Mateus 6

ಕ್ಹುದಾನಿ ರಾಜ್ಯನೆ ಪೈಲಾ ಸ್ಥಾನ

25 ತಿನಾಹುತಿ ತುಮಾರಾ ಜ಼ಲಮನೆ ಚಾ಼ಯೆ ಥಯಲ ಅನ್ನನಾಹುತಿ ರ‍್ಹವಾದೆ ಅಂಗನೆ ಚಾ಼ಯೆ ಥಯಲ ವಣ್ಣಾನಾಹುತಿ ರ‍್ಹವಾದೆ ತುಮೆ ಚಿಂತಾ ಕರು ನೈ. ಜ಼ಲಮ ಅನ್ನತಿಬಿ ಅಂಗ ವಣ್ಣಾತಿಬಿ ಘನ್ನು ಖಾಸ ವ್ಹೈ ಕೈನ ಮಿ ತುಮೊನೆ ಕೌಸ. 26 ಪಕ್ಷಿಯೊಕನ್ನ ದೆಕೊ ತ್ಯುನೆ ಬಿತ್ತತಾ ನೈ, ಕಾಟತಾ ನೈ ತೆ ಕಣಜಮಾ ಜ಼ಮಾ ಕರಲೆತಾ ನೈ. ತೆ ಪರಲೊಕಮಾ ರ‍್ಹವಾಲೊ ತುಮಾರೊ ಬಾ ತ್ಯುನೊನೆ ಅನ್ನ ದಿವಸ ತುಮೆ ತೆ ಪಕ್ಷಿಯೊತಿಬಿ ಘನ್ನಾ ಅಮುಲ್ಯ ವ್ಹೈ ಕವಾನು ತುಮೊನೆ ಗ್ವತ್ತ ಛೆ. 27 ತುಮೆ ಚಿಂತಾ ಕರಾಕ್ಹು ತುಮಾರಿ ಆಯಸ ಜಾಸ್ತ ಸು ನೈ ಥಾತಿ.

28 ವಣ್ಣಾವೊನಾಹುತಿ ಚಿಂತಾ ಕರಾನು ಕಾ? ಖೆತರಮಾ ರ‍್ಹವಾನಾ ಫುಲ್ಲೊನೆ ದೆಕೊ. ತ್ಯುನೆ ಬೆಳದಾನು ದೆಕೊ. ತ್ಯುನೆ ರಾಬತಾ ನೈ ತ್ಯುನೆ ತ್ಯುನಾಹುತಿ ವಣ್ಣಾ ಶಿಲೆತಾ ನೈ. 29 ತೆನೈಸೊ ಮಿ ತುಮೊನೆ ಕವಾನು ಸು ವ್ಹೈ ಕದ್ಯಾಮ, ಸೊಲೊಮೊನ ತಿನಿ ವೈಭವಕ್ಹು ರ‍್ಹತಾಮಾಬಿ ಎ ಫುಲ್ಲೊಮಾ ಯಕ್ಕನೆ ರ‍್ಹವಾನಿ ಕ್ಹುಬಸುರತ ರ‍್ಹಯಲ ವಣ್ಣಾ ಘಾಲಿದ್ಯೊ ನೈ. 30 ವಾಟ್ಮಾ ರ‍್ಹಯಲ ಚಾರಾನೆ ಕ್ಹುದಾ ತಿಮ್ಮ ವರಾಡಸ. ಚಾರೊತುಬಿ ಹಮ್ನಾ ರ‍್ಹೈನ ವಂತಾ ಆಗನಾ ಪಾಲೆ ಥಾವಸ. ತಿನಾಹುತಿ ಕ್ಹುದಾ ತುಮೊನೆ ಕೆಕ್ಲೊಕಿ ಜಾಸ್ತ ಫೆರಾಡಸ ಕವಾನು ತುಮೊನೆ ಗ್ವತ್ತ ಛೆ. ಕಮ್ಮ ವಿಶ್ವಾಸ ರ‍್ಹಯಲವಾಲಾವೊ ಲಿಂಗತ ಥಾವೊ ನಕೊ.

31 ಹಮೆ ಸು ಖೌ? ಸು ಪಿವು? ಸು ಪೆರಲ್ಯು? ಕೈನ ಚಿಂತಾ ಕರೊ ನಕೊ. 32 ಕ್ಹುದಾನೆ ನೈ ತಿಳದಿಲಿದಲ ಕ್ಹಾರಾ ಮನಕ್ಹೊ ಎ ಕ್ಹಾರು ಪಡ್ದಿಲಿವಾನೆ ಕೊಶಿಶ ಕರಸ. ಚಿಂತಾ ಕರೊ ನಕೊ, ಕಾಕದ್ಯಾಮ ಎ ಕ್ಹಾರು ತುಮೊನೆ ಜ಼ರುರತ್ತ ಛೆ ಕೈನ ಪರಲೊಕಮಾ ರ‍್ಹಯಲವಾಲಾ ತುಮಾರಾ ಬಾನೆ ಗ್ವತ್ತ ಛೆ. 33 ತಿನಾಹುತಿ ತುಮೆ ಕ್ಹುದಾನಾ ರಾಜ್ಯನಾಹುತಿ ವರಿ ತಿನಿ ಚಿತ್ತನಾ ಲಿಂಗತ ಕಾಮೊ ಕರಾನೆ ಘನ್ನಾ ಹರಬಡು. ತೆಳಾಮಾ ತುಮೊನೆ ಜ಼ರುರತ್ತ ರ‍್ಹಯಲ ಕ್ಹಾರುಬಿ ದಿವಸ. 34 ತಿಕ್ಹುನೆ ವಂತಾನಾಹುತಿ ಚಿಂತಾ ಕರೊ ನಕೊ. ಹರ ದಿನ್ನ ತಿನುಜ಼ ರ‍್ಹಯಲ ಕೆಕ್ಲಾಕಿ ತ್ರಾಸೊ ಹೊಂದಲ ರ‍್ಹವಸ. ವಂತಾಬಿ ತಿನುಜ಼ ರ‍್ಹಯಲ ಚಿಂತಾ ಹೊಂದಲ ರ‍್ಹವಸ.