Luke 8

Rhooapwut we Naiun Jairus me Rhooapwut we e Geotteopa Mengaagiun Jesus

40 Oatowe Jesus enoa sefaaeniti peigin meoneoiniun we epeig, aeremas ra itto aetiwa, pwe igiwe ra wetiwet noa rhag iiy. 41 Erhai mwaaen itan Jairus a noa itto; iiy erhai soamwoonin wutteer Jews. A itto foatotiw weni mmwaen pirheen Jesus a aeffaenipirhe ngaeni epwe tapweei noa reen iimw na imwan, 42 pwe igiwe rhooapwut we naiun iwe enaaen seig me ruwowu raegin a oaropaen mae.

Igiwe Jesus a tapweei noa nge aeremas ra igin itto aetietiy ngaeni. 43 Eno erhai rhooapwut neeiir eseiug aan peitaeg noa noan seig me ruwowu raeg, nge esooar erhai ne emmwenen aecchipwa. 44 Rhooapwut we a itto me niugiusagiuriun Jesus a itto geotteopa soapwon mengaagiun, iwe rhag nge e iug noa aan noa epeig faniuw. 45 Nge Jesus a aeiineo pwe, "Iyo we e geotteopayaei?"

Oanongeer rhooawe nge re iura pwe saapw iir, nge Peter a iura pwe, "Soamwoon, regin ssow rhooakka re pwaeniaeniug noa me aetietiy ngaeniug."

46 Jesus a iura pwe, "Erhai imwu e geotteopayaei, pwe i meyaefi maemaewaei aan toowow me wooai." 47 Iwe rhooapwut we a giuneei pwe a pwae miniwe efeeori, iwe a noa faaeraeg ngongongoto a itto aerheei tiw me weni mmwaen pirheen Jesus. Weni mmweer rhooanap we iwe niewe a aengaeni faaen minne e geotteopa reen me wunuunun aan iug noa aan noa epeig faniuw oatowe e geotteopa. 48 Jesus a aengaeni niewe pwe, "Naeyi, oamw niugiuniug minne a aecchipwoag tae. Wonoa noan oapoas."

49 Nge igiwe Jesus e rhiuwen kekkepas, nge erhai rhooan oarong a noa itto me reen imwaen Jairus nge a aengaeni Jairus pwe, "A mae noa rhooapwut we noawumw, wosoapw rhiuwen angiurhiu no Sinsei na."

50 Jesus e rongorong miniwe nge a aengaeni Jairus pwe, "Wosoapw mesag; niugiuniug rhag ina nge epwe menaw tae."

51 Oatowe enoa toorito iimw we, ese tipan pwe aeremas repwe tapweei nong nee iimw pwe aeggaen Peter rhag me John me James iwe me mwaaen we seman me inaen aet we. 52 Oanongeer aeremas kkewe noan iimw we ra saeng wooan aet we. Jesus a iura pwe, "Oawsoapw saeng; aeteen iye ese mae, pwe aan rhag maiur!"

53 Rhooa kkewe ra kekkaei aegini pwe igiwe re giuneei pwe aet we a mae. 54 Jesus a ammwarhiu tae paiun nge a iura pwe, "Rhimwitae, moawwerh!" 55 Iwe a menaw tae nge a rhiuwei rhimwitae rhag. Iwe Jesus a aengaeniir repwe ngaenneei anan mwongo. 56 Mwaaen we seman me inaen aet we ra riutae, nge Jesus a ammwir ngaeniir pwe resoapw aengaeni mwo nge erhai meeta e a wen.