1 ಯೆಸು ಡೊಂಗರಪರತೊ ಉತ್ರಿನ ಹೆಟೊ ಆಯೊ. ಮನಕ್ಹೊ ಗುಂಪ-ಗುಂಪ ಥೈನ ಯೆಸುನಾ ಪಾಚಾ಼ ಆಯಾ. 2 ತೆಳಾಮಾ ಯಕ್ಕ ಕುಷ್ಠ ರೊಗಿ ಯೆಸುಕನ ಆಯೊ. ತೆ ಯೆಸುನಾ ಅಗೊ ಅಡ್ಡ ಪಡಿನ, ಪ್ರಭು, ತು ಮನಸ ಕರ‍್ಯೊಮ ಮನೆ ಅರಾಮ ಕರಶಿ" ಕದ್ಯೊ.

3 ಯೆಸು ತಿನೆ ಮುಟ್ಟಿನ, ತುನೆ ಅರಾಮ ಕರಾನೆ ಮನೆ ಮನಸ ಛೆ, ಅರಾಮ ಥಾ" ಕದ್ಯೊ. ತೆಳಾಮಾಜ಼ ತಿನೆ ರ‍್ಹಯಲ ಕುಷ್ಠ ರೊಗ ಗೈನ ಅರಾಮ ಥಯು. 4 ಯೆಸು ತಿನೆ, ಎ ಕಿಮ್ಮ ಥಯು ಕೈನ ಕಿನೆ ಕೌ ನಕೊ. ಹಮ್ನಾ ತು ಗೈನ ಯಾಜಕನೆ ತಾರು ಅಂಗ ದೆಕಾಡ. ಅರಾಮ ಥಯಲವಾಲಾ ಮೊಶೆನಿ ಆಗನ್ಯಾ ಲಿಂಗತ ದಿವಾನಿ ಕಾಣಿಕೆ ದೆ. ತು ಅರಾಮ ಥಯಲನೆ ತೆ ಸಾಕ್ಷಿ ಥೈನ ರ‍್ಹವಾದೆ" ಕೈನ ಕದ್ಯೊ.

5 ಯೆಸು ಕಪೆನೌರ್ಮ ಕವಾನಾ ಗಾಮೆ ಗಯೊ. ತೆ ಗಾಮಮಾ ಗಯಲ ಬರೊಬ್ಬರ ಸೈನ್ಯನೊ ಅದಿಕಾರಿ ಯಕ್ಲೊ ಐನ, 6 ಪ್ರಭು, ಮಾರಾ ಆಳನೆ ತೌ ಐನ ವಚ್ಚಾ಼ನಾಪರ ಪಡ್ಯೊಸ. ತೆ ಘನ್ನಾ ದುಖಕ್ಹು ನೆಳ್ಳಾಡೊಸ" ಕೈನ ಮದತ ಮಾಂಗಿಲಿದ್ಯೊ.

7 ಯೆಸು ತೆ ಅಧಿಕಾರಿನೆ, ಮಿ ಐನ ತಿನೆ ಅರಾಮ ಕರುಸ" ಕೈನ ಕದ್ಯೊ. 8 ತಿಕ್ಹುನೆ ತೆ ಅದಿಕಾರಿ, ಪ್ರಭು, ತು ಮಾರಾ ಘರೆ ಆವಾ ಅಕ್ಲಿಬಿ ಯೊಗ್ಯತೆ ಮನೆ ನತ್ತಿ. ತಿನೆ ಅರಾಮ ಥಾವಾದೆ ಕೈನ ತು ಆಗನ್ಯಾ ದಿದ್ಯೊಮ ಬಸ, ತಿನೆ ಅರಾಮ ಥಾವಸ. 9 ಮಿಬಿ ಬಿಜಾ ಅಧಿಕಾರಿಯೊನಾ ಹತ್ಮಾ ವ್ಹತ್ತೊ. ಮಾರಾ ಅಧಿನಮಾ ಸಿಪಾಯಿಯೊ ಛೆ. ಮಿ ಯಕ್ಕ ಸಿಪಾಯಿನೆ ‘ಜಾ’ ಕದ್ಯೊ ಕದ್ಯಾಮ ತೆ ಜಾ಼ವಸ; ಬಿಜೆಕ್ಲಾನೆ ‘ಆ’ ಕದ್ಯೊ ಕದ್ಯಾಮ ತೆ ಆವಸ. ಮಿ ಮಾರಾ ಸೆವಕನೆ, ‘ಆಂ ಕರ’ ಕದ್ಯೊ ಕದ್ಯಾಮ ತೆ ವಿದೆಯತೆಕ್ಹು ಕರಸ. ತುನೆಬಿ ಎಜ಼ ತರಾನು ಅಧಿಕಾರ ಛೆ ಕೈನ ಕವಾನು ಮನೆ ಗ್ವತ್ತ ಛೆ" ಕೈನ ಕದ್ಯೊ.

