ಭೆದ ಭಾವನಾಹುತಿ
1 ಮಾರ ಭಾಯೊ ಭೆನೊ, ಮಹಿಮಾ ರ‍್ಹಯಲ ಅಪ್ನೊ ಕರ್ತಾ ಥಯಲ ಯೆಸು ಕ್ರಿಸ್ತನಾ ಉಪ್ಪರ ಬರೊಕ್ಹೊ ಮ್ಹೆಲಲವಾಲಾ ತುಮೆ ಯಕ್ಲಾನೆ ಹೆಟಾ ಯಕ್ಲಾನೆ ಉಪ್ಪರ ದೆಕಾಲಾ ರ‍್ಹೌ ನೈ. 2 ಕಿಮ್ಮ ಕದ್ಯಾಮ ಯಕ್ಲೊ ಮನಕ್ಹ ಕ್ಹೊನಾನಿ ಇಟ್ಟಿಯೊ ವರಿ ಚೊ಼ಕಾ ರ‍್ಹಯಲ ವಣ್ಣಾ ಘಾಲ್ಲಿನ ತುಮಾರಾ ಸಬೆಮಾ ಆತಾಮಾ ವರಿ ಯಕ್ಕ ಗರಿಬ ಮನಕ್ಹ ಚೊ಼ಕಾ ನೈ ರ‍್ಹಯಲ ವಣ್ಣಾ ಘಾಲ್ಲಿನ ಆತಾಮಾ, 3 ತುಮೆ ಚೊ಼ಕಾ ದಿಕ್ಹಾನಾ ವಣ್ಣಾ ಘಾಲ್ಲಿದಲವಾಲಾನೆ ಮರ್ಯಾದಿಕ್ಹು ದೆಕಿನ ತಿನೆ - ಆ ಉಪ್ಪರ ಬೈಟಾ ವರಿ ಗರಿಬನೆ ದೆಕಿನ ತು ತ್ಯಾ ಬೈಟ, ನೈತೊ ಹೆಟೊ ಬೈಟ ಕೈನ ಕದ್ಯಾಮ, 4 ತುಮೆ ತುಮಾರಾ ತುಮಾರಾಮಾಜ಼ ಭೆದ ಭಾವ ಕರಾಲಾ ಥೈನ, ಯಕ್ಲಾನೆ ಅಮ್ಮ ಯಕ್ಲಾನೆ ತಿಮ್ಮ ಕೈನ ವಿಚಾರ ಕರಾಲಾ ಥಾವೊಶಿ ಸು ನೈ?
5 ಮಾರಾ ಮಯಾನಾ ಭಾಯೊ ಭೆನೊ, ಐಕೊ ಕ್ಹುದಾ ಆಂ ದುನಿಯಾಮಾ ರ‍್ಹಯಲ ಗರಿಬೊನೆ ಬರೊಕ್ಹಾಮಾ ಸೌಕಾರ ವರಿ ತಿನೆ ಮಯಾ ಕರಾಲಾವಾಲಾವೊನೆ ತೆ ಕದಲ ತಿಮ್ಮ ತಿನಾ ರಾಜ್ಯಮಾ ಕೆಳಾಮಾಬಿ ರ‍್ಹವಾನೆ ಇನಿಲಿದ್ಯೊಸ ಸು ನೈ? 6 ತುಮೆತೊ ಗರಿಬೊನೆ ಮರ್ಯಾದಿ ನೈಸೊ ಕರ‍್ಯಾ. ತುಮೊನೆ ತ್ರಾಸ ಕರಿನ ಫೈಸಲೊ ಕರಾನಿ ಜ಼ಗಾ ಎಳದಿನ ಲಿನ ಜ಼ಾವಾಲಾ ಸೌಕಾರೊ ನ್ಹವೈ ಸು? 7 ತುಮೊನೆ ಬಲಾಯಲ ತೆ ಕ್ಹಾರವೊತಿ ಉಪ್ಪರ ರ‍್ಹಯಲ ನಾಮನೆ ಕ್ಹರಾಪಾಲಾ ನವೈ ಸು?
8 ರ‍್ಹೈತಬಿ ಪವಿತ್ರ ಗ್ರಂಥಮಾ ರ‍್ಹಯಲ ನಿಂಗತ ತಾರಾ ಬಾಜು಼ ಘರವಾಲಾನೆ ತು ತುನೆ ಕಿಮ್ಮ ಮಯಾ ಕರಶಿ ತಿನಾ ನಿಂಗತ ಮಯಾ ಕರು ಕೈನ ಕವಾನಿ ಮ್ಹೊಟಿ ಆಗ್ಯಾನಾ ನಿಂಗತ ಚಾ಼ಲ್ಯಾರೆ, ತುಮೆ ಚೊ಼ಕು ಕರಾಲಾ ಥಾವೊಶಿ. 9 ತೆನೈಸೊ ತುಮೆ ಆಂ ಛೊಡಿನ ಯಕ್ಲಾನೆ ಉಪ್ಪರ ಯಕ್ಲಾನೆ ಹೆಟಾ ದೆಕ್ಯಾಮ ಪಾಪ ಕರಾಲಾ ಥೈನ ವರಿ ತುಮೆ ಅಪರಾದಿ ವ್ಹೈ ಕೈನ ಪವಿತ್ರ ಗ್ರಂಥನಾ ನಿಂಗತ ತುಮೊನೆ ಫೈಸಲೊ ಥಾವಸ.