Mateus 21

Jesus a Soong Ngaeni Waniwan we Fig

18 Igiwe a sefaaeniti aepinoamw we noan soran we, nge Jesus a pecchai. 19 A weri waniwan we fig eno wenepeigin aan we iwe a faaeraeg ngaeni, nge a weri pwe esooar uwaan pwe rheon rhag. Iwe a aengaeni waniwan we pwe, "Esooar faaen eew ne wopwe rhiuwen uwa!" Noan rhag oaton we nge waniwan we a ppwass noa.

20 Igiwe rhooan kkayeo kkewe ra weri miniwe nge ra riutae nge ra iura pwe, "E ifa wusun rhag nge a noa mwetekkaein ppwass noa waniwan fig een?"

21 Jesus a paniuwaeniir pwe, "Ennetaen, ipwe aengaenigaemi pwe aere oaw niugiuniug, nge oawse tip mwaramwar, oawpwe mmwenen feeori meeta ngaang iya feeori ngaeni waniwan we fig. Nge saapw minneen rhag, pwe oawpwe pwan mmwenen aengaeni rhug een pwe, ‘Mwagiut saengi igeei nge wa noa oatoranoa oanongoamw nee metaw,’ nge epwe mmwen. 22 Aere oaw niugiuniug, nge oawpwe pwigi oanongaen meeta oaw tingoar noan aaemi maeipin."