ಮತ್ತಾಯ 22

ಪುನರುತ್ಥಾನನಾಹುತಿ ಸವಾಲ ಕರ‍ಲ

23 ತೆಜ಼ ದಿನ್ನಮಾ ಪುನರುತ್ಥಾನ ನತ್ತಿ ಕೈನ ಕವಾಲಾ ದಕ್ಹಾ ಸದ್ದು ಕಾಯರೊ ತಿಕನ ಆಯಾ. 24 ಇವ್ನೆ ತಿನೆ, ಗುರು, ಯಕ್ಲೊ ಬಚ್ಚಾ಼ ನೈಸೊ ಮರ‍್ಯೊಮ ತಿನಿ ಬೈಕೊನೆ ತಿನೊ ನ್ಹಾನೊ ಭೈ ಹಿವಾ ಕರಿಲಿದ್ಯೊಮ ತಿನಾ ಮ್ಹೊಟಾ ಬೈನಾ ಬಚ್ಚಾ಼ ಪಡ್ದಿಲ್ಯು ಕೈನ ಮೊಶೆ ಕದ್ಯೊಸ. 25 ತೆನೈಸೊ ಹಮೊಮಾ ಕ್ಹಾತ ಭಾಯೊ ವ್ಹತಾ. ಪೈಲಾನೊ ಹಿವಾ ಕರಿಲಿನ ಮರಿಗಯೊ. ತಿನೆ ಬಚ್ಚಾ಼ ನೈಸೊಕ್ಹು ಬೈಕೊನೆ ತಿನಾ ಭೈನೆ ಛೊಡಿನ ದಿದ್ಯೊ;

26 ತಿನಾನಿಂಗತಜ಼ ಬೆವಾವಾಲೊ ತನ್ವಾವಾಲೊ ತಿನಾನಿಂಗತಜ಼ ಕ್ಹಾತ್ವಾಲಕ್ಕಾ ಕರ್ಯಾ. 27 ತ್ಯುನೆ ಕ್ಹಾರಾ ಮರಲ್ಪರ ತೆ ಬಾಕ್ಡಿಬಿ ಮರಿಗೈ. 28 ತಿಮ್ಮ ರ‍್ಹಯುಮ ಪುನರುತ್ಥಾನಮಾ ತೆ ಕ್ಹಾತ ಜ಼ನಾವೊಮಾ ಕಿನಿ ಬೈಕೊ ಥೈನ ರ‍್ಹವಸ? ತೆ ಕ್ಹಾತೆ ಜ಼ನಾವೊನೆ ಹಿವಾ ಕರಿಲಿದಿಸ ಕೈನ ಪುಚ್ಯಾ.

29 ತೆ ವಾತೆ ಯೆಸು ತ್ಯುನೊನೆ, ತುಮೆ ಕ್ಹುದಾನಿ ವಾಕ್ಯಾ ವರಿ ಕ್ಹುದಾನಿ ತಾಕತನೆ ಕ್ಹರಿಮಾಜ಼ ನೈ ತಿಳದಿಲಿದ್ಯಾವಾಚಿ ತಪ್ಪ ಅಬಿಪ್ರಾಯಮಾ ಛೆ. 30 ಪುನರುತ್ಥಾನ ಥಯಲ್ಪರ ಹಿವಾ ಕರಿಲೆತಾ ನೈ, ಹಿವಾ ಕರಿನ ದೆತಾಬಿ ನೈ; ಪರಲೊಕಮಾ ದೆವದುತೊ ನಿಂಗತ ರ‍್ಹವಸ. 31 ಮರಲವಾಲಾವೊನಾಹುತಿ ಪುನರುತ್ಥಾನಾಹುತಿ ಕೌ ಕದ್ಯಾಮ, 32 ಮಿ ಅಬ್ರಹಾಮನೊ ಕ್ಹುದಾ, ಇಸಾಕನು ಕ್ಹುದಾ, ಯಾಕೊಬನೊ ಕ್ಹುದಾ, ಕೈನ ಕ್ಹುದಾ ತುಮೊನೆ ಕದ್ಯೊಸ ಕೈನ ತುಮೆ ಒದ್ಯಾ ನತ್ತಿಸು? ತೆ ಮರಲವಾಲಾವೊನೆ ಕ್ಹುದಾ ನ್ಹವೈ. ತೆನೈಸೊ ಜಿವ್ತಾರ‍್ಹಯಲವಾಲಾವೊನೆ ಕ್ಹುದಾ ವ್ಹೈ ಕೈನ ಕದ್ಯೊ. 33 ಮನಕ್ಹೊನು ಗುಂಪ ತೆ ಕ್ಹಾರು ಐಕಿನ ಘಾಬ್ರಾ ಥಯಾ.