Mateus 20

ದ್ರಾಕ್ಷಿಯೊನಾ ಮಳಾನೆ ಕುಲಿ ಆಳೊನಿ ಸಾಮ್ಯ

1 ಪರಲೊಕ ರಾಜ್ಯ ತಿನಾ ದ್ರಾಕ್ಷಿನಾ ಮಳಾನೆ ಕುಲಿನಾ ಆಳೊ ಲಾವಾನೆ ಪಾಟೆಜ಼ ಗಯಲ ಯಕ್ಕ ಮಳಾನಾ ಮಾಲಕ ನಿಂಗತ ಛೆ. 2 ತೆ ಯಕ್ಕ ದಿನ್ನನೆ ಯಕ್ಕ ರುಪ್ಪಾನೊ ಬಿಲ್ಲೊ ಕೈನ ಕುಲಿ ಆಳೊನಾ ಕ್ಹಾತೆ ಒಪ್ಪಂದ ಕರಿಲಿದಲಪರ ತ್ಯುನೊನೆ ದ್ರಾಕ್ಷಿಯೊನಾ ಮಳಾನೆ ವಳಾಯೊ. 3 ತೆ ವರಿ ಕಮ್ಮಸಿಕಮ್ಮ ನೌ ವಸ್ತಾ ಬಾಜ಼ರನಾ ಜ಼ಗಾನೆ ಗೈನ ಕಾಮ ನೈಸೊ ಗಪ್ಪ ಹುಬ್ರಯಲ ಬಿಜಾ಼ ದಕ್ಹಾ ಕುಲಿ ಆಳೊನೆ ದೆಕಿನ,

4 ತ್ಯುನೊನೆ, ‘ ತುಮೆಬಿ ಮಾರಾ ದ್ರಾಕ್ಷಿಯೊನಾ ಮಳಾನೆ ಜಾವೊ; ತುಮೊನೆ ಕರೆಟ್ಟ ಪಗಾರ ದ್ಯುಸ’ ಕದ್ಯೊ. ತೆಳಾಮಾ ತ್ಯುನೆ ಕಾಮೆ ಗಯಾ. 5 ತೆ ವರಿ ಕಮ್ಮಸಿಕಮ್ಮ ಬಾರಾ ವಸ್ತಾ ವರಿ ತನ್ನ ವಸ್ತಾ ಗೈನ ತಿನಾ ನಿಂಗತಜ಼ ಕರ‍್ಯೊ. 6 ಹಜಿಯಕ್ಕ ಸಲಾ ಕ್ಹಾಂಜ಼ನಾ ಟೈಮಮಾ ಪಾಂಚ ವಸ್ತಾ ತೆ ಗೈನ ಬಿಜಾ಼ ದಕ್ಹಾ ಜ಼ನಾ ಗಪ್ಪ ಹುಬ್ರಯಲ ದೆಕಿನ ತ್ಯುನೊನೆ, ‘ದಿನ ಕ್ಹಾರಿ ನ್ಹ್ಯಾ ಗಪ್ಪ ಶ್ಯಾನೆ ಹುಬ್ರಾಯಾಸ?’ ಕೈನ ಪುಚ್ಯೊ.

