John 20

Jesus a Pwae Ngaeni Maria Magdalene

11 Maria e rhiuwen iu saeng niugiun paeyi we. Igiwe e rhiuwen sessaeng, a pwoar tiw pwe a fan nong noan paeyi we 12 iwe a weriir riiurhai angkenus re mengaag pwerh ffat noa rhag, remooat igiwe eno miniwe oanongaen Jesus ee, erhai emooat reen rhimwen nge erhai reen pirheen. 13 Ra aeiineow pwe, "Rhooapwut mwuun, meeta wosaeng reen?"

A paniuwaeniir pwe, "Ra pwigi noa aaei Soamwoon nge ise giuneei igine ra pwigi noa ee!"

14 Enoa toagun sefaaen nge a weri Jesus pwe e iu igiwe; nge ese giuneei pwe Jesus. 15 Jesus a aeiineow pwe, "Rhooapwut mwuun, meeta wosaeng reen? Iyo mwu wo kiukkiutta?"

Niewe e niuwaennei pwe rhooan maat we, iwe a aengaeni pwe, "Menap, ngaere wa pwigi noa iwe nge wopwe aengaeniaei igine wonoa iseni noa ee, pwe ipwe noa iya noa pwigi."

16 Jesus a aengaeni pwe, "Maria!"

Niewe a toagun ngaeni nge a iura noan kkepesaen Hebrew pwe "Rabboni!" (Faan nge "Sinsei".)

17 Jesus a aengaeni pwe, "Wosoapw kkemwarh tae wooai, pwe ngaang isaaen ittae mwo reen miniwe Semaei. Iwe nge wopwe sefaaen noa reer rhooawe pwiiy nge wa aengaeniir pwe ngaang ipwene sefaaen noa reen miniwe Semaei me Semeer, aaei Deus me aar Deus."

18 Maria Magdalene a noa aengaeniir rhooan kkayeo kkewe pwe a weri Soamwoon, nge a pwan aengaeniir meeta we Soamwoon e aengaeni.