Mateus 18

ಕರಣಾ ನೈ ರ‍್ಹಯಲ ಸೆವಕನಿ ಸಾಮ್ಯ

21 ತೆಳಾಮಾ ಪೆತ್ರಾ ತಿಕನ ಐನ, ಕರ್ತಾ ಮಾರೊ ಭೈ ಮಾರಾ ವಿರುದ್ದ ಪಾಪ ಕರ‍್ಯೊಮ ಕೆಕ್ಲಿಸಲಾ ತಿನೆ ಮಾಫ ಕರು? ಕ್ಹಾತ ಸಲಾ ಸು? ಕೈನ ಕದ್ಯೊ. 22 ಯೆಸು ತಿನೆ, "ಕ್ಹಾತ ಸಲಾ ಕೈನ ನೈ ಸತ್ತರಪರ ಕ್ಹಾತ ಸಲಾ" ಕೈನ ಮಿ ತುನೆ ಕೌಸ. 23 ತಿನಾಹುತಿ ಪರಲೊಕ ರಾಜ್ಯ ತಿನಾ ಆಳೊಕ್ಹು ಲೆಕ್ಕೊ ಲಿವಾನಾ ಯಕ್ಕ ರಾಜಾ಼ನೆ ಹೊಲಿಕೆ ಥೈಸ. 24 ತೆ ಲೆಕ್ಕೊ ಲಿವಾನೆ ಶುರು ಕರ‍್ತಾಮಾ ದಕ್ಹ ಹಜಾ಼ರ ಕ್ಹೊನಾನಾ ಬಿಲ್ಲಾ ದಿವಾಲಾ ಆಳನೆ ತೆ ರಾಜಾ಼ಕನ ಲಾಯಾ. 25 ತೆ ಸಾಲಾ ತಿರ್ಸಾನೆ ತಿಕನ ಸುಜ಼ ನೈ ರ‍್ಹಯಲಕ್ಹು ತಿನೊ ಮಾಲಕ ತಿನೆ, ತಿನಿ ಬೈಕೊನೆ, ಬಚ್ಚಾ಼ವೊನೆ ತಿನೆ ರ‍್ಹಯಲ ಕ್ಹಾರು ಇಕ್ಕಿನ ತೆ ಸಾಲಾ ದ್ಯು ಕೈನ ಅಪ್ಪಣೆ ದಿದ್ಯೊ.

26 ತೆಳಾಮಾ ತೆ ಆಳ ಉಂದಾ ಗುಡಗಾ ಘಾಲಿನ ತಿನು ಮಾತು ಝುಕೈನ ಮಾಲಕನೆ, "ಮಾಲಕ, ಮಾರಾ ಉಪ್ಪರ ತಾಳ್ಮೆ ರ‍್ಹವಾದೆ, ತಾರು ಕ್ಹಾರು ಮಿ ದ್ಯುಸ" ಕದ್ಯೊ. 27 ತೆ ಆಳನೆ ರಾಜೊ಼ ಕನಿಕರ ಪಡಿನ ತಿನೆ ಛೊಡೈನ ತೆ ಸಾಲಾ ಕ್ಹಾರಿ ಮಾಫ ಕರಿ ಪಡ್ಯೊ. 28 "ಪಾಚ಼ಲ್ತೊ ತೆ ಸೆವಕ ಭಾರೊ ಐನ ತಿನೆ ಕ್ಹೊ ರುಪ್ಪಾನಾ ಬಿಲ್ಲಾ ದಿವಾಲಾ ಯಕ್ಕ ಆಳನೆ ದೆಕಿನ ತಿನೆ ಧರಿನ ನಡ್ಡಿ ಚಿಕಲಿನ, ಮಾರಿ ಸಾಲಾ ಫೆಡ’ ಕೈನ ಕದ್ಯೊ. 29 " ತೆನೈಸೊ ತಿನಾ ಕ್ಹಾತೆ ಆಳಬಿ ಉಂದಾ ಗುಡ್ಗಾ ಘಾಲಿನ ಮಾರಾ ಉಪ್ಪರ ತಾಳ್ಮೆ ರ‍್ಹವಾದೆ ಮಿ ತಿರಸುಸ’ ಕೈನ ಮಾಂಗಿಲಿದ್ಯೊ. 30 " ತೆನೈಸೊ ತೆ ಒಪ್ಪೆವಾಚಿ ಗೈನ ತೆ ಸಾಲಾ ತಿರಸಾಯೆ ಲಕ್ಕಾ ತಿನೆ ಜೆಲಮಾ ಘಲಾಯೊ.

31 ತಿನಾ ಕ್ಹಾತೆ ಆಳೊ ಥಯಲ ಸಂಗತಿಯೊನೆ ದೆಕಿನ ಘನ್ನಾ ದುಖ ಪಡ್ದಿನ ತಿನಾ ರಾಜಾ಼ಕನ ಐನ ಥಯಲ ಕ್ಹಾರು ತಿಕನ ಕದ್ಯಾ. 32 ತೆಳಾಮಾ ತೆ ರಾಜೊ಼ ತಿನೆ ಬಲೈನ, ‘ಎ, ದುಷ್ಟ ಆಳ, ತು ಮನೆ ಮಾಂಗಿಲಿದಲಕ್ಹು ತಾರಿ ಸಾಲಾ ಕ್ಹಾರಿ ಮಾಫ ಕರ‍್ಯೊಸ. 33 ಮಿ ತುನೆ ಮರಗಲ ನಿಂಗತ ತುಬಿ ತಾರಾ ಕ್ಹಾತೆ ಆಳನೆ ಮರಗಾನು ವ್ಹತು? ತಿಮ್ಮ ಕೈನ 34 ರಾಜೊ಼ ಸಿಟ್ಟ ಥೈನ ತಿನೆ ದಿವಾನಿ ಸಾಲಾನೆ ತಿರಸೆಲಕ್ಕಾ ತಿನೆ ಪಿಡ್ಸಾಲಾವೊನಾ ಹತೊಮಾ ದ್ಯುಸ. 35 " ತುಮಾರಾಮಾ ಹರಯಕ್ಲೊ ತಾರಾ ಭೈನೆ ಮನಸಕ್ಹು ನೈ ಮಾಫ ಕರ‍್ಯಾಮ ಮಾರೊ ಬಾಬಿ ತುಮೊನೆ ತಿಮ್ಮಜ ಕರಸ ಕೈನ ಕದ್ಯೊ.