7 ತ್ಯುನೆ ತಿನೆ, ‘ಕುನ್ನಜ಼ ಹಮೊನೆ ಕುಲಿನೆ ಬಲಾಯಾ ನೈ’ ಕದ್ಯಾ, ತೆಳಾಮಾ ತೆ ತ್ಯುನೊನೆ, ‘ತುಮೆಬಿ ಮಾರಾ ದ್ರಾಕ್ಷಿಯೊನಾ ಮಳಾನೆ ಜಾ಼ವೊ’ ಕದ್ಯೊ. 8 ಕ್ಹಾಂಜ಼ ಥಯಲ್ಪರ ದ್ರಾಕ್ಷಿಯೊನಾ ಮಳಾನೊ ಮಾಲಕ ತಿನಾ ಮೆಲ್ವಚಾರಕನೆ, ತೆ ಕುಲಿ ಆಳೊನೆ ಬಲೈನ ಲಾಸ್ಟನೆ ಆಯಲವಾಲಾವೊತೊ ಪಸ್ಟ ಆಯಲವಾಲಾವೊ ಲಕ್ಕಾ ಪಗಾರ ದೆ’ ಕೈನ ಕದ್ಯೊ. 9 ತೆಳಾಮಾ ಕ್ಹಾಂಜೆ ಪಾಂಚ಼ವಸ್ತಾ ಐನ ಕಾಮ ಕರಲವಾಲಾ ಆಯಲ್ಪರ, ಹರಯಕ್ಲಾನೆ ಯಕ್ಕಯಕ್ಕ ರುಪ್ಪಾನೊ ಬಿಲ್ಲೊ ದಿದ್ಯೊ. 10 ಪೈಲಾ ಆಯಲವಾಲಾ ತ್ಯುನೊನೆ, ಹೆಚ್ಕಿ ಮಳಸ ಕೈನ ತಿಳ್ದಿಲಿದ್ಯಾ. ತೆನೈಸೊ ತ್ಯುನೊನೆಬಿ ಯಕ್ಕಯಕ್ಕ ರುಪ್ಪಾನೊ ಬಿಲ್ಲೊಜ಼ ಮಳ್ಯೊ.

11 ತ್ಯುನೆ ತೆ ಲಿನ ಮಳಾನಾ ಮಾಲಕನಾ ವಿರುದ್ದ ಗುಣಗುಟ್ಟಿನ, 12 ‘ಲಾಸ್ಟೆ ಆಯಲ ಇವ್ನೆ ಕ್ಹಾಲಿ ಯಕ್ಕಜ಼ ತಾಸ ಕಾಮ ಕರ‍್ಯಾಸ. ಹಮೆ ಪುರಾದಿನ ತಡಕಾಮಾ ಕಷ್ಟ ಪಡಿನ ಕಾಮ ಕರ‍್ಯಾಸ. ತೆನೈಸೊ ತು ತ್ಯುನೊನೆ ಹಮೊನೆ ಯಕ್ಕಜ಼ ಕರ‍್ಯೊಸ ಸು? ಕದ್ಯಾ. 13 ತಿನಾಹುತಿ ಮಾಲಕ ತ್ಯುನೊಮಾ ಯಕ್ಲಾನೆ, ‘ಐಕ ದೊಸ್ತ, ಮಿ ತುನೆ ಅನ್ಯಾಯ ಕರ‍್ಯೊ ನತ್ತಿ. ತು ಮಾರಾ ಕ್ಹಾತೆ ಯಕ್ಕ ರುಪ್ಪಾನಾ ಬಿಲಾನೆ ಒಪ್ಪಂದ ಕರಿಲಿದ್ಯೊ ನ್ಹೊತೊ ಸು? 14 ತಾರು ಪಗಾರ ತು ಲಿನ ಜಾ಼ ತುನೆ ದಿದಲ ತಿಮ್ಮ ಲಾಸ್ಟೆ ಆಯಲವಾಲಾನೆಬಿ ದಿವಾನು ಮಾರಿ ಪಸಂದ ವ್ಹೈ. 15 ಮಾರಿ ಸ್ವಂತ ಆಸ್ತಿನೆ ಮಾರಿ ಆಸ ನಿಂಗತ ಕರಾನೆ ಮನೆ ಅದಿಕಾರ ನತ್ತಿ ಸು? ಮಿ ಚೊ಼ಕೊ ಥಯಲಕ್ಹು ತು ಕಾ ಹೊಚ್ಚಿಗಿಟ್ಟಿ ಘಾಲ್ಯಾಡೊಸ?’ ಕದ್ಯೊ. 16 ಇಮ್ಮ ಲಾಸ್ಟನಾ ಪಸ್ಟ ಥಾವಸ ಪಸ್ಟನಾ ಲಾಸ್ಟ ಥಾವಸ ಕದ್ಯೊ.