10 ಎ ಐಕಿನ ಯೆಸು ಘಾಬ್ರೊ ಥಯೊ. ಯೆಸು ತಿನಾ ಕ್ಹಾತೆ ರ‍್ಹಯಲವಾಲಾವೊನೆ, ಮಿ ಇಸ್ರಾಯೆಲಮಾಬಿ ಅಕ್ಲಾ ಬರೊಕ್ಹಾನಾ ಮನಕ್ಹನೆ ದೆಕ್ಯೊ ನೈ ಕೈನ ತುಮೊನೆ ಕ್ಹರಿಮಾಜ಼ ಕೌಸ" ಕದ್ಯೊ. 11 ಘನ್ನಾ ಮನಕ್ಹೊ ಪುರ್ವ ವರಿ ಪಶ್ಚಿಮ ದಿಕ್ಕೊತಾ ಆವಸ. ತ್ಯುನೆ ಪರಲೊಕ ರಾಜ್ಯಮಾ ಅಬ್ರಹಾಮ, ಇಸಾಕ, ಯಾಕೊಬ ಇವ್ನಾ ಕ್ಹಾತೆ ಬೈಟಿನ ಖಾವಸ. 12 ತೆನೈಸೊ ಪರಲೊಕ ರಾಜ್ಯ ನೈ ಹೊಂದಲವಾಲಾವೊನೆ ಭಾರಾ ಅಂದಾರಾಮಾ ಭಿರಕೈ ಪಡಸ. ತ್ಯಾ ತ್ಯುನೆ ಗೊಳಾಡಸ ವರಿ ದುಖಕ್ಹು ದಾತೊ ಖಾವಸ" ಕದ್ಯೊ. 13 ಪಾಚ಼ಲ್ತೊ ಯೆಸು ತೆ ಅಧಿಕಾರಿನೆ, ದಿಕ್ರಾ ಜಾ಼ ತು ನಂಬಲಿಂಗತಜ಼ ತಾರಾ ಸೆವಕನೆ ಅರಾಮ ಥಾವಸ" ಕದ್ಯೊ. ತೆಜ಼ ಟೈಮಮಾ ತಿನಾ ಸೆವಕನೆ ಅರಾಮ ಥಯು.

14 ಯೆಸು ಪೆತ್ರಾನಾ ಘರೆ ಗಯೊ. ತ್ಯಾ ಪೆತ್ರಾನಿ ಪ್ಹೈ ಘನ್ನಾ ತೌಕ್ಹು ವಚ್ಚಾ಼ನಾಪರ ಕ್ಹುರಯಲ ಯೆಸು ದೆಕ್ಯೊ.

15 ಯೆಸು ತಿನೊ ಹತ್ತ ಮುಟ್ಟೆಲ ಬರೊಬ್ಬರ ತೌ ತಿನೆ ಛೊಡಿನ ಗೈ ಪಡ್ಯೊ. ತೆಳಾಮಾ ತೆ ಉಟಿನ, ತಿನಿ ಸೆವಾ ಕರಿ. 16 ತೆ ದಿನ್ನೆ ಕ್ಹಾಂಜೆ ಮನಕ್ಹೊ ಕೆಟ್ಟ ಆತ್ಮಾ ಧರೆಲವಾಲಾ ಘನ್ನಾ ಜ಼ನಾ ಯೆಸುಕನ ಬಲೈಲಿನ ಆಯಾ. ಯೆಸು ಖಾಲಿ ವಾತೊಕ್ಹು ಕೆಟ್ಟ ಆತ್ಮಾವೊನೆ ತ್ಯುನಾಮಾತೊ ನ್ಹಟಾಡ್ಯೊ; ರೊಗೊಮಾ ರ‍್ಹಯಲ ಕ್ಹಾರಾ ಮನಕೊನೆ ಅರಾಮ ಕರ‍್ಯೊ. 17 ತೆ ಅಪ್ನಾ ತ್ರಾಸೊ ಕ್ಹಾದ್ಯೊ, ಅಪ್ನಾ ರೊಗೊ ಉಚೈಲಿದ್ಯೊ (ಯೆಶಾಯ 53:4) ಕೈನ ಯೆಶಾಯ ಕವಾಲಾ ಪ್ರವಾದಿಕ್ಹು ಕದಲ ವಾತ ಪುರಾ ಥೈ.

