೆ ವಳೈಪಡ್ಯೊ. 45 ವರಿಬಿ ತೆ ಗೈನ ತಿನಾ ಕ್ಹಾತೆ ಥಯಲ ಅದ್ಭುತ ಕರಲ ಸುದ್ದಿ ಘನ್ನೊ ಫೈಲಾಯೊ ಯೆಸುನೆ ಕಯಾಜ಼ ಗಾಮಮಾ ಖುಲ್ಲಾ ಜಾ಼ವಾನೆ ಥಯು ನೈ. ವರಿ ಕುನ್ನಜ಼ ನೈಸೊ ರ‍್ಹಯಲ ಜ಼ಗಾಪರ ವ್ಹತ್ತೊ. ವರಿ ಮನಕ್ಹೊ ಚ಼್ಯಾರೆ ಬಗಲತಾ ತಿಕನ ಆವಾಡಾತಾ.