18 ಯೆಸು ತಿನಾ ಸುತ್ತೆ ರ‍್ಹಯಲ ಕ್ಹಾರಾ ಮನಕ್ಹೊನೆ ದೆಕಿನ ತಿನಾ ಶಿಷ್ಯಾವೊನೆ ಸಮುಂದರನಾ ಬಿಜಿ ದಂಡಿ ಬಗಲ ಜಾ಼ವಾನೆ ಕದ್ಯೊ. 19 ತೆಳಾಮಾ ಧರ್ಮ ಉಪದೆಶ ಕರಾಲೊ ಯೆಸುಕನ ಐನ, ಗುರು, ತು ಕಯಾ ಜ಼ಗಾಬಿ ಗಯೊಮ ಮಿ ತಾರಾ ಪಾಚೊ಼ ಔಸ" ಕದ್ಯೊ.

20 ಯೆಸು ತಿನೆ, ನರಿಯೊನೆ ಗುಹೆ ಛೆ, ಪಕ್ಷಿಯೊನೆ ಗುಡೊ ಛೆ. ತೆನೈಸೊ ಮನಕ್ಹನಾ ದಿಕ್ರಾನೆ ಮಾತು ಮ್ಹೆಲಾಯಕ್ಲಿ ಜ಼ಗಾ ನತ್ತಿ" ಕದ್ಯೊ. 21 ಶಿಷ್ಯಾವೊಮಾ ಯಕ್ಲೊ ಯೆಸುನೆ, ಮಿ ಪೈಲಾ ಗೈನ ಮಾರಾ ಬಾನು ತನ್ನದಿನ್ನು ಕರಿನ ಆವಾನೆ ಮನೆ ಅಪ್ಪಣೆ ದೆ. ಪಾಚ಼ಲ್ತೊ ಮಿ ತಾರಾ ಪಾಚೊ಼ ಔಸ" ಕದ್ಯೊ. 22 ತೆನೈಸೊ ಯೆಸು ತಿನೆ, ಮರಲವಾಲಾಜ಼ ತ್ಯುನಾ ತ್ಯುನಾಮಾ ಮರಲವಾಲಾವೊನು ತನ್ನದಿನ್ನು ಕರಿಲಿವಾದೆ. ಮಾರಾ ಪಾಚೊ಼ ಆ" ಕೈನ ಕದ್ಯೊ.

23 ಯೆಸು ಹಡ್ಗಾಮಾ ಗಯೊ ತಿನಾ ಶಿಷ್ಯಾಬಿ ತಿನಾ ಕ್ಹಾತೆ ಗಯಾ. 24 ಹಡ್ಗೊ ದಂಡಿ ಛೊಡಲ್ಪರ ಮ್ಹೊಟು ವಾರಾನು ತುಫಾನ ಸಮುದ್ರಪರ ಐಯು. ತೆನೈಸೊ ಯೆಸು ಹಡ್ಗಾಮಾ ಕ್ಹುರಯೊತೊ. 25 ಯೆಸುನಾ ಶಿಷ್ಯಾ ತಿಕನ ಗೈನ ತಿನೆ ಉಟಾಡಿನ, ಪ್ರಭು, ಹಮೊನೆ ವಚಾ಼ಡ! ಹಮೆ ಡುಬಾಡಸ!" ಕೈನ ಕದ್ಯಾ.

26 ಯೆಸು, ತುಮೆ ಭುಚ಼ಕಾನು ಶ್ಯಾನೆ? ತುಮೊಮಾ ನಕ್ಕರಬಿ ಬರೊಕ್ಹೊ ನತ್ತಿ" ಕೈನ ಉತ್ತರ ದಿನ ಉಟಿನ ಹುಬ್ರೈನ ತೆ ತುಫಾನನೆ ಅಗನ್ಯಾ ದಿದ್ಯೊ. ತೆಳಾಮಾಜ಼ ತೆ ತುಫಾನ ಹುಬ್ರೈ ಗಯು. ಸಮಂದರ ಶಾಂತ ಥಯು. 27 ತ್ಯುನೆ ಕ್ಹಾರಾ ಘಾಬ್ರಾ ಥಯಾ. ಎ ಕ್ಯವೊ ಮನಕ್ಹ ವ್ಹೈ? ತುಫಾನ ವರಿ ಪಾನಿ ಇನೆ ವಿಧೆಯ ಥಾವಸ್ತೊ" ಕೈನ ಬೊಲಿಲಿದ್ಯಾ.

28 ಯೆಸು ಸಮುಂದರನಾ ಬಿಜೆಕ ದಂಡಿಕನ ರ‍್ಹಯಲ ಗದರೆನ ಕವಾನಾ ಗಾಮೆ ಆಯೊ. ತ್ಯಾ ಕೆಟ್ಟ ಆತ್ಮಾ ಧರಲ ಬೆಜ಼ನಾ ಯೆಸುಕನ ಆಯಾ. ತ್ಯುನೆ ಮಜಾ಼ರೊನಾ ಗವಿಯೊಮಾ ವ್ಹತ್ತಾ ವರಿ ಘನ್ನಾ ಖತರನಾಕ ವ್ಹತ್ತಾ. ತಿನಾಹುತಿ ಮನಕ್ಹೊ ತ್ಯುನಿ ವಾಟಕನ ಜಾ಼ತಾ ನ್ಹೊತಾ. 29 ತ್ಯುನೆ ಭಂಬಿಜ಼ನಾ ಯೆಸುಕನ ಐನ. ತು ಹಮೊನೆ ಸು ಕರು ಕೈನ ವಿಚಾರ ಕರ‍್ಯೊಸ? ಕ್ಹುದಾನಾ ದಿಕ್ರಾ, ಟೈಮ ಆವಾತಿ ಪೈಲಾ ಹಮೊನೆ ಶಿಕ್ಷಾ ದಿವಾನೆ ಆಯೊ ಸು?" ಕೈನ ಜೊ಼ರ ಅಡ್ಡಿನ ಕದ್ಯಾ. 30 ತೆ ಜ಼ಗಾಕನ ಢುಕ್ಕುರೊನು ಮ್ಹೊಟ್ಟು ಗುಂಪ ಚ಼ರಾಡುತು. 31 ತೆ ಕೆಟ್ಟ ಆತ್ಮಾವೊ, ಹಮೆ ಎ ಭಂಬಿಜ಼ನಾವೊನೆ ಛೊಡಿನ ಜಾ಼ವಾವರ್ಕ್ಹು ತು ಕರಾನೊ ರ‍್ಹಯೊಮ, ದಯಾ ಕರಿನ ಹಮೊನೆ ತೆ ಡುಕ್ಕುರೊಮಾ ವಳಾ" ಕೈನ ಮಾಂಗಿಲಿದ್ಯಾ.

32 ಯೆಸು ತ್ಯುನೊನೆ, ಜಾ಼ವೊ" ಕದ್ಯೊ. ತೆಳಾಮಾ ತೆ ಕೆಟ್ಟ ಆತ್ಮಾವೊ ತೆ ಭಂಬಿ ಜ಼ನಾವೊನೆ ಛೊಡಿನ ಢುಕ್ಕುರೊಮಾ ಗಯಾ. ತೆಳಾಮಾಜ಼ ಕ್ಹಾರಾ ಢುಕ್ಕುರೊ ಡೊಂಗರನಾ ಹೆಟಾ ನ್ಹಾಟಿನ ಸಮುಂದರಮಾ ಪಡಿನ ಪಾನಿಮಾ ಡುಬಿ ಗಯಾ. 33 ತೆಳಾಮಾ ಢುಕ್ಕುರೊ ಚ಼ರಾವಾಲಾ ಗಾಮಮಾ ನ್ಹಾಟಿನ ಗೈನ ಢುಕ್ಕುರೊನೆಬಿ ಕೆಟ್ಟ ಆತ್ಮಾವೊ ಧರಲವಾಲೊನೆಬಿ ಥಯಲ ಮನಕ್ಹೊನೆ ಕದ್ಯಾ. 34 ತೆಳಾಮಾ ತೆ ಗಾಮನಾ ಕ್ಹಾರಾ ಮನಕ್ಹೊ ಯೆಸುನೆ ದೆಕಾನೆ ಗೈನ, ತ್ಯುನಿ ಜ಼ಗಾ ಛೊಡಿನ ಜಾ಼ ಕೈನ ತಿನೆ ಮಾಂಗಿಲಿದ್ಯಾ.